“Kuhana cheswe chipema ni yawana yeswe yingunu kuyakuhulumuka kwilu, ya kuli mwe Tata wa pangu.” (Tiangu 1:17) Chisoneko chino chinahanjika hakutwala ku kuhana cha Tata wetu wa mu malilu, Yehova Zambi. Ha yawana yeswe yize Zambi hanatwehe, kuli chimwe chawana chilemu chinji kuhiana yeswe. Chawana chika? Mu mukanda wa Yoano 3:16, Yesu kanatulweze ngwenyi: “Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”

Chawana cha Mwana wa wika wa Zambi—che te muchipwa chawana chilemu chinji chize mutu mweswe mahasa kutambula, mumu che muchihasa kututusula mu undungo wa shili, ushinakaji ni kufwa. (Samu 51:5; Yoano 8:34) Chipwe ngwe mutweseka kusa tachi, kutuchi kuhasa kulinga nichimwe hanga tutusuke mu undungo wacho. Ha chino, ha zango lienyi linene, Zambi yatwaha yize tunafupiwa hanga atutusule mu undungo. Hakutwaha Mwanenyi wa wika, Yesu Kristu, ngwe ukuule, Yehova Zambi yahana kutalatala cha mwono wa mutolo kuli atu waze akumwononokena. Alioze ukuule yika unalumbunuka? Mumu liaka tunafupiwa ukuule? Nawa kuchi mutuhasa kuyuka ha ukuule?

Ukuule uli ndando akufweta hanga afunyise chimwe chuma chize chinatoka, hanji kutusula mutu mu undungo. Mbimbiliya yinalumbununa ngwo yisemi jetu atangu, Alama ni Eva, kaatangile angunu, hanga atwame ni mwono wa mutolo mu paraisu hano hashi ni ana jo waze te masema kulutwe lia matangwa. (Uputukilo 1:26-28) Alioze, ayo yatokesa yeswe ha kwehuka kwononokena Zambi—chocho yapwa yivulumunyi. Mba yika yalingiwile? Mbimbiliya yinakumbulula ngwo: “Kashika, chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.” (A-Roma 5:12) Shimbu ahane mwono ungunu kuli ana jenyi, Alama yaahichikila shili ni kufwa.

Hakutwala ku ukuule, yize te mafweta yatamba kulita ni yize yatokele. Muze Alama asakwile kuvulumuna kuli Zambi, iye yashililika, chino chatokesele mwono wenyi ungunu. Kulita ni Mbimbiliya, yino ye yasele ana ja Alama mu undungo wa shili ni kufwa. Kashika, te kunafupiwa mutu mweka wa mwono ungunu—Yesu—auhane ngwe chitapo hanga akule atu mu undungo. (A-Roma 5:19; A-Efwesu 1:7) Zambi mwe wafwetele ukuule wacho ha mukunda wa zango lienyi, kashika atu eswe mahasa kupwa ni kutalatala cha chiseke chize Alama ni Eva atokesele, mwono wa mutolo mu paraisu hano hashi.—Usolwelo 21:3-5.

Ha mukunda wa yize ukuule unalingi, tuli ni shindakenyo ngwetu ukuule uli chawana cha Zambi, unapwisa chashi kuzuka mwono wa miaka yeswe. Kashika, ukuule uli chawana chilemu chahiana yuma yeswe. Mba tuhane ‘chawana chingunu,’ chize muchituvwisa kuwaha, chitangu ndo tunyingike yize muyitukwasa ha kuhana chawana chacho, ngwe chize twamona ku uputukilo wa chikuma chino.

 Chize muchitukwasa. Tukwete nyonga lia kununga ni mwono. (Chilumbununyi 3:11) Ku tachi jetu kutushi kuhasa kununga ni mwono wa mutolo, alioze ukuule unapwisa chashi hanga tupwe nawo. Mbimbiliya yinambe ngwo: “Mumu fweto ya shili kufwa, alioze chawana cha vumbi lia Zambi, mwono wa mutolo muli Kristu Yesu Mwene wetu.”—A-Roma 6:23.

Kutukwasa ha yize tunahono. Atu kechi kuhasa kuhana ukuule. Mbimbiliya yinalumbununa ngwo: “Ukuule wa mwo wo ukalu.” (Samu 49:8) Kashika, te tunafupu ukwaso wa Zambi hanga atukule mu undungo wa shili ni kufwa. Alioze “ku ukuule uze uli muli Kristu Yesu,” Zambi hanatwehe yize te twakuhona.—A-Roma 3:23, 24.

Ha mashimbu alita. Mbimbiliya yinatulweze ngwo: “Shimbu te tuchili yivulumunyi, Kristu watufwilile.” (A-Roma 5:8) Ha mukunda wa kuuhana “shimbu te tuchili yivulumunyi,” ukuule unatwehe shindakenyo ha zango linji lize Zambi alinalio hali yetu, chipwe ngwe tuli yihenge. Nawa unatukwasa kuhulikila ku matanga akulutwe, ni kunyongonona chipwe ngwe mutupinda ni yikatalo ya shili.

Nyingika chitela cha kuchihana. Mbimbiliya yinasolola chitela cha mumu liaka Zambi ahanyine Mwanenyi ngwe ukuule, ha kwamba ngwo: “Muno hanasolola zango lia Zambi hakutwala kuli yetu, se Zambi hanatumu Mwanenyi wa wika hano hashi, hanga tukapwe a mwono muli iye. Muno mulili zango, kuchapwile ngwe yetu twazangile Zambi ka, alioze iye watuzangile yetu.”—1 Yoano 4:9, 10.

Kuchi muhasa kusolola ngwe wakulemesa chawana chilemu chahiana yuma yeswe? Euluka ngwe maliji a Yesu ali ha Yoano 3:16 kanambe ngwo, yoze wika “mamufuliela,” muli iye mwe makalamwina. Kulita ni Mbimbiliya, ufulielo unalumbunuka “chinyingi cha yuma yize anayitalatala.” (A-Hepreu 11:1) Twamba kupwa ni chinyingi chamwenemwene, mba tupwe ni ufulielo wacho. Kashika, tunakutoweza hanga use mashimbu akulilongesa hakutwala kuli Yehova Zambi, mwe Chihanyi wa “chawana chingunu,” ni kunyingika yize watamba kulinga hanga ukawahilile ni mwono wa miaka yeswe, uze unapu washi ha mukunda wa ukuule wa Yesu.

Muhasa kunyingika nawa yuma yeswe ai ha kuhengwola sango ja Yisoneko jili ha site yetu www.pr418.com. Yela ja Yehova mawahilila ha kukukwasa. Tunafuliela ngwetu muze mutanga hakutwala ku chize muyuka ha mukunda wa ukuule, mukomoka ni kwamba ngwe: “Ngunasakwila Zambi mu jina lia Yesu Kristu Mwene wetu.”—A-Roma 7:25.