Tulilongesenu Hakutwala Kuli Zambi Kupalikila Muli Aprofeta Jenyi
Ku mashimbu akunyima, Zambi kahanyine sango jilemu kuli aprofeta jenyi hakutwala kuli atu. Shina sango jacho, mujihasa kutukwasa tumone chize mutuyuka yiwape ya Zambi? Ewa, mujihasa. Tutalenu yize mutuhasa kulilongesa hali aprofeta atatu ashishika.
APALAHAMA
Zambi keshi katonde nawa kanazange kuwahisa atu eswe.
Zambi kalakenyene profeta Apalahama ngwenyi: “Muli yena mavungu eswe a hashi kumakaawahisa.”—Uputukilo 12:3.
Yika twalilongesa? Twalilongesa ngwetu, Zambi kakutuzanga chinji, nawa kanazange kuwahisa atu eswe waze akumwononokena, malunga, mapwo ni twanuke.
MOSE
Zambi kali mukwa-keke nawa kakuwahisa waze akusa tachi hanga amunyingike.
Mukwa-Ndundo-Jeswe kahanyine ndundo kuli profeta Mose hanga alinge yikomokeso. Mose yalemba ngwenyi: “Ngulweze kama majila je, ngukunyingike hanga nguwane vumbi kumeso je.” (Kutuhuka 33:13) Zambi yawahilila ni kwita cha Mose, chocho yamuwahisa ni yinyingi ni malinjekela, yanyingika majila ni yitanga Yenyi. Mose yanyingika ngwenyi, Sakatanga wetu kali “Zambi mukwa keke, mukwa vumbi.”—Kutuhuka 34:6, 7.
Yika twalilongesa? Twalilongesa ngwetu, Zambi kanazange kutuwahisa tulieswe, malunga, mapwo ni twanuke, nyi twasa tachi hanga tumunyingike kanawa. Iye kanasolola mu Yisoneko Yisandu chize twatamba kumuwayila ni chize anazange hanga atuwahise.
YESU
Yesu kasolwele keke kuli atu ni kuwuka yikola ya mulali weswe
Mutuhasa kuzuka yiwape ya mutolo ya Zambi, nyi mutulilongesa hakutwala kuli Yesu ha yize alingile ni yize alongesele.
Mu Liji lia Zambi muli yuma yinji hakutwala ku mwono wa Yesu ni yize alongesele. Zambi kahanyine ndundo kuli Yesu hanga alinge yikomokeso ngwe kuwuka tupuputa, afwa-matwi ni yitonji. Iye nawa kahindwishile afu. Yesu yasolola yiwape yize Zambi makahana kuli atu kulutwe lia matangwa. Iye kalumbunwine chize hita umwe wa kuli yetu mahasa kuzuka yiwape yacho hakwamba ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.”—Yoano 17:3.
Yesu kapwile mukwa-keke, mukwa-zango nawa chimbovu. Kashika malunga, mapwo, twanuke ni tushinakaji te akuzanga kupwa hamwe ni Yesu ni kutayiza maliji jenyi anambe ngwo: “Lilemenu ku kanga yami, lilongesenu kuli yami; mumu nguli mukwa kushimbika, mukwa kulikehesa mu mbunge; mba kumunuwana uhwimino ku mbunge jenu.” (Mateu 11:29) Kulisa ni atu akwo ha mashimbu jacho waze te akumwesa mapwo lamba, Yesu nihindu te kakutwama ni mapwo kanawa ha kwasolwela umbovu, kwalemesa ni kwavumbika.
Yika twalilongesa? Twalilongesa ngwetu, Yesu kazangile chinji atu, chocho yatuhichikila chilweza chipema cha chize twatamba kutwama ni akwetu.
YESU HI ZAMBI KO
Mbimbiliya yakulongesa ngwo, “Zambi umuwika uliko.” Nawa ngwo, Yesu kapwile kanganda ka Zambi yoze te wakulikehesa. (1 A-Korindu 8:6) Yesu mwene kalumbunwine ngwenyi, Zambi yoze wamutumine hano hashi kamuhiana.—Yoano 11:41, 42; 14:28. *
^ kax. 17 Mba unyingike nawa sango jikwo hakutwala hali Yesu Kristu, tala chikuma 8 ni 9 ha mukanda Verdadeira Fé—O Segredo de uma Família Feliz, uze uli ha site jw.org.