1. Yika te yakusoloka mu mulimo wa Zambi chize ku uputukilo?

YEHOVA ni Yesu kalinunga chize ku uputukilo wa yitangiwa. Yehova katangile Yesu shimbu te kanda achitanga yuma yikwo. Mba, hi Yesu yakalakala nenyi “hamuwika ngwe chilangaji.” (Yishima 8:30) Tuvumbi twa Yehova no kakalakalile hamuwika umwe ni mukwo mu mulimo uze ehele. Chakutalilaho, Noa ni usoko wenyi katungile ulungu hamuwika. Kulutwe, A-Izalele yakalakala hamuwika hanga atunge tabernakulu, kuyisokola ni kuyimbata ku chihela cheka ni cheka. Mu tembele, ayo te kakwimba njimba hamuwika hanga ahalise Yehova ni miaso yipema. Atu ja Yehova kahashile kulinga yuma yino mumu te kakulivwashana umwe ni mukwo.—Uputukilo 6:14-16, 22; Kwalula 4:4-32; 1 Sango ja Mianangana 25:1-8.

2. (a) Chilweza chika chipema chize akwa-Kristu atangu ahichikile? (b) Yihula yika mutushimutwina?

² Akwa-Kristu ku sekulu yitangu, no kakalakalile hamuwika ni kulivwasha. Postolo Paulu yalumbununa ngwenyi chipwe ngwe utotombo ni milimo yo te yalisa, nihindu te kalinunga. Ayo te kakukaula Mwata wo, Yesu Kristu. Paulu yaatesa ni umwe mujimba uli ni yihanda yinji yalisa yize yakukalakala hamuwika. (Tanga 1 A-Korindu 12:4-6, 12.) Mba yetu musono? Shina twakukalakala hamuwika ni akwetu mu munda, mu chikungulwila ni mu usoko nyi?

3. Usolwelo uka postolo Yoano atambwile?

³ Ku sekulu yitangu, postolo Yoano katambwile umwe usolwelo wa angelo shimbiali waze te anembi yitavwi. Muze mungelo wamuchitano hemba chitavwi chenyi, Yoano yamona umwe “katongonoshi yakatuka mwilu; yaholoka hashi.” “Katongonoshi” wacho yazachisa sapi hanga azulule chajilo cha wina usuku chinji nawa ulaa wapwi. Hasulaho chizavu cha mapasu yichituhuka mukachi ka mushi. Sapu te apihise mitondo ni yitemo, mapasu jacho yononona waze keshi ni chilayi cha Zambi ha mahuma jo. (Usolwelo 9:1-4) Yoano yanyingika ngwenyi chizavu cha mapasu muchihasa kupihisa yuma yinji; ngwe chize chalingiwile mu Engitu ha matangwa ja Mose. (Kutuhuka 10:12-15) Mapasu waze Yoano amwene, kanalumbunuka akwa-Kristu akuwayisa waze akwambujola sango ja ndundo ni kulimika ni uwayilo wa mahuza. Nawa tununu twa atu akwo waze ali ni kutalatala cha kutwama hano hashi kanalichingi hamwe no. Ayo eswe, kanalinungu ni kulinga mulimo uno wa kwambujola. Mulimo wacho unakwase atu anji hanga atuhuke mu uwayilo wa mahuza ni kwehuka usongwelo wa Satana.

4. Mulimo uka uze atu ja Zambi atamba kulinga, nawa jila yika yize mahasa kuulingila?

⁴ Yetu tuli ni mulimo wa kwambujola “sango lipema” kuli atu eswe a hano hashi shimbu songo kanda lichiza. Auno uli umwe mulimo unene chinji! (Mateu 24:14; 28:19, 20) Twatamba kutambika atu eswe waze ali ni “pwila” hanga anwe “meya a mwono,” ha chino, yetu twatamba kulongesa umwenemwene wa mu Mbimbiliya kuli atu eswe waze mazanga kuunyingika. (Usolwelo 22:17) Alioze chino mutuchilinga ni ‘mutulisepekenya nikulinunga’ ni kukalakala hamuwika umwe ni mukwo mu chikungulwila.—A-Efwesu 4:16.

5, 6. Kuchi twakulinunga muze tunambujola sango lipema?

⁵ Mba tuhase twambujola kuli atu anji, twatamba kulilulieka kanawa mu mulimo wetu wa kwambujola. Usongwelo uze twakutambula mu chikungulwila chetu wakutukwasa kulinga chino. Muze hitwalinga kukunguluka chakuya ni kwambujola, yetu twakuya hanga tuhanjike ni atu hakutwala ku sango lipema lia Wanangana. Yetu nawa twakuhana mikanda yakulongesa Mbimbiliya. Kwamba umwenemwene, twakuhana tununu a tununu a mikanda hashi heswe. Ha mashimbu akwo twakulinga umwe mulimo wa kwambujola uze walisa. Muze muulinga, yena unalichinga ni tununu a tununu twa mandumbu a hashi heswe waze akwambujola lusango yomwene! Yena nawa unakalakala ni angelo, waze akukwasa atu ja Zambi hanga ambujole sango lipema.—Usolwelo 14:6.

⁶ Twakwivwa chiseke chinji hakutanga mu Anuário yiwape yize yakwiza mu mulimo wa kwambujola hashi heswe! Achinyonga nawa chize twakulinunga hashi heswe muze twakutambika atu hanga apwe ha kukunguluka cha mambonge. Ha kukunguluka chacho, yetu eswe twakwivwa malongeso wowene. Pande, yiheho ni yimweso yakutukolweza hanga tulingile Yehova ni mbunge yetu yeswe. Yetu nawa twakulinunga ni mandumbu jetu a hashi heswe muze twakukunguluka hanga twiwuluke Kufwa cha Yesu miaka yeswe. (1 A-Korindu 11:23-26) Twakukunguluka hamuwika ha tangwa lizeliene, lia Nisane 14 hakutoka cha tangwa hanga tuhane usakwililo unji kuli Yehova ha yize hanalingi hali yetu ni kwononokena shimbi ya Yesu. Nawa, ha poso jitangu muze kanda tuchilinga Chiwanyino cha Kufwa cha Yesu, yetu twakukalakala hamuwika hanga tutambike atu hanga tukunguluke no hamuwika ha chiwanyino chino chilemu.

7. Amu twakukalakala hamuwika yika twakuhasa kulinga?

⁷ Lupasu umuwika kechi kuhasa kupihisa yuma ukawenyi. Ni yetu nawa tuchi kuhasa kwambujola ukawetu kuli atu anji. Alioze amu twakukalakala hamuwika, kashika twakuhasa kulweza atu anji hakutwala kuli Yehova ni kukwasa amwe hanga ahamulise ni kumufumanyisa.

8, 9. (a) Chilweza chika Paulu azachishile alongese akwa-Kristu anunge ni kulivwashana? (b) Kuchi mutuhasa kulinunga mu chikungulwila?

⁸ Paulu kalumbunwine kuli A-Efwesu chize chikungulwila akuchilulieka, nawa iye yamba ngwenyi, atu eswe mu chikungulwila katamba ‘kutatuka mu yuma yeswe.’ (Tanga A-Efwesu 4:15, 16.) Paulu kazachishile chilweza cha mujimba hanga alumbunune ngwenyi, mukwa-Kristu mweswe mahasa kukwasa chikungulwila hanga chilinunge ni kukaula Mwata wa chikungulwila, Yesu. Iye yamba ngwenyi, yihanda yeswe ya mujimba yakukalakala hamuwika ni ‘kulinunga chize yihanda yeswe yakuhana yize yinafupiwa.’ Kashika chipwe tuli akweze hanji tushinakaji, kawape hanji ka, yika mutu ni mutu atamba kulinga?

⁹ Yesu kakusakula makulwana hanga asongwele chikungulwila, nawa iye kanazange hanga twaavumbike ni kukaula usongwelo wo. (A-Hepreu 13:7, 17) Chino, hi chashi ko kuchilinga mashimbu eswe. Alioze mutuhasa kwita kuli Yehova hanga atukwase. Spiritu yenyi yisandu muyihasa kutukwasa hanga twononokene usongwelo weswao uze makulwana matwaaha. Mutuhasa nawa kukwasa chinji chikungulwila chetu nyi twakulikehesa ni kulivwashana ni makulwana. Chikungulwila chetu muchilinunga, nawa zango lietu hali umwe ni mukwo mulikola.

10. Kuchi tuvumbi akukwasa chikungulwila hanga chilinunge? (Tala chizulie chili ha uputukilo.)

¹⁰ Tuvumbi no kakukwasa chikungulwila hanga chilinunge. Ayo kakukalakala chinji hamuwika ni makulwana, nawa tunasakwilila chinji ha yuma yeswe yize akulinga. Chakutalilaho, tuvumbi kakusela shindakenyo ngwo kuli mikanda yinakumbana hanga tuzachise mu munda, nawa ayo kakutambula ngeji waze akwiza ni kukunguluka ni yetu. Akwo nawa kakululieka ni kukomba mu Zuwo lia Wanangana hanga lipeme. Muze mutukalakala hamuwika ni mandumbu wano, yetu tunalinungu ni kuwayila kanawa Yehova.—Tesa ni Yilinga 6:3-6.

11. Yika akweze mahasa kulinga hanga akwase chikungulwila chilinunge?

¹¹ Amwe makulwana, kakuhondangana chinji mu chikungulwila ha miaka yinji. Alioze ha mukunda wa ushinakaji ayo keshi kuhasa nawa kukalakala chinji ngwe chize apwile nikulinga. Mandumbu waze achili akweze mahasa kwaakwasa. Nyi akweze jacho apwa kufumba kanawa, ayo mahasa kufunga yiteli yinji mu chikungulwila. Nawa, muze tuvumbi makalakala chinji, ayo mahasa kwaatongola hanga apwe makulwana a mu chikungulwila kulutwe lia matangwa. (1 Timoteu 3:1, 10) Amwe makulwana a mu yikungulwila waze achili akweze, kanakolo chinji mu ufulielo. Ayo haliapwila kanakalakala ngwe tulayi a ma mbonge ni kukwasa mandumbu ni mapangi mu yikungulwila yinji. Tunasakwilila chinji muze akweze akulihana ene hanga akwase mandumbu ni mapangi jo.—Tanga Samu 110:3; Chilumbununyi 12:1.

12, 13. Yika muyihasa kukwasa atu eswe mu usoko hanga alivwashane?

¹² Kuchi mutuhasa kukwasa asoko jetu hanga tulivwashane umwe ni mukwo? Kulinga uwayilo wa mu usoko ha poso jeswe muuhasa kutukwasa. Nyi yisemi ni ana mapalikisa mashimbu hamuwika ni kulilongesa hakutwala kuli Yehova, zango lio kuli umwe ni mukwo mulikola chinji. Ha shimbu liacho, ayo mahasa kululieka yuma yize makahanjika mu munda, chino muchikwasa eswe hanga alilulieke kanawa. Nawa muze mevwa umwe ni mukwo mahahanjika hakutwala ku umwenemwene ni kumona ngwo ayo eswe kakuzanga Yehova ni kumuhalisa, ayo mapwa ni usepa upema kuli umwe ni mukwo.

¹³ Kuchi lunga ni pwo mahasa kulivwashana umwe ni mukwo? (Mateu 19:6) Nyi ayo eswe aali mazanga Yehova ni kumuwayila hamuwika, ayo mapwa ni sambukila ni kulinunga mu ulo wo. Ayo nawa katamba kusolola zango kuli umwe ni mukwo, ngwe chize alingile Apalahama ni Sara, Izake ni Rebeka, Elekana ni Hana. (Uputukilo 26:8; 1 Samuele 1:5, 8; 1 Petulu 3:5, 6) Nyi lunga ni pwo malinga chocho, ayo malinunga ni kukundama kuli Yehova.—Tanga Chilumbununyi 4:12.

14. Nyi mukwenu-lunga hanji mukwenu-pwo mecha kuwayila Yehova, yika muhasa kulinga hanga ufunge ulo wenu?

¹⁴ Mbimbiliya yinambe ndusu ngwo, kanda tulimbata ni mutu yoze keshi kuwayila Yehova. (2 A-Korindu 6:14) Alioze kuli amwe mandumbu ni mapangi waze alimbata ni atu waze hi Yela ja Yehova ko. Amwe kalilongesele umwenemwene muze te halimbata kulu, alioze yoze walimbata nenyi kanda achipwa Chela. Akwo kota kalimbachile ni umwe kavumbi wa Yehova, alioze kulutwe lia matangwa, lunga hanji pwo yahichika chikungulwila. Ha chino, akwa-Kristu eswe katamba kusa tachi hanga akolese ulo wo ha kwononokena usongwelo wa mu Mbimbiliya. Kulinga chino hi chashi ko. Chakutalilaho, Maria ni lunga lienyi David, te kakuwayila Yehova hamuwika. Mba hi kulutwe lia matangwa David yecha kuya ku kukunguluka. Alioze Maria yanunga ni kusa tachi hanga apwe pwo mupema ni kusolola yitanga ya akwa-Kristu. Aye yalongesa nawa ana jenyi asambano hakutwala kuli Yehova ni kununga kuya ku kukunguluka ni kukunguluka cha mambonge. Ha kupalika cha miaka, muze ana te hakola nawa hapwa ni mazuwo jo, Maria yanunga ni kulingila Yehova chipwe ngwe chapwile chikalu kuli iye. Mba hi David yaputuka kutanga mikanda yize Maria te akumuhichikila. Ha kupalika cha mashimbu, iye yaputuka kuya nawa ku kukunguluka. Mujikulu wenyi wa miaka yisambano te kakumufungila chitwamo mashimbu eswe, nawa nyi David kayile, mujikulu wenyi te kakwamba ngwenyi “Kaka, nakwivwila usona unji mumu chakumwene musono ku kukunguluka.” Mba, ha kupalika cha miaka 25 David yafuna kuli Yehova, iye ni mukwo pwo haliapwila kanawahilila chinji mumu kanawayila Yehova hamuwika.

15. Kuchi waze alimbachile kulu mahasa kukwasa akweze waze analimbate haliapwila?

¹⁵ Satana kanalimika chinji ni asoko musono. Kashika lunga ni pwo waze akuwayila Yehova katamba kulivwashana umwe ni mukwo. Chipwe ngwe hasuku nwalimbachila, nihindu nyonga ha yize muhasa kwamba hanji kulinga hanga ukolese ulo we. Nyi ulo we hiwalinga miaka yinji, enu munuhasa kupwa chilweza chipema kuli akweze waze analimbate haliapwila. Hanji munuhasa kwaasanyika hanga apwe ha uwayilo wenu wa mu usoko. Ha chino, ayo mamona ngwo, kuma katamba kusolola zango kuli umwe ni mukwo ni kulinunga chipwe ngwe hasuku alimbachila.—Titu 2:3-7.

16, 17. Yika anashimbwila tuvumbi twa Zambi waze alinunga?

¹⁶ Muze A-Izalele te akuya ku chiwanyino mu Yerusaleme, o te kakulivwashana umwe ni mukwo. Ayo te kakululieka yuma yeswe yize te akufupa mu wenyi. Mba hi malinga wenyi hamuwika ni kulikwasa umwe ni mukwo. Mu tembele, ayo eswe te kakuhalisa ni kuwayila Yehova hamuwika. (Luka 2:41-44) Musono, amu tunalilulieka hanga tukatwame mu paraisu, twatamba kulinunga ni kusa tachi hanga tulivwashane umwe ni mukwo. Shina yena muhasa kumona chize muhasa kukaula chikuma chino kanawa?

¹⁷ Atu hano hashi keshi kulivwashana, nawa kakuzwela hakutwala ku yuma yinji. Alioze tunawahilila chinji ha ukwaso wa Yehova wakupwa ni sambukila ni kunyingika umwenemwene! Atu jenyi hashi heswe kanamuwayila mu jila yize iye akuzanga. Kanji-kanji ha matangwa wano akusula, atu ja Yehova kanalinungu chinji kuhiana. Ngwe chize Izaia ni Mika ambile, yetu tunanyina hamuwika ku “mulundu wa Yehova.” (Izaia 2:2-4; tanga Mika 4:2-4.) Mutukawahilila chinji muze atu eswe hano hashi ‘makalinunga hamuwika’ ni kulivwashana kuli umwe ni mukwo hanga awayile Yehova!