Yami ngunakakolela mu Puerto Limón, yimwe mbonge ya zuzu mu chifuchi cha Costa Rica. Yisemi jami kashichile ana nake, yami te nguli wamuchishimbiali. Tata kafwile muze te nguchili ni miaka nake. Mama katulelele ukawenyi.

Beisebol te che chuma nakulinga chinji ku mwono wami. Chize ha wanuke wami te nakuzanga beisebol. Ha ukweze wami nanjilile mu chimwe chizavu cha beisebol. Muze napwile ni kwasa beisebol mu chizavu chacho, te nguchili ni miaka 20, hazehene yangusanyika hanga ngwase ku chizavu chinene cha beisebol mu Nicaragua. Alioze, ha mukanda wa yikola ya mama yingulituna kuya ku Nicaragua, mumu yami mwe te nakumufunga. Ha kupalika cha mashimbu yangusanyika nawa hanga ngwase beisebol mu chizavu cha chifuchi cha Costa Rica. Ha chino, yingunatayiza. Nashile beisebol mu jina lia chifuchi cha Costa Rica ha miaka ya 1949 ndo 1952. Nawa twashile ni chizavu cha Cuba, Mexico ni Nicaragua. Yami te nguli mukwa-lutwe nawa te nakwasa kanawa. Nashile beisebol yisuho 17 kuhona kulimbenja nihamwe. Te nakuzanga kwivwa muze mbunga malikuwa ni kuvuluka jina liami!

Alioze napwile ni mwono wa luchisa. Chipwe ngwe napwile ni kasendo umuwika, nihindu mashimbu eswe napwile ni mapwo akwo. Te nakunwa chinji walwa. Limwe tangwa nanwine walwa unji. Ha tangwa liasulileho yingutungumuka nguli ha muhela, chakuhona kunyingika chize nafunyine ku zuwo. Nawa te nakuzanga kuta yiheho ya mbongo ku loteria.

Muze te nguchili ni yitanga yino, mama yapwa Chela cha Yehova. Iye kasele tachi jinji hanga ni yami nguzange umwenemwene. Alioze mwambala kakahashile ha chisuho chitangu mumu mbunge yami yeswe te yili ku beisebol. Ha mashimbu waze te nakulilulieka hanga tuye ni kwasa beisebol ni ye zala te chishi kuyivwa! Manyonga jami eswe te kakupwa wika ku beisebol. Yami te nakuzanga chinji basebol kuhiana yuma yeswe!

Alioze, muze napwile ni miaka 29 yingulilemeka chinji ha kukwata bola muze te tunase beisebol. Muze nahindukile, yingwecha kwasa beisebol. Chipwe chocho, yingununga ni kululieka chimwe chizavu cha beisebol ni kuchilongesa, hakamwihi ni zuwo liami.

Ha mwaka wa 1957, yingutayiza kuya ku kukunguluka cha mambonge cha Yela ja Yehova chize chapwile mu chihela chize te nakwashila beisebol. Muze te ngunatwama hakachi ka mbunga, yingumona kulisa cha yitanga ya vumbi ya Yela ja Yehova ni yitanga yipi ya atu waze keshi mu ululikiso akwiza ni kutala beisebol. Yize namwene ha kukunguluka chacho yangukwashile kuputuka kulilongesa Mbimbiliya ni Yela ja Yehova ni kuya ku kukunguluka.

Nevwile kuwaha chinji ha yuma yize te ngunalilongesa mu Mbimbiliya. Chakutalilaho, Yesu kambile ngwenyi, ha matangwa akusula, tumbaji twenyi te mambujola sango jipema ja Wanangana wa Zambi hashi heswe. (Mateu 24:14) Nawa nalilonguesele ngwo akwa-Kristu amwenemwene keshi kutambula mbongo ha mulimo wa kwambujola. Yesu kambile ngwenyi: “Hinunatambula wana, hanenu wana.”—Mateu 10:8.

Muze te nakulilongesa Mbimbiliya, te nakutesa yize yinambe ni yize Yela ja Yehova akulinga. Nakomokene chinji hakumona tachi jize ayo akusa hanga ambujole sango jipema ja Wanangana wa Zambi hashi heswe. Yingumona hali ayo mbunge yakulihana ngwe chize Yesu atumine hanga akwa-Kristu alinge. Kashika muze natangile Marku 10:21 haze Yesu ambile ngwenyi: “Wize ungukaule,” yinguzanga kupwa Chela cha Yehova.

Nalingile mashimbu anji mba ngukwate chiyulo chino. Chakutalilaho, ha miaka yinji te nakuta ‘yiheho ya mbongo’ ha poso jeswe ku loteria ya mu chifuchi. Alioze, yingulilongesa mu Mbimbiliya ngwo Zambi keshi kuzanga atu waze akufuliela ‘zambi’ wakutahisa nenyi yuma ni akwa-kuzo. (Izaia 65:11; A-Kolosu 3:5) Kashika yingwecha kuta yiheho ya mbongo. Ha poso yize yene nechele kuta loteria, numero yami te nakuta nayo loteria yiyikumba! Atu yangupotela mumu ngwo te kuchatele ha poso yacho, nawa yangushinjila hanga ngute cheka, alioze kuchatayijile. Kuchishi kuta nawa yiheho ya mbongo.

Yeseka nawa utu wami waha ha tangwa lize liene angumpapachishile ha kukunguluka cha mambonge cha Yela ja Yehova. (A-Efwesu 4:24) Ha ufuku uzewene muze te ngunahiluka ku zuwo kuze akutambwila ngweji yinguwana mwana pwo yoze te wapwile kasendo kami kali ku chikolo chami. Yaputuka kungusanyika ngwenyi: “Sammy tweya hanga tulisumbakenye!” Alioze, hazehene yingulituna, ngwami: “Ka!” Yingumwewulula ngwami, haliapwila yami ngunatwama kulita ni shimbi ja Mbimbiliya. (1 A-Korindu 6:18) Iye yakomoka ngwenyi, “Yika?” Amu iye te kanyingikine shimbi ja mu Mbimbiliya hakutwala ku upangala yanunga ni kwamba ngwenyi, kukushi upi niumwe mutuhasa kununga ni usendo wetu. Ha chino aye yanjila mu chipatwilo chami nawa yayika pito. Musono nakuwahilila chinji ha kwamba ngwami, chize muze napwile Chela cha Yehova ha mwaka wa 1958, nanunga ni kushishika ha yuma yize yalumuna mwono wami.

Nakwivwa ngwe mungusoneka umwe mukanda hanga ngulumbunune yiwape yeswe yize nakutambula ha kukaula shimbi ja mu Mbimbiliya! Yiwape yacho yili masepa angunu waze nguli no musono, mwono upema ni sambukila.

Chipwe haliapwila nakuzanga chinji besebol, alioze hingunalumuna yitanga yami. Ku besebol, nazukileko lufuma ni mbonge, alioze yuma yino kuyichi kushimbula chinji. Kulisa ni yuma yino, usepa wami ni Zambi ni unungiso wa mandumbu jetu a hashi heswe muukanunga ndo ku miaka yeswe. Mbimbiliya yinambe ngwo: “Ya hashi muyipalika, ni usolo wayo: alioze yoze malinga upale wa Zambi matwama ndo ku miaka ya mutolo.” (1 Yoano 2:17) Haliapwila yami nakuzanga chinji Yehova Zambi ni atu jenyi kuhiana yuma yeswe!