Shina yena wakufuliela pundu ngwe yilakenyo yeswe ya Zambi muyikamanunuka? Yesu kafulielele ngwenyi pundu muyimanunuka, nawa ha malongeso jenyi iye katakamishine ufulielo wa waze apwile ni kumupanjika. Achitala chilweza chize iye ambile ha Longeso lienyi lia ha Mulundu chize chili mu Mateu 5:18: “Mumu pundu, ngunambe kuli yenu ngwami, Ndo lilu ni hashi muyikahwa, toshi [lusona] yimuwika hanji toma yimuwika kuyichi kahwa nichimwe ku shimbi ndo yeswe muyiza kupwa.”

Lusona mukehe chinji mu sona ja mu Hepreu kali י (yod), yoze uli lusona mutangu mu Tetragrama, jina lisandu lia Zambi, Yehova. * Alongeshi a shimbi ni A-Fwariseu te keshi kulemesa wika maliji ni sona ja Shimbi ja Zambi, alioze te kakulemesa nawa “toma yimuwika.”

Yesu te kanambe ngwenyi, lilu ni hashi te kumuyipalika alioze nichimwe chuma chikehe cha Shimbi te muchipalika chakuhona kumanunuka chakuhi. Kwamba pundu lilu ni hashi yize twakumona kumuyinunga ya mutolo. (Samu 78:69) Maliji wano kanasolola ngwo, pundu chipwe yuma yikehe-yikehe ya mu Shimbi kumuyikamanunuka niyimwe muyikasala yakuhi.

Shina Yehova Zambi kakupala ha yuma yikehe-yikehe? Ewa, kakuyipala. Achitala chino: A-Izalele kaalwezele ngwo, te katambile kumakuna nichimwwe chifwaha cha mwana-panga ha Chizomboka. (Kutuhuka 12:46) Kota chapwile chuma chikehe. Shina A-Izalele kanyingikine mumu liaka te katambile kumakuna nichimwe chifwaha? Kota ka. Alioze, Yehova Zambi te kananyingika ngwenyi maliji wano te kapwile a uprofeto hakutwala kuli Mesaya yoze te kechi kumumakuna nichimwe chifwa muze te mamushiha ha mutondo wa lamba.—Samu 34:20; Yoano 19:31-33, 36.

Yika maliji a Yesu anatulongesa? Ni yetu mutuhasa kupwa ni ushindakenyo ngwetu, yilakenyo yeswe ya Yehova Zambi kumuyikamanunuka pundu nichimwe muchisalaho chakuhi. Uno uli ushindakenyo ulemu wa lusona mukehe wa limi lia Hepreu!