MALONGESO A CHIFUKILO | SANGO JA CHIZE MBIMBILIYA—YINANUNGU NDO MUSONO
Mbimbiliya Yanungine Chakuhona Kuyenyeka
PONDE: Papiru ni pergaminhu yapwile yuma yitangu yize akwa-kusoneka Mbimbiliya ni akwa-kuyisonejeka apwile ni kuzachisa hanga asonekeho yisoneko. * (2 Timoteu 4:13) Mumu liaka mutuhasa kwamba ngwetu, yuma yino yasele Mbimbiliya mu ponde?
Papiru yashi kusuwika, kujimuka sona nawa yilelu. Mukwa-kulilongesa yuma ya mu Engitu Richard Parkinson ni Stephen Quirke yamba ngwenyi: “Papiru muyihasa kupiha ni kwalumuka fufuta. Papiru nyi mayivumbika, chivungo muchihasa kupiha ha mukunda wa kukekema chipwe kuyilia kuli tungenye-ngenye hanji yiswa.” Papiru jimwe muze ajiwanyine kajisele ha mwalwa unji hanji mu yihela yize te yatutuminya, chino chalingishile hanga jipihe kawashi.
Pergaminhu yili yikolo kuhiana papiru, alioze neyo yakupihia kawashi nyi yanjila mwalwa unji ni kututuminya. *Neyo kakuyilia kuli tututu. Ha chino mukanda, Everyday Writing in the Graeco-Roman East, unambe ngwo: “Chili chikalu yisoneko yikulu yinunge.” Nyi yisoneko ya Mbimbiliya yakapwile kufunga kanawa, kachi sango jamo jatokele.
CHIZE MBIMBLIYA YANUNGINE: Shimbi ya A-Yunda te yakukolweza mianangana eswe A-Izalele hanga ‘alisonekene Shimbi yino ha umwe mukanda’ yize te yakatuka ha mikanda yitangu yitano ya Mbimbiliya. (Shimbi Yamuchiali 17:18) Chikwo nawa, akwa-kusonejeka yisoneko kalingile yivungo yinji, kashika ha sekulu yitangu ha M.J., yisoneko yacho te akuhasa kuyiwana mu masunangonga amu Izalele nawa ni aku Masedoniya. (Luka 4:16, 17; Yilinga 17:11) Mba, kuchi yimwe yisoneko yikulu yanungine ndo musono?
Yisoneko yize avuluka ngwo Yivungo ya Mar Morto yalingile sekulu jinji mu mivungo ya uma muchima lia yimwe yivenge yomu
Mukanda wa umwe mukwa-mana Philip W. Comfort, New Testament, unambe ngwo: “A-Yunda te kakwete ndako yakutulika yivungu ya Yisoneko mu yikwachilo hanji mivungo ya uma.” Ni akwa-Kristu no kanungine ni ndako yacho. Yimwe yisoneko yitangu ya Mbimbiliya hanayiwane mu mivungo ya uma, mu yimwe yipatulo, mu yivenge ni ku yihela yomu.
KUYUKA: Tununu a yihanda ya yisoneko ya Mbimbiliya, hiyalinga miaka 2000, muyichinunga ndo musono. Kuchizako Mbimbiliya kukushi nawa mikanda yikwo yize yili ni yisonejeko yinji ya kushakulu.
^ kax. 3 Papiru hanji manenga yili yuma yize akuzachisa hanga asonekeneho, kakuyilinga ni yimwe mitondo ya ku nganga ya lwiji mitondo yacho neyo kayivuluka ngwo, papiru. Pergaminhu kakuyilinga ni yikonda ya tushitu.
^ kax. 5 Chakutalilaho, mukanda uze unahanjika hakutwala ku Lipanda lia E.U.A asonekene ha pergaminhu, haliapwila hikwalinga miaka 250, hiunapihia nawa sona jaho kujishi kusoloka kanawa.
