Nasemukine mu Saxony, kulutwe yayivuluka ngwo, República Democrática Alemã. Mwono mu usoko wetu te upema nawa yisemi jami kangufumbile kanawa. República Democrática Alemã te Chizavu cha Akwa-kukalila Ululi, kashika atu anji mu Saxony te keshi kulemesa ulembelo. Nawa kuli yami, Zambi te katwamineko. Nyonga liacho liangukwachile chinji, chocho muze napwile ni miaka 18 yingulichinga ha Chizavu cha Atu waze keshi kutayiza Zambi ni ha Chizavu cha Akwa-kukalila Ululi.

Mumu liaka te nakuzanga Chizavu cha Akwa-kukalila ululi? Mumu nazangile nyonga lia kwamba ngwo atu eswe katamba kupwa ni yuma yimuwika. Nawa napwile ni kuzanga hanga atu eswe aatetele yuma ni ululi, mumu chino te muchihwisa uswale. Kashika nasele mbunge yami ha Chizavu cha akweze Akwa-kukalila Ululi. Muze napwile ni miaka 14, napalikishile mashimbu anji ku mulimo wa kutongona mikanda yize apwile ni kumbila. Atu a mu mbonge ya Aue kevwile kuwaha chinji ha tachi jize nasele, chocho nguvulu yangwaha chawana. Chipwe ngwe te nguchili mukweze, nanyingikine amwe makulwana a lufuma a yizavu ya mafwefwe. Nanyongene ngwami, munguhasa kulinga yuma yipema yize nazangile nawa ngwami, mwono wami kulutwe lia matangwa muukawaha.

Alioze yuma kuyakapwile chocho. Ha mwaka 1989 chikalakala cha Berlin yichipuzuka hamwe ni Chizavu cha Akwa-kukalila Ululi ku Europa ya Chivumbuko. Yuma yiyinunga ni kupihia. Chocho yingunyingika ngwami, uhenge te unji mu República Democrática Alemã. Chakutalilaho, atu waze te keshi kukwasa Chizavu cha Akwa-kukalila Ululi kapwile ni kwaasa ulemu kuhiana akwo. Mumu liaka chino chinakalingiwa? Shina yetu akwa Chizavu cha Akwa-kukalila Ululi kutushi ni shindakenyo ngwetu atu eswe katamba kupwa ni yuma yimuwika? Shina Chizavu cha Akwa-kukalila Ululi chapwile wika chuma chamokomoko? Yingwivwa uli unji.

Chocho yingwalumuna manyonga jami ni kulihulikila ha miaso ni kufunjeka yizulie. Amu napwile ni uhashi wa kulilongesa ku shikola ya kwimba miaso, te muchipwa chashi kuya ku shikola yinene, chuma chize te ngunazange, kupwa mukwa-kwimba miaso. Kulutwe, yinguvulama fumbo lipema angulongesele muze te nguchili kanuke. Mba, kuheha ni mapwo anji ha shimbu limuwika yichipwa chuma chilemu kuli yami. Alioze kwimba, kufunjeka, ni kulinga yuma chamulingila te kuyishi kutepulula yipikalo yami. Chipwe yizulie  yize napwile ni kufunjekele te yakusolola yinyengo. Yika muyilingiwa kulutwe lia matangwa? Nawa ulemu uke te mwono ukwete?

Nakomokene chinji muze nawanyine kumbululo lize te ngunafupu. Ha umwe ufuku ku shikola, napwile ha chizavu cha alongi akwo waze te anahanjika hakutwala kulutwe lia matangwa. Mandy a neye te longi nawa chela cha Yehova. Ha ufuku wacho iye yangutoweza ngwenyi: “Andreas, nyi muzanga kuwana kumbululo lia yihula ye hakutwala ku mwono ni kulutwe lia matangwa, fupa kanawa mu Mbimbiliya.”

Kuchakatayijile kanawa ha yize ambile, chipwe chocho yingufupa kumbululo mu Mbimbiliya. Mandy yangulweza hanga ngutange mukanda wa Daniele kapitulu 2, nakomokene chinji ha yuma yize natangile. Uprofeto uno unasolola yize yinalingiwa ha matangwa jetu hakutwala ku miata hanji manguvulu. Mandy yangusolwela nawa mu Mbimbiliya uprofeto ukwo hakutwala kulutwe lia matangwa. Yinguputuka kuwana kumbululo lia yihula yami! Alioze iya wasonekele uprofeto wacho, nawa iya te mahasa kulumbununa ni ushishiko weswe yize muyikalingiwa kulutwe lia matangwa? Shina yino muyihasa kusolola ngwo Zambi katwamako?

Mandy yangulweza hanga nguhanjike ni umwe pwo ni lunga, Yela ja Yehova Horst ni Angelika waze angukwashile kunyingika kanawa Liji lia Zambi. Yingunyingika ngwami, Yela ja Yehova e wika akwete ululikiso uze wakusa tachi hanga azachise jina lia Zambi, Yehova. (Samu 83:18; Mateu 6:9) Nalilongesele ngwami, Yehova Zambi hanatulakenya mwono wa mutolo mu paraisu hano hashi. Samu 37:9 unambe ngwo: “Waze akutwaminyina Yehova kumakahinga chifuchi.” Yingunyonga ngwami chilakenyo chino chinatale hali hita mutu yoze wakutwama kulita ni shimbi ya Zambi ngwe chize anasolola mu Mbimbiliya.

Kashika nasele tachi hanga ngwalumune ndako jami ni kukaula shimbi ja mu Mbimbiliya. Lufuma napwile nenyi ngwe mukwa-kwimba miaso, kangupwishile mukwa-kulizata, kashika te natamba kupwa mukwa-kulikehesa. Chipwe chocho, kuchakapwile chashi kuli yami kwecha mwono wami upi. Ngunasakwila chinji Yehova ha kungusolwela uhomboloji, keke ni kupanjika kanawa waze akusa tachi hanga akaule yize Mbimbiliya yakulongesa!

Yizavu ya Akwa-kukalila Ululi ni ya waze keshi kutayiza Zambi, yangupiangwile muze te nguchili ni miaka 18; alioze Mbimbiliya yakwalumuna mwono wami mashimbu eswe. Yuma nalilongesele yahwishile yipikalo yami hakutwala kulutwe lia matangwa nawa yakungukwashile kupwa ni nyonga lipema hakutwala ku mwono. Ha mwaka 1993, yangupapachisa ngwe Chela cha Yehova, nawa ha mwaka 2000, yingulimbata ni Tabitha, umwe chela wa zanga chinji mulimo wa Yehova. Twapalikishile mashimbu anji ni kukwasa atu hanga anyingike Mbimbiliya. Amwe waze twapwile ni kuwana, no te kali ni mwono uze napwile nawo. Nakwivwa kuwaha chinji ku mwono wami muze nakwaasolwela chize mahasa kunyingika Yehova.

Muze napwile ni kulikata ni Yela ja Yeova, yisemi jami chitangu te kupihia akwivwa. Alioze kulutwe, ayo yamona chize mwono wami walumukine ha kulikata ni Yela ja Yeova. Nakwivwa kuwaha chinji, mumu ayo haputuka kutanga Mbimbiliya ni kuya ku kukunguluka cha Yela ja Yehova.

Tabitha ni yami twakuwahilila chinji mu ulo wetu mumu twakukawula kanawa shimbi ja um Mbimbiliya hakutwala kuli waze alimbata. Chakutalilaho, kukaula yiyulo hakutwala ku utanji yakutukwasa kukolesa ulo wetu.—A-Hepreu 13:4.

Haliapwila kuchishi kwivwa nawa woma wa mwono ni kulipikala hakutwala kulutwe lia matangwa. Nakwivwa ngwami nguli mukachi ka usoko wa akwa kufuliela a hashi heswe, waze akwete sambukila nawa alinunga. Mu usoko uno tulieswe twakulimona ngwetu tuli amuwika. Chuma chino che te nakutayize ngwami muchihasa kulingiwa nawa te nakufupa ku mwono wami.