Nyi Zambi keshi kuneha lamba, mba iya wakuneha zala, uswale, jita, misongo ni luyinda? Liji lia Zambi, Mbimbiliya, linasolola yuma yitatu yize yakuneha lamba kuli atu:

1. Kuzo, Chipululu ni Kole. “Mutu mapwa ni chiyulo helu lia mukwo ni kumupinjisa.” (Chilumbununyi 8:9) Atu kakumona lamba ha mukunda wa uhenge, chipululu ni uswi wa atu api.

2. Mashimbu ni Luyinda Yoze Wakwiza Susumuku. Atu kanjika-kanji kakumona lamba, mumu ‘luyinda kakwiza kuli mutu mweswe susumuku.’ (Chilumbununyi 9:11) Hanji, atu mahasa kupwa ha chihela chipi ni ha mashimbu api, haze mahasa kuliwana ni utoji, amwe keshi kulifunga nawa hanji kakulinga yuma yipi yize muyihasa kwaanehena luyinda.

3. Hashi Heswe Kanayulaho kuli Chingulungulu. Mbimbiliya yinasolola ndusu chitela cha mumu liaka atu akumona lamba. Yinambe ngwo: “Hashi heswe lukombo kuhakupomba mu chiyulo cha mwe chingulungulu.” (1 Yoano 5:19) “Chingulungulu” wacho, mwe Satana Ndiapu, chitangiwa cha spiritu yoze ha uputukilo wapwile mungelo wa Zambi, alioze “kamanyine mu umwenemwene.” (Yoano 8:44) Angelo akwo no yapwa yihulia ku meso ja Zambi mba yalichinga ni Satana hanga alinge usolo wo upi, kashika yalipwisa andemoniu. (Uputukilo 6:1-5) Chize haze aputukile uhulia wo, ni haliapwila Satana ni andemoniu jenyi kakupiangula atu anji hanga alinge yuma yipi. Yino ye ayo akulinga ha matangwa jetu. Haliapwila, Ndiapu kanevu uli unji ni “kupiangula yifuchi yeswe ya hashi,” kashika hano “hashi” hali “lamba” linji. (Usolwelo 12:9, 12) Nawa, Satana kali chilianyi munene. Iye kakuwahilila chinji muze akumona atu anapinda ni lamba. Kashika, Satana mwe wakumwesa atu lamba, hi Zambi ko.

ACHINYONGA HA CHINO: Ndo chilianyi yoze ukwete mbunge yipi, mwe mahasa kumwesa atu waze keshi chitela lamba. Alioze, Mbimbiliya yinambe ngwo: “Zambi iye zango.” (1 Yoano 4:8) Kulita ni utu wenyi wa zango, Mbimbiliya yinambe nawa ngwo, “chipwe kusuku ni Zambi akalinge ungulungulu, chipwe kusuku ni Mukwa-Ndundo-Jeswe akalinge chize chahenga.”—Yombi 34:10.

Alioze, hanji muhasa kulihula ngwe, ha mashimbu angahi Zambi Mukwa-Ndundo-Jeswe mecha hanga Satana anunge ni kuyula? Ngwe chize hitwamona, Zambi keshi kuzanga lamba, nawa iye kakwivwa yikola yinji ku mbunge muze yetu twakumona lamba. Chikwo nawa, Liji lienyi linambe ngwo: “Kunjikenu yipikalo yenu yeswe kuli iye, mumu iye kakunufunga.” (1 Petulu 5:7) Zambi kakutuzanga nawa kali ni ndundo ja kuhwisa lamba lieswe ni upi, ngwe chize mutwe muusulaho muulumbununa. a