Uwahililo Uze Wakwiza Hakuhana
“KALELA mahasa kuya, alioze Chines au asale!” Wano e maliji evwile Alexandra mu kalela muze te anashimbwila kutangunuka ngiza hakachi ka yifuchi yaali ya mu America. Aye yafwambuka hanga atale yize te yinalingiwa ko, yamona umwe mukweze wa mu China kanapinda kuhanjika limi lia Espanhol hanga alumbunune chimwe chikuma kuli maswalale. Alioze Alexandra yakwasa mukweze wacho mumu te hanalilongesa limi lia chines mu chikungulwila cha Yela ja Yehova.
Chines wacho yamba ngwenyi hanalingi kulu mikanda ya kutwama mu chifuchi alioze kamwiyayo hamwe ni mbongo. Ha uputukilo, swalale wacho katayijile nawa yanyonga ngwe Alexandra kanakwase chines wacho hanga anjile mu chifuchi chakuhona kupwa ni mikanda. Hi kusongo, swalale yatayiza yize chines te analumbununa, alioze chines yafuta limwe lijimo ha kuhona kupwa ni mikanda. Alexandra yahana kuli chines 20 a dolar mumu te keshi ni mbongo ja kufweta. Chines wacho yasakwilila chinji Alexandra nawa yalakenya kuhilwisa mbongo kuhiana 20 a dolar jize amwehele. Alaxandra yalumbununa ngwenyi te kaso kunyonga ha yize matambula, alioze te kanawahilila chinji ha kukwasa mumu kamwene ngwenyi che chuma te atamba kulinga. Yahana kuli chines wacho yimwe mikanda yize yakulumbununa Mbimbiliya nawa yamukolweza hanga alilongese Mbimbiliya ni Yela ja Yehova.
Chili chipema chinji kumona chize atu akusolola yitanga ya kuhana hali yilambala, kwamba pundu, yitanga yino kakuyisolola kuli atu eswe waze akulemba ni waze keshi kulemba. Shina ni yena hiunalihane kama hanga ukwase umwe mutu mu mutapu ngwe uno? Chihula chino chili ni ulemu mumu Yesu kambile ngwenyi: “Chinawaha kutambula alioze shinaho kuhana.” (Yilinga 20:35) Akwa-mana no hanyingika ngwo, kuhana chakulinga kanawa kuli mutu. Tunyingikenu mumu liaka?
“CHIHANYI WA KUSEHEJELA”
Sango jinasolola ngwo, kuhana chakuneha uwahililo. Postolo Paulu kasonekene ngwenyi, “Zambi kakuzanga chihanyi wa kusehejela.” Aye te kanahanjika hakutwala kuli waze te akuhana mulambu hanga akwase mandumbu jo. (2 A-Korindu 8:4; 9:7) Paulu te keshi kwamba ngwo ayo kahanyine ha mukunda wa kuwahilila. Alioze ayo te kanawahilila Kashika ahashile kuhana.
Kulita ni jimwe sango, kuhana “chakukwasa yimwe mijipa ya wongo yize yakuvwisa mutu kuwaha, kulinga usepa, kufuliela ni kupwa ni uwahililo.” Sango jikwo jinasolola ngwo “kuhana mbongo kuli umwe mutu nawa chakuneha chiseke kuli chihanyi kuhiana kujilia jeswe mwene ukawenyi.”
Shina hiunamono kama ngwe kuushi ni uhashi unji wa kukwasa akwenu? Kwamba umwenemwene, yetu eswe mutuhasa kwivwa chiseke ha kupwa ‘yihanyi a kusehejela.’ Nyi tunahane
ni mbunge yipema, kutuchi kupala nyi tuli ni yuma yinji hanji yikehe. Umwe Chela cha Yehova katumine mukanda hanga asakwilile chizavu cha akwa-kusoneka Kaposhi, yamba ngwenyi: “Ha miaka yeswayi, nakulambula mbongo jikehe mu Zuwo lia Wanangana. Alioze Yehova Zambi kakungwaha yuma yinji kuhiana yize nakumwaha. Ngunasakwila chinji ha yize nwakungwaha, chino chakungutakamisa chinji.”Chochene, kuhana, hi wika ko mbongo. Kuli yuma yinji yize mutuhasa kuhana.
KUHANA CHAKULINGA KANAWA KU MUJIMBA
Kuhana chakukolesa usepa
Mbimbiliya yinambe ngwo: “Mukwa keke kakuwahisa mbunge yenyi mwene; alioze mukwa uswi kakupinjisa musunya wenyi mwene.” (Yishima 11:17) Mutu mupema kali chihanyi nawa kakulinga yeswe yize mahasa, ngwe kusa mashimbu, tachi ni yuma yikwo hanga akwase akwo. Kulinga yuma yino chakutuyukisa chinji ku mwono, nawa kuhana chakulinga kanawa ku mujimba wa mutu.
Sango jinasolola ngwo atu waze akukwasa akwo kakuwahilila chinji ku mbunge. Atu jacho kakupwa ni mwono upema. Kuhana chakulinga kanawa atu waze ayiza musongo uze kuushi kuya ngwe, musongo wa Sida ni Esclerose múltipla. Nawa chakukwasa waze anazange kwecha kunwa walwa hanga achine kwivwa yinyengo ni kufunyina kunwa walwa.
Chikuma chino chinasolola ngwo: “keke, umbovu ni upeme, yakukwasa mutu hanga ehuke manyonga api.” Kuhana necho muchihasa kutepulula kulipikala chinji. Atu akufwisa waze alimbata no, mahasa kuhuzuluka kawashi ku yinyengo nyi makwasa akwo.
Chochene, kuhana chakulinga kanawa.
KUHANA CHAKUKOLWEZA AKWETU NO AHANE
Yesu kalwezele tumbaji twenyi ngwenyi: “Hanenu, mba kumakanwaha; njongo yipema, ya kukona, ya kunyikumuna hamwe, ya kusupwoka, kumakayihana mu hina lienu, mumu ni cheseko chize munweseka nacho, kumakanwesekela cheka nawa.” (Luka 6:38) Nyi yena wahana, atu waze wakuhana ni no mafupa kukusolwela usakwililo ni kupwa yihanyi. Kuhana chakukolesa usepa.
Kuhana chakulinga kanawa kuli yena ni kuli akwenu
Sango jize jinatale ha usepa wa atu jinambe ngwo, “atu waze akusolola chinji yitanga ya kuhana kakukolweza akwo no hanga achilinge. Chipwe kutanga mikanda yize yakuhanjika ku upeme neyo yakukolweza atu apwe yihanyi.” Chikwo nawa, kulita ni jimwe shimbi, “mutu umuwika ha internet mahasa kukolweza kama ja atu, waze iye kanyingikine hanji kanda achiliwana no hanga alinge chimwe chuma.” Chekwamba, yitanga ya kuhana ya mutu umuwika muyihasa kukolweza atu anji mu chihunda. Kuwazangile kutwama kumwe kuma ni atu apwa ni yitanga ngwe yino? Chochene, te mutuyuka chinji nyi atu anji apwa yihanyi.
Chimwe chilweza chineza ku mbonge ya Florida, mu U.S.A.
chinasolola yitanga yino. Chimwe chizavu cha Yela ja Yehova chalihanyine hanga chihane ukwaso muze kwapwile umwe kakundukundu. Muze te anashimbwila kululieka mazuwo, yamona chipanga cha umwe mwenyembo hichapuzuka, ayo yachilulieka. Ha kupalika cha mashimbu, mwenyembo wacho yasonekena mukanda ku chishina cha Yela ja Yehova ngwenyi: “Ngunasakwilila chinji. Atu wano kali apema chinji kuhiana.” Aye yasolola usakwililo wenyi ha kutuma mulambu hanga auzachise ha mulimo uze iye avulukile ngwenyi, mulimo walundunjila wa Yela ja Yehova.IMBULULA CHILWEZA CHINENE CHA KUHANA
Akwa-kuhengula kamona ngwo, “atu kakufupiwa kulikwasa umwe ni mukwo.” Nawa ngwo, twanuke “kakupwa ni yitanga ya zango muze kanda achiputuka kuhanjika.” Mumu liaka? Mbimbiliya yinatwehe kumbululo muze yinambe ngwo, atu kalingile “mu chano cha Zambi,” mumu kali ni yitanga ya Zambi.—Uputukilo 1:27.
Yehova Zambi, Sakatanga wetu kali ni yitanga yinji yipema ngwe kuhana. Iye hanatwehe mwono ni yuma yeswe yize twakufupa hanga tuwahilile. (Yilinga 14:17; 17:26-28) Mutuhasa kunyingika Tata yetu wa mu malilu ni upale wenyi wa zango ha kulilongesa Liji lienyi, Mbimbiliya. Mukanda wacho unambe nawa ngwo, Zambi hanapwisa chashi hanga kulutwe lia matangwa tukawahilile. * (1 Yoano 4:9, 10) Yehova Zambi kali chishina cha kuhana nawa yena kakulingile mu chano chenyi, kashika kutwatambile kukomoka nyi wembulula chilweza cha kuhana cha Zambi. Kuhana chakulinga kanawa ku mujimba nawa chakulemesa mutu.—A-Hepreu 13:16.
Unewuluka Alexandra, yoze twavulukanga ha uputukilo wa chikuma chino? Kuchi mba yuma yapwile kulutwe lia matangwa? Chipwe ngwe umwe mwenyembo mu kalela yamwamba ngwenyi, kakisa mbongo jenyi, alioze lunga yoze iye akwashile yafupa masepa mu mbonge muze mwamanyine kalela, chocho yafuta 20 ja dolar. Nawa lunga wacho yapanjika maliji waze amulwezele kuli Alexandra ha chino yaputuka kulilongesa Mbimbiliya. Muze kwapalikile tukweji atatu, Alexandra kanakawahilila chinji ha kuliwana nenyi ha chimwe kukunguluka cha mabonge cha Yela ja Yehova mu limi lia Chines mu chifuchi cha Peru. Lunga wacho yazanga kusolola usakwililo wenyi ha yuma yeswe yize Alexandra alingile hali iye, chocho yatambika Alexandra ni waze alingile nenyi wenyi hanga aye ni kulia mu restaurante yenyi.
Kuhana ni kukwasa akwetu chakuneha chiseke. Chikwo nawa yena muukwasa akwenu hanga anyingike kanawa Chishina cha yuma yeswe yipema—Yehova Zambi! (Tiangu 1:17) Shina yena unawahilila ni yiwape ya kuhana?
^ kax. 21 Mba unyingike nawa tala mukanda wakwamba ngwo, Yika Chamwenemwene Mbimbiliya Yakulongesa? wakutuhwisa kuli Yela ja Yehova, uli nawa ha www.pr418.com. Tala MIKANDA > MIKANDA NI TUMIKANDA.