Sefu, ngwenyi: * “Yami ni pwo liami yatuchiza ha milimo.” Ha miaka yaali twapwile ni kuwana ukwaso kuli akwetu ni ku milimo yikehe-yikehe twapwile ni kulinga. Pwo liami, Prisila, yahonga chinji, mba yingwivwa ngwe nguli wamokomoko.

“Kuchi mba twahashile kunyongonona? Prisila ha mashimbu eswe kapwile ni kwiuluka maliji a Yesu ali mu Mateu 6:34. Yesu ngwenyi kanda tulipikala ha tangwa lia hamene, mumu tangwa liacho lili ni yipikalo yalio. Nawa yilemba yenyi yikolo yamuhele tachi ja kununga. Hakutwala kuli yami, mukanda wa Samu 55:22 we wangutakamishine. Chizechene ngwe mukwa-kwimba masamu, nambilile chiteli chami hali Yehova, mba yangukolesa. Chipwe ngwe hinawana mulimo, nihindu tunashiwisa mwono wetu, kulita ni maliji a Yesu ali mu mukanda wa Mateu 6:20-22. Kashika, tunakundama kuli Zambi ni kuli umwe ni mukwo.”

Jonata ngwenyi: “Nazakalile chinji ha chize mwono wetu te muupwa kulutwe lia matangwa, muze mingoso yetu yapihile. Ha mukunda wa ukalu wa kuwana mbongo, miaka yami 20 nakalakalile yalitokelele. Ami ni pwo liami yituputuka kulizwelesa ha mbongo. Woma twapwile ni kwivwa wa kulanda ni cartao wa credito, ngwetu hanji kechi kuyitayiza.

“Alioze Liji lia Zambi ni spiritu yenyi yatukwashile kukwata chiyulo chipema. Nalilongesele kupwa ni kutayiza mulimo weswawo, ni kukehesako ya kulandalanda. Akwetu Yela ja Yehova no katukwashile chinji. Katutakamishile, ni kutukwasa chinji ha mashimbu akalu.”

Rakele yeuluka ngwenyi: “Muze lunga liami anguhichikile, yingwivwa yikolo ku mbunge ni ufwatulo. Chinyengo chinji nevwile. Alioze yingukundama kuli Zambi mba yangulembejeka. Sambukila ya Zambi yafungile mbunge yami muze napwile ni kulemba kuli iye matangwa eswe. Napwile ni kumona ngwe kanalulieka mbunge yami yize yinamakuka.

“Nawa ngunasakwila chinji ha Liji lienyi Mbimbiliya, lize liangukwashile kuchiza ufwatulo ni uli nevwile. Navumbikile chinji maliji a postolo Paulu waze ali ha A-Roma 12:21 akwamba ngwo: ‘Yipi kanda yinukumba, alioze kumbenu yipi ha kulinga yipema.’”

“Umwe sepa liami mupema yangukwasa ngununge ni mwono wami. Yangutangila Chilumbununyi 3:6 ni kungulweka ni vumbi lieswe ngwenyi kwakupwa mashimbu waze twatamba “kutokesa” yimwe. Maliji jacho kapwile akalu kwapanjika, alioze te e ngunafupu. Haliapwile ngunanungu ni mwono wami.”

Izabele ngwenyi: “Muze ulo we muufwa, mufupiwa utakamiso.” “Napwile ni sepa liami yoze wapwile ni kungutakamisa hita tangwa. Kapwile ni kulila hamuwika ni yami, ni kungulembejeka, ni kungusolwela zango. Namwene ngwami Yehova kanamuzachisa hanga auke mbunge yami yize yamakukine.”

Lufunda, yoze twalianganga kwamba mu mutwe utangu, kayiza mbunge, mba yamba kufwa kaali keswe. Haliapwile kakumusa makina akuhwimina nacho maola 16 ha tangwa. Mwene ngwenyi: “Nakulemba kuli Yehova mashimbu eswe. Muze nakuhwisa kulemba kuli Zambi, nakwivwa utakamiso wa spiritu yenyi. Kulemba chakungukolweza ngununge mumu nafuliela ngwami Zambi mwe wakungufunga.”

Petra, yoze haheta mu miaka 80, ngwenyi: “Nakuzanga kulinga yuma yinji, alioze chichi kuhasa. Chakukaliwa, kumona chize mujimba wami unayi ni kuzeya. Muze nakuhonga nakunwa yitumbo. Kanji-kanji nakunyonga ha chize Yesu echile Tato hanga apalikise yipikalo yimwe, nyi te muchilita. Alioze Yehova kahele Yesu tachi, chocho, ni yami kakungwaha tachi. Kulemba ye yitumbo yami ya tangwa ha tangwa. Nakwivwa kanawa kuhanjika ni Zambi.”—Mateu 26:39.

Juliano, yoze unalipikala ha miaka 30 ni yikola ya kukala cha yihunguhungu, neye che akwivwa. Mwene ngwenyi: “Nalumuna chitwamo chipema te nakutwama ni chitwamo cha mafumbo. Nihindu mwono wami uchili ulemu mumu nakukwasa atu. Kuhana chakulelula lamba, nawa Yehova kananungu kututakamisa ha mashimbu akalu ngwe chize alakenyene. Munguhasa kwamba pundu ngwe chize ambile postolo Paulu, ngwami: ‘Kunahasa kulinga yuma yeswe muli yoze wakunguhashisa.’”—A-Fwilipu 4:13.

Antonio yeuluka ngwenyi: “Muze tata afwile ha ponde ya ha mukwakwa, chitangu, chatayijile. Namwene ngwami kuchalitele mumu te kanalipalikila kwenyi mutapalo. Alioze ni chize te mungulinga chakuhi. Yahwilila ha matangwa atano, mba yafwa. Napwile ni kulikolweza nguhone kulila muze nguli ni mama, alioze napwile ni kulila ni nguli ukawami. Napwile ni kulihula ngwami: ‘Mumu liaka?’ ‘Mumu liaka?’

“Ha matangwa jacho, napwile ni kwita Yehova angukwase kufunga mbunge yami ni kupwa ni sambukila. Mba mbunge yiyiputuka kuunda. Newulukile ngwami Mbimbiliya yakwamba ngwo yipikalo muyihasa kukasumuna hita mutu. Amu Zambi keshi mahuza, napwile ni ushindakenyo ngwami mungukamona nawa tata ha uhindukilo wa afu.”—Chilumbununyi 9:11; Yoano 11:25; Titu 1:2.

Lote, yoze twavuluka mu mutwe utangu, neye che evwile. Mwene ngwenyi: “Ami ni mukwetu pwo, twapwile ni sambukila mu mbunge yize avuluka hali A-Fwilipu 4:6, 7. Twapwile ni sambukila yacho hamukunda wa kulemba kuli Yehova. Ayi sambukila ya ku mbunge ye yatukwashile kulumbununa kutalatala chetu cha uhindukilo kuli akwa-kwambujola sango jinapalika mu chifuchi. Chipwe ngwe mwanetu kafwile mu ndeke yize yaholokele, alioze twakwiwuluka mashimbu apema waze te twakupwa nenyi. Yino ye twakunyonga chinji.

“Muze akwetu Yela atulwekele ngwo katumwene tunalumbununa ufulielo wetu ha TV, yitwalumbunwina ngwetu twahashile kulinga chino mumu lia yilemba yize apwile ni kutulembela. Pundu lume, Yehova kapwile ni kututakamisa kupalikila mu maliji anji akutulembejeka waze twapwile ni kutambula.”

Ngwe chize twamona mu yilweza yino, Zambi mahasa kulembejeka atu waze anapalika mu yipikalo yeka ni yeka. Mba ena? Kukushi mulonga ni kapinda mweswawo mupalikamo, kuli utakamiso uze muukukwasa ha mashimbu akalu. * Kashika, Mumu liaka kuuso kwita Yehova ukwaso? Iye kali “Zambi ya kulembejeka cheswe.”—2 A-Korindu 1:3.