Chipi ni Chipema: Mu Mbimbiliya—Muli Usongwelo uze Mutuhasa Kujikijila
Kutushi ni shindakenyo nyi yuma muyenda lume kanawa nyi twecha hanga manyonga jetu ni manyonga ja akwetu asongwele yiyulo yize mutukwata. Mbimbiliya yakusolola mumu liaka, ni kutukwasa nawa chinji. Mu Mbimbiliya muli usongwelo uze mutuhasa kujikijila, mumu yakutukwasa kunyingika yuma yipi ni yuma yipema, ni kutunehena uwahililo ku mwono.
TWATAMBA KUFUPA USONGWELO WA ZAMBI
Mbimbiliya yakwamba ngwo, Yehova a Zambi kazangile hanga atu alihulikile kuli iye ha kufupa usongwelo wenyi, hi wa ayo ene ko hanji kulisongwela ene. (Jeremia 10:23) Kashika iye asele shimbi jingunu mu Mbimbiliya. Iye kakutuzanga chinji ni kutukwasa kwehuka kukwata yiyulo yimwe ya ku mwono yize muyihasa kutunehena lamba ni kapinda ku mwono. (Shimbi Yamuchiali 5:29; 1 Yoano 4:8) Chahiana ulemu, amu ali Sakatanga wetu, iye kali ni mana ni yinyingi yinji hanga atwehe yiyulo yipema ya ku mwono. (Samu 100:3; 104:24) Alioze, Zambi keshi kushinjila atu atwame kulita ni shimbi jenyi.
Yehova kahanyine kuli Alama ni Eva, yuma yeswe yize te mafupa hanga awahilile ku mwono. (Uputukilo 1:28, 29; 2:8, 15) Iye kaahele nawa usongwelo washi ni kushimbwila ngwo, maukaula. Chocho yecha hanga ene asakule yize te mazanga kulinga. (Uputukilo 2:9, 16, 17) Alioze, Alama ni Eva yasakula kutwama kulita ni shimbi jo kuhiana kutwama kulita ni shimbi ja Zambi. (Uputukilo 3:6) Mba yika yalingiwileko? Shina chili chipema atu kulikwachila ene chiyulo hakutwala ku chipi ni chipema? Ka. Sango jinji jakusolola ngwo, kulengulula usongwelo wa Zambi kuchishi kutunehena sambukila ni uwahililo wamwenemwene.—Chilumbununyi 8:9.
Mbimbiliya yakutwaha usongwelo uze tunafupu mba tukwate yiyulo ya mana, chipwe ngwe tuli atu a ku minyachi yeswayo. (2 Timoteu 3:16, 17; Tala mushete “ Um Livro para Todas as Pessoas.”) Tala chize Mbimbiliya yakukwasa atu.
Nyingika mumu liaka Mbimbiliya akuyivuluka ngwo “liji lia Zambi.”—1 A-Tesalonika 2:13. Tala chinema Mwenya Mbimbiliya Iya? Mu site jw.org.
CHIZE MBIMBILIYA YAKUSOLOLA USONGWELO WA ZAMBI
Mbimbiliya uli mukanda ulemu uze wakusolola usepa uze Yehova akwete ni atu chize ku uputukilo. Yuma yize yilimo yakutukwasa kunyingika nyonga lia Zambi hakutwala ku chipi ni chipema, yize mutuyuka nyi twakaula usongwelo wenyi ni lamba lize mutumona nyi kutwachilingile. (Samu 19:7, 11) Malongeso waze twakuwana mu Mbimbiliya kali amwenemwene, kashika akutukwasa kukwata yiyulo ya mana matangwa eswe.
Ngwe chilweza, tala chiyulo chize chili ha mukanda wa Yishima 13:20 chinambe ngwo: “Nyi muwenda ni akwa mana ni yena nawa muopwa ni mana; alioze mweswe malikata ni yihepuke kumakevwa kusasaminya.” Chiyulo chino muchihasa nawa kukwasa atu anji musono, chizechene ngwe ku mashimbu akunyima. Mbimbiliya uli umwe mukanda wa too ni shimbi ni yiyulo yipema chinji.—Tala mushete “ A Sabedoria da Bíblia.”
Alioze muhasa kulihula ngwe: ‘Kuchi munguhasa kupwa ni shindakenyo ngwami, yiyulo ya mu Mbimbiliya muyihasa kungukwasa?’ Mutwe uze muusulaho, muusolola yilweza yimwe ya ku mwono yize muyitukwasa.
a Yehova lili jina lia Zambi.—Samu 83:18.
