Ayo kanazomboka chinji! Akwa-tuvwalu awana a ndundo, kanazomboka ngwe kanambe kufwambuka ha mafwo ja Mbimbiliya! Kavwalu mutangu kali mutoma. Yoze uliho kali mwanangana mwaha wa uhenya. Kunyima lienyi kuneza kavwalu muchila ngwe kahia. Yoze unatwamaho kanachiza sambukila hashi heswe. Mukwo wa muchitatu, mulaa pwi. Yoze unatwamaho kali ni mbalasa ku kwoko lienyi kanambujola lusango wa zala. Kavwalu wamuchiwana katomonoka. Kali chilayi cha yikola ni yipikalo yikwo, yoze uliho kali Kufwa. Ni  Mafuka no keshi kuhonga ni kukoka mwono wa atu.​—Usolwelo 6:1-8.

“Ha chisuho chitangu, nevwile woma unji muze natangile sango ja akwa-tuvwalu awana. Namwene ngwe Tangwa lia Usopeso hiliakundama nawa ngwe kanda nguchililulieka. Mba yingumona ngwami kuchichi kulilamwina.”—Crystal.

“Nakomokene chinji ha kulisa cha tuvwalu jacho. Muze nanyingikine ulumbunwiso wa usolwelo uno, mba yuma yiyingulumbunukina.”—Ed.

Shina yena wakwivwa ngwe chize Crystal evwile hakutwala kuli akwa-tuvwalu awana a mukanda wa Usolwelo? Nyi wakwivwa ngwe chize Ed evwile? Sango ja akwa-tuvwalu awana a mukanda wa Usolwelo, kanajinyingika chinji kuli atu. Shina unanyingika ngwe muyuka chinji ha kulilongesa kanawa usolwelo uno? Kuchi muutuyukisa? Zambi kanalakenya ngwenyi, muhasa kuwahilila chinji ha kutanga, kulilongesa, ni kukaula yuma yize anasoneka ha mukanda uno wa uprofeto.​—Usolwelo 1:1-3.

Chipwe ngwe amwe kakwivwa woma wa usolwelo wa akwa-tuvwalu awana, alioze kakausonekene hanga ukuvwise woma. Kwamba pundu, atu anji kakukolesa ufulielo wo ha mukunda wa usolwelo uno, nawa wakwasolwela yize muyiza kulutwe lia matangwa. Che muchihasa kulingiwa kuli yena. Kashika utange.