Ulungu wa kululieka nacho lapi uze Jordão anatambula uli ngwe kuushi ni ulemu niumwe. Chipwe chocho, kuli iye chuma chacho chili chilemu chinji. Jordão yamba ngwenyi: “Russell, umwe kashinakaji nawa te sepa wa usoko wetu, mwe wangwehelewo muze te nguchili kanuke.” Muze Russell te hafwa, Jordão yanyingika ngwenyi, kuma Russell kapwile ni ulemu unji ku mwono wa akako ni yisemi jenyi, ha mashimbu akalu. Jordão yamba nawa ngwenyi: “Muze hinanyingika yuma yinji hakutwala kuli Russell, chawana chino yichipwa ni ulemu unji ku mwono wami.”

Ngwe chize chilweza cha Jordão chasolola, chawana muchihasa kupwa ni ulemu hanji ka ku kumeso ja amwe atu. Alioze yoze machitambula mahasa kuchilemesa chinji, chipwe ngwe cha ndando yikehe. Mbimbiliya yinasolola chimwe chawana chilemu chinji tunanyingika mu maliji wano ngwo: “Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”​—Yoano 3:16.

Chili chawana chize muchihasa kuneha mwono wa mutolo! Shina kuli chimwe chawana chize muchihasa kuhiana chino? Chipwe ngwe atu amwe keshi kuhasa kumona ulemu wa chawana chino, alioze akwa-Kristu amwenemwene ‘kakuchilemesa’ chinji. (Samu 49:8; 1 Petulu 1:18, 19) Mumu liaka Zambi ahanyine mwono wa Mwanenyi ngwe chawana hanga apulule atu?

Postolo Paulu kanasolola mumu liaka ha maliji wano: “Kashika, chizechene ngwe kuli mutu umuwika shili yanjilile hano hashi, ni ku shili kufwa chanjilile.” (A-Roma 5:12) Lunga mutangu, Alama kavulumwine ha kuhona kwononokena Zambi, chino yichimunehena shingo lia kufwa. Ha mukunda  wa Alama, kufwa yichiza hali munyachi wenyi​—⁠che kwamba atu eswe hano hashi.

“Fweto ya shili kufwa, alioze chawana cha vumbi lia Zambi, mwono wa mutolo muli Kristu Yesu Mwene wetu.” (A-Roma 6:23) Zambi katumine Mwanenyi, Yesu Kristu, hano hashi hanga ahane mwono wenyi ungunu hali atu hanga atusule atu ku shingo lia kufwa. Ha mukunda wa chitapo chize ananyingika ngwo “ukuule,” eswe waze mafuliela muli Yesu makapwa ni mwono wa mutolo.​​—⁠A-Roma 3:⁠24.

Hakutwala ku yiwape yeswe yize Zambi anahane kuli akwa-kumuwayila muli Yesu Kristu, Paulu yamba ngwenyi: “Tusakwilenu kuli Zambi ha chawana chenyi chize keshi kuhasa kuchambujola.” (2 A-Korindu 9:15) Chochene, ukuule uli chimwe chawana chipema chinji kuhiana. Mba alioze, ku yawana yeswe yize Zambi hanahane kuli atu, mumu liaka ukuule uli ni ulemu unji kuhiana? Kuchi ukuule unalisa ni yawana yikwo ya Zambi? * Ha chino, yika twatamba kulinga? Tunakwichi hanga uwane kumbululo ha Mbimbiliya lia yihula yili ha yikuma yaali yili mushi.