Kuchi Muhasa Kupwa ni Mwono Upema?
ZAMBI kakazangile hanga atu apwe ni mwono uze ali nawo musono. Hashi te hatamba kupwa atu waze akuvumbika wata wa Sakatanga wetu, akukaula usongwelo wenyi, ni kwimbulula yitanga yenyi. Ayo te katamba kukalakala hamuwika, kufunga usoko wo, ni kupwisa hashi heswe paraisu.
ZAMBI KANALAKENYA KUHANA MWONO UPEMA KULI ATU KULITA NI UPALE WENYI
-
“Hamanununa jita ndo ku songo lia hashi.”—Samu 46:9.
-
“Tangwa hilieza lize muukonona waze akwonona hashi.”—Usolwelo 11:18. MW 1991.
-
“Niumwe watungako mamba ngwenyi, Ngunayiji.”—Izaia 33:24.
-
“Makawahilila ni milimo ya moko jo.”—Izaia 65:22.
Kuchi uprofeto uno muukamanunuka? Zambi hanasakula Mwanenyi Yesu hanga apwe Mwanangana wa mu unguvulu wenyi uze muukayula hashi. Mbimbiliya yakuvuluka unguvulu uno ngwo, Wanangana wa Zambi. (Daniele 2:44) Mbimbiliya yinambe hakutwala kuli Yesu ngwo: “Mwene Zambi kumakamwaha nguja, . . . iye kumakayula.”—Luka 1:32, 33.
Muze Yesu apwile hano hashi, kalingile yikomokeso yinji hanga asolole chize mwono wa atu muukapema kulutwe lia matangwa, muze makayula hashi.
YESU KASOLWELE CHIZE MAKAYUKISA ATU WAZE AKWONONOKENA ZAMBI
-
Muze Yesu awukile misongo yeswe, kasolwele chize makahwisa yikola yeswe.—Mateu 9:35.
-
Muze aholesele kakundukundu munene, kasolwele chize makafunga atu ku tachi ja chisemewa.—Marku 4:36-39.
-
Muze alishile tununu twa atu, kasolwele ngwo makahana kulia chinji kuli atu.—Marku 6:41-44.
-
Muze Yesu alumwine meya apwe vinyu, kasolwele ngwo, makahana yuma yinji yipema kuli atu.—Yoano 2:7-11.
Kuchi muhasa kupwa ni mwono uze Zambi anazange kuhana kuli atu jenyi? Kuli yimwe “jila” yize watamba kukaula. Mbimbiliya yinalumbununa jila yacho ha kwamba ngwo, “chikolo chize cha twala ku mwono, chikehe, ni ye jila yikehe, ni waze akuyiwana akehe.”—Mateu 7:14.
WANA JILA YIZE MUYIKUTWALA KU MWONO UPEMA
Jila ya mwono yika? Zambi kanambe ngwenyi: “Yami Yehova nguli Zambi yenu, yoze wakunulongesa hanga nukalumbunuke, yoze wakunusongwela mu jila yize chanutamba kuya.” (Izaia 48:17) Kwendela mu jila yacho che muchitukwasa kupwa ni mwono upema.
Yesu kambile ngwenyi: “Ye jila yami, ni we umwenemwene, ni we mwono.” (Yoano 14:6) Kufuliela ha umwenemwene uze Yesu alongesele ni kwimbulula chilweza chenyi, ye muyitukwasa kukundama kuli Zambi ni kuyuka ku mwono.
Kuchi muhasa kuwana jila ya mwono? Kuli ma yingeleja anji, alioze Yesu kambile ngwenyi: “Hi mweswe ko mamba kuli yami ngwenyi, Mwene, Mwene, makanjila mu wanangana wa malilu, alioze yoze wakulinga upale wa Tata yoze uli mu malilu.” (Mateu 7:21) Yamba nawa ngwenyi: “Ku mihuko yo kumunukaanyingika.” (Mateu 7:16) Mbimbiliya muyihasa kukukwasa kunyingika uwayilo wamwenemwene ni wa mahuza.—Yoano 17:17.
Kuchi muhasa kwenda mu jila ya mwono? Muhasa kuchilinga ha kunyingika Sakatanga wetu: Sakatanga wacho iya? Jina lienyi iya? Kuchi apwa? Yika analingi? Yika anazange hanga tulinge? *
Zambi te kanazange hanga atu alinge yuma yinji, hi wikako kukalakala, kulia, kuheha ni kusema. Mutuhasa kunyingika Sakatanga wetu ni kupwa masepa jenyi. Mutuhasa kusolola ngwetu, twakumuzanga ha kulinga yuma yize yakumupemena. Yesu kambile ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika.”—Yoano 17:3.
ZAMBI KAKUTULONGESA CHIZE MUTUYUKA KUPALIKILA MU MBIMBILIYA.—IZAIA 48:17
PUTUKA KWENDA MU JILA YA MWONO
Kulilongesa kulinga yuma yize Zambi akuzanga chakufupiwa kwalumuna yimwe ku mwono wetu. Muchihasa kupwa chikalu kwenda mu jila ya mwono. Alioze, kwenda mujila yacho chili chipema chinji, kashika, twatamba kulikolweza hanga tununge ni kwendamo. Nyi muzanga akukwase kuwana kumbululo lia yihula hakutwala kuli Zambi, Yela ja Yehova mawahilila kulilongesa Mbimbiliya ni yena chawana ha ola ni ha chihela chize muzanga. Muhasa kwita longeso lia Mbimbiliya ha site yetu www.pr418.com.
