Chipi ni Chipema: Chiyulo Chize Watamba Kukwata
Shimbi jize twakusakula kukaula mujihasa kutwaha uwahililo hanji ka. Yehova Zambi kananyingika kanawa chikuma chino. Kashika anazange hanga tutwame kulita ni shimbi jenyi.
Yehova kanazange tuwahilile ku mwono ni kupwa ni sambukila.
“Yehova, Mukwa-Kunukuula, mwe Musandu wa Izalele, kanambe ngwenyi, Yami Yehova nguli Zambi yenu, yoze wakunulongesa hanga nukalumbunuke, yoze wakunusongwela mu jila yize chanutamba kuya. Mala! Nyi kachi nwevwile shimbi jami! Kachi uhwimino wenu wapwa ngwe lwiji, kachi ululi wenu wapwa ngwe mikanya ya kalunga-lwiji.”—Izaia 48:17, 18.
Zambi Sakatanga wetu, kananyingika chize twatamba kutwama ku mwono wetu. Iye kanazange hanga tukaule usongwelo wenyi mumu ha upeme wetu. Muze twakukaula shimbi ja Zambi, kutushi kulipikala nyi yuma muyenda kanawa nyi ka. Mumu mashimbu eswe mutukwata yiyulo yalita yize muyitukwasa kupwa ni sambukila ni kuwahilila ku mwono.
Yehova keshi kutwita hanga tulinge yuma yize kutushi kuhasa kulinga.
“Mumu liji lino lia shimbi ngunanwambe musono, kulianukalilile, chipwe kuliapwile kusuku.”—Shimbi Yamuchiali 30:11.
Kutwama kulita ni shimbi ja Zambi chakufupiwa kwalumuna manyonga jetu ni chize twakulinga yuma. Chipwe chocho, Yehova keshi kutwita yuma yinji. Ngwe Sakatanga wetu, kananyingika yize mutuhasa kulinga. Chikwo nawa, nyi twafupa kunyingika kanawa Yehova, mutumona ngwetu “shimbi jenyi hi jikalu ko.”—1 Yoano 5:3.
Yehova kanalakenya kukwasa waze akusakula kutwama kulita ni shimbi jenyi.
“Mumu yami Yehova Zambi ye, ngunakukwata ku kwoko lie lia chindume; yami mwene ngunambe kuli yena ngwami, Kanda wivwa woma, mungukukwasa.’”—Izaia 41:13.
Twakuhasa kutwama kulita ni shimbi ja Zambi mumu iye mwe wakutukwasa. Iye mahasa kutukwasa kupalikila mu Liji lienyi Mbimbiliya, lize liakututakamisa ni kutwaha kutalatala.
Tununu a tununu twa atu hashi heswe kakumona ngwo, kutwama kulita ni shimbi ja mu Mbimbiliya chakukwasa ku mwono. Shina unazange kulilongesa hakutwala ku yiyulo yimwe yize yili mu Mbimbiliya? Muhasa kuchilinga ha kulilongesa kamukanda Wahilila ku Mwono ku Miaka Yeswe! kali mu site jw.org. Kamukanda kano kali ni malongeso wano:
-
Kuchi Mbimbiliya Muyihasa Kukukwasa?
-
Mbimbiliya Yakutwaha Kutalatala
-
Shina Wakufuliela mu Umwenemwene wa mu Mbimbiliya?
Muze mulilongesa Mbimbiliya, Liji lia Zambi, mumona ngwe sango jamo jichili ni ulemu ndo ni musono. “Hanayikolesa ku miaka yeswe ya mutolo.” (Samu 111:8) Jila yipema yakutwama kanawa ku mwono, yili kukaula shimbi ja mu Mbimbiliya. Alioze, Zambi keshi kutushinjila hanga tukaule shimbi jenyi. (Shimbi Yamuchiali 30:19, 20; Yoshua 24:15) Chino chili chiyulo chize mutu ni mutu atamba kukwata.
