Atu amwe kakutayiza ngwo sango ja Mbimbiliya hanajalumuna. Alioze profeta Izaia kambile ngwenyi, Liji lia Zambi “kumulikakola lia mutolo.” (Izaia 40:8) Kuchi mutuhasa kupwa ni shindakenyo ngwetu, Liji lia Zambi kulialumukine?

Zambi kali ni ndundo ja kufunga Liji lienyi ni kukinda hanga achine kulialumuna. Ku mashimbu akunyima, akwa-kusoneka te kakusa shindakenyo hanga achine kuchiza hanji kuwezela maliji ha Yisoneko Yisandu. Chipwe chocho, ayo kapwile yihenge, kashika amwe kalingile tupalia akehe-akehe.

Kuli yivungo yinji yikulu ya Yisoneko Yisandu. Nyi chivungo chimwe muchilisa hakehe, mahasa kuchitesa ni chivungo chikwo hanga awane umwenemwene. Mba unyingike sango jikwo, tala chikuma “A Bíblia foi alterada?” (Shina Sango ja Mbimbiliya Kajalumwine?) chili ha site jw.org.

Chakutalilaho, achitala mikanda yikulu yize avuluka ngwo yivungo ya ku Mar Morto awanyine kuli bedouins mu chivwenge hakamwihi ni Mar Morto ha mwaka 1947. Mu yivungo yacho yikulu, muli Yisoneko Yisandu yize asonekene hikwapalika miaka kuhiana tununu aali. Akwa-mana katesele yivungo yino yikulu ni Yisoneko Yisandu yize tuli nayo musono. Yika ayo awanyine?

Akwa-mana kamwene ngwo, yisoneko ya Mbimbiliya yize tuli nayo musono yinalite ni yize yikulu. * Chimwe kuhengwola chize alingile mu yivungo yacho yikulu, chinasolola ngwo, yize twakutanga mu Yisoneko Yisandu yili sango ja Zambi. Kashika, mutuhasa kupwa ni shindakenyo ngwetu, Zambi kafungile kanawa Yisoneko Yisandu mumu lia yetu musono.

Kashika, mutuhasa kutanga Liji lia Zambi ni shindakenyo yeswe ngwo kulialumukine. Hachino, tuhengwolenu yize mutuhasa kulilongesa hakutwala kuli Zambi kupalikila muli aprofeta jenyi.