Domingo ni Maria  *kevwile kuwaha muze mwano ni asoko jenyi ayile ni kwaameneka. Muze maola akulia te hakumbana, Maria mukwa-kuteleka kanawa, yalulieka macarão ni queijo, kulia chize ajikulu jenyi akuzanga.

Ni chiseke cheswe, Maria yasa malonga ha mesa. Muze afukwile ndoho eswe yakomoka, mundoho te muli wika mutato. Maria yavulama kusamo macarão! *

Chipwe ngwe tuli ni miaka yinji hanji yinyingi, nihindu tulieswe twakuhengesa. Mutuhasa kwamba yuma hanji maliji chakuhona kunyonga, hanji kuvulama. Mumu liaka twakuhengesa? Kuchi mutuhasa kukumba tupalia? Shina mutuhasa kwehuka kapalia? Kupwa ni nyonga lialita hakutwala ku kapalia muchitukwasa kukumbulula yihula yino.

Nyi twalinga chuma chipema twakutayiza ni zango lieswe uchichimieko uze akutwaha. Alioze muze twakulinga kapalia chipwe kutachi hanji ka, shina twakutayiza fumbo ngwe chize twakulinga nyi matuchichimieka? Kashika, twatamba kulikehesa mba tutayize fumbo.

Nyi mutunyonga chinji hali yetwene, mutuhasa kulamikijila akwetu, hanji kulituna ngwetu twalinga kapalia wacho. Ndako jacho jakuneha kapinda. Mulonga muuhasa kununga, nawa atu akwo mahasa kwaalamikiza mulonga uze kalingile. Chipwe ngwe mutuhasa kulituna kapalia wetu haliapwila, twatamba kunyingika ngwetu, “mutu ni mutu, kumakalumbununa ha kutwala kuli iye mwene kuli Zambi.”—A-Roma 14:12.

Zambi kali ni nyonga lialita hakutwala ku tupalia. Mu mukanda wa Samu, Zambi kanamulumbununa ngwenyi, kakwete “keke ni vumbi iye makoke kutenuka, utu wa zango lienyi kuwalumbama.” Iye kananyingika ngwenyi, tuli yihenge nawa ‘twapwa fufuta.’—Samu 103:8, 9, 14.

Kashika, chizechene ngwe tata wa keke, Zambi kanazange yetu, ana jenyi, tunyonge ngwe iye. (Samu 130:3) Mu Liji lienyi hanatwehe yiyulo ni usongwelo hanga utukwase kukumba tupalia twetu ni twa akwetu.

Kanji-kanji, muze mutu malinga kapalia, kakusa tachi hanga alamikize akwo hanji kulikalila ha kapalia wenyi. Alioze, nyi maliji je kalemeka mukwenu, eta ukonekeno, livwashanenu, nawa kolesa usepa wenu. Shina hiwunalinga upi uze wakupinjishile hanji wapinjishile akwenu? Shimbu ulivwile uli yena mwene, hanji kulamikiza akwenu, sako tachi hanga uhwise mulonga wacho. Kununga ni kulamikiza akwenu chakuneha wika vunda ni kwokesa mulonga. Alioze,  lilongese ha upi wacho nawa sako tachi hanga uuhwise.

Nyi mutu mweka malinga umwe kapalia, chakupwa chashi kuli yetu kusolola ngwetu twevwa kupihia. Chili chipema kukaula chiyulo cha Yesu Kristu muze ambile ngwenyi: “Yuma yeswe kashika nunazange atu alinge hali yenu, lingenu chizechene hali ayo.” (Mateu 7:12) Kwamba pundu, nyi walinga umwe kapalia, chipwe ngwe mukehe, nihindu wakuzanga hanga akwenu asolole zango hali yena hanji avulame kapalia we. Shina ni yena muhasa kusolola zango muze akwenu mahengesa?—A-Efwesu 4:32.

Umwe mukanda wakulumbununa maliji unambe ngwo, kapalia kakulingiwa hamukunda wa kuhona “kupatwila kanawa, kuhona kunyingika, hanji kwehuka kusa manyonga ha yize unalingi.” Kwamba pundu, ha mashimbu amwe tulieswe hitunapalika mu yuma yacho. Chipwe chocho, mutuhasa kutepulula tupalia nyi mutunyingika jimwe shimbi ja mu Mbimbiliya.

Shimbi yimwe muyihasa kutukwasa yili mu mukanda wa Yishima 18:13, unambe ngwo: “Yoze makumbulula shimbu kanda evwe chikuma, chapwa uhepuke ni sonyi kuli iye.” Ewa, kupanjika kanawa chikuma chacho, ni kunyonga ha yize mukumbulula muchikwasa kwehuka kuhanjika hanji kulinga yuma yakalusulusu. Chinyingi chize mupwa nacho ha kupanjika chikuma chacho, chili chilemu hanga wehuke upatwilo upi ni kapalia.

Chisoneko chikwo cha mu Mbimbiliya chinambe ngwo: “Nyi kachi muchihasa kupwa nikulita ni tachi jenu, pwenu ni sambukila kuli atu eswe.” (A-Roma 12:18) Sako tachi hanga upwe ni nyonga lia kuneha sambukila ni kulivwashana ni akwenu. Muze mukalakala ni akwenu, solola zango, aavumbike, nawa aachichimieke. Kulinga chino muchikwasa kukonekena akwetu hanji kuvulama yuma yipi yize malinga hali yetu, nawa chakuhwisa kapalia.

Lilongese yuma yipema ha kapalia. Shimbu ufupe kulikalila yena mwene ha yize wamba hanji walinga, lilongese yuma yipema ha yize yalingiwa hanga ukolese ndako je. Shina ha mashimbu amwe muhasa kusolola uhomboloji, keke ni uhumukizo? Mba yika mutwamba ha kushimbika, ha sambukila ni zango? (A-Ngalashia 5:22, 23) Nyi musolola yitanga yino, muhasa kunyingika yize kuwatambile kulinga ha mashimbu akwo. Eseka kwehuka kulihulikila chinji ha yize walinga. Kupwa ni chiseke hanji kusehejela muchihasa kukukwasa uhone kulipikala chinji.

Kupwa ni nyonga lialita hakutwala ku tupalia muchitukwasa kumukumba muze masoloka. Mutupwa ni sambukila ni akwetu. Nyi mutusa tachi hanga tulilongese ha tupalia twetu, mutupwa ni mana, nawa akwetu matuzanga. Kutuchi kwivwa yinyengo yinji chipwe kunyonga chipi hali yetwene. Kunyingika ngwetu akwetu no kanalipikala ni tupalia two muchitukwasa kukundama kuli ayo. Chino muchitukwasa kwimbulula zango lia Zambi ni kukonekena ni mbunge yeswe.—A-Kolosu 3:13.

Shina kapalia wa Maria, yoze twavulukanga ku uputukilo kanakapihisa chiwanyino cha usoko? Ka. Eswe kasehele ha yize yalingiwile, chipi-chipi Maria, nawa kanakawahilila ha kulia chacho kuchishi macarão! Yimwe miaka kulutwe, ajikulu jenyi aali yalweza sango jacho kuli ana jo ni kwiuluka yize kako alingile. Alioze, te kapalia wika!