1. Lumbununa mumu liaka chili chilemu kunyingika kanawa shimbu ni yuma yize yinalingiwa hakachi ketu. (Tala chizulie ha uputukilo.)

TE HIKWASALA hakehe hanga kukunguluka cha mambonge chiputuke. Kasongo yaya ndo ku uhanjikilo ni kutambwisa atu eswe. Mwaso te hiwaputuka kulu. Atu te hanyingika kulu ngwo mashimbu akutwama hakundama. Te kanazange kwivwa mwaso upema ni kushimbwila kwivwa pande jize te mahanjika. Alioze kota hapwile amwe mandumbu waze kakapanjikile kanawa kasongo hanji te keshi kumona ngwo mwaso hiwaputuka kulu. Kashika o kakasela shindakenyo ngwo kukunguluka te hichaputuka, nihindu te machendangana ni kuhanjika ni masepa jo. Yuma yino, yinasolola yize muyihasa kulingiwa nyi kutwanyingikine kanawa shimbu hanji yuma yize yinalingiwa hakachi ketu. Lino lili longeso lilemu mumu kwasala hakehe mukulingiwa chimwe chuma chilemu chinji, kashika twatamba kulilulieka. Chuma chika chenacho?

2. Mumu liaka Yesu ambile kuli tumbaji twenyi hanga anunge ni ‘kulawola’?

² Yesu Kristu katowezele tumbaji twenyi hakutwala ku ulemu wa kulawola ni kulilulieka ha “kumanunuka cha miaka.” Yaamba ngwenyi: ‘Kanyamenu, lawolenu, lembenu: mumu kunwanyingikene muze mwaka muupwa.’ Yaamba nawa ha yisuho yinji ngwenyi: Nungenu ni ‘kulawola.’ (Mateu 24:3; tanga Marku 13:32-37.) Mukanda wa Mateu unasolola nawa ngwo, Yesu katowezele tumbaji twenyi hakutwala ku chikuma chino. Aye yaalweza ngwenyi: Nungenu ni ‘kulawola mumu kunwanyingikine ha ola yize Mwene wenu meza.’ Yaatoweza nawa ngwenyi: “Lilulikenu; mumu mwe Mwana Mutu kumakeza ha ola yize kunwashinginyekene.” Mba hi yaamba ngwenyi: ‘Lawolenu se kunwanyingikine tangwa, chipwe ola.’—Mateu 24:42-44; 25:13.

3. Mumu liaka twakusela shindakenyo ha utowezo wa Yesu?

³ Yela ja Yehova kakusela chinji shindakenyo ha utowezo uze Yesu ahanyine. Tunanyingika ngwetu, tuli ha ‘mashimbu a ku songo’ nawa kwasala hakehe hanga “luyinda munene” aputuke! (Daniele 12:4; Mateu 24:21) Ngwe chize Yesu ambile, tuvumbi twa Yehova kakwambujola sango lipema lia Wanangana hashi heswe. Nawa twakumona jita, yikola, minyiko, ni zala ku yihela yeka ni yeka. Kuli kalumbanganyiso wa mayingeleja hamwe ni ungulungulu ni upupilo unji kuhiana ku mashimbu akunyima. (Mateu 24:7, 11, 12, 14; Luka 21:11) Alioze tunashimbwila shimbu lize Yesu meza hanga amanunune upale wa Tato.—Marku 13:26, 27.

4. (a) Mumu liaka tunafuliela ngwetu, Yesu haliapwila kananyingika shimbu lize Armagedone muyikaputuka? (b) Chipwe ngwe kutwanyingikine shimbu lize luyinda munene meza, nihindu shindakenyo yika tulinayo?

⁴ Muze twakuya ku kukunguluka cha mambonge, twakunyingika hola yize chihanda ni chihanda muchikaputuka. Alioze, chili chikalu etu kunyingika kanawa shimbu lize luyinda munene makaputuka. Muze apwile hano hashi, Yesu kambile ngwenyi: ‘Hakutwala ku tangwa lize ni ola yize niumwe kayinyingikine, chipwe angelo a mwilu, chipwe Mwana ka, alioze Tata wika.’ (Mateu 24:36) Alioze, kota haliapwila Yesu kananyingika shimbu lize jita yacho muyikaputuka, mumu iye mwe makasongwela jita ya Armagedone. (Usolwelo 19:11-16) Alioze, yetu nihindu kutwanyingikine tangwa ni ola yize songo mulikeza. Kashika, chili chilemu chinji kuli yetu kununga ni kulawola. Yehova hanatese kulu shimbu lize luyinda munene maputuka, ha tangwa ni tangwa shimbu liacho linakundama. ‘Kulichi kahona!’ (Tanga Habakuke 2:1-3.) Mumu liaka twatamba kupwa ni shindakenyo lia tangwa liacho?

5. Hana chilweza chinasolola ngwo Yehova kanji-kanji kakumanununa uprofeto wenyi ha shimbu lize lialita.

⁵ Uprofweto wa Yehova kanji-kanji wakumanunuka ha shimbu lize lialita! Chakutalilaho, achinyonga tangwa lize iye atuswile atu jenyi mu Engitu. Liapwile tangwa 14 lia Nisane ha mwaka 1513, muze Kristu te kanda achisemuka. Kulutwe, Mose yasoneka hakutwala ku tangwa liacho ngwenyi: ‘Ha kuhwa cha miaka 430, ha tangwa lizeliene yizavu yeswe ya Yehova yikatuka ku chifuchi cha Engitu.’ (Kutuhuka 12:40-42) Ha tangwa 14 lia Nisane ha mwaka 1943 muze Kristu te kanda achisemuka, ha miaka yoyene 430 muze A-Izalele te kanda achaatusula mu undungo, Yehova yaputuka kumanununa chilakenyo chize alingile kuli Apalahama cha kuwahisa munyachi wenyi. (A-Ngalishia 3:17, 18) Hakupalika cha amwe mashimbu, Yehova yalweza Apalahama ngwenyi: ‘Nyingika pundu ngwe akwa munyachi we makapwa yilambala mu chifuchi chize hi nicho ko, makapwa ndungo, makaamwesa lamba ha miaka 400.’ (Uputukilo 15:13; Yilinga 7:6) Miaka 400 yaputukile ha mwaka 1913 shimbu Kristu te kanda achisemuka, muze Ishemali aputukile kumwesa Izake lamba. Miaka yacho yahwile ha tangwa lize Yehova atuswile A-Izalele mu Engitu. (Uputukilo 21:8-10; A-Ngalishia 4:22-29) Chochene, kulakaji ya miaka kulutwe Yehova te hanatese kulu tangwa lize te matusula atu jenyi mu undungo!

6. Mumu liaka twatamba kupwa ni shindakenyo ngwetu, Yehova makalamwina atu jenyi?

⁶ Yoshua kapwile umwe wa kuli A-Izalele waze atuswile ku Engitu. Hakupalika cha miaka iye yewulula A-Izalele ngwenyi: ‘Yenu nunanyingika mu mbunge jenu ni mu alma jenu ngwenu, Nichimwe chuma kuchahonene cha yuma yeswe yipema yize Yehova Zambi yenu hananulakenya. Yeswe hinamanunuka hali yenu; nichimwe kuchahonene.’ (Yoshua 23:2, 14) Yehova hanalakenya kulamwina atu jenyi ku luyinda munene ni kwaha mwono wa mutolo mu chifuchi chaha. Nawa mutuhasa kupwa ni shindakenyo ngwetu, chilakenyo chenyi muchikamanunuka. Kashika nyi tunazange hanga tukatwame mu chifuchi chacho haha, twatamba kununga ni kulawola.

7, 8. (a) Mulimo uka te tulayi akulinga ku mashimbu akunyima, nawa longeso lika twalilongesa? (b) Hana chilweza cha yize te muyilingiwa nyi tulayi maya tulo.

⁷ Mutuhasa kuwana limwe longeso hali tulayi waze te akufunga mambonge ku mashimbu akunyima. Mambonge jacho anji, ngwe Yerusaleme, te yapwa ya kujingilika ni yipanga yisuku-yisuku hanga akwa-kole ahone kunjila mukachi. Tulayi te kakutwama helu lia yipanga yacho, helu liacho o te kakuhasa kumona kanawa mbonge yeswe. Tulayi akwo te kakutwama ku yikolo ya mbonge. Malunga jacho te katamba kununga ni kulawola ufuku ni mwalwa, nyi o mamona akwa-kole kaneza, te kakutoweza atu mu mbonge. (Izaia 62:6) Ayo te kanyingika ulemu wa kununga ni kulawola ni kutala-tala kanawa mbonge. Nyi kachilingile, atu anji te mahasa kufwa.—Ezekiele 33:6.

⁸ Yosefwe yoze wasonekene sango hakutwala kuli A-Yunda, kalumbunwine chize A-Roma ahashile kunjila mu Yerusaleme ha mwaka 70 muze Kristu te hafwa kulu. Tulayi waze te akufunga mbonge kayile mu tulo. Ha chino, maswalale A-Roma yahasa kunjila mu mbonge. O kayile ndo ni ku tembele, yayocha, nawa yanongesa Yerusaleme yeswe. Yono kapwile luyinda munene wakasula yoze vungu lia A-Yunda amwene.

9. Yika atu anji keshi kunyingika musono?

⁹ Manguvulu anji musono kakwete maswalale ni yikumba yikwo ya mana yize yakufunga mwono wo. Manguvulu jacho kakutala kuli mutu mweswawo hanji chuma cheswacho, chize muchihasa kupihisa ukulungunga mu chifuchi. Alioze o keshi kunyingika ngwo kuli umwe unguvulu wa ndundo jinji mu malilu uze anayulu kuli Kristu Yesu. Unguvulu wacho kwasala hakehe hanga wase jita ni manguvulu eswe a hano hashi. (Izaia 9:6, 7; 56:10; Daniele 2:44) Tunashimbwila tangwa liacho ni mbunge yeswe nawa tunazange kulilulieka haliapwila hakutwala ku tangwa liacho. Kashika tusenu shindakenyo ha uprofeto wa Mbimbiliya ni kununga ni kuwayila Yehova ni ushishiko weswe.—Samu 130:6.

10, 11. (a) Ha yika twatamba kukanyama, nawa mumu liaka? (b) Yika yinakwehe shindakenyo ngwe Ndiapu kanapiangula atu hanga alengulule uprofeto wa Mbimbiliya?

¹⁰ Achinyonga umwe kalayi yoze wanunga ni kulawola ufuku wamuwundu. Alioze muze mukusala mahola akehe, muchimupwila chikalu kununga ni kulawola mumu kanahongo chinji. Chizechene nawa, yetu tuli ha matangwa akusula a hano hashi. Nawa tunayi ni kuheta kusongo, muchikapwa chikalu chinji kuli yetu kununga ni kulawola. Muchipihia chinji nyi kutwanungine ni kulawola! Tuhengulenu yuma yitatu yize muyihasa kutukwika kununga ni kulawola.

¹¹ Ndiapu kanapiangula atu. Iye mwe “wayula hashi.” Muze te kwasala hakehe hanga afwe, Yesu yewulula tumbaji twenyi hakutwala ku chikuma chacho ha yisuho yitatu. (Yoano 12:31; 14:30; 16:11) Ndiapu kakuzachisa mayingeleja amahuza hanga apiangule atu. Kashika atu anji musono akulengulula uprofeto wa Mbimbiliya uze wakusolola ndusu ngwo songo lia hano hashi hiliakundama. (Zefania 1:14) Kwamba pundu, Satana ‘kakupupuchisa manyonga ja waze kasolo kufuliela.’ (2 A-Korindu 4:3-6) Ha chino, muze twakulweza atu ngwetu, songo lia yino yuma hiliakundama nawa ngwetu, Kristu kanayulu, anji akuli ayo keshi kuzanga kutupanjika. O kanji-kanji kakwamba ngwo, ‘kutwazangile kwetu.’

12. Mumu liaka kutwatambile kwecha Ndiapu hanga atupiangule?

¹² Chipwe ngwe atu anji keshi kuzanga uprofeto wa Mbimbiliya, kutwambile kwecha yitanga yo hanga yitepulule ufulielo wetu. Tunanyingika mumu liaka chili ni ulemu kununga ni kulawola. Paulu kambile kuli mandumbu jenyi ngwenyi: “Yenwene nunanyingika pundu, tangwa lia Mwene muliza.” Yamba nawa ngwenyi: Muliza “ngwe mwiji ha ufuku.” (Tanga 1 A-Tesalonika 5:1-6.) Yesu katutowezele ngwenyi: “Lilulikenu; mumu ha ola yize kunwanyingikine mwe Mwana Mutu meza.” (Luka 12:39, 40) Kwasala hakehe, Satana mapiangula atu ha kwaalingisa hanga anyonge ngwe kali ni “sambukila ni kutwama kawape” hano hashi. Chocho, mba hi tangwa lia Yehova muliza susumuku, ni kwanehena lamba. Mba yika mutwamba hakutwala hali yetu? Nyi tunazange kulilulieka ha mukunda wa tangwa liacho ni kuhona kutupiangula ngwe mutu mweswawo, twatamba ‘kulawola, ni kununga ni kukeya.’ Kashika tunafupiwa kutanga Liji lia Zambi matangwa eswe ni kupukuna ha yize Yehova akutulweza.

13. Kuchi yitanga yipi ya hano hashi yakupinjisa atu nawa kuchi mutuhasa kwehuka yitanga yacho?

¹³ Yitanga yipi ya hano hashi yakupihisa kunyonga cha atu. Atu anji musono kakumona ngwo kafupiwile kunyingika Zambi. (Mateu 5:3) Alioze, o kakuzachisa mashimbu ni tachi jo jeswe hanga apwe ni yikumba ya hano hashi. (1 Yoano 2:16) Chikwo nawa, ha matangwa wano kuli yiheho yinji yeka ni yeka yize atu akuzanga chinji ni ye yiheho yacho yakukolweza atu kupwa ni usolo wa ku musunya ni kulinga cheswacho mazanga. (2 Timoteu 3:4) Yuma yino yakulalwisa atu kufupa yuma yilemu, nawa keshi kunyonga ha usendo wo ni Zambi. Kashika Paulu ewulwile akwa-Kristu ngwenyi, katamba “kulaula mu tulo” ha kwehuka kulengumuka ni usolo wo wa ku musunya.—A-Roma 13:11-14.

14. Utowezo uka tunawane mu mukanda wa Luka 21:34, 35?

¹⁴ Yetu twakuzanga hanga spiritu ya Zambi yisongwele kunyonga chetu, hi ya hano hashi ko. Kupalikila mu spiritu yenyi, Yehova kakutukwasa hanga tunyingike kanawa yize yinalingiwa. (1 A-Korindu 2:12) ^[1] (Tala maliji akusongo.) Alioze twatamba kukanyama. Chipwe yuma yize yinasoloka ngwe yili yangwaza ku mwono wetu, muyihasa kutulalwisa kulingila Yehova. (Tanga Luka 21:34, 35.) Akwo mahasa kutulweza ngwo chili ujingale kutayiza ngwo tuli ha matangwa akusula cha hano hashi. (2 Petulu 3:3-7) Alioze kutwatambile kwecha hanga o akeketese ufulielo wetu, mumu tuli ni shindakenyo ngwetu, songo hiliakundama. Nyi tunazange hanga spiritu ya Zambi yitusongwele, twatamba kukunguluka mashimbu eswe hamwe ni mandumbu jetu.

15. Yika yalingiwile kuli Petulu, Tiangu ni Yoano, nawa yika muyihasa kulingiwa kuli yetu?

¹⁵ Uhenge wetu wakupwisa chikalu kununga ni kulawola. Yesu kanyingikine ngwenyi, atu kali yihenge nawa kakwete ulelu. Achinyonga ha yize yalingiwile ha ufuku muze Yesu te kanda achifwa. Chipwe ngwe Yesu kapwile mungunu, aye kanyingikine ngwenyi mba te anunge ni kushishika, iye katambile kulemba kuli Tato hanga amukwase. Yesu kambile kuli apostolo Petulu, Tiangu ni Yoano hanga anunge ni kulawola muze iye te analembe. Alioze apostolo kakanyingikine ulemu wa kununga ni kulawola. Ayo yahonga, chocho yaya tulo. Ni Yesu neye kahongele, alioze aye kanungine ni kulawola ni kulemba kuli Tato. Apostolo katambile kununga ni kulemba ha shimbu liacho.—Marku 14:32-41.

16. Kulita ni Luka 21:36, yika Yesu atulongesele mba tununge ni ‘kulawola’?

¹⁶ Yika muyitukwasa hanga tununge ni ‘kulawola’ ni kulilulieka hakutwala ku tangwa lia Yehova? Tunafupiwa kupwa ni zango linji mba tununge ni kulinga yuma yize yalita. Alioze yino wika kuyakumbanyine. Muze te kwasala hakehe hanga Yesu afwe, aye yalweza tumbaji twenyi ngwenyi, o te katamba kununga ni kulemba kuli Yehova hanga aakwase. (Tanga Luka 21:36.) Mba tununge ni kulawola ha matangwa wano akusula, twatamba kulemba kuli Yehova matangwa eswe.—1 Petulu 4:7.

17. Kuchi mutuhasa kusa shindakenyo ngwetu, hitwalilulieka kulu ha yize muyilingiwa kulutwe?

¹⁷ Yesu kambile ngwenyi songo mulikeza “ha ola yize kunwashinginyekene.” (Mateu 24:44) Kashika, twatamba kulilulieka mashimbu eswe. Wano hi mashimbu ko akwimbulula yitanga ya mwono wa hano hashi ha Satana, yize akwamba ngwo yakuneha uwahililo. Yino yili wika yilota. Alioze, kupalikila mu Mbimbiliya, Yehova ni Yesu kakutulweza chize mutuhasa kununga ni kulawola. Kashika, tusenu chinji shindakenyo ku uprofeto wa Mbimbiliya ni chize unamanunuka. Nawa mutuhasa kununga ni kukundama kuli Yehova ni kusa Wanangana wenyi kulutwe ku mwono wetu. Ha chino, mba mutukapwa akulilulieka kulu muze songo muliza. (Usolwelo 22:20) Nyi twalinga chocho mba mutuhasa kulamwina mwono wetu!