Tulieswe tuli a ku chisemuko cha mutu mutangu, Alama, kashika tulieswe tuli asoko. Asoko katamba kulizanga ni kulivumbika umwe ni mukwo, alioze hi yino ko twakumona musono. Zambi kakazangile hanga atu ahone kulizanga ngwe chize tunamono musono.

“Ukazange mukwenu ngwe wakulizanga yena mwene.”—ULEVI 19:18.

“Zangenu akwa kole jenu.”—MATEU 5:44.

Tala chize Zambi alumbunwine zango mu Liji lienyi ha 1 A-Korindu 13:4-7:

“Zango uhomboloji lili nawo, utu lili nawo.”

Achinyonga hachino: Kuchi wakwivwa nyi atu amwe makusolwela uhomboloji ni kuhona kulivutula ni kawashi muze mulinga chuma chipi?

“Zango kulishi kupwa ni lufwachinda.”

Achinyonga hachino: Kuchi muwivwa nyi atu amwe makwivwila chipululu ni kufupa kukulinga upi?

“Zango kulishi kufupa yuma yalio-liene.”

Achinyonga hachino: Kuchi muwivwa nyi atu akwo mavumbika nyonga lie ni kuhona kulikwachilila ha manyonga jo?

“Zango kulishi kushinginyeka yipi.”

Achinyonga hachino: Atu waze akulinga yuma yipi nyi malikonyeka, nihindu Zambi kakwakonekena. Mbimbiliya yinambe ngwo: “Zambi keshi kwambamba matangwa eswe, chipwe utenu wenyi keshi kuufunga ndo ku miaka ya mutolo.” (Samu 103:9) Tulieswe twakuzanga atu waze akutukonekena. Kashika, ni yetu twatamba kukonekena akwetu muze matulinga upi.—Samu 86:5.

“Zango kulishi kuwahilila mu uhenge.”

Achinyonga hachino: Nyi yuma yipi muyilingiwa kuli yetu, kutushi kuzanga hanga akwetu awahilile ha lamba lize tunamono. Kashika, ni yetu nawa kutwatambile kuwahilila muze akwetu mapalika mu yuma yipi, chipwe ngwe katulingile chuma chipi.

Mba tuzuke yiwape ya Zambi, ni yetu twatamba kusolola zango lia mutapu au kuli atu chipwe ngwe kali ni miaka yalisa nawa aku vungu hanji yingeleja yeka. Jila yimwe yakusolwelamo zango liacho yili, kukwasa waze anafupiwa ukwaso.