SARA kanatwama muchipatwilo nawa maputuka ni kutalatala. Nyonga kama umwe pwo wa ku Oriente Médio kali ngwe kananyenganyana. Shina iye kananyenganyana lume? Nyi wamba ngwe ewa, nyingika ngwe iye kali ni chitela cha mumu liaka ananyenganyana. Zuwo linalumbunuka yuma yinji kuli ayo. Iye ni lunga lienyi, Apalahama, kapwile ni mashimbu anji a chiseke mu zuwo liacho. * Nawa kalitungile chimuwika.

Ayo te katwama mu Ure, yimwe mbonge yipema, ya upite unji. Atu jamo te kakulinga milimo ya ku moko ni ulangaji. Chino chinatwaha shindakenyo ngwo ayo kapwile ni upite. Sara te kakuzanga chinji zuwo lienyi, te keshi kulimona wika ngwe lili chihela cha kutulikila yikwata. Mu zuwo liacho iye ni mukwo-lunga kapwile ni mashimbu a chiseke ni a yipikalo. Ayo kapwile ni chitela cha kulemba ni ufulielo weswe kuli Zambi yo wa zango, Yehova. Sara kapwile ni chitela chinene chakuzanga chinji zuwo lienyi.

Chipwe chocho, Sara kakwachile chiyulo chakuhichika yuma yeswe yize te akuzanga. Chipwe ngwe Sara te kali ni miaka 60, iye kalingile wenyi wa kuya mu chimwe chifuchi chize te kanyingikine ni kupwa ni mwono washi, wa ponde nawa wa yipikalo yinji, chipwe chocho iye kakanyongene kufuna kuze akatukile. Mumu liaka ayo alingile wenyi ukalu chize? Nawa yika mutuhasa kulilongesa ha ufulielo wenyi?

Kota Sara kanakakolela mu mbonge ya Ure. Musono mbonge yacho keshi kuyitunga nawa, hiyinapu yikulu. Alioze, ha mashimbu a Sara, ma ulungu anji te akuzauka Lwiji Ufrateze hanga atwale upite ni yuma yilemu ku mbonge yacho. Nawa mbonge yacho te yikwete atu anji waze te akwenda mu matapalo. Nawa ma ulungu anji te akututa yuma yipema yize te akusa mu yitanda. Tunyongenu Sara kanakolela mu mbonge yino, nawa kananyingika ma jina ja atu anji. Ni ayo kananyingika jina lienyi, mumu iye te pwo mupema chinji. Nawa iye te kakwete asoko anji mu mbonge yacho.

Sara kanamusolola mu Mbimbiliya, ha mukunda wa ufulielo wenyi ukolo. Alioze ufulileo wacho hi hali zambi wa kakweji ko, yoze te atu anji akuwayila mu Ure, yoze atungilile kaposhi hanga ngwo zambi wacho apwe hakamwihi ni mbonge. Alioze, Sara te kakuwayila Zambi wamwenemwene, Yehova. Yisoneko kuyishi kulumbununa kuze iye awanyine ufulielo wacho. Tato, ha mashimbu anji te kakuwayila tuponya. Chipwe chocho, iye yalimbata ni Apalahama, yoze wapwile mukulwana hali iye ni miaka 10. * (Uputukilo 17:17) Kulutwe lia matangwa yapwa “tato ya waze eswe akufuliela.” (A-Roma 4:11) Ayo eswe aali, yakolesa umbachiso wo ni kuupwisa upema, ukolo, wa vumbi, ni kulivwashana ni zango lieswe. Nawa te kakulikwasa umwe ni mukwo muze anapinda ni yipikalo. Ku yuma yeswe ai, umbachiso wo te wakola chinji ha mukunda wa zango lio hali Zambi yo.

Sara te kakuzanga chinji mukwo-lunga, nawa ayo eswe aali yahichika zuwo lio ni asoko jo ku Ure. Ha mashimbu akehe ayo yapwa ni umwe kapinda. Mbimbiliya yinatulweze ngwo Sara “te mumba, keshi mwana.” (Uputukilo 11:30) Ha mashimbu jacho,  kupwa mumba te chakuneha yinyengo yinji, che Sara te akwivwa. Alioze Sara yanunga ni kushishika kuli Zambi yenyi ni kuli mukwo-lunga. Muhwa-wenyi mwana-shiwa Lote kapwile ngwe mwano. Ayo yanunga ni mwono wo ndo haze yuma yalumukine.

Apalahama yeza kuli Sara ni sango jipema. Apalahama yakomoka ha yize evwile. Zambi yoze ayo te akuwayila yahanjika ni Apalahama. Chapwile chisuho chitangu chize Zambi asolokele kuli iye, kupalikila muli mungelo! Mutuhasa kunyonga Sara, kanahulikila meso jenyi kuli mukwo-lunga, ni kumuhula ngwenyi: “Yika iye akulweza? Lisesa ngulweze kama!” Kota Apalahama chitangu yatwama hashi hanga anyonge kanawa yize evwa. Mba yamulweza yize Yehova amwambile ngwenyi: “Katuka ku chifuchi che, ni kuli usoko we, ukaye ku chifuchi chize mungukakulweza.” (Yilinga. 7:2, 3) Muze mbunge jo hijahwima, yatala ha mulimo uze Yehova te anahe. Ayo te makatuka mu mbonge yo, mahichika mwono upema hanga aye ni kutwama ngwe yilambala! Kuchi Sara akumbulwile? Apalahama kahulikilile meso jenyi hali Sara ni kushimbwila kumbululo. Shina Sara te matayiza hanga aye ni Apalahama mu wenyi uno usuku?

Ku manyonga jetu mutuhasa kumona ngwe Sara kakasakwile kanawa. Hanji mutuhasa kwamba ngwetu, ‘Zambi kanda achingwita kama, hanji kwita mukwetu-lunga hanga tulinge yuma ya mutapu au!’ Nawa, hi eswe ko akupinda ni yuma ngwe yino. Twatwama hashi haze atu akuzanga chinji upite. Ha mukunda wa chino ayo mahasa kutupiangula hanga tulemese chinji upite, kufupa mwono upema hano hashi ni kusa yuma yacho kulutwe lia mwono wetu. Alioze Mbimbiliya yinatutoweza kulinga yuma yikwo, ngwe kusa yuma ya ku spiritu kulutwe hanga tuvwise Zambi kuwaha, hi yetwene ko. (Mateu 6:33) Ha kukaula yize Sara alingile, mutuhasa kulihula ngwetu, ‘yika ngunanzange kulinga ku mwono wami?’

Sara kamwene yimwe yipikalo muze te analulieka yuma. Iye te katamba kusakula yize mambata ni yize te mahichika. Iye te katambile kumbata yuma yilemu, yize chimbulu ni kamelu te kechi kuhasa kumbata. Nawa chino te muchipwisa chikalu mwono wo ngwe yilambala. Kashika yuma yimwe kayilanjishile yikwo yayihana. Ayo te mapwa nawa ni kapinda mukwo, te keshi kuhasa nawa kuya ku yitanda hanga alande yilima-lima, yifwo, mahina ni yuma yikwo yipema, ngwe chize apwile ni kulinga mu mbonge ya Ure.

Kota kuli Sara chapwile chikalu chinji kuhishika zuwo lienyi. Akwa-kushikulula yuma yikulu kananyingika ngwo, mu Ure mwapwile mazuwo apema, nawa ngwo chamwenemwene Sara kahishikile yuma ni mwono upema. Mazuwo jacho amwe kapwile ni yipatulo yinji, ni meya a apema a kumulonda. Chipwe  mazuwo ayiswale no te kakwete shapa jipema, yikalakala ni yajilo yipema. Shina mbalaka te muyihasa kwafunga hanga ahone kweya kuli eji kuhiana mu zuwo? Hanji kwafunga hanga ahone kwaumbula kuli changwi, ndumba, ursu ni kangunga, waze te akusoloka chinji ha mashimbu akunyima?

Mba asoko? Iya Sara te anahichika kunyima? Shimbi jize Zambi ahele ja ‘kukatuka mu chifuchi cho’ japwile jikalu chinji kuli Sara. Iye kapwile pwo wa zango, wa chiseke, nawa kota kapwile ni ehwa, anatu, atato-pwo ni mandumbu waze te akuzanga chinji, waze hanji kechi kamona nawa. Chipwe chocho Sara kakahilukile kunyima, ha hita tangwa te kakulilulieka hanga alinge wenyi.

Chipwe ngwe kamwene yipikalo yacho, nihindu aye yalilulieka hanga alinge wenyi wa kuya kuze atumine. Tera te kali ni miaka yinji, a mu apwile kalamba wa usoko, kashika iye yaya ni Sara ni Apalahama. (Uputukilo 11:31) Chino chinasolola ngwo Sara te kakuzanga chinji tato. Lote neye “yakatuka ku chifuchi cha A-Kaletea” yaya no hanga ononokene shimbi ja Yehova.—Yilinga 7:4.

O chitangu kendele tando 600 (960 km) yaya ndo ku noroeste ya Harane, yakaula chikulo cha lwiji Ufrateze. Katwamine ndambu mu Harane. Kota ha mashimbu jacho Tera te kanayiza, kashika te kechi kuhasa kwenda chinji. O katwamine mu mbonge yacho ndo muze iye afwile ni miaka 205. Muze ayo te analilulieka hanga alinge nawa wenyi wo, Yehova yahanjika nawa ni Apalahama, yamulweza hanga ahichike chifuchi chacho aye ku chifuchi chize Yehova te mamulweza. Ha mashimbu waze ene, Zambi yamulakenya nawa ngwenyi: “Kumungukakupwisa vungu linene.” (Uputukilo 12:2-4) Alioze muze ayo ahichikile Harane, Apalahama te kali ni 75 a miaka Sara te kali ni 65, nawa te keshi ni mwana. Kuchi te vungu liacho muliza muli Apalahama? Shina iye te mambata pwo mukwo? Ha mashimbu jacho atu te kakuhalika chinji, kashika Sara te anazange kunyingika kanawa hakutwala ku yuma yino.

Chipwe chocho, ayo yahichika Harane yanunga ni wenyi wo. Tunyingikenu waze anende hamuwika ni Apalahama. Mbimbiliya yinatulweze ngwo, Apalama ni usoko wenyi yakatuka hamwe ni upite uze apwile nawo “ni atu eswe aze haliwezela mu Harane.” (Uputukilo 12:5) Atu jacho ayo enowo? Kota, te tuvumbi jenyi. Chipwe chocho, Apalahama ni Sara te kakwambujola ufulielo wo kuli atu waze te akuzanga kupanjika. Jimwe sango jikulu ja A-Yunda jinambe ngwo atu anavuluka ha versu yino nawa te a ku mavungu akwo, waze alichingile ni Apalahama ni Sara hanga awayile Yehova. Nyi che apwile ni kulinga, ufulielo ukolo wa Sara we wamuhele ushindakenyo unji muze apwile ni kuhanjika ni akwo hakutwala kuli Zambi ni kutalatala chenyi. Twatamba kwimbulula ufulielo wenyi, mumu twatwama ha mashimbu waze ufulielo ni kutalatala akuchilelesa chinji. Muze wakutanga chimwe chuma chilemu ha Mbimbiliya, shina wakuchilweza kama akwenu?

Muze ayo te hazauka Lwiji Ufrateze, kota ha kakweji wa 14 wa Nisane, ha mwaka 1943 K.M.J., ayo kapalikile mu jila ya ku uto hanga anjile mu chifuchi chize Yehova alakenyene. (Kutuhuka 12:40, 41) Achinyonga Sara kanatala sali ni sali, kanamona kupema cha chifuchi, ni mavu apema akutwama. Hakamuwihi ni mitondo yinene ya More, hakamwihi ni Shekeme, Yehova yasoloka nawa kuli Apalahama, yamba ngwenyi: “Chifuchi chino munguchihana ku munyachi we.” Liji “munyachi” te mulilumbunuka chuma chilemu kuli Apalahama! Chino chamunyongesene hakutwala ku munda wa Endene, muze Yehova ambile ngwenyi, umwe mukwa-munyachi te manongesa Satana limwe tangwa. Yehova te hanalweze kuli Apalahama ngwenyi, vungu lize te muliza ku chisemuko chenyi te mulineha yiwape hali atu eswe hano hashi.—Uputukilo 3:15; 12:2, 3, 6, 7.

Chipwe chocho, usoko wa Apalahama te muununga ni kumona luyinda wa hano hashi. Apalahama ni usoko wenyi kayile ni kutunga ku uto wa Engitu ha mukunda wa zala yinji yize yapwile mu chifuchi cha Kanana. Alioze, Apalahama kanyongene ha utoji wa chifuchi chacho. Kashika ambile kuli Sara ngwenyi: “Tala, ngunanyingika yena uli chileza ku meso. Chocho muze A-Engitu makumona mamba ngwo, Au mukwo-pwo; mba mangushiha yami, ena musala ni mwono. Ngunaliumbu, nyi makuhula amba ngwe, Nguli ndumbwenyi, hanga chikapwe kanawa ni yami mumu hali yena, ngukamone mwono mumu ha mukunda wa yena.” (Uputukilo 12:10-13) Mumu liaka Apalahama ambile chocho?

 Apalahama te hi mukwa-mahuza ko nawa te keshi kwivwa woma, ngwe chize amwe akwamba hakutwala kuli iye. Kwamba pundu Sara te ndumbwenyi. Kashika manyonga ja Apalahama hakutwala ku utoji te kanalita. Apalahama ni Sara te kananyingika ngwo, kukushi nichimwe chuma chilemu kuhiana upale wa Zambi wa kusema munyachi ni vungu lia Apalahama. Kashika Apalahama te anase tachi hanga afunge mwono wenyi. Kulita ni akwa-kushikulula yuma ya shakulu, ngwo malunga a lufuma mu Engitu te kakwete ndako ya kushiha lunga hanga asale ni pwo lienyi. Kashika Apalahama akwachile chiyulo cha mana, nawa Sara ni kulikehesa cheswe yamwononokena.

Yuma yize yalingiwile yasolwele ngwo, kulipikala cha Apalahama te chili ni chitela; mumu amwe miata ja Falau kamwene ngwo, Sara te chileza, chipwe ngwe te kali ni miaka yinji. Ayo yamulweza Falau, chocho iye yatuma hanga amuneheneyo! Achinyonga ha yinyengo yize Apalahama evwile ni woma uze Sara evwile. Nyi twatala kanawa, Sara kamufungile kanawa, kakamutengele ngwe kapinji. Kota Falau kazangile hanga Sara apwe kasendo kenyi, kashika amusolwelele upite wenyi, nawa te kanazange kufuta upite kuli “ndumbwenyi” Apalahama, hanga apwe pwo lienyi.—Uputukilo 12:14-16.

Achinyonga Sara kali hakapenda mu limwe zuwo lipema nawa linene kanatalatala upeme wa mu Engitu. Kuchi iye evwile ha kupwa nawa mu zuwo lipema, nawa lia too ni kulia chipema? Kota mwono mu Engitu wapwile upema chinji kuhiana mu Ure. Shina Sara kevwile usolo wa kupwa ni mwono wacho? Achinyonga kama kuwaha chize te Satana mevwa ha kumona Sara kanahichika Apalahama hanga apwe pwo lia Falau! Alioze Sara kakalingile chocho. Aye kasolwele ushishiko kuli mukwo-lunga ni kuli Zambi yenyi. Te muchipema chinji nyi atu eswe masolola ushishiko wa mutapu au mu ulo wo, chipwe ngwe katwama hano hashi ha too ni utanji! Kuchi mutuhasa kwimbulula ushishiko wa Sara ha kutwama ni akwetu?

Yehova kalingile yilayi hanga afunge pwo yono wa zango, hakutuma misongo yipi kuli Falau ni akwa zuwo lienyi. Ha chino Falau yanyingika ngwenyi, kuma Sara pwo liambala lia Apalahama. Yamufunyisa kuli lunga lienyi ni kweta hanga akatuke mu Engitu. (Uputukilo 12:17-20) Apalahama kevwile kuwaha chinji ha kupwa cheka ni mukwo-pwo! Ewuluka ngwe iye kambile ni zango lieswe kuli mukwo-pwo ngwenyi: “Ngunanyingika yena uli chileza ku meso.” Alioze iye te kakuzanga upeme ukwo wa Sara, kuhiana upeme wenyi wa ku meso. Sara te kakwete yitanga yipema yize Yehova te akuzanga chinji. (1 Petulu 3:1-5) Ayi ye yitanga yipema yize yetweswe twatamba kupwa nayo. Mutuhasa kwimbulula ufulielo wa Sara, nyi twasa ufulielo wetu kulutwe kuhiana upite, ni kwambujola chinyingi cha Zambi kuli akwetu ni kusolola ushishiko wetu ha shimbi ja Zambi muze mutupwa mu yeseko.