Keke kakuyilumbununa ngwo, “uhashi wa kwivwa yize akwetu anevu, hanji kunyonga yize akwetu anapalika.” Ndotolo Rick Hanson, yoze wakuwuka musongo wa matachi kambile ngwenyi, “keke yatwama mu yifwaha yetu.”

ACHINYONGA HA CHINO: Mumu liaka atu wika e akwiva keke? Mbimbiliya yinalumbununa ngwo, atu kaatangile mu chifwa cha Zambi. (Uputukilo 1:26) Yetu katutangile mu chifwa cha Zambi hanga tuhase kwimbulula utu wenyi ni kusolola yitanga yenyi yipema. Kashika, muze keke yakutwala mutu hanga akwase akwo, chino chakusolola ngwo, ayo kanembulula Sakatanga wo wa keke, Yehova Zambi.—Yishima 14:31.

Zambi kakutuvwila keke, nawa kakwivwa yinyengo ha kumona chize tunapinji ni lamba. Hali A-Izalele, waze apwile ni kumona lamba mu undungo ku Engitu, ni kwenda mu puya ha miaka 40, Mbimbiliya yinambe ngwo: “Mu huli [hanji lamba] lio lieswe iye wamwene huli.” (Izaia 63:9) Hano twamona ngwetu, Zambi kakanyingikine wika lamba lio. Alioze neye kamwene lamba hamwe no. Iye yamba ngwenyi, “Chamwenemwene hinamona luyinda wa atu jami.” (Kutuhuka 3:7) Zambi yamba ngwenyi, “Mumu yoze manusunga chapwa ngwe kunguchoka ha katumba ka liso.” (Zekaria 2:8) Muze akwetu akutumwesa lamba, neye kakwivwa yikola ku mbunge.

Mbimbiliya yinambe ngwo, nyi mutwivwa ngwe kutwatelele keke ya Zambi, twatamba kunyingika ngwetu, “Zambi iye munene wahiana mbunge jetu, kananyingika yuma yeswe.” (1 Yoano 3:19, 20) Zambi kanatunyingika kanawa kuhiana yetu ene. Iye kananyingika lamba lieswe lize tuli nalio, ni yize tunanyongo ni chize tunevu. Iye kakutuvwila keke yinji.

 Yisoneko yinatulweze ngwo

• “Munukatambika ni Yehova makanukumbulula. Munuteta mba iye mamba ngwenyi, Yami uno.”—IZAIA 58:9.

• “Yehova kanambe ngwenyi, Ngunanyingika manyonga aze nguli no hali yenu; manyonga akunuwahisa hi akunupinjisa ko. Manyonga akunwaha kutalatala ku yuma ya kulutwe. Mba munutambika kuli yami, nikwiza ni kulemba kuli yami mba mungunwivwa.”—JEREMIA 29:11, 12.

• “Sako kama masoji jami mu mulangi we. Te mu mukanda we keshimo, nyi?”—SAMU 56:8.

Kunyingika ngwo, Zambi kakutuvwila keke, chakutukwasa hanga tukumbe yipikalo yetu. Tala sango ja Maria:

“Muze mwanami wa miaka 18 afwile ni musongo wa câncer, nevwile yikola yinji nawa nevwile ngwe mwono wapwa ukalu chinji. Yinguvwila Yehova uli mumu kakalingile ni chimwe hanga amuuke!

“Muze kwapalikile miaka yisambano, nahanjikile ni umwe sepa mu chikungulwila, iye yapanjika chize te ngunalinyenge ngwami Yehova keshi kunguzanga. Nawa yangupanjika wika ni kungwecha hanga nguhanjike ha mashimbu anji. Kulutwe mba yatongola chimwe chisoneko chize changukwachile chinji ku mbunge. Chisoneko chacho chapwile mukanda 1 Yoano 3:19, 20, chinambe ngwo: “Zambi iye munene wahiana mbunge jetu, kananyingika yuma yeswe.” Mba iye yangulumbunwina ngwenyi, Yehova kananyingika kanawa lamba lietu.

“Chipwe chocho, chakaliwile chinji kuli yami kwecha uli uze te ngunevu! Mba yingutanga Samu 94:19, yoze unambe ngwo: ‘Hakachi ka kulumbama cha manyonga jami muchima, kulembejeka che chakunguwahisa.’ Nevwile ngwe chisoneko chino yami achisonekenene! Haliapwila, mba hinaputuka kuhanjika ni Yehova hakutwala ku lamba liami ni kumwita ukwaso, ni kunyingika ngwami iye kakungupanjika nawa kanangunyingika kanawa.”

Chili chipema kunyingika ngwo, Zambi kananyingika kapinda wetu, nawa ni iye kakumona lamba hamwe ni yetu! Alioze mumu liaka twakumona lamba lipwahaha? Shina Zambi mwe unatumwesa lamba liacho ha mukunda wa upi uze twakulinga? Shina Zambi malinga chuma cheswacho hanga ahwise lamba lieswe? Yihula yino mutuyishimutwina ha mitwe yize muyisulaho.