Mashimbu atangu waze mwana akusemuka kali alemu chinji hanga ejilile naye. Mumu liaka? Mumu nyi mama makangayika mwanenyi mu kondo ha ola yize akusemuka, chino muchikwasa mwana hanga akole kanawa. a

Yika yakukwasa chisemi hanga asolole zango kuli mwanenyi yoze wasemuka? Longeshi Jeannette Crenshaw kalumbunwine ha mukanda, The Journal of Perinatal Education, ngwo, yuma yize avuluka mu limi lia Putu ngwo, hormônio Ocitocina , ye “yakukasumuna manyonga ja amama muze hasema mwana, ngwe chize chisemi akusunga mwanenyi yoze wasemuka, ni kumukwata.” Hormônio jikwo “jakukwasa pwo hanga azange chinji mwanenyi yoze wasemuka” ni kuwahilila nenyi. Mumu liaka yuma yino yili yilemu?

Sakatanga wetu wa zango, Yehova Zambi, mwe wasele usepa uze watwama hakachi ka mwana ni naye. b Mwanangana Ndawichi te kakutayiza ngwenyi, Zambi mwe wamuchijile “mu jimo” ni kumufunga muze te uchili mu jimo lia naye. Kashika iye alembele ngwenyi: “Nalimbilile hali yena chize ku jimo; yena uli Zambi yami chize ku jimo lia mama.”—Samu 22:9, 10.

ACHINYONGA HA CHINO: Nyi Zambi katangile kanawa yuma yino yakukwasa pwo hanga afunge kanawa mwanenyi, ni kumwaha yize anafupu, shina chino kuchishi kusolola pundu ngwo Zambi nawa kakutufunga, ngwe “ana” jenyi?—Yilinga 17:29.

Yesu Kristu unanyingika kanawa Sakatanga, kambile ngwenyi: “Te keshi kulanjisa tulujila twali ha kalumbongo kamuwika, nyi? Hindu niumwe wa kuli ayo kechi kaholokela hashi shina Tatenu machitayiza: alioze chipwe je kambu ja ku mitwe yenu hanajalula jeswe. Kashika kanda nukevwa woma; yenu kunwahiana tulujila tunji.”—Mateu 10:29-31.

Anji a kuli yetu hanji kutushi kulemesa tujila akehe-akehe, nawa kanda tuchimona ‘niumwe wa kuli ayo kanaholokela hashi.’ Alioze Tata yetu wa mu malilu kakumona hita umwe wa kuli ayo! Tujila—chipwe tujila anji—keshi ni ulemu unji kuhiana atu. Longeso linasoloka pundu: Kanda “wivwa woma” ngwe Zambi kaso kukunyingika. Alioze iye kakukuzanga chinji!

 Yisoneko yinatulweze ngwo

• “Meso a Yehova kanamono kweswe nikutala chipi ni chipema.”—YISHIMA 15:3.

• “Meso ja Yehova katala kuli akwa ululi. Matwi jenyi kajikuka ku muteto wo.”—SAMU 34:15.

• “Munguwahilila ni chiseke mu utu wa zango lie, mumu hiwamona luyinda wami; hiwanyingika lamba lia mbunge yami.”—SAMU 31:7.

Hi chipema ko kunyingika ngwetu, Zambi kanazange hanga tuwahilile ku mwono nawa kakututala ni zango lieswe? Chili chipema, tala yize Ana, c wa ku Inglaterra ambile:

“Ha mashimbu amwe nakwivwa ngwe Yehova keshi kunguzanga nawa ngwe keshi kukumbulula yilemba yami. Ami namwene ngwe chino chakulingiwa mumu kuchishi ni ufulielo. Te nakwivwa ngwe iye kanangumwesa lamba hanji kanangulengulula mumu kuchishi ni ulemu ku meso jenyi. Te nakwivwa ngwe Zambi keshi kunguzanga.”

Haliapwila Ana kali ni shindakenyo ngwenyi, Yehova kakumuzanga chinji. Yuma yika yalumwine manyonga ja Ana? Iye kanalumbununa ngwenyi, “Nalumwine manyonga jami hakehe-hakehe. Ngunewuluka jimwe panda ja Mbimbiliya mashimbu anji kunyima, jahanjikile hakutwala ku ukuule wa chitapo cha Yesu, nawa jangukwashile chinji kunyingika ngwami, Yehova kakunguzanga. Te nakulila chinji hakunyingika ngwami, yilemba yami kakuyikumbulula, mumu Yehova kakunguzanga chipwe ngwe nguli chihenge. Chikwo nawa, kulilongesa Mbimbiliya ni kuya ku kukunguluka, yakungukwasa chinji kunyingika Yehova, utu wenyi ni yize iye akwivwa hakutwala kuli yetu. Haliapwila ngunamono pundu ukwaso wa Yehova ni zango lienyi hali yetu eswe, ni chize akufunga hita mutu.”

Yuma yize Ana amba yakututakamisa chinji. Mba kuchi mutuhasa kupwa ni ushindakenyo ngwetu Zambi kakutunyonga nawa kakulemesa manyonga jetu? Mutwe muusulaho muukumbulula chihula chino.