CHIPWE ngwe uhulia wa yisemi jetu atangu, Alama ni Eva, wanehene shili ni kufwa kuli ana jenyi eswe, nihindu upale wa Zambi hakutwala kuli atu kuwalumukine. Mu Mbimbiliya, Zambi kanasolola pundu ngwenyi, upale wenyi kuwalumukine.

• “Akwa ululi kumakazuka chifuchi; kumakatwamamo ku miaka ya mutolo.”—Samu 37:29.

• “Kumakakumba che kufwa ndo ku miaka ya mutolo mba Mwene Yehova makusumuna masoji ku meso eswe.”—Izaia 25:8.

• “Mukwa kole wa kusula kujimisa, hi kufwa.”—1 A-Korindu 15:26.

• “Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.”—Usolwelo 21:4.

Kuchi Zambi “makakumba che kufwa”? Ngwe chize twamona, Mbimbiliya yinasolola pundu ngwo, ‘akwa ululi . . . kumakatwama ku miaka ya mutolo.’ Alioze yinambe nawa ngwo, “kuheshi mutu niumwe hano hashi yoze wakulinga chipema.” (Chilumbununyi 7:20) Shina chino chinalumbunuka ngwo Zambi kechi kamanununa upale wenyi wa kutwaha uhashi wa kutwama ku miaka yeswe? Ka! Zambi makamanununa upale wenyi, mumu iye “keshi mahuza.” (Titu 1:2) Yika Zambi makalinga hanga amanunune upale wenyi hakutwala kuli atu?

Yehova Zambi kahanyine chawana cha zango hanga apulule atu ku kufwa—ha kufweta ukuule. Ukuule uli ngwe ndando yize akufweta hanga atusule mutu hanji afwete umwe mulonga. Atu eswe kali yihenge, nawa kakufwa, kashika Mbimbiliya yinambe pundu ngwo: “Niumwe hakachi ko mahasa kukuula mwanakwo, nichimwe, chipwe kuhana kuli Zambi upite wa kumukuula nawo. Mumu ukuule wa mwono wo ukalu, mba wakuhwa ndo ku miaka ya mutolo.”—Samu 49:7, 8.

Muze mutu akufwa, kakufweta mulonga wa shili yenyi; kechi kuhasa kukuula akwo, chipwe kufweta ha milonga yo. (A-Roma 6:7) Te kunafupiwa mutu mungunu yoze keshi shili hanga ahane mwono wenyi ha shili yetu.—A-Hepreu 10:1-4.

Chino che Zambi alingile. Iye yatuma Mwanenyi Yesu hanga asemukine hano hashi ngwe mutu mungunu yoze keshi shili. (1 Petulu 2:22) Yesu kambile ngwenyi, kejile hanga ahane “mwono wenyi ndando ya ukuule hali anji.” (Marku 10:45) Iye kafwile hanga akumbe mukwa-kole wetu kufwa, mba tukapwe ni mwono wa mutolo.—Yoano 3:16.

Musono, kulita ni umanunuko wa uprofeto wa mu Mbimbiliya, tuli ha “miaka yikalu,” yize yinasolola ngwo, tuli “ha matangwa a kusula” cha yuma ya mwakono. (2 Timoteu 3:1) Matangwa a kusula makahwa muze makanongesa “yitanganyanyi.” (2 Petulu 3:3, 7) Alioze atu waze akuzanga Zambi, makaalamwina ni kutambula chiwape cha “mwono wa mutolo.”—Mateu 25:46.

Atu anji muze makaahindwisa makapwa ni uhashi wa kutwama ku miaka yeswe. Yesu kasolwele chize uhindukilo wa afu wapwa muze ayile mu limbo lia Naine. Muze mwana umuwika wa tuliwa afwile, Yesu “yamuvwila keke,” hachino, yamuhindwisa. (Luka 7:11-15) Postolo Paulu kasonekene ngwenyi: “Ngunafuliela Zambi . . . ngwami, Kumukukapwa uhindukilo wa akwa ululi ni wa yihenge.”  Kutalatala chino, chinasolola zango linene lia Zambi hali atu.—Yilinga 24:15.

Atu anji mahasa kutwama ku miaka yeswe. Mbimbiliya yinambe ngwo: “Akwa ululi kumakazuka chifuchi; kumakatwamamo ku miaka ya mutolo.” (Samu 37:29) Ha mashimbu jacho, ayo makawahilila chinji ni kutakama ha kumona umanunuko wa maliji waze postolo Paulu asonekene ha amwe 2,000 a miaka kunyima, anambe ngwo: “Yena kufwa, lumunyi we ulihiye? Yena fuka, kukumba che chilihicho?” (1 A-Korindu 15:55) Kufwa, mwe mukwa-kole munene wa atu, makamukumba!