1-2. Aya mahasa kutulinga yuma yipi? Lumbununa.

 YESU katele chishima cha umwe tuliwa, yoze waliumbile kuli umwe ngaji hanga amulingile yuma ni ululi. Chishima chino, kota chakwachile chinji ku mbunge ja tumbaji twenyi, mumu ha mashimbu jacho atu kapwile ni kwalinga chinji yuma yipi. (Luka 18:1-5) Chishima chino nawa, muchihasa kupwa ni ulemu unji kuli yetu musono, mumu ni yetu ha mashimbu amwe kakutulinga yuma yipi.

² Musono, hano hashi hanasoloka katonde, kalisa mukachi ka atu ni yuma yinji yipi. Kashika kutushi kukomoka muze atu amwe akutulinga yuma yipi. (Chilu. 5:8) Alioze kutushi kushimbwila atulinge yuma yipi kuli mandumbu jetu a ku ufulielo. Chipwe chocho, yino muyihasa kulingiwa. Tunanyingika ngwetu, mandumbu jetu keshi ngwe atu waze akuzanga kutulinga yuma yipi. Ayo kali wika yihenge. Mutuhasa kulilongesa ha yize Yesu alingile muze apwile ni kumulinga yuma yipi. Nyi twakusa tachi hanga tulihumikize ni atu waze keshi kuwayila Yehova waze akutulinga yuma yipi, twatamba nawa kusa tachi hanga tulihumikize chinji ni mandumbu jetu. Kuchi Yehova akwivwa muze akumona umwe mu chikungulwila hanji haze lia chikungulwila matulinga yuma yipi? Shina yino yakukwata hali Yehova?

 3. Kuchi tunanyingika ngwetu Yehova kakumona yuma yipi yize atu akutulinga?

³ Yehova kakumona yuma yeswe yize atu akutulinga. Iye ‘kakuzanga  ululi.’ (Samu 37:28) Chikwo nawa, Yesu kanatulakenya ngwenyi, muze shimbu muliheta, Yehova ‘mapatwila atu jenyi ni ululi.’ (Luka 18:7, 8) Kwasala hakehe, Yehova mahwisa yuma yeswe yipi yize yakutumwesa lamba ni kuhwisa uhenge weswe hano hashi.​—Samu 72:1, 2.

 4. Ukwaso uka Yehova akutwaha musono?

⁴ Yetu tunashimbwila tangwa lize Yehova makahwisa lamba lietu lieswe. Alioze ha shimbu lino, iye kanatukwase kunyingika yize mutulinga muze atu matulinga yuma yipi. (2 Petu. 3:13) Ngwe chilweza, Yehova kanatulongesa yize twatamba kulinga muze tunapalika mu yuma yipi hanga tuhone kulinga yuma yize muyitunehena lamba. Chikwo nawa, kupalikila muli Yesu, Yehova kanatwehe chilweza chingunu cha chize mutuhasa kukumba yuma yipi yize atu akutulinga. Kakutwaha nawa yiyulo ya mu Mbimbiliya yakutukwasa kunyingika yize mutulinga muze mutupalika mu yuma yipi.

TWATAMBA KUKEYA HA YIZE MUTULINGA MUZE MATULINGA YUMA YIPI

 5. Mumu liaka twatamba kukeya ha yize mutulinga muze umwe matulinga yuma yipi?

⁵ Kupalika mu yuma yipi muchihasa kutulemeka ku mbunge ni kutupinjisa ku mwono. (Chilu. 7:7) Chipwe tuvumbi twa Yehova ashishika ku shakulu, ngwe Yombi ni Habakuke, no che alivwile. (Yombi 6:2, 3; Haba. 1:1-3) Chipwe ngwe hi chipi ko kulivwa chocho, alioze twatamba kukeya ha yize mutulinga hanga tuhone kulinga yuma ya uhepuke.

 6. Yika chilweza cha Absalome chinatulongesa? (Tala nawa chizulie.)

⁶ Muze umwe matulinga yuma yipi, hanji mayilinga kuli mutu yoze twazanga, mutuhasa kuzanga kufunyisa upi ha upi hanji kulinga mutu wacho chuma chipi. Alioze kulinga chocho, muchihasa nawa kupihisa chinji yuma. Tutalenu chilweza cha Absalome, mwana wa Mwanangana Ndawichi. Iye kevwile yikola yinji ku mbunge muze ndumbwenyi Tama, amupihishile kuli Amnone ndumbwo yoze asemukine nenyi kuli tato umuwika. Kulita ni Shimbi ya Mose, kachi Amnone kamushihile mumu lia yize alingile. (Levi 20:17) Chipwe ngwe Absalome kapwile ni ulite wa kwivwa yikola ku mbunge, nihindu kakapwile ni ulite wa kufunyisa upi ha upi hanji ngwetu, kulilingila ululi ni moko jenyi.​—2 Samue. 13:20-23, 28, 29.

 7. Yika mukwa-kwimba masamu alingile muze amwene yuma yipi?

⁷ Ha mashimbu amwe, chakusoloka ngwe atu waze akulinga chinji yuma yipi, keshi kwamwesa lamba mumu lia yize akulinga. Hachino,  mutuhasa kuputuka kulihula ngwetu, shina chinalite lume kulinga yuma yalita? Tutalenu yize yalingiwile kuli mukwa-kwimba masamu yoze waputukile kumona ngwo, atu waze akulinga yuma yipi kakuyuka chinji ku mwono wo. Alioze waze akulinga yuma yipema, kakumona lamba mashimbu eswe. Yamba ngwenyi: “Wano e yingulungulu, se kakuhwima matangwa eswe.” (Samu 73:12) Iye kapinjile chinji mumu lia yuma yipi yize apwile ni kumona, chocho yaputuka kuyambashana nyi te chinalite lume kulingila Yehova. Yamba nawa ngwenyi: “Muze nanyongene kunyingika chuma chino, chapwile kukatala kumeso jami.” (Samu 73:14, 16) Iye yasolola ngwenyi: ‘Alioze yami, te kwasala hakehe kachi yiliato yami hiyaya.’ (Samu 73:2) Yuma ya mutapu au, yalingiwile nawa kuli ndumbu yoze avuluka ngwo Alberto.

 8. Kuchi yuma yipi yize ndumbu Alberto apalikile yakwachile ku mwono wenyi?

⁸ Ndumbu Alberto kamuliongelele ngwo, keya mbongo ja mu chikungulwila. Hachino, yamuchiza yiteli; mandumbu anji mu chikungulwila te keshi kumuvumbika nawa. Iye yamba ngwenyi: “Nevwile uli unji ni kwivwa yikola ku mbunge.” Mumu lia kulivwa chocho, Alberto yazeya ku ufulielo ha miaka yitano. Chilweza chenyi, chinasolola yize muyihasa kulingiwa ku mwono wetu nyi mutwivwa uli muze matulinga yuma yipi.

 IMBULULA CHIZE YESU AKUMBILE YUMA YIPI

 9. Yuma yika yipi yize Yesu apalikile? (Tala nawa chizulie.)

⁹ Yesu kahichikile chilweza chingunu cha chize mutuhasa kukumba yuma yipi. Iye kapalikile mu yuma yinji yipi, yize amulingile kuli asoko jenyi, ni kuli atu akwo nawa. Amwe a kuli asoko jenyi, kapwile ni kunyonga ngwo iye kanazaluka. Mangana a mayingeleja te kakumwamba ngwo, kakulinga mulimo ni andemoniu. Mba maswalale A-Roma yamuhepwisa, yamumwesa lamba ni kumushiha. (Marku 3:21, 22; 14:55; 15:16-20, 35-37) Chipwe chocho, Yesu kakumbile yuma yacho yeswe, chakuhona kufwetesa upi ha upi. Yika mutuhasa kulilongesa ha chilweza chenyi?

10. Kuchi Yesu apwile ni kumona yuma yipi yize te atu akumulinga? (1 Petulu 2:21-23)

¹⁰ Tanga 1 Petulu 2:21-23. a Yesu katuhichikilile chilweza chingunu cha yize mutulinga nyi atu matulinga yuma yipi. Iye kanyingikine ola yalita ya kuhanjika ni ya kuhola. (Mateu 26:62-64) Iye kakapwile ni kulikalila ha hita chuma chize atu apwile ni kumuliongela. (Mateu 11:19) Mba muze te akuhanjika, iye te keshi kutukana chipwe kuhalila atu. Yesu te kakulihumikiza mumu “kapwile ni kujikijila kuli Yoze wakusopesa ni ululi.” Iye kanyingikine ngwenyi, nyonga lia Yehova hakutwala ku yuma yacho, lie liapwile ni ulemu. Kapwile ni kujikijila ngwenyi, ha shimbu lialita, Yehova mahwisa yuma yeswe yipi.

11. Kuchi mutuhasa kulihumikiza ha kuhanjika? (Tala nawa yizulie.)

¹¹ Mutuhasa kwimbulula Yesu ha kulihumikiza ha yize mutuhanjika muze matulinga yuma yipi. Yuma yimwe yipi akutulinga hi yinene ko chinji,  kashika mutuhasa kwetu kwecha chizechene. Ha yisuho yimwe, mutuhasa kusakula kuhola chakuhona kwamba chuma nichimwe, mumu nyi twahanjika mutuhasa kupihisa yuma. (Chilu. 3:7; Tia. 1:19, 20) Ha yisuho yikwo, mutuhasa kuhanjika hanga tukalile mutu yoze analingi yuma yipi hanji kukalila yize twafuliela. (Yili. 6:1, 2) Alioze nyi mutufupa kulinga chocho, twatamba kusa tachi hanga tuhanjike mu mutapu uze muusolola vumbi ni kulihumikiza.​—1 Petu. 3:15. b

12. Yika mutuhasa kulinga hanga tujikijile muli Yehova, “Yoze wakusopesa ni ululi”?

¹² Mutuhasa nawa kwimbulula Yesu ha kujikijila muli Yehova, “Yoze wakusopesa ni ululi.” Muze akwetu matulinga yuma yipi, yetu twakujikijila muli Yehova ngwetu, kananyingika umwenemwene weswe. Chino chakutukwasa kununga ni kunyongonona mu yuma yacho, mumu tunanyingika ngwetu ha shimbu lialita, Yehova malulieka yuma. Muze twakuhichika yuma yeswe mu moko ja Yehova, chino chakutukwasa kwecha kwivwa uli ni kwehuka kutulika toto. Mumu manyonga jacho mahasa kututwala tulinge chuma chipi, tutokese uwahililo wetu, ni kupihisa usepa wetu ni Yehova.​—Samu 37:8.

13. Yika muyihasa kutukwasa kunyongonona muze atu matulinga yuma yipi?

¹³ Tunanyingika ngwetu, kutuchi kuhasa kwimbulula chilweza cha Yesu ni ungunu weswe. Ha mashimbu amwe, mutuhasa kwamba hanji kulinga chuma chize hanyima mutuliseha. (Tia. 3:2) Chikwo nawa, yuma yipi yize atu akutulinga muyihasa kutunehena yikola ku manyonga ni ku musunya yize kuyichi kuhwa mu chifuchi chino. Nyi hanakulingi yuma yipi, pwako ni shindakenyo ngwe, Yehova kanamono yize unapalika. Yesu yoze neye wapalikile mu yuma yipi, kananyingika chize unevu. (Hepre. 4:15, 16) Kuchizako kutwaha chilweza chingunu cha Yesu chize twatamba kukaula, Yehova kakutwaha nawa yiyulo yipema ni kutukwasa kumona chize mutukumba yuma yipi yize atu akutulinga. Tutalenu versu jaali mu mukanda wa A-Roma jize mujihasa kutukwasa ha chikuma chino.

“ECHENU ZAMBI HANGA ASOLOLE UTENU WENYI”

14. Yika postolo Paulu azangile kwamba ha A-Roma 12:19?

¹⁴ Tanga A-Roma 12:19. Postolo Paulu kakolwezele Akwa-Kristu hanga ‘eche Zambi asolole utenu wenyi.’ Yetu twakwecha Yehova asolole utenu wenyi, muze twakuhichika yuma yeswe mu moko jenyi hanga alinge ululi ha shimbu lize mwene mazanga. Ndumbu John, yoze alingile yuma yipi yamba ngwenyi: “Nasele tachi ngulihumikize hanga nguhone kufunyisa upi ha upi, alioze kuchakapwile chashi. Mukanda wa A-Roma 12:19, wangukwashile kununga ni kushimbwila muli Yehova.”

15. Mumu liaka chili chipema kushimbwila muli Yehova hanga alulieke yuma?

¹⁵ Kushimbwila ndo haze Yehova maluliekela yuma chakutuyukisa chinji. Muze twakuchilinga, twakwehuka kusakalala ni lamba lize liakwiza ha kulinga yuma ukawetu hanga tulikalile. Yehova kakulihana mwene hanga atukwase. Muze tunapalika mu yuma yipi, chakupwa ngwe iye kanatulweze ngwenyi: ‘Hichikenu yuma yacho mu moko jami; yami mwene munguyilulieka.’ Nyi mututayiza chilakenyo cha Yehova chinambe ngwo: “Yami mwene mungukafwetesa,” acho mutuhasa kwecha yuma yacho mu moko ja Yehova ni kushimbwila ngwetu ha shimbu lialita, iye malinga yeswe yize mahasa hanga ayilulieke. Yino ye yakwashile John, yoze twatongola ku uputukilo. Iye kambile ngwenyi: “Nyi necha hanga Yehova ahwise kapinda wami, munguzuka yuma yinji yipema kuhiana nyi yami mwene ngumuhwisa.”

 “NUNGENU NI KUKUMBA UPI HA KULINGA YIPEMA”

16-17. Kuchi kulemba chakutukwasa kununga ni “kukumba upi ha kulinga yipema”? (A-Roma 12:21)

¹⁶ Tanga A-Roma 12:21. Postolo Paulu kakolwezele nawa mandumbu hanga anunge ni “kukumba upi ha kulinga yipema.” Ha Longeso lia ha Mulundu, Yesu kambile ngwenyi: “Nungenu ni kuzanga akwa-kole jenu ni kulembela waze akunuhungumiona.” (Mateu 5:44) Yino ye Yesu alingile. Shina hiunanyongo kama ha lamba ni yikola yize Yesu evwile muze amuhachile ha mutondo kuli maswalale A-Roma? Ewa, iye kevwile yikola yinji nawa kakumbile yuma yinji yipi.

¹⁷ Yesu kakechele hanga yuma yipi yize amulingile yimupinjise. Shimbu alembe kuli Yehova hanga amwese lamba maswalale A-Roma, iye yalemba ngwenyi: “Tata, akonekene, mumu kanyingikine yize analingi.” (Luka 23:34) Muze twakulembela atu waze akutulinga yuma yipi, twakutepulula uli uze twakwivwa ni kuhona kutulika toto. Chino nawa chakutukwasa kupwa ni nyonga lialita hali atu waze akutulinga yuma yipi.

18. Kuchi kulemba chakwashile Alberto ni John kukumba yuma yipi yize apalikile?

¹⁸ Kulemba chakwashile mandumbu aali waze twatongola ku uputukilo wa mutwe uno, kukumba yuma yipi yize apalikile ku mwono wo. Alberto yamba ngwenyi: “Yami napwile ni kulembela mandumbu waze angusumine mulonga. Nalembele kuli Yehova yisuho yinji hanga angukwase nguvulame yuma yize o angulingile.” Chochene Alberto kafunyine ni kuwayila Yehova ni ushishiko weswe. John yamba ngwenyi: “Ha yisuho yinji, napwile ni kulembela ndumbu yoze wangulemekene ku mbunge. Mumu lia yilemba yacho, Yehova yangukwasa kumukonekena, kuchishi kumuvwila nawa uli chipwe kumupatwila. Yilemba yacho yangukwashile nawa ngupwe ni sambukila ya ku mbunge.”

19. Yika twatamba kulinga muze kanda tuchiheta kusongo lia yuma ya mwakono? (1 Petulu 3:8, 9)

¹⁹ Ndo haze mutuhetela kusongo lia yuma ya mwakono, kutushi kunyingika pundu yuma yipi yize mutupalika. Alioze yeswayo muyiza kulutwe mu mwono wetu, kutuchi kwecha kulemba kuli Yehova hanga atukwase. Chikwo nawa, mutununga ni kwimbulula yize Yesu alingile muze apalikile mu yuma yipi, ni kukaula shimbi ja mu Mbimbiliya. Nyi twachilinga, mutuhasa kupwa ni shindakenyo ngwetu Yehova matuwahisa.​—Tanga 1 Petulu 3:8, 9.