Zambi katangile mujimba wetu ni uhashi wa kuliwuka wene. Muze twakulilemeka chilonda chinene hanji chikehe, mujimba wetu “wakukalakala chinji hanga uliwuke wene.” (kulita ni sango ja Johns Hopkins Medicina) Mujimba wakukalakala hanga ukwike manyinga waze akutuhuka mu mijipa nyi twalilemeka, nawa uli ni uhashi wa kuwuka chilonda chacho ni kutuhwisaho chikowa cheka.

ACHINYONGA HA CHINO: Nyi Sakatanga wetu katangile mijimba yetu ni uhashi wa kuliwuka yene, shina kutuchi kuhasa kufuliela ngwetu iye mahasa kuwuka yinyengo yetu? Mukwa-kwimba masamu kasonekene ngwenyi, Iye “kakuwuka waze anafu mbunge. Kakujichika yilonda yo.” (Samu 147:3) Mba nyi wakunyenganyana chinji ha mukunda wa yuma yize yalingiwile ku mashimbu akunyima hanji haliapwila, kuchi muhasa kupwa ni shindakenyo ngwe, Yehova mahasa kuwuka yilonda ye, haliapwila ni kulutwe lia matangwa?

Zambi kanalakenya ngwenyi: “Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa.” (Izaia 41:10) Mutu yoze unanyingika ngwenyi, Yehova kakumufunga, kakupwa ni ukulungunga mu mbunge, ni tachi ja kukumba kapalia mweswawo mapwa nenyi. Postolo Paulu kavulukile ukulungunga wacho ngwenyi, “sambukila ya Zambi, yize yakuhiana kunyonga cheswe.” Paulu yamba nawa ngwenyi: “Kunahasa kulinga yuma yeswe muli yoze wakunguhashisa.”—A-Fwilipu 4:4-7, 9, 13.

Yisoneko yakutukwasa hanga tukolese ufulielo wetu ha yilakenyo ya Yehova ha kutwala kulutwe lia matangwa. Chakutalilaho, mukanda wa Usolwelo 21:4, 5, (mutuutongola ha lifwo lize mulisulaho) unatulweze yize Yehova makalinga ni mumu liaka mutuhasa kufuliela ngwetu iye makamanununa yilakenyo yino:

• “Iye makakusumuna masoji eswe” ku meso ja atu. Yehova makahwisa lamba lieswe ni yipikalo, chipwe yize yakusoloka ngwe yikehe ku meso ja akwetu.

• “Yoze watwama ha ngunja” ya uhenya wa mu malilu, Mwanangana Mukwa-Ndundo-Jeswe makazachisa ndundo jenyi ni chiyulo hanga ahwise lamba ni kutwaha ukwaso uze tunafupu.

• Yehova kanashindakenya ngwenyi, yilakenyo yenyi yili “yamwenemwene kuyishi mahuza.” Che kwamba, Zambi makamanununa yilakenyo yenyi ha mukunda wa utu ni jina lienyi.

“Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu. yoze watwama ha ngunja wambile ngwenyi, Talenu, ngunatange yuma yeswe yaha. Iye yamba kuli yami ngwenyi, Soneka: mumu yino yuma yamwenemwene kuyishi mahuza.”—Usolwelo 21:4, 5.

Mbimbiliya ni yitangiwa yeswe, yinasolola ndako ni utu wa Tata yetu wa mu malilu, Yehova. Chipwe ngwe yitangiwa yakutukwasa hanga tunyingike kanawa Zambi ngwe sepa lietu, alioze Mbimbiliya yinatulweza ngwo: “Kundamenu kuli Zambi, mba iye kumakundama kuli yenu.” (Tiangu 4:8) Nawa mukanda wa Yilinga 17:27 unambe ngwo: “Katwamine kusuku ni yetu eswe, mutu ni mutu.”

Nyi wachiza mashimbu hanga unyingike kanawa Zambi, muupwa ni shindakenyo ngwe, ‘iye kakukufunga.’ (1 Petulu 5:7) Yiwape yika muupwa nayo nyi wafuliela muli Yehova?

Tala chilweza cha Toru, wa ku Japão. Toru kamulele kuli chisemi mukwa-Kristu, chipwe chocho, iye yaputuka kulinga yuma ya upupilo nawa yanjila mu chizavu chize akuvuluka ngwo, yakuza, chili chizavu cha Yingulungulu a ku Japão. Toru yamba ngwenyi: “Yami te nakunyonga ngwami Zambi kakunguvwila kole, nawa namwene ngwe Zambi kashihile atu waze te nakuzanga hanga angumwese lamba.” Yawezela nawa ngwenyi, ha mukunda wa yuma yipi yize te nakulinga, “mbunge yami yiyikala mbe, nawa te kuchishi kwivwila atu keke.” Chikwo nawa, hamukunda wa kuzo yenyi, yamba ngwenyi, “te ngunazange kufwa ha ukweze wami, muze te mungushiha umwe mutu wa lufuma munji kuhiana yami, chino te muchingupwisa mukwa lufuma.”

 Alioze, muze Toru ni mukwo-mama, Hana, alilongesele Mbimbiliya, Toru yalumuna yitanga ni mwono wenyi. Hana yamba ngwenyi; “Namwene ni meso jami chize lunga liami te analumuna yitanga yenyi.” Haliapwila, Toru kanambe ni shindakenyo yeswe ngwenyi: “Kuli Zambi yoze wakulihulumba ni yetu eswe. Iye keshi kuzanga hanga niumwe mutu akafwe, nawa iye kakukonekena waze eswe akulikonyeka ni mbunge yeswe ha uhenge wo. Iye kakupanjika yuma yize kutushi kuhasa kulweza kuli ni umwe, alioze kuli iye, nawa ni yuma yize mutu niumwe keshi kuhasa kuyinyingika. Kwasala hakehe hanga Yehova ahwise milonga yeswe ni lamba. Chipwe haliapwila, iye kakutukwasa mu mutapu walisa. Iye kakutufunga nawa kakutukwasa muze tunapinda ni yipikalo.”—Samu 136:23.

Ngwe chize twamona ha chilweza cha Toru, kunyingika ngwo, kwasala hakehe hanga Zambi ahwisa luyinda mweswe ni kukusumuna masoji ku meso jetu, kuchishi kutwaha wika shindakenyo ya kutalatala cha kulutwe lia matangwa, alioze chakutukwasa nawa hanga tupwe ni mwono upema haliapwila. Ewa, chipwe ngwe hashi hanazala too ni lamba, nihindu mutuhasa kuwahilila ha ufunge wa Zambi, Tata yetu wa zango.