1, 2. (a) Yika yakuhana chiseke kuli atu ja Zambi musono? (b) Kuchi yisemi Yela ja Yehova ni makulwana amu yikungulwila akukwasa akweze kunyingika ulumbunwiso wa upapachiso?

UMWE mukulwana wa mu chikungulwila yambila Christopher wa miaka 12, ngwenyi; “Ngunakunyingika chize haze wasemukine, ngunawahilila chinji hakwivwa ngwo unazange hanga akupapachise. Ngunazange kukuhula, ‘Mumu liaka unazange hanga akupapachise?’” Mukulwana wacho te kali ni chitela chipema chakuhula mukweze wacho. Chakutwaha chiseke chinji hakumona akweze anji maapapachisa ha miaka yeswe. (Chilumbununyi 12:1) Alioze yisemi Yela ja Yehova ni makulwana amu yikungulwila kakuzanga kupwa ni shindakenyo ngwo akweze kakwata yiyulo yo ene ni kunyingika ulumbunwiso wa upapachiso.

² Mu Mbimbiliya, twakulilongesa ngwo kulihana ni upapachiso chili uputukilo wa mwono waha wa mukwa-Kristu. Mwono uno waha, wakuneha yiwape yinji ya Yehova hamwe ni yihungumiona ya Satana. (Yishima 10:22; 1 Petulu 5:8) Ha chino, yisemi akwa-Kristu katamba kupwa ni mashimbu hanga alongese ana jo yika chamwenemwene chinalumbunuka kupwa kambaji ka Kristu. Nyi amwe akweze, yisemi jo hi Yela ja Yehova ko, makulwana amu yikungulwila kakwaakwasa ni zango lieswe hanga anyingike yika chinalumbunuka kulihana ni upapachiso. (Tanga Luka 14:27-30.) Ngwe chize chatamba kulilulieka hakutunga limwe zuwo, ni akweze no katamba kulilulieka muze kanda achaapapachisa, ha chino ayo mahasa kulingila Yehova “ndo ku songo.” (Mateu 24:13) Yika muyihasa kukwasa akweze alingile Yehova ha miaka yeswe? Tutalenu.

3. (a) Yika maliji a Yesu ni a Petulu anatulongesa ha ulemu wa upapachiso? (Mateu 28:19, 20; 1 Petulu 3:21) (b) Yihula yika mutulilongesa, nawa mumu liaka?

³ Mukweze, shina unazange hanga akupapachise? Nyi che unazenge, lino lili nyonga lipema! Chili uhenya unene kukupapachisa hanga upwe Chela cha Yehova. Chino chili nawa, chuma chize mukwa-Kristu atamba kulinga, nawa chili chuma chilemu kuli waze eswe anazange kulilamwina ha luyinda munene. (Mateu 28:19, 20; 1 Petulu 3:21) Nyi hakupapachisa, yena musolola ngwe, hiwalakenya kulingila Yehova ku miaka yeswe. Nyi ena unambe lume kulinga chilakenyo chino, yihula yino muyikukwasa kunyingika ni hiwalilulieka hanga akupapachise: (1) Shina hinakola ku ufulielo hanga ngukwate chiyulo chino? (2) Kutala ngunazange kulinga chino ni mbunge yami yeswe? (3) Shina ngunanyingika ulumbunwiso wakulihana kuli Yehova? Tulilongesenu yihula yino.

4, 5. (a) Mumu liaka upapachiso kuushi wika wa makulwana? (b) Kukola ku ufulielo yika chinalumbunuka kuli mukwa-Kristu?

⁴ Mbimbiliya kuyishi kwamba ngwo waze wika hapwa makulwana hanji waze hakumbanyisa yimwe miaka e mahasa kupapachisa. Tunatanga mu mukanda wa Yishima 20:11 ngwo, ‘Mwana kakusoloka ku yitanga yenyi, nyi yilinga yenyi yapwa yitoma hanji ya ululi.’ Kashika chipwe twanuke mahasa kunyingika yika yinalumbunuka kulinga yuma ya ululi ni kulihana kuli Sakatanga wo. Ha chino, upapachiso uli ulemu nawa uli jila kuli akweze waze anasolola ngwo hakola hanga alihane kuli Yehova.—Yishima 20:7.

⁵ Kukola ku ufulielo yika chinalumbunuka? Kukola ku ufulielo kuchalumbunukine wika miaka ya mutu chipwe kutatuka cha mujimba. Mbimbiliya yinambe ngwo atu akola mu ufulielo hanafumbu “mana” jo hanga anyingike chipema ni chipi. (A-Hepreu 5:14) Mutu wakola ku ufulielo kananyingika yize yalita nawa mu mbunge yenyi kakukwata chiyulo cha kulinga yize yalita. Kashika kuchichi kupwa chashi kumupiangula hanga alinge yuma ya uhenge. Nawa kechi kufupa mutu hanga amulweze shimbu lieswe ngwenyi linga yuma yalita. Kashika mutuhasa kushimbwila ngwetu kanuke yoze hamupapachisa malinga yuma yipema chipwe muze ali ukawenyi.—Tesa ni A-Fwilipu 2:12.

6, 7. (a) Amba kapinda yoze Daniele apwile nenyi muze te ali ku Babilonia. (b) Kuchi Daniele asolwele kukola chenyi?

⁶ Kutala akweze mahasa kusolola kukola ­chacho? Tutalenu chilweza cha Daniele. Kota iye te uchili kanuke muze amuchijile mukachi ka yisemi jenyi ni kumutwala ku Babilonia. Daniele yatwama mukachi ka atu waze te keshi kukaula shimbi ja Zambi. Kashika tuchitalenu mwono wa Daniele muze te uchili kanuke. Iye kapwile ni kumusa ulemu unji ku Babilonia. Kapwile umwe wa kuli akweze akehe waze apwile kusakula hanga alingile mwanangana. (Daniele 1:3-5, 13) Mutuhasa kwamba ngwetu, Daniele kapwile mu chihela chilemu ku Babilonia kuhiana chize te mapwa nacho ku Izalele.

⁷ Mba kuchi Daniele alingile? Shina kechele hanga atu a ku Babilonia alumune mwono wenyi hanji kukokolola ufulielo wenyi? Ka! Mbimbiliya yinambe ngwo muze te uchili ku Babilonia, Daniele yakwata chiyulo mu “mbunge yenyi ngwenyi, chichikulichisa,” ha chino, aye te matwama kusuku ni yuma ya uwayilo wa mahuza. (Daniele 1:8) Yino yinasolola kukola chamwenemwene!

8. Yika mutuhasa kulilongesa ha chilweza cha Daniele?

⁸ Yika mutuhasa kulilongesa ha chilweza cha Daniele? Mukweze yoze hakola mu ufulielo kakujikijila ha yuma yize afuliela, chipwe ha mashimbu a kapinda. Iye kechi kupwa ngwe, nongwena yoze wakulialumona-lialumona kulita ni haze ali. Iye keshi kulionga kupwa sepa lia Zambi muze ali ku Zuwo lia Wanangana, alioze ku shikola mapwa sepa lia waze keshi kukaula shimbi ja Zambi. Nawa iye kakujikiza mu ufulielo chipwe muze mamweseka.—Tanga A-Efwesu 4:14, 15.

9, 10. (a) Kuchi umwe mukweze mahasa kuyuka ha kunyonga ha chize iye alingile muze apalikile mu yeseko? (b) Upapachiso yika unalumbunuka?

⁹ Chochene, ni umwe mutu mungunu wakuhi. Akweze chipwe makulwana ha mashimbu amwe kakuvulumuna. (Chilumbununyi 7:20) Alioze nyi unazange hanga akupapachise, muchipema kunyingika chize watamba kwononokena shimbi ja Yehova. Lihule ngwe, ‘Shina hingunonokena kama Yehova ha amwe mashimbu?’ Achinyonga ha yize unakalinga muze esekele ufulielo we. Shina unakahasa kulinga chuma chize chalita? Ngwe Daniele, shina ni yena kuli umwe yoze wakukolwezele hanga uzachise utotombo we hano hashi ha Satana? Muze yuma yamutapu au yakulingiwa, shina wakuhasa kunyingika yize upale wa Yehova unalumbunuka?—A-Efwesu 5:17.

¹⁰ Mumu liaka chili chilemu kunyingika makumbululo a yihula yino? Mumu muyikukwasa kunyingika kanawa ulemu wa upapachiso. Upapachiso wakusolola kuli akwenu ngwo yena walinga chilakenyo chilemu chinji kuli Yehova. Yena walakenya ngwe mukamuzanga ni kumuwayila ni mbunge ye yeswe ha miaka yeswe. (Marku 12:30) Eswe waze akupapachisa katamba kumanununa chilakenyo cho kuli Yehova.—Tanga Chilumbununyi 5:4, 5.

11, 12. (a) Mutu yoze unafupu hanga amupapachise yika atamba kusela shindakenyo? (b) Yika muyitukwasa hanga tupwe ni manyonga a Yehova hakutwala ku upapachiso?

¹¹ Mbimbiliya yakwamba ngwo, atu ja Yehova eswe, chipwe akweze, mahasa kumuwayila ni “upale woene”. (Samu 110:3) Kashika mutu yoze unazange hanga amupapachise katamba kupwa ni shindakenyo ngwo kanachilinga kuzango lienyi mwene. Katamba kuhengwola kanawa nyonga liacho, chipi-chipi nyi kanakakolela mu usoko wa Yela ja Yehova.

¹² Muze te unakola, kota wamwene chize atu anji apwile ni kwaapapachisa, kota hamwe masepa ni mandumbu je. Alioze watamba kukeya hanga uchine kupwa ni nyonga lia kukupachisa ha mukanda miaka ye yinji hanji ha mukunda wa akwenu waze anapu kupapachisa. Kuchi muuhasa kunyingika ngwe wakulemesa upapachiso ngwe chize Yehova akuulemesa? Sako mashimbu hanga unyonge mumu liaka upapachiso uli ulemu. Ha mutwe uno ni uze muusulaho, mutuwana yitela yinji yipema.

13. Kuchi muuhasa kunyingika nyi chiyulo cha kukupapachisa chinakatuka mu mbunge ye?

¹³ Kulemba chili yimwe jila yize muyihasa kukukwasa kunyingika nyi chiyulo cha kukupapachisa chinakatuka ku mbunge ye, nyi ka. Kangahi wakulemba kuli Yehova? Shina kulemba che chapwa pundu? Kumbululo lia yihula yino muyihasa kusolola chize usepa we ni Yehova uli. (Samu 25:4) Kanji-kanji Yehova kakukumbulula kulemba chetu kupalikila mu Mbimbiliya. Jila yikwo nawa yize muyihasa kukukwasa kunyingika nyi unazange kukundama kuli Yehova ni kumuwayila ni mbunge yeswe yili katalilo we wa longeso lia wika. (Yoshua 1:8) Lihule ngwe: ‘Shina nakulinga mashimbu eswe longeso liami lia wika lia Mbimbiliya? Nakuwahilila ni mbunge yeswe ha kupwa mu uwayilo wa mu usoko?’ Makumbululo a yihula yino makukwasa kunyingika nyi chiyulo cha kukupapachisa chinakatuka mu mbunge ye.

14. Lumbununa kulisa cha kulihana ni upapachiso.

¹⁴ Akweze amwe kanyingikine kanawa kulisa cha kulihana ni upapachiso. Amwe mahasa kwamba ngwo ayo hanalihana kuli Yehova, alioze kanda achililulieka hanga apapachise. Shina chino chili chamwenemwene? Kulihana chili kulemba kuli Yehova ni kumulweza ngwenyi unalakenya kumulingila ku miaka yeswe. Muze hakupapachisa, yena musolola kuli akwenu ngwenyi hiunalihana kuli Yehova. Kashika muze kanda achikupapachisa, yena watamba kunyingika yize yinalumbunuka kulihana kuli Zambi.

15. Kulihana yika chinalumbunuka?

¹⁵ Nyi walihana kuli Yehova, mumulweza ngwe yena hiwapwa wa iye. Mumulakenya ngwenyi kumuwayila muchipwa chikuma chilemu ku mwono we. (Tanga Mateu 16:24.) Chilakenyo chacho chilemu chinji kuli Zambi! (Mateu 5:33) Ha chino, kuchi musolola ngwe unanyingika ngwo mwono we hiwapwa wa mbala wa Zambi?—A-Roma 14:8.

16, 17. (a) Lumbununa chilweza chinasolola ulumbunwiso wakulituna yena mwene. (b) Mutu yoze wakulihana kuli Yehova yika akwamba?

¹⁶ Tutalenu chimwe chilweza. Achinyonga ngwe umwe sepa makwaha mashinyi achawana. Makwaha nawa mikanda yeswe ya mashinyi ni kwamba ngwenyi: “Mashinyi wano ni e.” Alioze mamba nawa ngwenyi: “Ami ngusala ni fungula. Nawa ami wika mungupwa ni kweendesa, ena ka.” Kuchi muwivwa ha chawana chacho? Kuchi munyonga hali sepa wacho?

¹⁷ Muze mutu akulihana kuli Yehova, iye kakwamba kuli Zambi ngwenyi: “Ami ngunakwehe mwono wami. Hinapwa wa yena”. Yehova kali ni chitela chakushimbwila hanga mutu wacho amanunune chilakenyo chenyi. Mba yika mutwamba nyi mutu wacho maputuka kwehuka shimbi ya Yehova ni kulinga usendo kutenga ni lunga hanji pwo yoze keshi kumuwayila? Nawa nyi mutu wacho hanji matayiza mulimo uze muukisa mashimbu jenyi ni kumupinjisa kwambujola hanji kuhona kuya ku kukunguluka? Mutu wacho kechi kuhasa kumanununa chilakenyo chenyi kuli Yehova. Chino chili ngwe kasala ni fungula ja mashinyi. Muze twakuhana mwono wetu kuli Yehova, twakwamba kuli iye ngwetu, “Mwono wami hiwapwa wa yena, hi wa yami ko nawa.” Kashika mutupwa ni kulinga mashimbu eswe yize Yehova akuzanga, chipwe ngwe hi chocho ko tunazange. Twimbululenu Yesu yoze wambile ngwenyi: “Nakatukile mwilu mukulinga upale wa yoze wangutumine, hi upale wa yami mwene ko.”—Yoano 6:38.

18, 19. (a) Kuchi maliji a Rose ni Christopher, asolola ngwo upapachiso uli jila yize yakuneha yiwape yinji? (b) Kuchi wakwivwa hakutwala ku chiwape cha upapachiso?

¹⁸ Kwamba pundu, upapachiso uli chiyulo chilemu. Kulihana kuli Yehova ni upapachiso yili yiwape yinene. Akweze waze akuzanga Yehova ni kunyingika ulumbunwiso wakulihana, keshi kukakajana hakuhana mwono wo kuli Zambi ni kwaapapachisa. Ayo keshi kunyenganyana ha chiyulo cho. Rose, umwe mukweze yoze hanapapachisa yamba ngwenyi: “Nakuzanga Yehova, kukushi chuma nichimwe chize chakungunehena chiseke ngwe kumulingila. Kukushi nichimwe chuma chilemu ku mwono wami, kuhiana chiyulo chami cha kungupapachisa.”

¹⁹ Mba yika mutwamba hakutwala kuli Christopher, yoze twatongola kuuputukilo wa mutwe uno? Kuchi iye evwile hakutwala ku chiyulo chenyi cha kumupapachisa muze te uchili ni miaka 12? Iye kambile ngwenyi, kawahililile chinji hakukwata chiyulo chacho. Yaputuka mulimo wa pionelu muze apwile ni miaka 17, nawa yapwa kavumbi mu chikungulwila ni miaka 18. Haliapwila kanakalakala ku Mbetele. Iye yamba ngwenyi: “Chiyulo cha upapachiso chapwile chipema. Mwono wami unawahilila chinji ni milimo ya Yehova ni ululikiso wenyi.” Nyi unazange hanga akupapachise, kuchi muhasa kulilulieka? Ha mutwe uze muusulaho mutukumbulula chihula chino.