MALONGESO A CHIFUKILO | SHINA YENA MUTAYIZA CHAWANA CHILEMU CHA ZAMBI?
Kuchi Muhasa Kusolola Usakwililo we ha Chawana Cha Zambi?
“Zango lia Kristu kuliakutushinjika . . . Iye wafwilile eswe, hanga waze achili ni mwono kechi kwenda nawa ni kukaula upale woene, alioze kuli yoze waafwilile mba wahindukile.”—2 A-Korindu 5:14, 15.
CHAWANA chipema chatamba kutukolweza kusolola usakwililo. Yesu kalongesele ulemu wa usakwililo muze awukile kumi lia malunga waze apwile ni yikola ya mbumba yize te kuyishi ni uukiso ha mashimbu jacho. Umwe wa kuli ayo “yahiluka ni liji linene nikuchichimieka Zambi. Yesu yamba ngwenyi: “Kuma, chahindwishile kumi, nyi? Mba livwa alihi-o?” (Luka 17:12-17) Yika twalilongesa ni chilweza chino? Twalilongesa ngwetu twatamba kusakwilila ha yuma yipema yize akwetu akutulingila!
Ukuule unalisa ni yawana yikwo. Uli chimwe chawana chilemu chinji chize hitunatambula kama. Mba kuchi yena muhasa kusakwilila ha yuma yeswe yize Zambi hanakulingila?
-
Nyingika Chihanyi. Ukuule kuushi kuneha ndusu mwono wa mutolo kuli atu. Yesu kambile hakulemba kuli Zambi ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.” (Yoano 17:3) Nyi makulweza ngwo, kuli umwe mutu yoze wapulwile mwono we muze te uchili kanuke, shina kuuchi kusa tachi hanga unyingike mutu wacho ni mumu liaka iye apulwile mwono we? Yehova Zambi kahanyine ukuule hanga apulule mwono wetu, iye kazangile hanga umunyingike wika alioze kanazange nawa hanga upwe ni usepa ukolo ni iye. Mbimbiliya yinambe ngwo, ‘Kundama kuli Zambi, mba iye kumakundama kuli yenu.”—Tiangu 4:8.
-
Fuliela ha chitapo cha ukuule. “Yoze mafuliela mwe Mwana, mwono wa mutolo ali nawo.” (Yoano 3:36) Yika chinalumbunuka kufuliela? Chinalumbunuka ngwo, twatamba kupwa ni yitanga yize muyisolola ngwo twakufuliela ha ukuule. (Tiangu 2:17) Kuchi mutusolola yitanga yacho? Chawana chakupwa cha mutu, muze mutu wacho machitayiza. Ni yetu twatamba kusa tachi hanga tutayize ukuule. Kuchi? Ha kunyingika chize Zambi anazange hanga tutwame ni kulinga yuma kulita ni yize anatulongesa. * Lemba kuli Zambi hanga akukonekene ni kukukwasa kupwa ni mbunge yitoma. Kundama kuli Zambi ni kufuliela ngwe ukuule muukaneha yiwape ya mutolo ngwe sambukila, ukulungunga ni mwono upema!—A-Hepreu 11:1.
-
Pwako ha kukunguluka cha Kwiwuluka kufwa cha Yesu. Yesu katukolwezele kulinga chimwe chiwanyino chize chakutwiwulula ukuule. Hakutwala ku chiwanyino chino iye kambile ngwenyi: “Chilingenu nukangwiwuluke.” (Luka 22:19) Yela ja Yehova makewuluka kufwa cha Yesu ha tangwa liamali 11 lia Abril wa 2017 ha kutoka cha tangwa. Kukunguluka muchikalinga ola yimuwika, mukukapwa pande jize mujikalumbununa kufwa cha Yesu, yiwape yize tuli nayo musono ni yize mutukazuka kulutwe lia matangwa. Ha mwaka wa palika, ha chiwanyino cha kwiwuluka kufwa cha Yesu hapwanga unji wa 20 a tununu wa tununu twa atu hashi heswe. Kashika ni zango lieswe tunakutambika hanga ukapwe hamwe ni yetu hanga tukasolole usakwililo wetu ha chawana chilemu cha Zambi.
^ kax. 7 TJila yipema ya kukundamina kuli Zambi yili kulilongesa Liji lienyi, Mbimbiliya. Nyingika chize muhasa kulinga longeso liacho ha kwita kuli umwe Chela cha Yehova hanji kunjila mu site yetu, www.pr418.com.
Kota Muzanga Chinji Yuma Yize Mumona
SANGO JA YETU
Chiwanyino cha Kwiwuluka Kufwa cha Yesu
Hita mwaka tununu a tununu twa atu hashi heswe, kakukunguluka hanga ewuluke kufwa cha Yesu. Tunakusanyika hanga ukamone mumu liaka chiwanyino chino chilemu chinakwete hali yena.
CHIWANYINO CHA YESU
Iwuluka Kufwa cha Yesu
Tunechi hanga ukalikungulule ni yetu ku chiwanyino chino chilemu. Mukalilongesa chize mwono wa Yesu ni kufwa chenyi muyihasa kukukwasa mu mwono we.
