LUZIA KAKUCHINGWINYA KU KULU LIA UMAMA. Muze apwile kanuke iye kakwachikile yikola ya kalepa, yize yakukekemesa kulu hanji koko. Muze Luzia apwile ni miaka 16, umwe pwo yoze te akukalakalila yamwamba ngwenyi, “Zambi mwe wakuhele yikola yacho, mumu yena wapwile chihulia nawa te kuushi kwononokena noko.” Iye kakwivwa yikola yinji ku mbunge muze akwiwuluka maliji wano, chipwe ngwe hikwapalika yimwe miaka.

MUZE DAMARIS ANYINGIKINE NGWENYI KALI NI CÂNCER MU WONGO, tato yamuhula ngwenyi: “Yika walinga mba upwe ni yikola yino? Yena kota walinga chuma chipi chinji, kashika Zambi anakumwesa lamba lino.” Maliji wano kamuhele yikola yinji ku mbunge.

Ha miaka yinji atu kakutayiza ngwo, Zambi mwe wakutumwesa lamba. Mukanda uze wakuhanjika ha ndako ni mianda ya ku mashimbu akunyima, (Maneiras e Costumes Bíblicos) unambe ngwo, atu anji ha mashimbu a Kristu te kakutayiza ngwo, “yikola te yakwiza ha mukunda wa shili yeswayo ya mutu, nawa ngwo te kakwayijisa ha mukunda wa shili yacho.” Mukanda wa Medicina Medieval e a Peste unambe ngwo: “Atu amwe te kakutayiza ngwo, Zambi kakwaanehena yilungo hanga aamwese lamba ha mukunda wa shili yo.” Muze atu anji afwile ni yikola ku Europa ha sekulu 14, shina Zambi mwe wanehene yikola yacho hanga aamwese lamba? Nyi shina yikola yacho yejile ha mukunda wa tututu, ngwe chize akwa-kuhengwola ni mandotolo akwamba? Atu anji mahasa kulihula ngwo, shina chamwenemwene lume Zambi kakuzachisa yikola hanga amwese atu lamba hamukunda wa shili yo? a

ACHINYONGA HA CHINO: Nyi Zambi mwe wakuneha yikola ni kapinda mukwo hanga amwese atu lamba, mba mumu liaka Yesu awukile atu waze te ayiza? Chino te kuchishi kusolola ngwo, iye kanalimika ni ululi wa Zambi? (Mateu 4:23, 24) Nilimwe tangwa Yesu kanda achilimika kama ni yitanga ya Zambi. Iye yamba ngwenyi: “Nakulinga matangwa eswe yuma yize ya kupemena kuli iye,” yamba nawa ngwenyi, “chizechene ngwe Tata wanguhele shimbi, chocho nakulinga.”—Yoano 8:29; 14:3.

Mbimbiliya yinasolola pundu ngwo, Yehova Zambi “keshi uhenge.” (Shimbi Yamuchiali 32:4) Chakutalilaho, Zambi kechi kuhasa kuchilumuna ndeke hanga ashihe atu anji waze keshi chitela, hamukunda wa mutu umuwika yoze walinga shili! Kulita ni ululi wa Zambi, Apalahama umwe kavumbi wa Zambi washishika yamba ngwenyi: Zambi ni limwe tangwa kechi “kanongesa akwa ululi hamwe ni yingulungulu.” Iye yamba nawa ngwenyi, chino “chikapwe kusuku ni yena.” (Uputukilo 18:23, 25) Mbimbiliya yinambe nawa ngwo, “Zambi kechi kulinga ungulungulu” hanji keshi kulinga “upi.”—Yombi 34:10-12.

Nyi tunamono lamba kanda tunyonga ngwetu, Zambi mwe unatumwesa lio ha mukunda wa shili yize twalinga. Yesu kahanjikile pundu ha chikuma chino, muze iye ni tumbaji jenyi amwene umwe lunga yoze wasemukine kapuputa. “Tumbaji twenyi yamuhula ngwo, Longeshi, iya wavulumwine, shina yono, nyi shina yisemi jenyi, akasemuke kapuputa? Yesu yakumbulula ngwenyi, Chipwe yono kavulumwine, chipwe yisemi jenyi, ka: alioze hanga akasolole yitanga ya Zambi muli iye.”—Yoano 9:1-3.

 Ha mukunda wa nyonga lipi lize atu apwile nalio, tumbaji ja Yesu kota kakomokene muze iye ambile ngwenyi, lunga wacho chipwe yisemi jenyi kakavulumwine, mba asemuke kapuputa. Yesu kakawukile wika lunga wacho hanga alaule, alioze kachilingile hanga ahwise nyonga lize atu akwete lia kwamba ngwo, Zambi mwe wakuneha lamba. (Yoano 9:6, 7) Atu waze ayiza ha miaka yinji mahasa kupwa ni utakamiso hakunyingika ngwo, hi Zambi ko unamwesa lamba.

Yisoneko yinatulweze ngwo

• “Zambi kechi kuhasa kweseka ni yuma yipi, iye mwene kechi kuzeza niumwe.” (TIANGU 1:13) Nawa yuma “yipi” yeswe yize yakumwesa atu lamba ha miaka yinji, ngwe misongo, yikola ni kufwa, kwasala hakehe hanga Zambi ayihwise.

• Yesu Kristu “yawuka waze eswe ayijile.” (MATEU 8:16) Ha kuwuka waze eswe ayijile, Mwana wa Zambi yasolola yize Wanangana wa Zambi muukalinga hashi heswe kulutwe lia matangwa.

• “Iye [Zambi] makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.”—USOLWELO 21:3-5.

Mumu liaka atu akumona lamba lipwahaha? Atu kakulihula chihula chino ha miaka yinji. Nyi Zambi keshi kuneha lamba, mba iya wakulineha? Yihula yino mayikumbulula ha mutwe uze muusulaho.