1, 2. (a) Mumu liaka hichashiko yisemi kulongesa ana hanga afuliele Yehova, mba yika muyikwasa yisemi ahase kulinga chino? (b) Yikuma yiwana yika mutushimutwina haliapwila?

AMWE yisemi mu França yamba ngwo: “Twafuliela kuli Yehova, alioze achi kuchalumbunukine ngwo ni ana jetu no mamufuliela. Ufulielo keshi kuuhinga. Ana jetu kaputuka hakehe-hakehe kufuliela.” Umwe ndumbu mu Austrália yasoneka ngwenyi: “Kukwasa ana hanga apwe ni ufulielo mu mbunge yo che chuma chikalu akumona yisemi.” Yamba nawa ngwenyi: “Muhasa kunyonga ngwe wakumbulula kanawa yize mwane akuhula. Alioze muwivwa hi makuhula nawa chihula chizechene ha shimbu likwo. Kumbululo lialita lize mumwaha musono hanji hamene kulichi kulita nawa.” Muze ana anayi nikukola, yisemi anji kakuputuka kulumbununa yikuma yinji ha yuma yimuwika. Hachino maputuka kuzachisa jila jinji hakulongesa ana jo hanga azange Yehova.

² Nyi uli chisemi, kutala wakuyambashana nyi muhasa kulongesa ana je azange Yehova ni kununga kumuwayila ni muze makola nyi? Kwamba pundu, kukushi niumwe mahasa kulinga chino mutachi jenyi. (Jeremia 10:23) Yeyize kuma atamba kutukwasa kuli Yehova. Aye kakuhana yisemi usongwelo unji. Kuchi mba munuhasa kukwasa ana jenu? (1) Anyingikenu kanawa. (2) Alongesenu yize yili mu mbunge yenu hakutwala kuli Yehova. (3) Zachizenu yilweza. (4) Lembenu kuli Zambi anwehe spiritu yisandu, nawa nwatamba kulihumikiza hakulongesa ana jenu.

3. Kuchi yisemi mahasa kwimbulula chize Yesu apwile ni kulongesa tumbaji twenyi?

³ Kanji-kanji, Yesu kapwile ni kuhula tumbaji twenyi hayize o afulielele. (Mateu 16:13-15) Munuhasa kumwimbulula. Muze nunashikama hanji kulinga yimwe ni ana jenu, ahulenu nwivwe yize akunyonga ni kwecha anulweze chize akwivwa. Shina kuli yimwe nunakakajana? Umwe ndumbu wa miaka 15 mu Austrália yamba ngwenyi: “Kanji-kanji tata kakuhanjika ni yami hakutwala ku ufulielo wami ni kungukwasa. Kakunguhula ngwenyi: ‘Kuchi Mbimbiliya yakwamba?’ ‘Unatayize yize yakwamba nyi?’ ‘Mumu liaka wakutayiza yuma yacho?’ Tata kakuzanga ngukumbulule kulita ni chize nanyingika chakuhona kufunyina yize iye akungulweka hanji mama. Muze hinakola, nakulumbununa kanawa yuma.”

4. Mumu liaka chili chilemu kulihumikiza ni kukumbulula yihula ya ana jenu? Hanenu chilweza.

⁴ Nyi ana jenu keshi kutayiza amwe malongeso a Mbimbiliya, hwimenu mbunge. Akwasenu awane makumbululo a yihula yo. Chisemi umwe walunga ngwenyi: “Nwatamba kumona yihula ya ana jenu ngwenu yilemu. Kanda nuyiliula ngwenu yangwaza, hanji kuchina kukumbulula ha mukunda wa kwivwa sonyi.” Kwamba pundu, chili chipema ana jenu kunuhula, mumu kanazange kunyingika. Ni Yesu kapwile ni kuhula muze te uchili kanuke. (Tanga Luka 2:46.) Mukweze umwe wa ku Dinamarca ngwenyi: “Muze nambile ngwami, kwiji nyi kwatwama uwayilo wamwenemwene, yisemi jami yalihumikiza, chipwe ngwe kazakalile chinji hali yami. Yakumbulula yihula yami yeswe ni Mbimbiliya.”

5. Yika atamba kulinga yisemi, chipwe ngwe ana jo masoloka ngwo kafuliela muli Yehova?

⁵ Nwatamba kunyingika kanawa ana jenu. Kanda nunyonga ngwenu, kafuliela Yehova mumu wika ngwo kakuya ni kwambujola ni ku kukunguluka. Kuchi akwivwa hakutwala kuli Yehova, nawa kuchi akunyonga ha Mbimbiliya? Senu tachi nunyingike nyi kuli yimwe yakwaapinjisa hanga anunge ni ushishiko wo kuli Yehova. Hanjikenu no matangwa eswe muze nunakalakala no hamuwika. Lembelenu ana jenu muze nuli no ni muze nuli ukawenu.

6. Nyi yisemi manunga ni kulilongesa hakutwala kuli Yehova ni Mbimbiliya, kuchi chino muchaakwasa kulongesa ana jo?

⁶ Atu kazangile chinji kupanjika kuli Yesu mumu Yesu kazangile chinji Yehova nawa kanyingikine kanawa Yisoneko. Yevwa nawa ngwo Yesu kaazangile. Mba yamupanjika chinji. (Luka 24:32; Yoano 7:46) Cho chimuwika, muze ana jenu mamona ngwo nwazanga Yehova, no mamuzanga. (Tanga Shimbi Yamuchiali 6:5-8; Luka 6:45.) Kashika, nungenu ni kulilongesa kanawa Mbimbiliya, ni kutanga mikanda yetu yikwo. Nyingikenu kanawa yitangiwa ya Yehova. (Mateu 6:26, 28) Nyi nwanyingika kanawa Yehova, munuhasa kumulumbununa kanawa kuli ana jenu.—Luka 6:40.

7, 8. Muze mulilongesa yimwe hakutwala kuli Yehova yika watamba kulinga? Kuchi yisemi amwe akulinga chino?

⁷ Nyi nwalilongesa yimwe hakutwala kuli Yehova, alwezenuko ana jenu. Lingenu chino hita shimbu nuli no, hi wika ko ha kululieka kukunguluka hanji ha uwayilo wa mu usoko. Ayi ye akulinga amwe yisemi ku Estados Unidos. Kakuhanjika hali Yehova muze mamona yimwe yitangiwa yipema hanji muze anali kulia chiyema. Ayo ngwo: “Twakwiwulula ana jetu ha zango ni mana ja Yehova waze akusoloka ha yize akutwaha.” Amwe yisemi ku África do Sul kakuhanjika ni ana jo aali a mapwo hakutwala ku yitangiwa muze anakalakala no mu munda. Chakutalilaho, hamwe kakwamba chikomokeso cha chize mikeshi yakusoka. Yisemi jacho ngwo: “Twakweseka kwaafumba hanga ase mwono vumbi ni yitangiwa yikwo yakukomwesa.”

⁸ Chisemi umwe wa ku Austrália yatwala mwanenyi wa miaka 10 ku zuwo akusolwela yuma yikulu. Chisemi wacho yazachisa shimbu liacho hanga akolese ufulielo wa mwanenyi ni kumona yuma yize yinasolola ngwo Yehova mwe Sakatanga. Yamba ngwenyi: “Yitumona amwe tushitu ashakulu a mu kalunga-lwiji waze avuluka ngwo ammonoids ni trilobites. Yitukomoka hakwivwa ngwo tushitu jacho kapwile te apema, akukomwesa, alioze kalisele ni waze twakumona musono. Mba nyi chamwenemwene yuma ya mwono yakukatuka ku yuma yangwaza ni kupwa yuma yakukomwesa, mba mumu liaka tushitu wano apwile akukomwesa kukatuka ha mashimbu jacho? Ali liapwile longeso linene kuli yami, mba yinguliambulwila mwanami.”

9. Mumu liaka chili chipema kuzachisa yilweza? Chilweza chika asolwele umwe pangi?

⁹ Kanji-kanji Yesu kapwile ni kuzachisa yilweza. Kalongesele yuma yilemu hakuta yishima, hanji kuhana yimwe yilweza. (Mateu 13:34, 35) Nyi munuzachisa yilweza, munukwasa ana jenu anyonge ha yize nunaalongesa. Munwaakwasa anyonge ha malongeso waze nunaalongesa, hanga aalumbunukine ni kuhasa kweewuluka. Mevwa nawa kuwaha kulilongesa. Chakutalilaho, pangi umwe wa ku Japão kazangile ana jenyi aali a malunga anyingike ngwo jila Yehova atangililemo hano hashi yinasolola chize iye akutuzanga. Mwana umwe kapwile ni miaka 8 mukwo 10. Mba yazachisa chilweza chize ahashile kwivwa kulita ni miaka yo. Yahana anenyi yamwa, suka ni kafe. Mba yalweka hita mwana amulingile kafe. Yalumbununa ngwenyi: “Kapwile ni kulianjeka hakulinga kafe. Muze nahulile mumu liaka apwile ni kulianjeka, o yamba ngwo te kanazange kafe yacho yipwe ngwe yize nakuzanga. Mba yingwalumbunwina ngwami, Zambi neye kachingile fuji kulita ni chize yafupiwa kuli yetu.” Ana kawahililile chinji kulilongesa, chino te muchakwasa achine kuvulama!

10, 11. (a) Chilweza chika munuhasa kuzachisa hanga nusolwele ana jenu ngwenu, Sakatanga kwali? (Tala chizulie ha uputukilo.) (b) Yilweza yika yize hi nunazachisa kama?

¹⁰ Yilweza yika munuhasa kusolola hanga nukwase ana jenu anyingike ngwo Sakatanga kwali? Munuhasa kwaha mulimo wakuchaka wunga hanga nulinge mbolo. Nwatamba kwalumbunwina ngwenu, chili chilemu kuchinga kanawa wunga mba mbolo yiwahe. Muze mahwisa, ahenu muhuko ni kwahula ngwenu: “Nunanyingika ngwenu yimwe akuchinga mba kupwe muhuko wacho?” Tetenu muhuko wacho hakachi ni kwaaha mukeshi. Lumbununenu ngwenu mu mukeshi mwe mwakukatuka muhuko. Mwe mwatwama shimbi jakutanga nacho muhuko. Alioze shimbi jacho jikalu chinji kuhyana ja kulinga mbolo. Munuhasa kwaahula ngwenu: “Kuli yoze wakusoneka chize atamba kwocha mbolo. Mba iya wasonekene chize mihuko yatamba kusoka?” Nyi ana jenu hakola, munuhasa kwaalumbunwina ngwenu shimbi ja mitondo ya mihuko ni mihuko yacho jatwama mu DNA. Munuhasa kulweka yizulie ni yilweza ha mafwo 10 ndo 20 mu mukanda wetu A Origem da Vida—Cinco Perguntas Que Merecem Resposta..

¹¹ Yisemi amwe kakutangila hamuwika ni ana jo mitwe ya mu Despertai! yakwamba ngwo “Shina Yuma Kayitangile Nyi?” Nyi ana jenu achili akehe, munuhasa kwalumbunwina mujila yashi. Chakutalilaho, amwe yisemi ku Dinamarca yatesa ndeke ni tujila. Ngwo: “Ndeke jakusoloka ngwe tujila. Mba kutala ndeke ja kwomba monda ni kutota ndeke jikehe-jikehe nyi? Shina tujila kakufupiwa chihela chakupwilamo ngwe muze yakutulila ndeke nyi? Kuchi munuhasa kutesa chivumo cha ndeke ni miaso akwimba tujila? Mba iya ukwete chinji mana, yoze watangile tujila nyi yoze watangile ndeke?” Kashika, nyi munuhula-hula ana jenu yihula yamutapu awu, munwakwasa apwe ni “mana” ni kukolesa ufulielo wo muli Yehova.—Yishima 2:10-12.

12. Kuchi munuhasa kulingila yilweza hanga nulongese ana jenu ngwenu yeswe akuhanjika mu Mbimbiliya yili yamwenemwene?

¹² Munuhasa kuzachisa yilweza hanga nukwase ana jenu ngwenu yeswe akwamba mu Mbimbiliya yili yamwenemwene. Chakutalilaho, munuhasa kutanga Yombi 26:7. (Tanga.) Kanda nulianga kulweka ana jenu ngwenu sango jili mu versu yino jakatukile kuli Yehova. Alioze, akwasenu anyonge ene. Munuhasa kwamba ngwenu, atu ku matangwa ja Yombi te keshi kufuliela ngwo mavu katwama mutetela. O kakanyingikine ngwo hita chuma, ngwe konda hanji liwe, ndo chipwe ni haze chatwama. Ha shimbu liacho, niumwe te kanda anyingika ngwenyi, hashi hatwama mutetela, mumu te keshi ni makina akutala nacho mwilu waze avuluka ngwo telescópios hanji naves espaciais. Kashika longeso lili ngwo, chipwe ngwe Mbimbiliya kayisonekene ha shakulu, nihindu yakuhanjika umwenemwene mumu yakatuka kuli Yehova.—Nehemia 9:6.

13, 14. Kuchi yisemi mahasa kulongesa ana jo ononokene maliji a Mbimbiliya?

¹³ Chili nawa chilemu kulongesa ana jenu anyingike ngwo mawahilila chinji nyi mononokena maliji a Mbimbiliya. (Tanga Samu 1:1-3.) Chakutalilaho, lwekenu ana jenu anyonge ngwe maya ni kutwama ha limwe tungu. Nawa katamba kusakula atu waze makatwama no. Hi ahulenu ngwenu: “Atu amutapu uka munuhasa kusakula nyi nunazange nukatwame kanawa?” Mba hi tangenu A-Ngalashia 5:19-23 hanga amone atu waze Yehova anazange akapwe mu chifuchi chaha.

¹⁴ Nyi nwalinga chino, munuhasa kulongesa ana jenu malongeso aali alemu. Litangu, Yehova kali ni kutulongesa mwono upema haliapwila ni kupwa ni sambukila ni atu. Liamuchaali, kali ni kutulongesa chize mutukatwama mu chifuchi chaha. (Izaia 54:13; Yoano 17:3) Munuhasa kusolwela ana jenu chize Mbimbiliya yinakwasa mandumbu jetu. Chakutalilaho, talenu sango ja atu mu mikanda yetu, hanji mitwe ya Kaposhi wa Kutalila yakwamba ngwo, “Mbimbiliya Yakwalumuna Mwono wa Atu.” Hanji munuhasa kuhula ndumbu wa mu chikungulwila chenu anulweke chize Mbimbiliya ya mukwashile hanga alumune mwono wenyi mba avwise Yehova kuwaha.—A-Hepreu 4:12.

15. Yika muyinukwasa hanga nulongese ana jenu?

¹⁵ Wanenu jila yakuwahishilamo malongeso waze munulongesa ana jenu hanga evwe kuwaha hakulilongesa. Nyongenu jila jinji munukwashilamo ana jenu alilongese hakutwala kuli Yehova ni kukundama kuli iye. Nungenu kulinga chino ni muze anayi ni kukola. Chisemi umwe yamba ngwenyi: “Kanda nwecha kufupa-fupa jila jaha jakulumbunwinamo sango yikulu.”

16. Muze nunalongesa ana, mumu liaka nwatamba kupwa ni uhomboloji? Kuchi yisemi amwe akusolola uhomboloji?

¹⁶ Ni ukwaso wa spiritu ya Yehova, ana jenu mahasa kupwa ni ufulielo ukolo. (A-Ngalashia 5:22, 23) Alioze muchimbata shimbu mba ufulielo wo ukole. Kashika, sololenu uhomboloji kuli ana jenu, ni kununga ni kwaalongesa. Umwe chisemi ku Japão yoze wapwile ni mwana wa lunga ni wa pwo, ngwenyi: “Ami ni mukwetu pwo twasele chinji mbunge kuli ana jetu. Kukatuka ku wanuke wo, napwile ni kulilongesa no minutu 15 hita tangwa, kuchizaho wika matangwa a kukunguluka chetu. Kulilongesa no ha minutu 15 chapwile chashi kuli yetu ni kuli ayo.” Umwe kalayi wa mbonge yasoneka ngwenyi: “Ha wanuke wami napwile ni yihula yinji ku mbunge yami yize chahashile kwamba. Mba hakupalika cha mashimbu, yihula yinji yayikumbulula ha kukunguluka ni ha longeso liami lia wika ni ha uwayilo wa mu usoko. Yeyize yisemi atamba kununga ni kulongesa ana.”

17. Mumu liaka yisemi atamba kukolesa ufulielo wo? Kuchi amwe yisemi amu Bermuda akukwasa ana jo hanga apwe ni ufulielo muli Yehova?

¹⁷ Kwamba pundu, ana jenu malilongesa chinji nyi mamona ngwo ni yenu nukwete ufulielo ukolo muli Yehova. Maapwa ni kumona yize munulinga. Kashika, nungenu ni kukolesa ufulielo wenu. Ana jenu katamba kumona ngwo nwakumona Yehova ngwenu wamwenemwene. Chakutalilaho, muze amwe yisemi amu Bermuda akuzakalala ha chimwe chuma, o ka kulemba hamuwika ni ana jo hanga Yehova aasongwele. Kakukolweza nawa ana jo hanga apwe ni kulemba ukawo. “Twakulweza ni mwanetu wa pwo ngwetu, ‘Fuliela ni mbunge yeswe muli Yehova, kalakala chinji milimo ya Wanangana, nawa kanda ulipikala chinji ku mbunge ye.’ Muze akumona yiwape mu mwono wenyi, kakunyingika ngwenyi Yehova kanatupale. Achi chamukwasa chinji apwe ni ufulielo muli Zambi ni mu Mbimbiliya.”

18. Yika atamba kunyingika yisemi?

¹⁸ Yisemi, nyingikenu ngwenu kunuchi kuhasa kushinjila ana jenu apwe ni ufulielo. Enu tumbenu wika ni kuhinjila, alioze Yehova wika mwe mahasa kusokesa. (1 A-Korindu 3:6) Kashika, senu tachi hakulongesa ana jenu hakutwala kuli iye, ni kwita spiritu yenyi yakwase apwe ni ufulielo. Nyi nwalinga chino, munupwa ni ushindakenyo ngwenu Yehova mapala milimo yenu yeswe nunakilikita.— A-Efwesu 6:4.