UFUNGE uka malunga atamba kufunga nawo mapwo jo? Atu anji kakunyonga ngwe chuma chitangu chize malunga atamba kulinga chili kuhana mbongo kuli asoko jo. Alioze, mapwo amwe waze malunga jo akuwaaha mbongo jinji, kanji-kanji kakwivwa ngwe malunga keshi kwasolwela zango ni kwafunga nawa kakwivwa yikola yinji ku mbunge. Chakutalilaho umwe pwo mu Espanha yoze anavuluka ngwo Rosa, yamba hakutwala kuli lunga lienyi ngwenyi, “Mukwetu-lunga kuli atu akwo kakusoloka ngwe mutu mupema alioze ku zuwo kapwa lunga mupi.” Joy yoze watwama ku Nigeria neye yamba ngwenyi, “Nyi chatayijile chiyulo cha mukwetu-lunga iye kakungwamba ngwenyi, ‘Ena watamba kulinga yuma eswe yize mungukutuma mumu ami mwe nakumbachile.’”

Kuchi lunga mahasa kuzachisa wata wenyi ni zango? Yika muyikwasa lunga kuneha sambukila mu usoko ni kufunga kanawa mukwo-pwo?—Rute 1:9.

Chipwe ngwe lunga ni pwo kali ni ulemu umuwika ku meso ja Zambi, alioze Mbimbiliya yinambe ngwo lunga ni pwo kali ni yiteli yalisa mu usoko. Mukanda wa A-Roma 7:2 unambe ngwo, pwo yoze hanayi ku ulo kali mushi lia “shimbi ya mukwo-lunga.” Chizechene ngwe umwe ululikiso ukwete kasongo, ni Zambi hanase lunga ngwe mutwe hanji mwata wa mukwo-pwo. (1 A-Korindu 11:3) Lunga mwe watamba kusongwela usoko.

Malunga, kuchi nwatamba kuzachisa wata uze Zambi hananwehe? Mbimbiliya yinambe ngwo malunga “zangenu akwenu-mapwo, chizechene ngwe Kristu nawa wazangile chikungulwila.” (A-Efwesu 5:25) Chochene, chipwe ngwe Yesu Kristu kakambachile pwo, alioze iye mahasa kupwa chilweza chipema kuli malunga. Tutalenu chilweza chenyi.

Yesu kapwile ni kulembejeka atu ni kukwasa. Yesu kambile kuli atu eswe waze te akwaahungumiona nawa te akwete yipikalo ngwenyi: “Tweyenu kuli yami, . . . kumungunuhwimisa.” (Mateu 11:28, 29) Iye kanji-kanji te kakwahuzulula ku yikola yo ni kwaha ukwaso wa ku spiritu. Hi kukomokako hakumona atu anji meza kuli Yesu ni ujikijilo weswe hanga akwase ku milonga yo!

Malunga mahasa kwimbulula Yesu. Hakufupa mutapu wakukwashilamo mapwo jo. Mapwo amwe kakwivwa ngwe chize evwile Rosa yoze wambile ni yinyengo yeswe ngwenyi: “Kuli lunga liami napwile wika umwe kapinji.” Kulisa ni lunga yoze anavuluka ngwo Kweku, yoze uli ni chilweza chipema mu ulo wenyi ngwenyi: “Yami nakuhula mukwetu-pwo ha mashimbu eswe yiteli yize natamba kulinga hanga ngumukwase. Amu nakuzanga chinji pwo liami, mashimbu eswe, ami mwe nakukwata chiyulo cha kumukwasa ku milimo yenyi ya ku zuwo.”

Yesu te kakulemesa atu ni kwevwile keke. Umwe pwo chiswale yoze te wayiza chinji ha miaka 12. Muze evwile hakutwala ku yikomokeso ya ndundo ya Yesu, “yanyonga ngwenyi, Chipwe mungusa munwe wika ku hina lienyi mungupwa mungunu.” Kambile umwenemwene. Aye yakundama kuli Yesu nawa yakwata ku songo lia hina lienyi ni kuhinduka hazehene. Chipwe ngwe atu amwe kamwene ngwo yize pwo wacho alingile te kuyalitelele, alioze Yesu kamwene ngwenyi iye te kananyenganyana. * Yesu ni zango lieswe yamulweza ngwenyi: “Mwanami, ufulielo we hiwakupwisa mungunu, uye kanawa ukahinduke ku upupilo we.” Yesu kakevwishile sonyi pwo wacho chipwe kumukekuna ka, alioze aye yanyingika kapinda wa yikola yenyi.—Marku 5:25-34.

Chize malunga mahasa kwimbulula Yesu. Nyi mukwenu-pwo kaso kwivwa kanawa, ena solola zango ni kupwa chihumikiji. Fupa kulinga yuma kulita ni nyonga lienyi ni chize aye akwivwa. Chakutalilaho, Ricardo yalumbununa ngwenyi, “Muze nakumona ngwami, mukwetu-pwo kali ni uli, nakulinga yeswe yize nguhasa hanga nguchine kwamba yuma yize muyihasa kumwivwisa kupihia.”

Yesu te kakuhanjika ni tumbaji twenyi. Yesu kapwile ni kuhanjika ni tumbaji twenyi mashimbu eswe. ‘Hingunanunyingikisa yuma yize yeswe nevwile kuli Tata.’ (Yoano 15:15) Ha mashimbu amwe Yesu te kakuzanga kupwa ukawenyi hanga apukune nawa alembe. Alioze kanji-kanji te kakulweza yize te akunyonga kuli tumbaji twenyi. Tangwa lia ufuku muze te kanda achimushiha ngwe chingalwe, iye ni umwenemwene weswe yaalweza ngwenyi: “Mbunge yami yinevu chinyengo chahiana.” (Mateu 26:38) Chipwe ngwe yitanga yo te yakumuvwisa yinyengo, nihindu, aye kakechele kuhanjika ni masepa jenyi.—Mateu 26:40, 41.

Chize malunga mahasa kwimbulula Yesu. Lweza mukwenu-pwo yize unanyongo ni yize unevu ku mbunge. Umwe pwo yalinyenga ngwenyi, mukwetu-lunga kakuhanjika kanawa ni atu eka, alioze ku zuwo kakuhola kulu. Kulisa ni chino, chilweza cha Ana chinasolola chize iye akwivwa muze mukwo-lunga akumulweza yize alinayo ku mbunge ni chize akwivwa hali iye. Aye yamba ngwenyi: “Nakwivwa ngwami pundu lume lunga liami kakunguzanga chinji nawa chino chakungukwasa ni yami kumuzanga chinji.”

Kuwatambile kuzachisa kuhola ngwe uta hanji muheto hanga umwese mukwenu-pwo lamba. Umwe pwo yamba ngwenyi, “Muze mukwetu-lunga te akwivwa uli, iye te kakulituna kuhanjika ni yami ha matangwa anji. Aye te kakunguvwisa ngwe nguli ni mulonga ni kungulengulula.” Edwin, aye kaneseka kwimbulula chilweza cha Yesu. Aye yamba ngwenyi, “Muze nakwivwa uli, chishi kukumbulula ha shimbu lizeliene, alioze nakushimbwila shimbu lize lialita mba tuhanjike chize twatamba kuhwisa mulonga wetu.”

Joy, yoze hitwavuluka kulu, kakumona chize mukwo-lunga analumuna yitanga yenyi chize haze aputukile kulilongesa Mbimbiliya ni Yela ja Yehova. Joy yamba ngwenyi, “Aye kanalilulieka ni kusa tachi hanga apwe lunga wa zango ha kwimbulula Yesu.” Akwa-kulimbata anji kanayuku chinji ha kulilongesa Mbimbiliya. Shina muuzanga kukaula chilweza cho? Muuhasa kuhanjika ni umwe Chela cha Yehova hanga akulongese Mbimbiliya chawana.