Tunyongenu ha usepa watwama hakachi ka atu, ngwe wa mapasa. Ayo kakwete usepa ukolo. Nancy Segal, longeshi wakalakala ku Chipatulo cha Akwa-kulilongesa hakutwala kuli Ana-mapasa, yoze neye uli pasa, kambile ngwenyi, “Ana-mapasa amwe mahasa kulinyingika kanawa umwe ni mukwo ni kulivwashana.” Umwe pasa wa pwo kasonekene hakutwala ku usepa uze watwama hakachi ko ngwenyi: “Yetu tunanyingika yuma yeswe hakutwala kuli umwe ni mukwo.”

Yika yakukwasa ana-mapasa hanga apwe ni chinyingi chacho? Akwa-kuhengwola kakwamba ngwo, chisemuko cho ni chize akwaalela, chipi-chipi ana-mapasa waze alifwa chinji, ye yakwakwasa kupwa ni chinyingi chacho.

ACHINYONGA HA CHINO: Sakatanga wa mana wano eswe a chisemuko, kananyingika yuma yeswe hali yetu. Nawa, Ndawichi mukwa-kwimba masamu kambile ngwenyi: “Wangutokekele mujimo lia mama. Muze angutangile ku tenga . . . yifwaha yami kuyaswamine kuli yena. Meso je amwene mujimba wami shimbu kanda uliwumba. Mu mukanda we yihanda yami yeswe muyili te ya kusoneka.” (Samu 139:13, 15, 16) Zambi wika mwe unanyingika kanawa chize twapwa ni yuma yize yakulingiwa ku mwono wetu. Chinyingi cha Zambi hakutwala ku chize atutangile chinatwehe ushindakenyo ngwetu, Zambi kananyingika kanawa yize yakulingiwa kuli hita mutu.

Ndawichi kalembele ngwenyi: “Yehova, yena hiunapolongoza mu mbunge yami, hiunanguse chinyingi. Unanyingika ni kutwama chami ni kukatuka chami. Kunyonga chami kuchakulumbunuka kuli yena chipwe kusuku. Nilimwe liji kulishiho ha limi liami, shina yena Yehova unalinyingika ndusu.” (Samu 139:1, 2, 4) Chikwo nawa, Yehova kananyingika kanawa manyonga jetu, nawa “kakunyingika kutaka cha manyonga eswe.” (1 Sango ja Mianangana 28:9; 1 Samuele 16:6, 7) Yika versu yino yinatulongesa hakutwala kuli Zambi?

Chipwe ngwe hakulemba kutushi kwamba yuma yeswe yize twakunyonga nawa ni yize twakwivwa, nihindu Sakatanga wetu keshi kutala wika ha yize twakulinga, alioze kakunyingika nawa mumu liaka tunalingi yuma yacho. Nawa, iye kananyingika tachi jize twakusa hanga tulinge yuma yipema, chipwe ngwe uhenge wetu wakutukwika kulinga yuma yacho. Kwamba pundu, ha mukunda wa zango lize Zambi atusele mu mbunge, iye kakuwahilila ha kumona manyonga a zango waze ali mu mbunge yetu.—1 Yoano 4:7-10.

 Yisoneko yinatulweze ngwo

• “Meso ja Mwene hwali hali akwa ululi. Matwi jenyi kakupanjika ku kuliumba cho.”—1 PETULU 3:12.

• Zambi kanalakenya ngwenyi: “Mungukufumba, mungukulongesa jila yize chakutamba kwenda. Mungukwaha mana nikukutala ni liso liami.”—SAMU 32:8.

Kunyingika ngwetu, Zambi kananyingika kanawa kapinda wetu ni yize twakwiva, chakutukwasa hanga tukumbe kapinda wacho. Tutalenu yize yalingiwile kuli Anna, wa ku Nigéria. Iye yamba ngwenyi, “yami te nakumona ngwe mwono kuushi ni ulemu ha mukunda wa kapinda wami. Yami nguli tuliwa, nawa te nakufunga mwanami wa pwo yoze te uli mu shipitali ha mukunda wa musongo uze avuluka ngwo, Hidrocefalia (hanji meya anji mu wongo), ni yami yangupima ngwo nguli ni musongo wa câncer de mama nawa te katamba kungupasula ha mukunda wa musongo wacho, ni kulinga quimioterapia ni radioterapia . Chapwile chikalu chinji kuli yami kupwa mu shipitali hamwe ni mwanami yoze te unayiji.”

Yika yakwashile Anna kukumba kapinda wacho? Iye yamba ngwenyi, “kunyonga ha chisoneko ngwe cha A-Fwilipu 4:6, 7, chinambe ngwo, ‘sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu.’ Muze nakwiwuluka chisoneko chino, nakwiva ngwe nguli hakamwihi ni Yehova, ni kunyingika ngwami, iye kanangunyingika kanawa kuhiana yami mwene. Nawa mandumbu jami a mu chikungulwila kangukwashile chinji.

“Chipwe ngwe ngunachipinda ni yipikalo, alioze yami ni mwanami hitwahinduka. Amu Yehova kali hamwe ni yetu, hitwanyingika ngwetu, nyi mutupalika mu kapinda, kutwatambile kulinyenga. Mukanda wa Tiangu 5:11 unambe ngwo: “Twakuavuluka ngwetu, Akwa kuwaha, waze anyongonwene. Hinunevu ha kunyongonona cha Yombi. Hinunamono songo lia mwe Mwene, iye wa too ni vumbi ni keke.” Yehova te kananyingika kanawa kapinda wa Yombi, ni yetu mutuhasa kupwa ni shindakenyo ngwetu, iye kananyingika kanawa kapinda wetu.