1, 2. (a) Lamba lika atu anji anamono musono, nawa yika lamba liacho linaneha kuli atu? (b) Kutalatala chika mukanda wa Izaia 41:10,13 wakutwaha?

UMWE pangi, pionelu wa shimbu lieswe yoze wasomboka kuli mukulwana wa mu chikungulwila yamba ngwenyi: “Chipwe ngwe nakulinga yeswe yakufupiwa ku ufulielo wami, alioze ha miaka yinji nakuzakalala ni yipikalo yinji. Yipikalo yacho yakungulingisa nguhone kuya tulo, nguyize, kuhona kutwama kanawa ni akwetu, ni kunyonga kulishiha ha mashimbu amwe.”

² Shina muhasa kwivwa ngwe chize pangi yono evwile? Muhasa, mumu tuli ni yipikalo yinji ku mwono, muno mu chifuchi chipi cha Satana twatwama. Yipikalo muyihasa kukwika mbunge hanji kutuhongesa ngwe chize chikwachiliji chakukwika wato. (Yishima 12:25) Yika muyihasa kutupikala ku mbunge? Kota chinyengo chakutokesa usoko wetu mu ufwe chipwe musongo unene uze twayiza hanji kutuhungumiona. Hanji nawa lamba tunamono lia kufunga asoko ha matangwa wano akalu kuwana mbongo. Hakupalika cha matangwa, kuzakalala muchihasa kutuhongesa tuhone kwivwa chiseke. Alioze, twatamba kupwa ni ushindakenyo ngwetu Yehova kanazange atukwase.—Tanga Izaia 41:10, 13.

3, 4. (a) Kuchi Mbimbiliya yakulumbununa liji “kwoko”? (b) Yika muyihasa kuzeyesa moko jetu?

³ Kanji-kanji Mbimbiliya yakutongola yihanda ya mujimba hakulumbununa yitanga ya mutu. Chakutalilaho, kwoko kalivuluka yisuho yinji. Muze Mbimbiliya muyamba ngwo kwoko lia mutu kalitakamisa, yinalumbununa ngwo mutu wacho kamutakamisa hanga ahase kukalakala. (1 Samuele 23:16; Ezera 1:6) Muchihasa kulumbunuka nawa ngwo mutu wacho kali ni mbunge yipema mba kali ni kutalatala cha kulutwe.

⁴ Ha mashimbu akwo, Mbimbiliya muyihasa kwamba ha mutu yoze unazeye moko. (2 Sango ja Mianangana 15:7; A-Hepreu 12:12) Muze muhonga hanji muzeya hanji muwivwa ngwe usendo we ni Yehova unazeye, muhasa kunyonga kulitwamina kuwayila Yehova. Kulihi muhasa kuwana utakamiso? Yika muyikukwasa hanga upwe ni tachi ja kunyongonona ni chiseke?

5. (a) Kuchi mutuhasa kwivwa nyi tuli ni yipikalo, alioze yika twatamba kwiwuluka? (b) Yika mutushimutwina?

⁵ Tanga Zefania 3:16, 17. Kutwatambile kwivwa woma ni kuhonga, hanji ni kuzeyesa moko jetu muze mutupwa ni yipikalo. Tata yetu wazango, Yehova, kanechi hanga tukunjike yipikalo yetu yeswe kuli iye. (1 Petulu 5:7) Yehova kakutufunga ngwe chize afungile munyachi wa Izalele. Kaalwekele ngwenyi kwoko lienyi “kuliahihile ngwe iye kahashile kulamwina.” Kakuzanga kulamwina tuvumbi twenyi ashishika. (Izaia 59:1) Mu mutwe uno, mutushimutwina yilweza yipema yitatu ya mu Mbimbiliya yize yinasolola ngwo Yehova kakuzanga nawa mahasa kutakamisa atu jenyi chipwe ngwe kanamono yipikalo yinji. Tutalenu chize yilweza yacho muyihasa kututakamisa.

6, 7. Yika twalilongesa hachize A-Izalele akumbile A-Amaleke?

⁶ Muze A-Izalele atuhukile mu undungo mu Engitu, mwapalikile matangwa akehe yaalukuka kuli A-Amaleke. Mose yalweka Yoshua, lunga wa hamu, hanga asongwele A-Izalele ku jita. Mba Mose yaya ni Arone ni Hure ku mulundu wapwile hakamwihi. Ha mulundu wacho, yahasa kumona waze apwile ni kwasa jita. Shina wano malunga atatu kachinyine mumu woma evwile nyi? Kwamba pundu, ka!

⁷ Mose kakawile ululikiso uze wakwashile a Izalele hanga akumbe A-Amaleke. Kakwachile lukanda wa Zambi wamwenemwene ni kumuzundula helu. Muze Mose alingile chino, Yehova yahana tachi kuli A-Izalele ja kuzwela ni A-Amaleke. Alioze, muze moko ja Mose alemene ni kuputuka kuzeya, A-Amaleke yaputuka kukumba. Arone ni Hure, washiwashi, yakwasa Mose. “Yanda liwe, nikulisa mushi lienyi mba iye watwamineho. Arone ni Hure akundwijile moko jenyi, mukwo ku lumbu limwe, ni mukwo ku lumbu likwo. Chocho moko jenyi ajikijile ndo tangwa hilianjila.” Ewa, ha ndundo lia kwoko lia Zambi, A-Izalele ya kumba jita.—Kutuhuka 17:8-13.

8. (a) Yika Asa alingile muze A-Etiopia alukukile A-Yunda? (b) Kuchi mutuhasa kwimbulula Asa?

⁸ Yehova kazangile nawa kukwasa atu jenyi ni kwoko lienyi lia ndundo ha matangwa ja Mwanangana Asa. Yizavu ya maswalale yinji avuluka mu Mbimbiliya, alioze chizavu cha Ka-Etiopia, Zera che chatohwele chinji mumu chapwile ni maswalale 1,000,000. Maswalale ja A-Etiopia kokele yisuho yaali hakwatesa ni maswalale ja Asa. Shina Asa yazakalala chinji ni kwivwa woma hanji kuhonga nyi? Shina kazeyesele moko jenyi nyi? Ka! Hazehene Asa yeta ukwaso kuli Yehova. Atu waze anyingika jita, mahasa kunyonga ngwo chapwile chikalu kukumba maswalale ja A-Etiopia. “Alioze kuli Zambi yuma yeswe muyihasa kupwa.”(Mateu 19:26) Zambi yalingila ndundo jenyi jinene ni kulamba “A-Etiopia kumeso ja Asa,” yoze wapwile ni mbunge “yingunu kumeso ja Yehova matangwa jenyi eswe.”—2 Sango ja Mianangana 14:8-13; 1 Mianangana 15:14.

9. (a) Mumu liaka Nehemia kakechele kutunga mbango ja Yerusaleme? (b) Kuchi Yehova akumbulwile kulemba cha Nehemia?

⁹ Yika Nehemia awanyine muze ayile ku Yerusaleme? Kawanyine akwa-kole a ku yifuchi yeka kanazwelesa A-Yunda, mba te hecha kutunga mbango ja Yerusaleme. Mbonge te kuyakapwile yakufungiwa, nawa A-Yunda te hahonga. Kuchi Nehemia evwile? Shina neye yahonga ni kuzeyesa moko jenyi nyi? Ka! Nehemia yajikijila hali Yehova ngwe chize alingile Mose, Asa, ni tuvumbi twa Yehova akwo waze ashishika. Nehemia neye yalemba kuli Yehova amukwase, mba Yehova yakumbulula kulemba chenyi. Zambi yatakamisa A-Yunda ni “ngolo” jenyi ni ‘kwoko lienyi lia tachi.’ (Tanga Nehemia 1:10; 2:17-20; 6:9.) Shina nunafuliela pundu ngwenu ni musono Yehova kakutakamisa tuvumbi twenyi ni “ngolo” jenyi ni ‘kwoko lienyi lia tachi’ nyi?

10, 11. (a) Kuchi Satana akutweseka hanga tuzeyese moko jetu? (b) Kuchi Yehova akututakamisa ni kutwaha tachi? (c) Kuchi nwayuka ku malongeso ja Yehova?

¹⁰ Twatamba kunyingika ngwetu Ndiapu kechi kuzeyesa moko jenyi. Manunga ni kutupinjisa hanga tweche milimo yetu ya Ukristu. Kakutuliongela ni kutuvwisa woma kupalikila mu unguvulu, mangana a mangeleja ni yitanganyanyi. Mumu liaka? Kanafupu tweche kwambujola sango lipema lia Wanangana. Alioze Yehova mahasa, nawa kanazange atukwase, nawa kakutwaha spiritu yisandu yitutakamise. (1 Sango ja Mianangana 29:12) Chili chilemu kwita kuli Zambi atwehe spiritu yenyi hanga tuhase kulimika ni Satana ni chifuchi chenyi chipi. (Samu 18:39; 1 A-Korindu 10:13) Nawa twakusakwila chinji haukwaso twakuwana mu Liji lia Zambi. Uchinyongenu ha yize twakulilongesa mu mikanda yetu hita kakweji. Maliji ali ha Zekaria 8:9, 13 (tanga) Kasonekene muze te achili ni kutunga tembele ya Yerusaleme, alioze nihindu mahasa kutukwasa musono.

¹¹ Yehova kakututakamisa nawa kupalikila mu malongeso waze twakutambula ha kukunguluka cha chikungulwila, cha mbonge ni cha mambonge, ni ku mashikola a Zambi. Malongeso jacho kakutukwasa kuwayila Zambi ni mbunge yipema, kulitesa milimo yakulinga, ni kufunga kanawa milimo yetu ya Zambi. (Samu 119:32) Shina tunazange atutakamise ni malongeso ja Yehova?

12. Yika twatamba kulinga mba tununge ni kujikiza?

¹² Yehova kakwashile atu jenyi kukumba A-Amaleke ni A-Etiopia, ni kuhana tachi kuli Nehemia ni A-Yunda hanga ahwise kutunga mbango ja Yerusaleme. Chimuwika nawa, Zambi mahasa kututakamisa hanga tununge ni mulimo wetu wakwambujola, chipwe tuhu mutuzakalala kumbunge, hanji matuhungumiona chipwe matulelesa kuli atu. (1 Petulu 5:10) Yehova kechi kulinga yikomokeso hanga ahwisa yipikalo yetu. Alioze, ndo tulinge ko yimwe. Yuma yika? Twatamba kutanga Liji lia Zambi hita tangwa, kululieka ni kuya ku kukunguluka chetu hita poso, ni kununga ni longeso lia wika ni lia usoko ni kulemba ni kujikijila hali Yehova. Kanda tutayize chuma cheswecho hanga chituhonese kutambula utakamiso ni ukolwezo uze Yehova akutwaha. Nyi mutwivwa ngwetu moko jetu hazeya mu yimwe yuma, tulembenu kuli Zambi atukwase. Mba hi talenu chize spiritu ya Zambi ‘muyitupala hanji kulinga chize chamupemena.’ (A-Fwilipu 2:13) Kutala ni yetu mutuhasa kutakamisa moko ja mandumbu jetu nyi?

13, 14. (a) Kuchi umwe ndumbu amutakamishine muze afwishile mukwo-pwo? (b) Kuchi mutuhasa kutakamisa akwetu?

¹³ Yehova hanatwehe mandumbu hashi heswe waze mahasa kutukolweza. Postolo Paulu ngwenyi: “Ololenu moko aze a upekepeke, ni makungunwa a kukokoloka. Lingilenu molu jenu majila alulama.” (A-Hepreu 12:12, 13) Akwa-Kristu akulianga anji no kakwaashile kuli mandumbu jo. Chimuwika ni musono. Tutalenu chilweza chino. Muze umwe ndumbu wafwishile pwo lienyi, ni kupalika muyipikalo yinji, yamba ngwenyi: “Nalilongesele ngwami, kutuchi kuhasa kusakula lamba lietu, hanji mashimbu ni yisuho yize muyisoloka. Kulemba ni longeso lia wika lie lia kungulamwina. Ukwaso wa mandumbu we wakungukolweza chinji. Mba hinamona ulemu wa kupwa ni usoko ukolo ni Yehova shimbu kanda tupalika mu umwe kapinda.”

¹⁴ Arone ni Hure katakamishile moko ja Mose muze te anase jita ni A-Amaleke. Ni musono, mutuhasa kuwana jila ja kutakamishinamo akwetu ni kwakwasa. Mandumbu amwe kanalipikala ni ushinakaji, misongo, yihungumiona kukatuka kuli asoko jo, yinyengo, ni kufwisa asoko. Mutuhasa kutakamisa akweze waze akushinjila chinji hanga alinge yuma yipi hanji kufupa lufuma wa hano hashi. (1 A-Tesalonika 3:1-3; 5:11, 14) Tupwenu ni kuwana jila ja kusolwelamo zango kuli akwetu ku Zuwo lia Wanangana, mu munda, muze tunali no hamuwika, ni muze mutuhanjika no ha telefone.

15. Kuchi maliji jetu apema mahasa kukwasa mandumbu jetu?

¹⁵ Muze Asa akumbile maswalale anji ja A-Etiopia, profeta Azaria yamukolweza ni atu jenyi ngwenyi: “Alioze takamenu; moko jenu kanda akokoloka, mumu manukundulula ha milimo yenu.” (2 Sango ja Mianangana 15:7) Maliji jacho kakwashile Asa hanga apemese uwayilo wamwenemwene. Chimuwika nawa, maliji jetu apema mahasa kukolweza akwetu ni kwakwasa anunge kuwayila Yehova. (Yishima 15:23) Kanda tuvulama nawa ngwetu mutuhasa kukolweza mandumbu jetu nyi mutupwa ni kukumbulula kanawa hakukunguluka.

16. Kuchi makulwana akwimbulula Nehemia? Hanenu yilweza ya chize mandumbu ni mapangi akukwasa mandumbu jo.

¹⁶ Nehemia ni A-Yunda katakamishine moko jo ni ukwaso wa Yehova. Mba yahwisa kutunga yikalakala ya Yerusaleme ha matangwa 52. (Nehemia 2:18; 6:15, 16) Nehemia te keshi kutala wika akwo makalakala. Neye kakwashile mulimo wakutunga yikalakala ya Yerusaleme. (Nehemia 5:16) Chimuwika nawa, makulwana a mu yikungulwila anji kakwimbulula Nehemia muze akukwasa kutunga hanji kupemesa ni kululieka ma Zuwo a Wanangana. Wano mandumbu jetu azango kakutakamisa nawa mandumbu jo waze ali ni “mbunge ja woma” hakuya ni kwaameneka ni kukalakala no mu munda.—Tanga Izaia 35:3, 4.

17, 18. Nyi tunapalika mu yimwe yipikalo hanji tunazakalala ku mbunge, mutuhasa kupwa ni ushindakenyo uka?

¹⁷ Kukalakala hamuwika ni mandumbu, chakukolesa kulinunga chetu. Chakutukwasa nawa kufunga usendo wetu ni kujikijisa ufulielo wetu mu yilakenyo yize muyiza mu Wanangana wa Zambi. Nyi mututakamisa moko ja akwetu, mutwakwasa anyongonone muze mapalika mu yipikalo ni kupwa ni kutalatala cha kulutwe. Nawa nyi twakwasa akwetu, moko jetu matakama nawa mutusa mbunge kuyiwape yize yineza kulutwe.

¹⁸ Muze mutunyonga ha chize Yehova akwashile ni kufunga tuvumbi twenyi ashishika akunyima, ufulielo wetu muli iye muujikiza. Kashika nyi mutupalika mu yimwe yipikalo ni kuzakalala ku mbunge ‘moko jetu kanda ahonga.’ Tunyingikenu ngwetu nyi tweta kuli Yehova atukwase, kwoko lienyi lia ndundo mulitutakamisa ni kutusongwela hanga tukatambule yiwape mu Wanangana uze hiwaheta hakamwihi.—Samu 73:23, 24.