Ewa, kwali. Kulihi akatukile? Ewuluka ngwe Zambi katangile angelo ni chawana chakusakula chipi ni chipema. Ha mashimbu akehe muze lunga ni pwo mutangu, Alama ni Eva aatangile, umwe mungelo yazachisa chipi utuswilo wenyi wakusakula chipi ni chipema, chocho yasakula kupiangula akwo hano hashi. Iye yahasa kupiangula Alama ni Eva hanga alimike ni Yehova. (Uputukilo 3:1-7; Usolwelo 12:9) Mbimbiliya kuyishi kutongola jina lia mungelo wacho ni chiteli chize te akwete mu malilu muze te kanda achipwa chihulia. Alioze muze te hapwa chihulia, mba yaputuka kumuvuluka mu Mbimbiliya ngwo, Satana, linalumbunuka “Chimika,” nawa Ndiapu, linalumbunuka “Chilamikiji.”— Mateu 4:8-11.

Alioze, uhulia wenyi kuwakasulile hazehene. Ha mashimbu a Noa amwe angelo ‘kahichikile chihela choene’ mu malilu. Ayo yeza hano hashi nawa yalumuna mijimba yo yipwe ya musunya nawa yalimbata ni mapwo, chuma chize ayo te kakatambile kulinga.—Yundase 6; Uputukilo 6:1-4; 1 Petulu 3:19, 20.

Yika yalingiwile kuli angelo jacho api? Muze Zambi anehele sanga lia meya hashi heswe hanga apemeseho, ayo yalialumuna nawa ngwe angelo ni kufuna mu malilu. Alioze, Zambi kakaatayijile angelo jacho api afune nawa mu “chiyulo cho chitangu.” Nawa, yaakunjika “kushi lia milima pwi,” kuze avuluka ngwo, Tartarus. (Yundase 6; 2 Petulu 2:4) Andemoniu wano yalipwisa ene tunganda ja Satana Ndiapu, “mwata wa andemoniu,” yoze ‘wakulihipula ngwe mungelo wa pangu.’—Mateu 12:24; 2 A-Korindu 11:14.

Mbimbiliya yakulongesa ngwo, Wanangana wa Zambi, nguvulu wa mu malilu, kawusele ha mwaka wa 1914. a Muze yino yalingiwile, Satana ni andemoniu jenyi kaahumine mu malilu ni kwaanyasa hakamwihi ni hashi. Ungulungulu weswe ni utanji twakumona hano hashi, yinasolola pundo ngwo Satana ni andemoniu jenyi e anapiangula atu hanga ayilinge.—Usolwelo 12:9-12.

Chipwe chocho, kwoka cha ungulungulu weswe hano hashi chinasolola ngwo, kwasala hakehe hanga kuyula chenyi chipi chihwe. Nawa Zambi makachiza tachi jeswe jize akwete ja kupiangula atu. Muze Wanangana wa Zambi muukayula mu paraisu hano hashi ha mika 1.000, yintangiwa yacho muyikapwa nawa ni uhashi ukehe wa kweseka atu. Mba makayinongesa ha miaka yamutolo.—Mateu 25:41; Usolwelo 20:1-3, 7-10.