Katutangile Hanga Tutwame ndo ku Miaka ya Mutolo
IYA WA kuli yetu yoze kazangile kuwahilila ni mwono wa miaka yeswe hano hashi? Achinyonga chize mwono te muupwa nyi mututwama ndo ku miaka yeswe chakuhona kuyiza hanji kufwa! Kachi te twakupalikisa mashimbu anji hamwe ni atu waze twazanga, kulinga wenyi, kupwa ni utotombo ni kulilongesa yuma yeswe yize twakuzanga.
Shina chili chipi kupwa ni nyonga lia kutwama ku miaka yeswe? Mumu liaka atu akuzanga kutwama ku miaka yeswe? Mbimbiliya yinasolola ngwo, Zambi katutangile ni nyonga liacho. (Chilumbununyi 3:11) Mbimbiliya yinambe nawa ngwo, “Zambi iye zango.” (1 Yoano 4:8) Zambi kakutuzanga, kashika iye kechi kuhasa kusa mu mbunge yetu nyonga lia mwono wa miaka yeswe, nyi te keshi ni uhashi wa kutwaha mwono wacho.
Kwamba pundu, niumwe keshi kuzanga kufwa. Mbimbiliya yinambe ngwo, kufwa chili “mukwa kole” wetu. (1 A-Korindu 15:26) Atu amwe kakulianga kufwa, akwo ka. Chipwe chocho yetu eswe mutufwa. Atu anji kakwivwa woma muze akunyonga ngwo makafwa. Shina mukwa-kole yono makamukumba? Shina makamukumba lume?
USHINDAKENYO WA KUTALATALA CHETU
Shina unanyingika ngwo, Zambi kakatangile atu hanga afwe? Mbimbiliya mu mukanda wa Uputukilo, muli yuma yize yinatwahe shindakenyo ngwo, Zambi katangile atu hanga atwame ku miaka yeswe hano hashi. Yehova Zambi katangile hashi ni yuma yeswe yize atu akufupa hanga awahilile. Mba yatanga mutu mutangu, Alama ni kumusa mu paraisu, mu munda wa Endene. Kulutwe, mba “Zambi yamona yuma yeswe yize halinga ngwenyi, Yinapeme chikolo.”—Uputukilo 1:26, 31.
Zambi katangile Alama ni mujimba ungunu nawa muchano chenyi. (Shimbi Yamuchiali 32:4) Eva, pwo lia Alama, neye kapwile ni mujimba ungunu. Yehova yaalweza ngwenyi: “Semenu nukaliokese, nukazalise hashi, ni kuyulaho. Nukayule yishi a mu kalunga-lwiji, ni tujila a mwilu, ni tushitu eswe akwenda hashi.”—Uputukilo 1:28.
Te mukumbata mashimbu anji, mba Alama ni Eva azalise hashi ni munyachi wo. Eva te mapwa ni ana, ana jacho no te masema ana, ndo muze hashi te muhazala ngwe chize Zambi ambile. (Izaia 45:18) Nyi Yehova katangile Alama ni Eva hanga atwame ha mashimbu akehe wika, kachi kakaahele mulimo wa kusema hanga azalise hashi.
Achinyonga ha mulimo uze Zambi aahele wa kuyula tushitu. Iye kalwezele Alama hanga ahane majina kuli tushitu, chino te muchimbata mashimbu anji. (Uputukilo 2:19) Alioze, mba te ayule tushitu, iye te katamba kulilogesa hakutwala kuli ayo ni kunyingika chize te maafunga. Chino te muchimbata mashimbu anji.
Usongwelo wa Zambi wa kuzalisa hashi ni kuyula tushitu, te unasolola ngwo, Zambi katangile Alama ni Eva hanga atwame ku miaka yeswe. Alioze, chino chakalingiwile.
UPALE WA ZAMBI WAPWILE NGWO, ATU ATWAME KU MIAKA YESWE MU PARAISU HANO HASHI
AYO KANAKATWAMA MIAKA YINJI
Alama, 930 a miaka
Metusela, 969 a miaka
Noa, 950 a miaka
Musono, 70-80 a miaka
Mbimbiliya yinasolola ngwo, atu ku mashimbu akunyima te kakutwama miaka yinji kuhiana yetu musono. Yinambe ngwo: “Matangwa eswe a mwono wa Alama makulakaji livwa a miaka ni makumi atatu a miaka.” Mbimbiliya yinasolola nawa atu asambano waze atwamine miaka kuhiana 900! Atu jacho kanavuluka ngwo, Sete, Enoshe, Kenane, Yara, Metusela ni Noa. Wano eswe katwamine shimbu Sanga lia Meya te kanda lichiza, Noa te hapwa ni 600 a miaka muze Sanga lia Meya liejile. (Uputukilo 5:5-27; 7:6; 9:29) Kuchi ayo ahashile kutwama ha miaka yipwa-haha?
Malunga wano, muze asemukine atu te achili hakamwihi ni mwono ungunu uze Alama ni Eva atokesele. Chino kota che chakwashile hanga atwame miaka yinji. Alioze kuchi ungunu unalite ni kutwama miaka yinji? Kuchi kufwa makachikumba? Alioze, mba tuwane kumbululo lia yihula yino, chitangu twatamba kunyingika mumu liaka twakushinakajiwa ni kufwa.
Kota Muzanga Chinji Yuma Yize Mumona
ESSENTIAL BIBLE TEACHINGS
Mumu Liaka Zambi Atangile Hashi?
Hashi hazala too ni yuma yipema. Usuhwe watwama mukachi ka hashi ni tangwa walita, ni hashi hasendala kanawa, ni kulijinga chaho nawa chalita. Mumu liaka Zambi asele tachi ni kupemesa hashi chichize?
