MUZE KWAKULINGIWA LUYINDA, SHINA YENA WAKULIHULA NGWE, ‘ZAMBI KULIHI TE ALI?’ HANJI MUZE MUPALIKA MU LUYINDA, MUHASA KULIHULA NGWE, SHINA ZAMBI KAKUNGUFUNGA NYI?

Hanji muhasa kwivwa ngwe chize Sheila yoze watwama ku Estados Unidos evwile. Iye kamulele kuli yisemi waze te afuliela chinji, alioze yamba ngwenyi: “Chize ha wanuke wami te nakusa tachi hanga ngukundame kuli Zambi, mumu iye mwe Tangi yetu. Chipwe chocho kanda nguchililivwa kama ngwe nguli nenyi hakamwihi. Nawa te ngunanyingika ngwami iye kakungumona, alioze kusuku akungutalila. Chishi kwivwa ngwami, Zambi kakunguvwila kole, nawa chishi kutayiza ngwami, iye kakunguzanga.” Mumu liaka Sheila te akukakajana? Iye yamba ngwenyi: “Asoko jami kapalikile mu luyinda munji, nawa te chakusoloka ngwe, Zambi keshi kulinga ni chimwe hanga atukwase.”

Chizechene ngwe Sheila, ni yena muhasa kutayiza ngwe, Zambi Mukwa-Ndundo-Jeswe katwamako. Chipwe chocho, yena hanji muhasa kulihula nyi chamwenemwene Zambi kakukufunga. Yombi lunga wa ululi, yoze te wafuliela ha ndundo ni mana ja Sakatanga, neye kapwile ni kukakajana. (Yombi 2:3; 9:4) Muze Yombi apalikile mu luyinda munji, iye yahula Zambi ngwenyi: “Kuchi te nwanguswekelele meso jenu nikungumona ngwe nguli mukwa kole yenu?”—Yombi 13:24.

Yika Mbimbiliya yinambe? Shina Zambi mwe wakuneha luyinda? Shindakenyo yika tuli nayo ngwetu, Zambi kakuzanga atu eswe hanji hita mutu? Hakutwala hali hita mutu, shina mutuhasa kunyingika nyi Zambi kakutumona, kanatunyingika, kakwete keke, hanji kakutukwasa kukumba milonga yetu?

Ha yikuma yize muyisulaho, mutushimutwina ha chize yitangiwa yinatulongesa hakutwala ku chize Zambi akutufunga. (A-Roma 1:20) Mba mutumona nawa yize Mbimbiliya yakulongesa hakutwala ku ufunge wa Zambi hali yetu. Muze yena mununga ni ‘kumunyingika’ kupalikila mu yitangiwa yenyi ni Liji lienyi, mupwa ni shindakenyo yinji ngwe iye ‘kakukufunga.’—1 Yoano 2:3; 1 Petulu 5:7.