1, 2. Yika akweze, Yela ja Yehova mahasa kulihula, mba ukwaso uka uli mu Mbimbiliya?

UMWE ndumbu wa mu Grã-Bretanha, yamulweka kuli mukwo atanga nenyi ku shikola ngwo: “Ena ngwe wakanyama hakufuliela muli Zambi.” Umwe ndumbu mu Alemanha yasoneka ngwenyi: “Alongeshi jami ngwo, sango ja Mbimbiliya ja chize atangile yuma jili ja mahuza. Ayo kakunyonga ngwo alongi jo eswe kafuliela ngwo yuma yalijilile yene.” Umwe ndumbu wa mu França ngwenyi: “Alongeshi a ku shikola yami kakutungumuka hakwivwa ngwo kuli alongi waze afuliela Mbimbiliya.”

² Atu anji musono keshi kutayiza ngwo Zambi mwe watutangile. Nyi uli mukweze, chela cha Yehova, chipwe ngwe unalilongesa hakuktwala kuli iye, hanji wakulihula chize muhasa kusolola ngwo tuli ni Sakatanga watutangile. Mbimbiliya yakutukwasa tunyonge kanawa ha yize twakutanga ni kwivwa ni kupukuna ha yuma yacho. Liji lia Zambi linambe ngwo: “Malinjekela makakufunga.” Kuchi mahasa kutufunga? Makukwasa kwehuka manyonga amahuza ni kutatwisa ufulielo we muli Yehova.—Tanga Yishima 2:10-12.

3. Yika mutushimutwina ha longeso lino?

³ Chitangu twatamba kumunyingika kanawa Yehova mba tumufuliele kanawa. (1 Timoteu 2:4) Kashika, muze mutanga Mbimbiliya ni mikanda yetu yikwo, chili chilemu kupukuna kanawa hayize yinambe. Eseka nawa kwivwa yize unatange. (Mateu 13:23) Nyi mulinga chino, muhasa kuwana yuma yinji yize muyikwaha ushindakenyo ngwo Yehova mwe Tangi yetu nawa Mbimbiliya yakatuka kuli iye. (A-Hepreu 11:1) Tushimutwinenu chize mutuhasa kulinga chino.

4. Mumu liaka kutayiza longeso liakwamba ngwo yuma yalilingile yene chili chimuwika ni kutayiza ngwo yuma kayitangile? Mba, yika twatamba kulinga tulieswe?

⁴ Umwe mahasa kwamba ngwenyi, “Ami nafuliela longeso liakwamba ngwo yuma yalilingile yene, mumu akwa-mana ngwo longeso liacho lili liamwenemwene. Niumwe wamona kama Zambi wakuhi, mba kuchi unanyingika ngwe kwali?” Atu anji che akunyonga. Kwamba pundu, niumwe wakuhi wamona kama Zambi, hanji kumona chuma machitanga. (Yoano 1:18) Mba kuchihi mutwamba hali atu waze akwamba ngwo yuma yalilingile yene? No kakufuliela yize keshi kuhasa kumona. Atu eswe kuselaho ni akwa-mana kanda achimona kama chuma chinalumuka mu chuma cheka. Chakutalilaho: Niumwe kanda achimona kama kashitu wakukalala malialumuna kashitu mweka. (Yombi 38:1, 4) Kashika tulieswe twatamba kuhengwola uchela ni kuupukuna kanawa hanga tupwe ni ushindakenyo. Atu anji hakuhengwola yuma hano hashi kakumona ngwo ‘yinasolola pundu’ ngwo Zambi kwatwama. Tachi jenyi ni yitanga yenyi yipema ‘yinasolola pundu’ ngwo iye Sakatanga.—A-Roma 1:20.

5. Mikanda yika mutuhasa kulilongesa hakutwala ku yitangiwa?

⁵ Muze mututala ha yuma ya hashi ni kuyipukuna kanawa, mutumona ngwetu yeswe kayilingile mujila yakukomwesa. “Ku ufulielo chatulumbunuka” ngwo Sakatanga kwatwama chipwe ngwe kutushi kumumona. Hitwanyingika ngwetu kali mupema nawa mana anji akwete. (A-Hepreu 11:3, 27) Mutuhasa kunyingika yinji ha yuma yize atangile muze mututanga yize akwa-mana anawana-wana. Yikuma yimwe mutuhasa kuyiwana mu chinema cha As Maravilhas da Criação Revelam a Glória de Deus, ni ha mikanda A Vida—Teve um Criador? ni A Origem da Vida — Cinco Perguntas Que Merecem Resposta, ni mukanda Existe um Criador Que Se Importa com Você? Kanji-kanji mu Despertai! mwakupwa sango jize akuhula-hula akwa-mana ni atu eka waze musono akufuliela ngwo Zambi kwatwama. Ni mukanda “Teve Um Projeto?” uli ni sango ja tushitu ni yuma yeka ni yeka ya hano hashi, ni chize akwa-mana aneseka kwimbulula chize yuma yacho yakukalakala.

6. Kuchi mikanda yize yili ni sango jize anahengwola muyihasa kutukwasa?

⁶ Ndumbu umwe mu Estados Unidos, wa miaka 19 yahanjika hakutwala ku mikanda yetu yaali ngwenyi: “Mikanda yino yakungukwasa chinji. Hinatanga mikanda yino yisuho yinji.” Umwe pangi mu França yasoneka ngwenyi: “Nakukomoka ha mitwe ya kwamba ngwo “Teve Um Projeto?” Sango jacho jinambe ngwo, akwa-mana alufuma mahasa kwimbulula yitangiwa, alioze yuma akulinga kuyichi kulifwa ni yitangiwa yene.” Yisemi ja kanuke wa miaka 15 wa mu Africa do Sul ngwo: “Chuma chitangu mwanetu akutanga mu Despertai! chili yihwojola.” Mikanda yino muyikukwasa upwe ni ushindakenyo ngwe kuma Sakatanga kwali, mba uhase kwehuka malongeso amahuza. Ufulielo we muutatuka mba muopwa ngwe mutondo uli ni miji yajama, uze muumana ngu chipwe ngwe mukwiza fuji yinene.—Jeremia 17:5-8.

7. Mumu liaka Zambi anazange hanga tuzachise mana jetu?

⁷ Shina chili chipi kulihula ngwe, ‘Mumu liaka natamba kufuliela Mbimbiliya?’ Ka. Yehova kazangile tufuliele chuma mumu ngwo akwetu no kakuchifuliela. Iye kanazange ‘tunyonge ni mana’ jetu hanga tunyingike kanawa Mbimbiliya ni ulumbunwiso wacho. Nyi mutunyingika kanawa yize yinambe, mutukolesa ufulielo wetu mu Mbimbiliya. (Tanga A-Roma 12:1, 2; 1 Timoteu 2:4.) Jila yimwe yakunyingikilamo kanawa Mbimbiliya, yili kulilongesa yikuma yize tunazange kunyingika kanawa.

8, 9. (a) Yika atu amwe akuzanga kulilongesa? (b) Kuyuka chika atu amwe akuwana muze mapukuna ha yize akutanga?

⁸ Atu amwe kakuzanga kulilongesa uprofeto wa Mbimbiliya. Kakuzanga kutesa Mbimbiliya ni yize asoneka akwa-kusoneka sango ja yuma yikulu, akwa-mana ni akwa-kuvumbwola yuma yikulu. Chakutalilaho, tutalenu Uputukilo 3:15. Yehova yamba uprofeto uno ulemu muzemwene Alama ni Eva ehukile shimbi jenyi. Uno we uprofeto utangu wamu Mbimbiliya uze wakutukwasa kunyingika chize Wanangana wa Zambi muukasolola ngwo chiyulo cha Zambi che chipema, ni chize muukahwisa lamba lieswe. Mba kuchi mutuhasa kulilongesa Uputukilo 3:15? Mutuhasa kusoneka jimwe versu jamu Mbimbiliya jize jakulumbununa kanawa chize uprofeto uno muukamanunuka. Nawa mutuhasa kufupa mwaka uka versu jacho ajisonekene ni kujisa kulita ni chize yuma yalingiwile. Nyi twalinga chino, mutuwana ngwetu kuma akwa-kusoneka Mbimbiliya katwamine ha miaka yalisa, alioze mutu ni mutu kasonekene yikuma yize yinalumbununa kanawa uprofeto wacho. Chino muchitwaha ushindakenyo ngwo spiritu yisandu ya Yehova ye yakwashile waze asonekene uprofeto.—2 Petulu 1:21.

⁹ Umwe ndumbu mu Alemanha yanyonga ha chize hita mukanda wa Mbimbiliya wakuhanjika hakutwala ku Wanangana wa Zambi. Yamba ngwenyi: “Chechize Mbimbiliya yapwa, chipwe ngwe kayisonekene kuli malunga 40. Nawa atu jacho katwamine ha mashimbu alisa nawa te kalinyingikine umwe ni mukwo.” Umwe pangi mu Austrália te kanatange Kaposhi wa Kutalila mba yalilongesa chize chiwanyino cha Chizomboka chakwata uprofeto wa Uputukilo 3:15 ni Mesaya. ^[1] (Tala maliji akusongo.) Iye yasoneka ngwenyi: “Longeso liacho liangukwashile kumona uhenya wa Yehova. Nevwile kuwaha hakumona chize uprofeto wacho wakwachile hali A-Izalele ni chize wamanunukine hali Yesu. Yingulihulika hakehe ni kunyonga ha uprofeto wakukomwesa wa kulia cha Chizomboka!” Mumu liaka pangi yetu evwile chino? Mumu kanyongene chinji ha yize apwile ni kutanga mba yiyimulumbunukina. Chino chakolesele ufulielo wenyi ni kumukundamisa kuli Yehova.—Mateu 13:23.

10. Kuchi ushishiko wa akwa-kusoneka Mbimbiliya wakutukwasa tufuliele Mbimbiliya?

¹⁰ Tutalenu nawa ha ushishiko wa malunga waze asonekene Mbimbiliya. Atu jacho kasonekene umwenemwene chakuhona kwivwa woma. Ha mashimbu jo, akwa-kusoneka anji te kakusoneka wika yuma yipema hakutwala ku yifuchi yo ni mianangana jo. Alioze aprofeta ja Yehova kanji-kanji kapwile ni kusoneka yuma yipema ni yuma yipi yize munyachi wa Izalele ni mianangana jo alingile. (2 Sango ja Mianangana 16:9, 10; 24:18-22) Ayo yasoneka tupalia two ni tupalia twa tuvumbi twa Zambi akwo. (2 Samuele 12:1-14 Marku 14:50) Ndumbu wa mu Grã-Bretanha yasoneka ngwenyi: “Chili chikalu kuwana atu ashishika chichize. Chino chakutwaha ushindakenyo ngwo Mbimbiliya chamwenemwene yili mukanda wa Yehova.”

11. Kuchi usongwelo wa Mbimbiliya wakutwaha ushindakenyo ngwo Mbimbiliya yili mukanda wa Zambi?

¹¹ Atu anji kakumona yiwape yinji muze akukaula Mbimbiliya mu mwono wo. Chino chakwaha ushindakenyo ngwo Mbimbiliya uli mukanda wa Zambi. (Tanga Samu 19:7-11.) Umwe ndumbu wa mu Japão yasoneka ngwenyi: “Muze ami ni asoko jami twakawile malongeso a mu Mbimbiliya, twapwile ni chiseke chinji. Twapwile ni sambukila, ni kulinunga hamuwika, ni kusolola zango kuli umwe ni mukwo.” Mbimbiliya yakwasa atu anji kunyingika ngwo yuma te akutayiza yili ya mahuza. (Samu 115:3-8) Mbimbiliya yinasongwela atu ajikijile hali Yehova, Zambi wa ndundo jeswe, ni kwaaha kutalatala cha kulutwe lia matangwa. Alioze, atu waze akwamba ngwo Zambi katwamineko kakutenga yitangiwa kupwa zambi yo. Atu akwo kakwamba ngwo atu mahasa kuneha mwono upema, alioze muze mutunyonga ha yize alinga ndo musono, mutumona ngwetu kahashile kuhwisa yipikalo ya hano hashi.—Samu 146:3, 4.

12, 13. Kuchi mutuhasa kuhanjika ni atu hakutwala ku yitangiwa hanji Mbimbiliya?

¹² Hakuhanjika ni akwetu hakutwala ku yitangiwa hanji Mbimbiliya, chitangu tunyingikenu yize ayo afuliela. Twatamba kunyingika ngwetu amwe waze akwamba ngwo yuma yalilingile yene no kakutayiza ngwo Zambi kwatwama. Kakwamba ngwo Zambi mwe waluliekele hanga yuma yililinge yene. Akwo kakwamba ngwo longeso liakwamba ngwo yuma yalilingile yene lili liamwenemwene mumu kakulilongesa mu mashikola. Eka haneche kufuliela muli Zambi mumu lia katalingiso watwama mu ulembelo unji. Kashika, chitangu twatamba kuhula mutu twivwe yize afuliela nawa mumu liaka. Mba twatamba kupanjika kanawa yize mamba. Nyi twalinga chino mahasa kwivwa yize mutumulweka.—Titu 3:2.

¹³ Kuchi mutukumbulula mutu yoze matwamba ngwenyi twajingala hakutayiza ngwetu Sakatanga kwatwama? Ni vumbi lieswe, twatamba kwita mutu wacho alumbunune chize mwono waputukile. Mutuhasa kwamba ngwetu nyi mwono walilingile wene, kachi chuma chitangu chize chalilingile chene chanungile ni kufwambisa yuma yikwo yize yalifwa nacho. Longi umwe wakulongesa quimica yamba ngwenyi, chuma chacho chatambile kupwa, (1) ni chimwe chikowa hanga chihase kulifunga, (2) ni tachi jakukalakala nacho, (3) ni chinyingi chachize chatamba kusoloka ni kukola, (4) ni kupwa ni uhashi wa kuliteta mu yuma yikwo. Longi wacho yawezela nawa ngwenyi: “Chipwe tu yuma tukepe twakukomwesa chinji ha chize atutanga.”

14. Jila yika yashi mutuhasa kukaula muze tunahanjika hakutwala ha yitangiwa?

¹⁴ Muze tunahanjika hakutwala ku yitangiwa, mutuhasa kukaula jila yashi azachishile postolo Paulu. Iye ngwenyi: “Zuwo lieswe lili ni yoze walitungile; alioze yoze watungile yuma yeswe iye Zambi.” (A-Hepreu 3:4) Kwamba pundu, zuwo lieswe kakulitunga kuli mutu. Kashika, chuma cheswe chikwete mwono, chize chahiana zuwo, chatamba kupwa ni yoze wachitangile. Mutuhasa kuzachisa nawa mikanda yetu. Umwe pangi yahanjika ni mukweze yoze te kechi kutayiza ngwo Zambi kwe atwama. Yahana mukweze wacho mikanda yetu yaali yize twalianga kwamba, mba hakupalika cha poso yimuwika yamba ngwenyi, “Haliapwila ngunatayiza ngwami Zambi kwe atwama.” Mukweze wacho yaputuka kulilongesa Mbimbiliya mba kulutwe yapwa ndumbwetu.

15, 16. Yika twatamba kulinga shimbu kanda tulumbunwina mutu ngwetu Mbimbiliya yili Liji lia Zambi? Nawa yika twatamba kwiwuluka mashimbu eswe?

¹⁵ Kuchi twatamba kukwasa mutu yoze mayambashana ha Mbimbiliya? Ngwe chize hi twamba kulu, chitangu twatamba kumuhula twivwe yize afuliela. Twatamba nawa kwivwa yize azanga mu mwono wenyi. (Yishima 18:13) Nyi kakuzanga ciência, tumwehenu yilweza ya mu Mbimbiliya yize yalita ni yize ciência yakwamba. Nyi kakuzanga sango ja kunyima, mutuhasa kumulweza yimwe yuma yalingiwile kunyima, ni kumulweka ngwetu yuma yacho kaliangile ku yamba mu Mbimbliya muze te kanda yichilingiwa. Atu amwe mahasa kutupanjika nyi mutwasolwela chimwe chuma mu Mbimbiliya chize muchihasa kwakwasa ku mwono wo, ngwe Longeso lia ha Mulundu.

¹⁶ Twiwulukenu ngwetu, kutwatambile kulikokojola ni atu. Tunazange evwe kuwaha muze mutuhanjika no hanga alilongese Mbimbiliya. Kashika, twatamba kwahula ni vumbi lieswe, ni kwapanjika kanawa. Hakulumbununa ufulielo wetu, tuhanjikenu ni vumbi, chipi-chipi nyi mutu tunahanjika nenyi kali mukulwana hali yetu. Nyi mutuvumbika akwetu, no matuvumbika. Mba makomoka hakumona ngwo wakunyonga chinji ha yize wakufuliela chipwe ngwe uchili kanuke. Alioze, nyi mutu mazanga kukokojola ni yetu hanji kutwasa mikuta, kutwatambile kumukumbulula.—Yishima 26:4.

17, 18. (a) Yika muyitukwasa kukolesa ufulielo wetu mu Mbimbiliya? (b) Chihula chika mutushimutwina mu mutwe unahateko?

¹⁷ Mutuhasa kunyingika amwe malongeso a Mbimbiliya, alioze chilemu ndo kupwa ni ufulielo ukolo. Kashika, twatamba kuhengwola ni kulilongesa umwenemwene wakunama, ngwe tuli ni kufupa upite, yuma ya ndando yikalu yize yinaswamana. (Yishima 2:3-6) Jila yimwe yakukoleselamo ufulielo wetu yili yakutanga Mbimbiliya yeswe yamuundu. Mutuhasa kweseka kuyitanga mu mwaka umuwika. Achi chakwashile kalayi wa mbonge akundame kuli Yehova muze te uchili kanuke. Iye yamba ngwenyi: “Chuma changukwashile kunyingika ngwami Mbimbiliya yili Liji lia Zambi shina kuyitanga yeswe yamuundu. Sango jize nalilongesele muze te nguchili kanuke yijingulumbunukina.” Mutuhasa nawa kuzachisa yikwata yakuhengwola nayo yize yili mu limi lietu hanga twivwe kanawa yize tunatange. Hanji tuli ni Biblioteca da Torre de Vigia mu DVD, UTULIKILO WA MIKANDA MU ON-LINE, Índice das Publicações da Torre de Vigia, hanji Guia de Pesquisa para Testemunhas de Jeová.

¹⁸ Yisemi, atu atangu nwatamba kulongesa hakutwala kuli Yehova kali ana jenu. Mba kuchi munuhasa kwakwasa hanga apwe ni ufulielo ukolo? Mu mutwe unahateko mutulilongesa jila jize mujitukwasa ha chikuma chino.