Niumwe wakwachile Yesu foto wakwihi. Iye kakamufunjekele ha mawe chipwe kumwola ha mataka. Chipwe chocho, chize ku mashimbu akunyima iye kakumusolola ha yizulie ya akwa-kufunjeka.

Alioze, akwa-kufunjeka jacho kanyingikine chamwenemwene chifwa cha Yesu. Ndako ja atu, ufulielo wo, ni manyonga ja atu waze akutuma kufunjeka Yesu, ye yakusolola chize mukwa-kufunjeka mafunjeka Yesu. Chipwe chocho, yizulie yacho muyihasa kulingisa atu anyonge yuma hakutwala kuli Yesu ni malongeso jenyi.

Akwa-kufunjeka amwe kakusolola Yesu ngwe keshi tachi hanji wakokoloka ni kambu jisuku ni tuwevu tukehe ni chifwa cha kunyenganyana. Ha yizulie yimwe, Yesu kakumusolola kali ni pangu ku mutwe, hanji kali kusuku ni atu waze anamujingilika. Shina yizulie yino yinasolola lume chize Yesu apwile? Kuchi mutuhasa kunyingika? Chuma muchitukwasa chili kunyingika yize Mbimbiliya yakwamba ha chikuma chacho. Nawa muyitukwasa kupwa ni nyonga lialita hakutwala kuli Yesu.

Wano kali maliji a Yesu muze alembele ha mashimbu waze kota te anamupapachisa. (A-Hepreu 10:5; Mateu 3:13-17) Kuchi mujimba wa Yesu te wapwa? Muze Yesu te kanda asemuka, mungelo Gabriele kalumbunwine kuli Maria ngwenyi: “Mukasema mwana-lunga, . . . mwe Mwana Zambi.” (Luka 1:31, 35) Kashika, Yesu kapwile lunga mungunu ngwe chize apwile Alama muze amutangile. (Luka 3:38; 1 A-Korindu 15:45) Yesu kapwile ni mujimba upema nawa ungunu nawa kota kapwile ni chifwa cha naye Maria, ka-Yunda.

Kulisa ni A-Roma, Yesu kapwile ni wevu ngwe chize apwile akwo A-Yunda. Wevu wacho wapwile chinyingi cha vumbi ni ulemu; nawa te hi usukuko hanji wavunda. Kwamba pundu Yesu te kakutewula kanawa wevu wenyi. Waze wika apwile A-Nazireu ngwe, Samasone, e te keshi kutewula kambu jo.—Kwalula 6:5; Akwa Kuyula 13:5.

Chize ha ukweze wenyi ndo muze akumbanyishine 30 a miaka, Yesu te kakulinga mulimo wa karpinderu, te keshi ni yuma yinji yakukalakala nayo ngwe musono. (Marku 6:3) Hachino, kota iye kapwile ni zuwo liakusongela mapaya. Kulutwe, mu mulimo wenyi wakwambujola, iye ukawenyi “yatuhwisa eswe mu Tembele, ni mapanga ni ngombe. Yamwanga mbongo ja akwa kusumbakenya, nikulimbula mesa jo.” (Yoano 2:14-17) Ndo lunga wa tachi ni hamu mba alinge yuma yacho. Yesu kazachishile mujimba uze Zambi aluliekele hanga amanunune mulimo amuhele, kashika ambile ngwenyi: “Changutamba kwambujola sango lipema lia wanangana wa Zambi ku membo akwo nawa: mumu angutumine ha chino.” (Luka 4:43) Ndo kupwa ni tachi jinji mba mutu ende hashi ni kwambujola sango mu Palestina yeswe.

Zango lienyi ni ndako jenyi kota jakwashile atu waze ‘akukilikita nikulemewa’ hanga atayize muze Yesu aasanyikine. (Mateu 11:28-30) Ha mukunda  wa zango lienyi ni keke yamanununa chilakenyo chenyi chakukwasa waze te mazanga hanga alongese. Chipwe twanuke no te kakuzanga kukundama kuli Yesu, ngwe chize Mbimbiliya yinambe hano ngwo: “Iye yaasa mu kondo.”—Marku 10:13-16.

Chipwe ngwe Yesu kamwene lamba shimbu kanda achifwa, iye kakapwile mutu wakunyenganyana. Chakutalilaho, iye kakwashile ha chiwanyino cha umbachiso mu Kena ha kwalumuna meya apwe vinyu. (Yoano 2:1-11) Ha chiwanyino chikwo, yalongesa limwe longeso lilemu chinji.—Mateu 9:9-13; Yoano 12:1-8.

Kuhiana yeswe, Yesu te kakulongesa mu jila yize atu eswe te akuwahilila ni kupwa ni kutalatala cha mwono wa mutolo. (Yoano 11:25, 26; 17:3) Muze apostolo jenyi 70 amulwezele sango jo hakutwala ku mulimo wakwambujola, iye ‘yawahilila’ ni kwamba ngwenyi: “wahililenu mumu majina jenu hanasoneka mwilu.”—Luka 10:20, 21.

Ku mashimbu a Yesu, tusongo a mangeleja te kakutomba shimbi hanga asoloke nawa asolole wata wo. (Kwalula 15:38-40; Mateu 23:5-7) Alioze, Yesu kalongesele tumbaji twenyi ngwenyi, “hakachi kenu kuchichi kupwa chocho.” (Luka 22:25, 26) Kwamba pundu, Yesu yatoweza ngwenyi: “Kanyamenu ni alongeshi a Shimbi waze akuzanga kwenda ni mahina a mukambo, akaameneke mu yitanda.”—Marku 12:38.

Alioze, Yesu te kalisa ni ayo, chipwe ngwe te kakupwa mukachi ka atu akwo, te keshi kuzanga kulilemesa mwene. (Yoano 7:10, 11) Chipwe hakachi ka tumbaji twenyi 11, iye te keshi kusolola chinji upeme wa mujimba wenyi. Kashika, Yundase mukwa-kukunjika, amuhele mbeju ngwe “chilayi” chize te muchimunyingikisa kuli akwa-kole jenyi.—Marku 14:44, 45.

Chipwe ngwe yuma yinji kutwayinyingikine, yino yinasolola pundu ngwo Yesu kakapwile ngwe chize atu amwe akumusolola. Kashika chuma chilemu hi chize ko chifwa chenyi te chapwa, alioze chize twakumunyonga haliapwila.

Tangwa lizeliene Yesu ahanjikile maliji wano, lie amushihile ni kumufunda. (Yoano 14:19) Iye kahanyine mwono wenyi ngwe “ndando ya ukuule hali anji.” (Mateu 20:28) Ha tangwa liamuchitatu Zambi yamuhindwisa mu “spiritu” nawa “wamusolwele pundu” kuli tumbaji twenyi. (1 Petulu 3:18; Yilinga 10:40) Chifwa chika Yesu apwile nacho muze asolokele kuli tumbaji twenyi? Kota kasolokele ni chifwa cheka, kashika muze asolokele kuli tumbaji twenyi chitangu ayo te kaso kumusa kanawa chinyingi. Kashika Maria Mandalena amumwene ngwe njimi; nawa muze tumbaji jenyi aali te anayi mu tapalo lia Emeu kamumwene ngwe chilambala.—Luka 24:13-18; Yoano 20:1, 14, 15.

Yika twatamba kunyonga hakutwala kuli Yesu musono? Muze te hikwapalika miaka 60 chize muze Yesu afwile, postolo Yoano yoze te azanga chinji kamwene usolwelo wa Yesu. Yoano kakamwene mutu yoze te unafu ha kulusu ka. Alioze kamwene “Mwanangana wa mianangana eswe, Mwene wa ene eswe.” Mwanangana wa Wanangana wa Zambi mwe makakumba akwa-kole eswe ja Zambi, andemoniu ni atu. Hi kulutwe lia yino yeswe makaneha yiwape yamutolo kuli atu eswe.—Usolwelo 19:16; 21:3, 4.