Ha limwe tangwa Liayenga chingoloshi, Kinitu ni Filomena waze atwama mu mbonge ya Curaçao, kayile ni kumeneka umwe lunga ni mukwo pwo waze apwile ni kulongesa Mbimbiliya.

Kinitu yamba ngwenyi, “Muze twahetele ku zuwo lio, yituwana te kwakuyika, nawa mashinyi te keshiko. Alioze yingunyonga kusanyika mukwo pwo ku telefone.”

Mukwo pwo yakumbulula ni kwaalweza ngwenyi, mukwo lunga kali ku milimo. Muze anyingikine ngwenyi Kinitu ni Filomena kali haze, aye yazulula pito ni kweeta hanga anjile.

Ayo yamona ngwo iye te kanalila. Muze Kinitu alembele hanga aputuke kusongwela longeso lia Mbimbiliya, pwo wacho yapukutuka nawa kulila. Chocho Kinitu ni Filomena ni zango lieswe yamuhula mumu liaka iye te analila.

Pwo yaalweza ngwenyi, te kananyonga kulishiha ha chingoloshi chacho, nawa te kanasoneka mukanda hanga ahichikile mukwo-lunga, alioze muze Kinitu amusanyikine ku telefone aye yecha kusoneka mukanda wacho. Yaalweza nawa ngwenyi, te kanapinda ni yinyengo, chocho ayo yatanga nenyi yimwe yisoneko ya mu Mbimbiliya hanga amutakamise. Utakamiso wacho wamukwashile hanga ehuke kulishiha.

Kinitu yamba ngwenyi, “Yitusakwila Yehova hakutuzachisa hanga tukwase pwo yono te unapinda, nawa hakuzachisa—spiritu yenyi yisandu hanji mungelo hanga tusanyike pwo wacho ku telefone!” a

Shina Kinitu ni Filomena kali ni ulite wa kutayiza ngwo Zambi mwe watumine mungelo hanji spiritu yenyi yisandu, hanga ayo asanyike pwo wacho ku telefone? Nyi yili wika yuma yize te muyihasa kulingiwa?

Kutuchi kuhasa kupwa ni ushindakenyo. Alioze yuma tunanyingika yili wika ngwo, Zambi kakuzachisa angelo jenyi hanga akwase atu jenyi ku shipiritu. Chakutalilaho, Mbimbiliya yinambe ngwo, Zambi katumine mungelo wenyi hanga asongwele mukwa-Kristu Fwilipu hanga akwase chilolo Ka-Etiopia yoze wapwile ni kufupa usongwelo ku ufulielo.—Yilinga 8:26-31.

Mangeleja anji kakulongesa atu hakutwala ku yitangiwa ya spiritu, amwe kakwamba ngwo yitangiwa yacho yikwete keke, yakulinga upale wa Zambi nawa yakupwa tufunga twa hita mutu. Atu anji keshi kutayiza wika ngwo angelo kali amwenemwene, alioze kakutayiza nawa ngwo, yitangiwa yacho yili yilemu kuli ayo mu majila amwe. Chipwe chocho, atu anji keshi kutayiza ngwo angelo kali amwenemwene.

Shina angelo kali amwenemwene? Nyi kali amwenemwene, kulihi akatukile? Umwenemwene uka uliko hakutwala kuli angelo? Shina kali ni ulemu ku mwono we? Tutalenu umwe ushindakenyo.