Mbimbiliya yinasolola ngwo, ha mashimbu amwe angelo kakufunga akwa-Kristu amwenemwene hanga upale wa Zambi ulingiwe. (Samu 34:7) Chakutalilaho:

• Muze Yehova anongesele atu api mu mbonge ya Sondome ni Ngomora, angelo kakwashile Lote mutu wa ululi ni asoko jenyi hanga achine.—Uputukilo 19:1, 15-26.

• Ku Babilonia yikulu muze akweze atatu A-Hepreu aasele mu lutengo wa kahia, Zambi ‘yatuma mungelo wenyi ni kupulula tuvumbi twenyi.’—Daniele 3:19-28.

• Muze Daniele lunga wa ululi amusele ufuku umuwika mu wina wa ndumba, iye yalumbununa ngwenyi, kapwile ni mwono mumu ‘Zambi yenyi katumine mungelo wenyi kuyika makanwa ja ndumba.’—Daniele 6:16, 22.

Ha kupalika cha mashimbu, angelo ja Zambi kapwile ni kukwasa milimo ya mu chikungulwila cha akwa-Kristu hanga amanune upale wa Yehova. Chakutalilaho:

• Umwe mungelo yazulula chikolo cha zuwo lia ususu ni kusongwela apostolo hanga anunge ni kwambujola mu tembele.—Yilinga 5:17-21.

• Umwe mungelo kasongwele Fwilipu mukwa-kwambujola hanga aye mu jila yakuya ku Yerusaleme ndo ku Ngaza ni kwambulwila sango kuli Ka-Etiopia yoze wapwile ni kuya ku Yerusaleme ni kuwayila Zambi.—Yilinga 8:26-33.

• Ha mashimbu waze Zambi azangile hanga atu waze te hi A-Yunda ko apwe akwa-Kristu, umwe mungelo yasoloka kuli umwe Ka-Roma, kapitau wa maswalale avuluka ngwo, Koneliu ni kumulweza hanga afupe postolo Petulu ku zuwo lienyi.—Yilinga 10:3-5.

• Muze postolo Petulu amusele mu zuwo lia ususu, umwe mungelo yasoloka kuli iye ni kumuchizamo.—Yilinga 12:1-11.

Kukushi nichimwe chuma chize chinasolola ngwo, musono Zambi kakuzachisa angelo alinge yikumokeso hanga akwase atu ngwe chize anasolola mu Mbimbiliya. Chipwe chocho, hakutwala ku matangwa jetu, Yesu yamba ngwenyi: “Sango lino lipema lia wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.” (Mateu 24:14) Shina unanyingika ngwe tumbaji a Kristu kakulinga mulimo uno ni ukwaso wa angelo?

Mukanda wa Usolwelo unasolola ngwo angelo te makwasa atu hashi heswe hanga anyingike Yehova Zambi ni upale wenyi. Postolo Yoano yasoneka ngweny: “Namwene mungelo mukwo kanahumuka mukachi ka lilu, kali ni Sango Lipema lia mutolo mukwambujola kuli akwa hashi, ku mavungu eswe, ni ku minyachi yeswe, ni ku malimi eswe, ni kuli atu eswe. Iye yamba ni liji linene ngwenyi, Ivwenu woma wa Zambi, numuchichimieke; mumu ola ya upatwilo wenyi hiyeza. Wayilenu yoze watangile lilu ni hashi ni kalunga-lwiji ni mafuji a meya.” (Usolwelo 14:6, 7) Yuma yinji yinalingiwa musono, yinasolola ngwo, angelo kanakwase mulimo wakwambujola Wanangana hashi heswe. Kashika, muze chivulumunyi akulikonyeka ni kufuna kuli Yehova, ‘angelo ja Zambi kakuwahilila.’—Luka 15:10.

Yika muyikalingiwa muze mulimo wa kwambujola muuhwa? Angelo “mbunga ja maswalale aze ali mwilu” makakwasa Yesu Kristu, Mwanangana wa mianangana, ni kwasa “jita ya tangwa linene lia Zambi Mukwa-Ndundo-Jeswe” mu Armagedone. (Usolwelo 16:14-16; 19:14-16) Angelo a ndundo o makapatwila upale wa Zambi muze Mwene Yesu ‘makakala milonga ya waze . . . keshi kwononoka ku sango lipema lia Mwene wetu Yesu.’—2 A-Tesalonika 1:7, 8.

Nyingika ngwe, angelo kakukusa mbunge. Ayo kakuzanga hanga atu waze akuwayila Zambi atwame kawape, nawa Yehova kanji-kanji kakwazachisa hanga atakamise ni kufunga atu jenyi ashishika hano hashi.—A-Hepreu 1:14.

Hita mutu, kali ni chikuma chilemu chize atamba kusakula. Shina mutupanjika ni kwononokena sango jipema jize akwambujola hashi heswe? Yela ja Yehova waze atwama hakamwihi ni yena, mawahilila kuhanjika ni yena ha yiwape ya ukwaso wa zango lia angelo ja Zambi.