1, 2. (a) Lumbununa mumu liaka upapachiso uli chimwe chuma chilemu. (b) Ha yuma yika mutu atamba kupwa ni ushindakenyo shimbu kanda achimupapachisa, nawa mumu liaka?

SHINA ena uli mukweze yoze unazange hanga akupapachise? Nyi chocho, chili chipema chinji. Ngwe chize twamona ha mutwe uze wahwa, upapachiso uli chimwe chuma chilemu chinji. Wakusolola kuli akwenu ngwo walihana kuli Yehova, ni kumulakenya hanga ukamuwayile ku miaka yeswe nawa ngwo kulinga upale wenyi chili chilemu chinji ku mwono we. Amu chili chilakenyo chilemu kuli Zambi, kashika katamba kukupapachisa wika muze hiwajama kanawa, alioze ndo kuchilinga ku zango lie, nawa muze hi wanyingika ulumbunwiso wakulihana kuli Zambi.

² Chipwe chocho, muhasa kumona ngwe kanda uchipwoho hanga akupapachise. Hanji muhasa kumona ngwe hiwapwoho alioze yisemi je manyonga ngwo ena watamba kushimbwila ndo muze muukola ni kupwa ni yinyingi yinji ku mwono we. Yika watamba kulinga? Kanda uhonga ku mbunge. Alioze, zachisa mashimbu jacho hanga ukole mu ufulielo hakupalika cha mashimbu mba muhasa kujama hanga akupapachise. Nyi walinga chocho, yena muhasa kutesa kukaula yuma yitatu yize yalisa: (1) yize wafuliela, (2) yitanga ye, ni (3) usakwililo we.

3, 4. Longeso lika akweze mahasa kulilongesa ha chilweza cha Timoteu?

³ Achinyonga ha chize yena muuhasa kukumbulula yihula yino: Mumu liaka yami nakutayiza ngwami Zambi katwamako? Mumu liaka nguli ni ushindakenyo ngwami pundu lume Mbimbiliya yili mukanda wa Zambi? Mumu liaka nakwononokena shimbi ja Zambi ni kwehuka kwimbulula yitanga yipi ya hano hashi? Yihula yino muyihasa kukukwasa hanga ukaule chiyulo cha postolo Paulu chize chinambe ngwo: “Nukase chinyingi chize wapwa upale upema ni ungunu wa Zambi ni uze wamupemena.” (A-Roma 12:2) Mumu liaka watamba kuchilinga?

⁴ Chilweza cha Timoteu muchihasa kukukwasa. Iye te kanyingika kanawa Yisoneko mumu naye ni kako te kakumulongesayo. Kashika Paulu alwezele Timoteu ngwenyi: ‘Nyongonona mu yuma yize hiunalilongesa, ni yize hiunafuliela.’ (2 Timoteu 3:14, 15) Hano, liji ‘yize hiunafuliela’ linalumbunuka “kutayiza pundu hanji kusa ushindakenya ha chimwe chuma cheswacho.” Kashika Timoteu wapwile ni kufuliela ha umwenemwene uze te akuwana mu Yisoneko. Iye kakautayijile ha mukunda wa naye ni kako, ka, alioze ha mukunda wa kufuliela ha yize alilongesele ni yize afulielele.—Tanga A-Roma 12:1.

5, 6. Mumu liaka chili ni ulemu kuli ena kulilongesa kuzachisa kanawa “kunyonga cha mana” ku mwono we?

⁵ Mba ena? Hanji hiunanyingika kulu umwenemwene. Nyi chocho, use mu mbunge ye hanga unyonge hakutwala ku yiyulo ya ufulielo we. Chino muchikukwasa hanga ukolese ufulielo we ni kwehuka kukwata yiyulo yipi mumu ha ushinjilo wa masepa je, kunyonga cha hano hashi, chipwe hakutwala ku manyonga je.

⁶ Nyi wanyingika kuzachisa kanawa “kunyonga cha mana” je muze uchili mukweze, yena muupwa ni uhashi wa kukumbulula yihula ya masepa je ngwe yino: ‘Kuchi kevwe unanyingika ngwenyi Zambi kwali? Nyi Zambi kakutuzanga lume, mba mumu liaka iye akwecha hanga yuma yipi yilingiwe? Kuchi unanyingika ngwenyi Zambi te katwamako chize ku miakulwila?’ Muze mulilulieka kanawa, ena kuuchi kuyambashana ha yihula yacho mu mbunge ye alioze muyikukwasa hanga ulilongese chinji Mbimbiliya.

7-9. Lumbununa chize yikuma yili ha internet ya usongwelo wa malongeso akwamba ngwo, “O Que A Bíblia Realmente Ensina?” muyihasa kukolesa ufulielo we.

⁷ Kulilongesa kanawa Mbimbiliya muchihasa kukukwasa kukumbulula yihula, ni kuhona kuyambashana, nawa muchikolesa ufulielo we. (Yilinga 17:11) Yetu tuli ni mikanda yinji yize muyihasa kukukwasa kulinga chino. Atu anji hanawane ukwaso hakulilongesa kamukanda A Origem da Vida—Cinco Perguntas Que Merecem Resposta ni Existe um Criador Que Se Importa com Você? Nawa, akweze anji kakuwahilila ni kuyuka chinji ku yikuma yakwamba ngwo “O Que A Bíblia Realmente Ensina?” mu jw.org. Muhasa kuyiwana ha chikuma ENSINOS BÍBLICOS. Yikuma yeswe yilimo kakuyilinga hanga yikukwase kukolesa ufulielo we hakutwala ku Mbimbiliya.

⁸ Nyi uli longi wa Mbimbiliya, kota ena hiwanyingika kulu kumbululo lia yimwe yihula yize yili mu usongwelo wa malongeso. Shina ena uli ni ushindakenyo wa makumbululo je? Usongwelo wa malongeso muukukwasa kunyonga kanawa ha yisoneko yeka ni yeka, nawa muyikukolweza kwiwuluka yuma yize wafuliela. Chino muchikukwasa kulumbununa ufulielo we kuli akwenu. Nyi uli ni uhashi wa kutanga ha internet malongeso akwamba ngwo, “O Que A Bíblia Realmente Ensina?” yena muhasa kwaazachisa mu longeso lie lia wika hanga akukwase kukolesa ufulielo we.

⁹ Yena watamba kupwa ni ushindakenyo yena mwene ngwo, uno we umwenemwene. Chino muchikukwasa kulilulieka hanga akupapachise. Umwe pangi mukweze yamba ngwenyi: “Shimbu te kanda nguchikwata chiyulo cha kungupapachisa, nalilongesele Mbimbiliya ni kumona ngwami, auno we uwayilo wamwenemwene. Nawa ha tangwa ni tangwa ufulielo wacho yikola chinji.”

10. Mumu liaka mukwa-Kristu yoze hapapachisa atamba kupwa ni yitanga ni kulita ni ufulielo wenyi?

¹⁰ Mbimbiliya yinambe ngwo: “Ufulielo, nyi kachi kuushi yitanga, kachi kuunafu ukawawo.” (Tiangu 2:17) Nyi wapwa nyi ufulielo ukole, muusolola ku yitanga ye. Muupwa ni yitanga yize Mbimbiliya yakuvuluka ngwo “kwenda chisandu ni uwayilo.”—Tanga 2 Petulu 3:11.

11. Lumbununa liji “kwenda chisandu.”

¹¹ “Kwenda chisandu” yika? Nyi yitanga ye yapwa yisandu, yena muupwa mutu mupema ku yitanga. Chakutalilaho, achinyonga ha tukweji asambano kunyima. Muze akwesekele kulinga yuma yipi, shina yena wanyongene kanawa hakutwala ku upi ni upeme nyi? (A-Hepreu 5:14) Shina yena uneuluka amwe mashimbu waze wehukile cheseko hanji ushinjilo wa masepa je? Ku shikola, shina yitanga ye yili chilweza chipema kuli akwenu? Shina unanungu ni kushishikila kuli Yehova, nyi wakweseka kupwa ngwe waze walilongesa no hanga achine kukupotela? (1 Petulu 4:3, 4) Chamwenemwene, kukushi mutu mungunu. Ha mashimbu amwe, waze akuwayila Yehova ha mashimbu anji, mahasa kupalika mu yipikalo ha mukunda wa kwambujola sango lipema kuli akwo. Alioze mutu yoze hanalihana kuli Zambi kakuwahilila kupwa Chela cha Yehova ni kusolola ngwenyi kali ni yitanga yipema.

12. Yimwe ‘yitanga ya uwayilo’ yika, nawa kuchi watamba kuyimona?

¹² ‘Yitanga ya uwayilo’ yika yinalumbunuka? Yinalumbunuka milimo yize wakulinga mu chikungulwila, yapwa ngwe kuya ni kukunguluka ni kwambujola sango lipema. Alioze yinalumbunuka nawa yuma yize akwenu keshi kuhasa kumona, ngwe, yilemba ye kuli Yehova ni longeso lie lia wika. Mutu yoze hanahana mwono wenyi kuli Yehova keshi kunyonga ngwo yuma yacho yili yikalu kuyilinga. Iye kakwivwa ngwe chize evwile Mwanangana Ndawichi, yoze wambile ngwenyi: “Ngunawahilila kulinga upale we, Zambi yami. Ewa, shimbi je jinasonewa muchima lia mbunge yami.”—Samu 40:8.

13, 14. Ukwaso uka uze muuhasa kukukwasa hanga upwe ni ‘yitanga ya uwayilo,’ nawa kuchi amwe akweze ayukile ha ukwaso wacho?

¹³ Mba uhase kupwa ni amwe manyonga akulinga yimwe yuma, tuli ni mukanda Jovens Perguntam—Respostas Práticas, Volume 2, ha mafwo 308 ni 309 hali chihela haze muhasa kusoneka yize unazange. Ha chihela chacho, yena muhasa kusoneka kumbululo lia yihula ngwe yino: “Kuchi yilemba ye yapwa, nawa yika yakusolola hakutwala ku zango lie kuli Yehova?” “Yika nawa yena wakulilongesa mu longeso lie lia wika?” “Shina wakuya mu sango lipema chipwe ngwe yisemi je keshi kuyamo nyi?” Nawa ha mukanda wacho, hali chihela haze muhasa kusoneka yuma yize muzanga kuhanjika mu yilemba ye, mu longeso lie lia wika, ni mu mulimo wa kwambujola.

¹⁴ Akweze anji waze akunyonga hanga apapachise, kakumona ngwo mafwo wano kali alemu chinji. Umwe pangi yoze avuluka ngwo Tilda yamba ngwenyi: “Ami nazachishile mafwo jacho hanga ngusoneke yuma yize te ngunazange kulinga. Yinguhasa kulinga chuma ni chuma, chocho yingujama mba ha mwaka uze wasulileho yangupapachisa.” Mukweze wa lunga yoze avuluka ngwo Patrick ni neye hanawane uwahililo wowene, yamba ngwenyi: “Ami te hingunanyingika kulu yuma yize te mungulinga, alioze kuyisoneka hamwe homa changukwashile kuyilinga.”

15. Lumbununa mumu liaka kulihana chatamba kupwa chiyulo cha mutu mwene.

¹⁵ Chihula chimwe chili ha mafwo jacho, chili chino: “Shina muwayila Yehova chipwe ngwe yisemi ni masepa je makukwika?” Muze muhana mwono we kuli Yehova ni kukupapachisa, yena muupwa ni usepa upema ni iye. Kashika, yuma yize mulingila Yehova kuyatalile hali yisemi je hanji mutu mweswao. Yitanga ye yisandu nawa ya uwayilo muyisolola ngwo wakufuliela ngwenyi uli ni umwenemwene nawa unazange kukaula shimbi ja Zambi. Nyi walinga chocho, ha mashimbu akehe muujama hanga akupapachise.

16, 17. (a) Yika yatamba kukolweza mutu hanga apwe Chela cha Yehova? (b) Kuchi zango ha ukuule mulihasa kupwa kutesa?

¹⁶ Limwe tangwa, umwe lunga te wanyingika kanawa Shimbi ja Mose, yahula Yesu ngwenyi: “Lie liji linene lia shimbi mu mukanda wa shimbi lika?” Yesu yamukumbulula ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe.” (Mateu 22:35-37) Yesu kalumbunwine ngwenyi, kuzanga Yehova chatamba kupwa chikuma chize muchikolweza mutu hanga amupapachise ni kupwa Chela cha Yehova. Yimwe jila yipema yakukolesa zango lie kuli Yehova yili kunyonga kanawa hakutwala ku ukuule, chiwape chinene cha Zambi kuli atu. (Tanga 2 A-Korindu 5:14, 15; 1 Yoano 4:9, 19.) Nyi mulinga chenacho, yena muzanga kusolola usakwililo we ha chiwape chacho chipema.

¹⁷ Usakwililo we ha ukuule muuhasa kupwa kutesa ni chino: Achinyonga ngwe unashimbama mu meya mba hi umwe mutu makulamwina. Shina muya kwe ku zuwo lie, ni kuvuluma yuma yize mutu wacho akulingila? Ka! Yena musakwilila chinji kuli mutu wacho ha kulamwina mwono we! Chizechene nawa ni yetu twatamba kusakwilila kuli Yehova ni Yesu ha mukunda wa ukuule. Mwono wetu watwama kuli ayo! Ayo hanatutusula ku shili ni ku kufwa. Ha mukunda wa zango lio hali yetu, kashika tuli ni kutalatala cha kupwa ni mwono wa mutolo mu Paraisu hano hashi.

18, 19. (a) Mumu liaka kutwatambile kwivwa woma wa kulihana kuli Yehova? (b) Kuchi kuwayila Yehova muchipemesa mwono we?

¹⁸ Shina wakusakwilila kuli Yehova ha yuma yize hanakulingila? Nyi chocho, kulihana ni upapachiso chili chuma chipema chize muhasa kulinga. Kulihana che chili kulakenya Zambi ngwo yena muukalinga upale wenyi matangwa eswe. Shina watamba kwivwa woma wa kulinga chilakenyo chacho? Ka! Yehova kanazange yuma yipema ku mwono we, nawa iye makayukisa waze akulinga upale wenyi. (A-Hepreu 11:6) Muze mulihana kuli Zambi ni kukupapachisa, mwono we kuuchi kupihia, alioze muupema! Umwe ndumbu uli ni miaka 24, yoze apapachishile muze te uchili kanuke, yamba ngwenyi: “Kachi napwile ni yinyingi yeka ni yeka nyi nakolele, alioze kukwata chiyulo cha kulihana kuli Yehova changufungile ku yitanga yipi ya hano hashi.”

¹⁹ Yehova kanazange yuma yipema hali yena. Alioze, Satana ka, mumu iye kali mukwa-kuzo. Nyi wamukaula iye kechi kuhasa kukwaha chuma chipema nichimwe. Kuchi iye mahasa kukwaha chuma chize iye keshi nacho? Iye keshi ni sango lipema, nawa keshi ni kutalatala nichimwe. Iye mahasa kupihisa mwono we wa kulutwe lia matangwa, mumu yenayi muyikalingiwa kulutwe lia matangwa!—Usolwelo 20:10.

20. Yika umwe mukweze mahasa kulinga hanga ajame mba alihane kuli Yehova ni kumupapachisa? (Tala kasha “Ukwaso Hanga Ukole mu Ufulielo.”)

²⁰ Kulihana kuli Yehova chili chiyulo chipema chize muhasa kukwata. Shina hiwapwoho kuchilinga? Nyi hiwapwoho, kanda wivwa woma wa kulinga chilakenyo chacho. Alioze nyi wamona ngwe kanda uchipwoho, zachisa yiyulo yize yili ha mutwe uno, hanga ujame mba akupapachise. Paulu kalwezele mandumbu mu Fwilipu hanga anunge kukola mu ufulielo. (A-Fwilipu 3:16) Nyi wakaula shimbi yacho, kulutwe lia matangwa yena muuzanga kulihana kuli Yehova ni kukupapachisa.