Postolo Paulu kanavuluka Yehova * ngwenyi iye “Zambi ya kulembejeka cheswe; yoze wakututakamisa mu lamba lietu lieswe.” (2 A-Korindu 1:3, 4) Kashika, Mbimbiliya yinatukolweza ngwo kukushi mutu yoze Zambi mahona kukwasa hanji lamba linene lize Tata wa mu malilu mahona kututakamisa.

Twatamba kulinga yimwe nyi tunazange hanga Zambi atutakamise. Kuchi mbuki mahasa kutukwasa nyi kutwalitesele shimbu liakuliwana nenyi? Profeta Amose yahula ngwenyi: “Atu aali kakuliendela ni kalitesele?” (Amose 3:3) Yeyize kuma Yisoneko yakututowezela ngwo: “Kundamenu kuli Zambi, mba iye kumakundama kuli yenu.”—Tiangu 4:8.

Kuchi mutuhasa kunyingika ngwetu Zambi kanazange hanga tukundame kuli iye? Chitangu, mwene kakutulweka kanji ngwenyi kanazange atukwase. (Tala maliji ali  mu kasha) Kamuchaali, tuli ni yilweza ya atu waze Zambi hanatakamisa ku mashimbu akunyima ni musono.

Ngwe chize atu musono anafupu ukwaso wa Zambi, ni Mwanangana Ndawichi neye kafupile ukwaso ha yipikalo amwene. Shimbu limwe yeta ukwaso kuli Yehova ngweyi: “Ivwa liji lia kuliumba chami muze mungutambika kuli yena.” Zambi kakumbulwile? Ewa. Ndawichi ngwenyi: “Kakungukwasa. Kashika mbunge yami yinawahilila chikolo.”—Samu 28:2, 7.

Upale wa Zambi wapwile wa kupwisa Yesu mukwa-kutakamisa. Mulimo umwe amuhele kuli Zambi wapwile wa ‘kuwuka waze amakuka mbunge’ ni ‘kuvumbika waze eswe analinyenge.’ (Izaia 61:1, 2) Ngwe chize aliangile kwamba, Yesu kazangile chinji atu waze ‘akukilikita nikulemewa.’—Mateu 11:28-30.

Yesu katakamishile atu ni maliji jenyi a mana, ni chize apwile ni kwafunga ni zango ni kuwuka akwa-kuyiza. Tangwa limwe mukwa-mbumba yaliumba kuli Yesu ngwenyi: “Nyi mupala muhasa kungupemesa.” Yesu yamuvwila keke mba yamba ngwenyi: “Ngunapale; pwako mupema.” (Marku 1:40, 41) Hazehene mukwa-mbumba yapema.

Musono mwana wa Zambi keshi hano hashi hamwe ni yetu mba atutakamise. Alioze Tato, Yehova, kali “Zambi ya kulembejeka cheswe.” Kananungu ni kulembejeka waze anafupu ukwaso. (2 A-Korindu 1:3) Tutalenu yikuma yiwana yize Zambi akukwashila nayo atu.

• Mbimbiliya. “Mumu yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.”—A-Roma 15:4.

• Spiritu Yisandu ya Zambi. Kwapalikile wika mashimbu akehe kukatuka ha kufwa cha Yesu, chikungulwila cha Akwa-Kristu yichipwa ni sambukila. Mumu liaka? Mumu kendele “mu woma wa Mwene ni mu kulembejeka cha Spiritu Musandu.” (Yilinga 9:31) Spiritu yisandu, che kwamba, tachi ja Zambi, yikwete ndundo jinji. Zambi mahasa kujizachisa hanga atakamise mutu mweswawo, hamashimbu eswawo.

• Kulemba. Mbimbiliya yakutukolweza ngwo: “Kanda nukalipikala ha chuma nichimwe.” Ni kwamba nawa ngwo: “Kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu.”—A-Fwilipu 4:6, 7.

• Mandumbu jetu Akwa-Kristu kali masepa jetu amwenemwene waze mahasa kututakamisa. Postolo Paulu ngwenyi, waze apwile ni kukalakala no kapwile ‘akwa kumutakamisa’ ha mashimbu a ‘huli hanji kapinda.’—A-Kolosu 4:11; 1 A-Tesalonika 3:7.

Hanji wakulihula chize yuma yino yakulingiwa lume. Mutuhengwola kanawa yize yalingiwile kuli atu waze apalikile mu yipikalo yize twamba ku uputukilo. Chizechene ngwe ayo, mutumona ngwetu Zambi uchili ni kukumbanyisa chilakenyo chenyi, chakwamba ngwo: “Ngwe mwana wa kuwumbikiza kuli naye, chocho mungukanuwumbikiza.”—Izaia 66:13.