ATU AMWE KAKWAMBA NGWO uwayilo atu e atombele; akwo kakunyonga ngwo, Zambi kakuzachisa uwayilo hanga akwase atu kukundama kuli iye. Mba kuchi yena wanyonga?

YIZE MBIMBILIYA YAKULONGESA

Kuli umwe ‘uwayilo upema nawa wamwenemwene kumeso ja Tata Zambi.’ (Tiangu 1:27) Uwayilo upema nawa wamwenemwene wakukatuka kuli Zambi.

YIKA MUTUHASA NAWA KULILONGESA MU MBIMBILIYA?

• Uwayilo mba uvwise Zambi kuwaha, watamba kukatuka mu umwenemwene wa Mbimbiliya.—Yoano 4:23, 24.

• Uwayilo uze wakukatuka ha manyonga ja atu kuushi ni ulemu niumwe.—Marku 7:7, 8.

• Shina chili chilemu kupwa mu umwe uwayilo?

SHINA MWAMBE NGWE

• Ewa

• Ka

• Kota

YIZE MBIMBILIYA YAKULONGESA

“Tulitalenu umwe ni mukwo ni kulikasumuna ku zango ni yitanga yipema. Kanda twehuka kulikungulula hamuwika.” (A-Hepreu 10:24, 25) Zambi kanazange hanga tuvumbi twenyi alilulieke ngwe chimwe chizavu.

YIKA MUTUHASA NAWA KULILONGESA MU MBIMBILIYA?

• Waze akuwayila Zambi hamuwika, katamba kulinunga mu ufulielo.—1 A-Korindu 1:10, 11.

• Tuvumbi waze Zambi akutayiza kakulinunga mu undumbu hashi heswe.—1 Petulu 2:17.