1, 2. Kapinda muka ali nenyi tuvumbi twa Yehova?

TUVUMBI twa Zambi eswe ashishika, kukatuka kuli Abele ndo musono, kakulikolweza. Postolo Paulu yalweka Akwa-Kristu A-Hepreu ngwenyi kanyongonwene “ha kulinjika chinji cha lamba” muze azangile apwe ni utayizo wa Yehova hanga awahise. (A-Hepreu 10:32-34) Paulu katesele tachi jize Akwa-Kristu akusa, ni tachi jize akwa-kuheha a mu Ngregu apwile ni kusa hakuzomboka, kulitachika, ni kulilamba. (A-Hepreu 12:1, 4) Musono, twakuzomboka tukawane mwono, alioze tuli ni akwa-kole waze anazange kutupiangula tuhone kupwa ni uwahililo ni kutokesa yiwape yetu ya ku matangwa akulutwe.

² Yuma yikalu chinji twakupinda hanji kulitachika nayo yili Satana ni chifuchi chenyi. (A-Efwesu 6:12) Chili chilemu kwehuka malongeso, mana ja atu, ni yitanga yipi ya hano hashi yili ngwe utanji, kunwa makanya ni kuzengewa walwa. Twatamba nawa kununga ni kusa tachi chipwe mutuhonga hanji kuzeya.—2 A-Korindu 10:3-6; A-Kolosu 3:5-9.

3. Kuchi Zambi akutulongesa kulimika ni akwa-kole jetu?

³ Shina mutuhasa kukumba kapinda wacho nyi? Ewa, alioze hi chashiko. Paulu yalitesa mwene ni mukwa-kuzwela, ngwenyi: “Nakulimbufula, hi kufufula ko mu tetela mwamokomoko.” (1 A-Korindu 9:26) Twatamba kulimika ni akwa-kole jetu ngwe chize akulinga atu waze anazwele. Yehova kakutukwasa ni kutulongesa mwakulingila chino. Kakutukwasa kupalikila mu Mbimbiliya. Kakutukwasa nawa kupalikila mu mikanda yetu ni kukunguluka cha chikungulwila, cha mbonge ni cha mambonge. Kutala twakukaula malongeso eswe twakutambula? Nyi ka, kutuchi kuhasa kulimika ni mukwa-kole yetu, ngwe chize mutu mamufufula mutetela.

4. Yika twatamba kulinga hanga upi uhone kutukumba?

⁴ Twatamba kulimuka mashimbu eswe. Mumu liaka? Mumu akwa-kole jetu mahasa kutulukuka ha mashimbu waze tunalaluka hanji muze tunahongo. Mbimbiliya yakututoweza ni kutukolweza muze yakwamba ngwo: “Yipi kanda yinukumba, alioze kumbenu yipi ha kulinga yipema.” (A-Roma 12:21) Nyi mutusa tachi ni kulimika ni yuma yipi, mutukumba. Alioze nyi mutulaluka ni kuhona kusa tachi, Satana, chifuchi chenyi ni ulelu wetu muyitukumba. Kashika, twatamba kununga kusa tachi. Kanda tuhonga ni kuzeyesa moko jetu!—1 Petulu 5:9.

5. (a) Yika twatamba kunyingika mba tupwe ni utayizo wa Yehova hanga atuwahise? (b) Atu aka a mu Mbimbiliya waze mutulilongesa?

⁵ Twatamba kunyingika yize tunasela tachi mba tuhase kukumba. Twakusa tachi mumu twakuzanga tupwe ni utayizo wa Yehova hanga atuwahise. Mukanda wa A-Hepreu 11:6 unambe ngwo: “Yoze meza kuli Zambi ndo mafuliela ngwenyi, Zambi hwali, iye mukwa kwonona waze akumufupa.” Kufupa Yehova chinalumbunuka kusa tachi hanga tupwe ni utayizo wenyi. (Yilinga 15:17) Mu Mbimbiliya muli yilweza yipema yamandumbu waze alingile chino. Yakomba, Rakele, Yosefwe ni Paulu kapalikile mu kapinda munji mu mwono wo. Alioze yakumba yipikalo yo. Yilweza yo yinasolola ngwo nyi twasa tachi, ni yetu mutuhasa kutambula yiwape kuli Yehova. Manenu tutale.

6. Yika yakwashile Yakomba anyongonone, nawa kuchi amuwahishile (Tala chizulie ha uputukilo.)

⁶ Lunga washishika Yakomba yasa tachi ni kunyongonona mumu kazangile Yehova, nawa kasele ulemu usepa apwile nawo ni iye. Kafulielele ni mbunge yeswe ngwenyi Yehova makawahisa munyachi wenyi ngwe chize amulakenyene. (Uputukilo 28:3, 4 ) Muze Yakomba apwile ni miaka 100, kalitachikile ni mungelo hanga amuwahise kuli Zambi. (Tanga Uputukilo 32:24-28.) Shina Yakomba kalitachikile ni mungelo mu tachi jenyi nyi? Ka! Alioze kazangile chinji kusolola ngwenyi mahasa kukalakala hanga amuwahise. Yehova yawahisa Yakomba hakulikolweza mba yamwaha jina Izalele, kulumbununa ngwo “mukwa-kulitachika ni Zambi.” Yakomba yatambula yiwape yize ni yetu tunafupu, chekwamba, kututayiza kuli Yehova ni kutuwayisa.

7. (a) Kapinda muka apwile nenyi Rakele? (b) Yika Rakele alingile nawa kuchi amuwahishile?

⁷ Pwo lia Yakomba, Rakele, kazangile chinji kumona chize Yehova mamanununa yize alakenyene mukwo-lunga. Alioze te kuli umwe kapinda. Rakele te mumba. Chino chapwile ni kuneha yikola yinji ku mbunge ja mapwo ha mashimbu jacho. Kuchi mba Rakele ahashile kunyongonona muze apwile ni kapinda wacho? Kanungine ni kutalatala. Yanunga nawa ni kulemba chinji kuli Yehova. Yehova yevwa kulemba chamwenemwene cha Rakele, mba hakasula yamuwahisa apwe ni ana. Yeyize kuma ambilile ngwenyi: “Hinalitachika . . . hinakumba.”—Uputukilo 30:8, 20-24.

8. Lamba lika Yosefwe apwile nalio, nawa kuchi mutuhasa kukaula chilweza chenyi chipema?

⁸ Chilweza chipema cha Yakomba ni Rakele chakwashile mwano Yosefwe kunyongonona muze apwile ni kapinda mu mwono wenyi. Muze Yosefwe apwile ni miaka 17, mwono wenyi walumukine. Mandumbu jenyi, waze te akumuvwila kole ya mulanjisa mu undungo. Kukatuka haze, ya musa mu zuwo lia ususu mu Engitu ha miaka yinji, chipwe ngwe te keshi mulonga. (Uputukilo 37:23-28; 39:7-9, 20, 21) Alioze Yosefwe kakahongele hanji kwivwa uli, nawa kakahilwishile upi ku upi. Mumu lika? Mumu Yosefwe kalemesele usepa wenyi ni Yehova ni kuhulikila kuli iye ni mbunge yenyi yeswe. (Ulevi 19:18; A-Roma 12:17-21) Chilweza cha Yosefwe muchihasa kutukwasa. Chipwe ngwe twakolele ni lamba hanji mutusoloka ngwe kutushi ni kutalatala, chatutamba kununga kuzomboka ni kunyongonona. Muze mutulinga chocho, mutuhasa kupwa ni ushindakenyo ngwetu Yehova matuwahisa.—Tanga Uputukilo 39:21-23.

9. Kuchi mutuhasa kwimbulula Yakomba, Rakele ni Yosefwe?

⁹ Musono, ni yetu hanji mutuhasa kupwa ni umwe kapinda. Hanji tunamono lamba hamukunda wa kutulinga yipi, kutusolwela katonde, kutukekuna ni kutuvwila chipululu. Sapu tuzeye, twiwulukenu yize yakwashile Yakomba, Rakele ni Yosefwe hanga anunge ni kuwayila Yehova ni uwahililo. Zambi kaatakamishine ni kwawahisa mumu kazangile chinji usendo wo ni iye. Yanunga ni kusa tachi ni kulinga yize apwile ni kulemba. Muze tuli mu matangwa akusula, chili chilemu kununga ni kutalatala chetu cha kulutwe. Shina nunazange kusa tachi, chipwe ngwetu, kukilikita hanga nupwe ni utayizo wa Yehova?

10, 11. (a) Mumu liaka twatamba kusa tachi hanga atuwahise kuli Zambi? (b) Yika muyitukwasa hanga tupwe ni kulinga yuma yipema?

¹⁰ Mumu liaka twatamba kusa tachi hanga atuwahise kuli Zambi? Muze tuli yivulumunyi, mutuhasa kulipikala ni manyonga api. Eka kakupinda ni mbunge yakufupa akalakale chinji mu munda, alioze akwo kanayiji hanji kwivwa chinyengo hakupwa ukawo. Amwe nawa kukonekena akwo chakupwa chikalu. Kashika, tulieswe twatamba kusa tachi tukumbe yuma yize yakutupinjisa kuwayila Yehova yoze wakutuwahisa, chipwe ngwe hitwamulingila miaka yinji.

¹¹ Pundu lume, muchihasa kupwa chikalu kupwa mukwa-Kristu ni kulinga yuma yaululi, chipi chipi nyi tunalipikala ni amwe manyonga api. (Jeremia 17:9) Nyi che twakwivwa, tulembenu kuli Yehova ni kwita spiritu yenyi yisandu. Kulemba ni spiritu yisandu muyihasa kutujikijisa tulinge yuma yipema, hanga tutambule yiwape ya Zambi. Tusenu tachi hanga tulinge yize twakwita mu yilemba yetu. Tusenu tachi tupwe ni kutanga Mbimbiliya hita tangwa ni kupwa ni shimbu lia longeso lia wika ni lia uwayilo wa mu usoko.—Tanga Samu 119:32.

12, 13. Kuchi Akwa-Kristu aali atambwile ukwaso hanga ahase kukumba usolo wo upi?

¹² Tuli ni yilweza yinji yize yinasolola chize Liji lia Zambi, spiritu yenyi, ni mikanda yetu yinakwasa mandumbu hanga ehuke usolo upi. Kanuke umwe yatanga pande jakwamba ngwo “Kuchi Muhasa Kwehuka Usolo Upi?” jize japwile mu Despertai! wa Dezembro 8, 2003. Kuchi alingile? Mwene yamba ngwenyi: “Nguli ni kupinda ni manyonga api. Pande natanganga jize jinasolola ngwo ‘chili chikalu chinji kuli atu anji kwehuka usolo upi,’ jangukwasanga chinji kwivwa ngwe nguli hakachi ka mandumbu. Chishi ukawami.” Au kanuke yayuka nawa hakutanga mutwe wakwamba ngwo “Shina Zambi Kakutayiza Atu Waze Akulialumuna Mweka Nyi?” uze wapwile mu Despertai! wa Outubro 8, 2003. Mu mutwe wacho yawana ngwo amwe kanalipikala ni kapinda uli ngwe “lumbambo mu mujimba.” (2 A-Korindu 12:7) Alioze muze atu jacho anase tachi hanga apwe ni ndako yipema, kali ni kutalatala chipema cha kulutwe. Mba kanuke wacho yamba ngwenyi: “Ha chino, ni yami munguhasa kushishika ha tangwa ha tangwa. Ngunasakwila chinji kuli Yehova ha ululikiso wenyi uze wakutukwasa ha tangwa ha tangwa hano hashi hapi.”

¹³ Tutalenu chilweza chikwo cha umwe pangi wa mu Estados Unidos. Iye yasoneka ngwenyi: “Ngunanusakwila chinji ha kutwaha kulia chize tunafupu ha shimbu lialita. Kanji-kanji nakwivwa ngwe yikuma yino kakuyisonekena yami. Ha miaka yinji, nakupinda ni usolo upi wa chimwe chuma chize Yehova keshi kuzanga. Ha mashimbu amwe nakuzanga kwecha ngununge kwami chizechene. Ngunanyingika ngwami Yehova kali mukwa-keke nawa kakukonekena, alioze amu nguli ni usolo upi uze nawa chichi kuvwila kole mu mbunge yami, nakumona ngwe chichi kuhasa kutambula ukwaso wenyi. Kapinda wacho kanangupinjisa ku mwono wami weswe. . . . Muze natangile chikuma chakwamba ngwo: ‘Uli “ni Mbunge ya Kunyingika” Yehova?’ mu Kaposhi wa Kutalila wa Março 15, 2013, yingwivwa ngwami pundu lume Yehova kanazange kungukwasa.”

14. (a) Kuchi Paulu evwile ha tachi jize asele? (b) Kuchi mutuhasa kukumba jita ya ulelu wetu?

¹⁴ Tanga A-Roma 7:21-25. Paulu kanyingikine chize muchihasa kupwa chikalu kupinda ni usolo upi ni tupalia. Chipwe chocho, kapwile ni ushindakenyo ngwenyi mahasa kukumba jita nyi malemba kuli Yehova, ni kujikijila ha ukwaso wenyi, ni kufuliela ha chitapo cha Yesu. Mba yetu? Mutuhasa kukumba jita ya ulelu wetu nyi? Ewa, hi ku tachi jetu ko, alioze nyi mutwimbulula Paulu ni kujikijila hali Yehova ni mbunge yeswe, ni kufuliela nawa ha chitapo cha Yesu.

15. Kuchi Yehova mahasa kutukwasa hanga tununge ni kushishika nawa ni kunyongonona?

¹⁵ Ha mashimbu amwe, Zambi mahasa kutwecha tusolole chize tunalipikala ni chimwe chuma. Chakutalilaho, nyi yetu hanji usoko wetu makwachika umwe musongo unene hanji kutulinga yipi, yika mutulinga? Nyi mutujikijila hali Yehova, mutuliumba kuli iye atwehe tachi mutufupa hanga tununge ni kushishika ni kupwa ni chiseke ni kukolesa usepa wetu ni iye. (A-Fwilipu 4:13) Yilweza ya Akwa-Kristu anji akunyima ni a musono, yinasolola ngwo yilemba muyihasa kutukolweza ni kutwaha hamu tunafupu hanga tununge ni kunyongonona.

16, 17. Muzanga kusa tachi hanga ulinge yika?

¹⁶ Ndiapu mawahilila chinji nyi mutuhonga ni kwecha kuwayila Yehova ni kuzeyesa moko jetu. Kashika, tusenu tachi ni ‘ku kakaminya ku yize yinapeme.’ (1 A-Tesalonika 5:21) Mutuhasa kukumba Satana, ni hashi henyi hapi ni usolo weswawo upi tuli nawo. Mutuhasa kukumba nyi mutufuliela ni mbunge yeswe ngwetu Zambi matutakamisa ni kutukwasa.—2 A-Korindu 4:7-9; A-Ngalashia 6:9.

¹⁷ Kashika tunungenu ni kusa tachi. Tunungenu kulitachika. Tunungenu ni kuzomboka. Tunungenu ni kunyongonona. Mutuhasa kupwa ni ushindakenyo ngwetu Yehova ‘mazulula tupenda a mwilu ni kutuzukwila yiwape yakulumbama.’—Malakia 3:10.