1. Kuchi postolo Paulu apwile ni kumona tuvumbi?

 TUVUMBI kakukwasa chinji chikungulwila. Postolo Paulu kapwile ni kulemesa chinji malunga wano ashishika. Iye kasolwele ulemu wacho muze asonekenene mukanda Akwa-Kristu mu Fwilipu. Ha mukanda wacho, iye yameneka tuvumbi hamwe ni makulwana a mu chikungulwila.​—Fwili. 1:1.

 2. Kuchi ndumbu Luis akulivwa ha kupwa kavumbi?

² Mandumbu anji a malunga waze hanapapachisa, kakuwahilila chinji ha kukwasa chikungulwila ngwe tuvumbi. Ngwe chilweza, Devan kapwile ni miaka 18 muze amutongwele ngwe kavumbi. Alioze, ndumbu Luis kamutongwele ngwe kavumbi muze apwile ni miaka 50 ni ndambu. Iye yamba ngwenyi: “Chili chiwape chinene kuli yami kukwasa chikungulwila ngwe kavumbi, chipi-chipi muze nakunyonga ha zango lize mandumbu akungusolwela.” Tuvumbi anji no che akwivwa.

 3. Yihula yika mutukumbulula ha mutwe uno?

³ Nyi uli ndumbu yoze hanapapachisa, chikwo nawa kanda uchipwa kavumbi, shina muhasa kutesa kupwa kavumbi? Yika muyihasa kukukwasa kuchilinga? Yika Mbimbiliya yakwamba yize watamba kulinga mba upwe kavumbi? Ha mutwe uno, mutukumbululaho yihula yino. Alioze chitangu, mutumona milimo yize tuvumbi akulinga.

 MILIMO YIKA TUVUMBI AKULINGA?

 4. Milimo yika tuvumbi akulinga? (Tala nawa chizulie.)

⁴ Kavumbi kali ndumbu wa kupapachisa yoze akutongola kupalikila mu spiritu yisandu, hanga akwase makulwana a mu chikungulwila ha milimo yize akwete. Tuvumbi amwe, kakululieka njiza ya chikungulwila ni kuhana mikanda yize mandumbu mambujola nayo. Akwo, kakukwasa ku mulimo wa kululieka ni kukomba Zuwo lia Wanangana. O nawa kakwatongola hanga ahane yihela kuli atu waze akwiza ha kukunguluka ni kukalakala ku yisaji. Milimo yize tuvumbi akulinga, yakufupiwa kusa tachi jinji. Alioze chahiana ulemu, ayo kali malunga ajama ku ufulielo waze akuzanga Yehova ni kutwama kulita ni yize Mbimbiliya yakulongesa. Chikwo nawa, tuvumbi kakuzanga mandumbu eswe mu chikungulwila. (Mateu 22:37-39) Yika ndumbu yoze hanapapachisa atamba kulinga mba apwe kavumbi?

 5. Yika umwe ndumbu mahasa kulinga hanga apwe kavumbi?

⁵ Mbimbiliya yakusolola yitanga yize ndumbu wa lunga atamba kupwa nayo mba amutongole ngwe kavumbi. (1 Timo. 3:8-10, 12, 13) Shina muhasa kulilongesa yitanga yacho ni kulikolweza hanga uyikaule? Nyi wachilinga, muchikukwasa kuzuka chiteli chino. Alioze chitangu, watamba kunyonga kanawa ha yize yinakutwale kuzanga kupwa kavumbi.

MUMU LIAKA UNAZANGE KUPWA KAVUMBI?

 6. Yika yatamba kukutwala kulingila mandumbu je mulimo weswawo? (Mateu 20:28; tala nawa chizulie ha )

⁶ Yesu Kristu kali chilweza chipema kuli yetu. Yuma yeswe yize apwile ni kulinga, yapwile ni kukatuka ha zango lize apwile nalio hali Tato ni hali atu. Zango liacho liatwalile Yesu kusa tachi hanga akwase akwo, ni kulikehesa hanga alinge milimo yize yapwile ni kusoloka ngwe kuyishi ulemu. (Tanga Mateu 20:28; Yoa. 13:5, 14, 15) Nyi yuma yeswe mulinga muyikatuka ha zango, Yehova makuwahisa ni kukukwasa hanga upwe kavumbi.​—1 Kori. 16:14; 1 Petu. 5:5.

 7. Mumu liaka hi chipema ko ndumbu kufupa kupwa kavumbi hanga akwo amukomoke?

⁷ Atu anji hano hashi, kakukomoka atu waze akulinangamisa ni kulizelwola. Alioze tuvumbi twa Yehova kalisa. Ndumbu yoze wakuzanga kulingila akwo, chizechene ngwe Yesu, keshi kufupa ndundo, wata, chipwe kusoloka  ngwe kali mulemu kuhiana akwo. Mutu yoze wakulinangamisa, nyi mamutongola ngwe kavumbi muchihasa kupwa chikalu kuli iye kulinga milimo yize muyisoloka ngwe kuyishi ulemu, alioze yakufupiwa hanga afunge mapanga a Yehova. Iye mahasa kulimona ngwe katambile kulinga milimo yacho, mumu kali mulemu chinji kuhiana akwo. (Yoa. 10:12) Yehova keshi kuwahisa atu waze akulinangamisa, hanji waze akulinga yuma hanga akwo aakomoke.​—1 Kori. 10:24, 33; 13:4, 5.

 8. Chiyulo chika Yesu ahanyine kuli apostolo jenyi?

⁸ Ha yisuho yimwe, chipwe lume masepa ja Yesu, kesekele kuzuka yiteli ni nyonga lipi. Tutalenu yize yalingiwile kuli apostolo aali a Yesu​—Tiangu ni Yoano. Ayo kechile hanga Yesu aehe chihela chilemu mu Wanangana wenyi. Yesu kakaachichimiekene ha nyonga lio lia kuzanga kupwa alemu kuhiana akwo. Shimbu achilinge, iye yalweza apostolo eswe kumi ni aali ngwenyi: “Yoze mazanga kupwa munene hakachi kenu, mwenawo watamba kunulingila, ni yoze mazanga kupwa mutangu hakachi kenu, mwe watamba kupwa ndungo wa eswe.” (Marku 10:35-37, 43, 44) Yoze mazanga kupwa kavumbi ni nyonga lialita, chekwamba lia kulingila akwo, iye kakukwasa chikungulwila mu majila anji.​—1 Tesa. 2:8.

YIKA MUYIKUKWASA KUZANGA KUPWA KAVUMBI?

 9. Kuchi muhasa kwokesa zango lie lia kulingila akwenu?

⁹ Kwamba pundu, wakuzanga Yehova nawa unazange kulingila akwenu. Alioze, hanji kuushi kuzanga kupwa kavumbi mumu unanyingika ngwo, chino muchikunehena milimo yinji. Mba kuchi muhasa kwokesa zango lie lia kulingila akwenu? Jila yimwe, yili kunyonga ha uwahililo uze twakupwa nawo muze twakukwasa mandumbu jetu. Yesu kambile ngwenyi: “Kuhana chakuneha uwahililo unji kuhiana kutambula.” (Yili. 20:35) Mu mwono wenyi weswe, Yesu kapwile chilweza chipema hakutwala ku chikuma chino. Iye kapwile ni uwahililo wamwenemwene mumu lia kulingila akwo, yino ye muyilingiwa nawa ni kuli yena.

10. Yika yinasolola ngwo Yesu te kakuwahilila ha kulingila akwo? (Marku 6:31-34)

¹⁰ Tutalenu chilweza chize chinasolola ngwo, Yesu kapwile ni kuwahilila ha kukwasa akwo. (Tanga Marku 6:31-34.) Ha chisuho chimwe, Yesu ni apostolo jenyi, te kanahongo chinji. Ayo te kanayi ku chihela cha ukawo hanga ahwime. Alioze yimwe mbunga ya atu yalianga kuheta ku chihela chacho ni kushimbwila Yesu hanga aalongese. Yesu kachi kalitunyine, mumu iye ni apostolo jenyi “chipwe mashimbu a kulia kakapwile no.” Iye te mahasa kwalongesa chikuma chimuwika hanji yaali ni kwalweza hanga aye kwo. Alioze amu te akuzanga atu, chocho “yaputuka kwalongesa yuma yinji.” Yanunga ni kuchilinga ndo ha “kutoka cha tangwa.” (Marku 6:35) Iye kakachilingile ha kumushinjila, alioze kachilingile mumu “kevwilile atu keke” Kazangile kwalongesa mumu te kakwazanga. Kulinga chino, chevwishile chinji Yesu kuwaha.

11. Yika Yesu alingile hanga akwase mbunga ya atu ku musunya? (Tala nawa chizulie.)

¹¹ Muze Yesu alongesele mbunga, iye kalingile yuma yinji hi wika ko kwalongesa. Kaehele nawa yuma yize te anafupu ku musunya. Kupalikila mu chikomokeso, iye yokesa mbolo ni yishi ni kuyihana kuli tumbaji twenyi hanga ayitetele atu. (Marku 6:41) Hachino, Yesu yalongesa tumbaji twenyi kulingila akwo. Yasolola nawa ngwenyi, chili chilemu kukwasa akwetu ha yize anafupu. Yino ye tuvumbi atamba kulinga. Achinyonga uwahililo uze apostolo evwile ha kukwasa Yesu kuhana kulia chacho kuli atu, mba “eswe yalia, yaakuta”!  (Marku 6:42) Chino chili chimwe cha ku yilweza yize yinasolola ngwo, Yesu te kakulihulumba chinji ha yize akwo anafupu. Muze apwile hano hashi, iye kalingilile akwo ku mwono wenyi weswe. (Mateu 4:23; 8:16) Kulongesa atu ni kwalingila yuma yikehe-yikehe hanga aakwase, chapwile ni kuvwisa Yesu kuwaha. Ni yena muwahilila chinji nyi walihana hanga ulingile akwenu ngwe kavumbi.

12. Mumu liaka mutu niumwe katambile kulivwa ngwe keshi ni ulemu mu chikungulwila?

¹² Atu amwe kakunyonga ngwo, keshi ni utotombo niumwe uze mahasa kukwasa nawo chikungulwila. Nyi che wakulivwa, kanda uhonga. Kwamba pundu, yena uli ni yitanga yinji yipema yize muyikwasa akwenu. Kashika, muhasa kutanga maliji a Paulu ali ha 1 A-Korindu 12:12-30, ni kulemba ha chikuma chacho. Ha chisoneko chino, Paulu kanasolola pundu ngwo, kavumbi mweswe wa Yehova, kuchingako ni yena kali ni ulemu unji mu chikungulwila. Kashika nyi kanda uchijama ni kupwa kavumbi, kanda uhonga. Shimbu uhonge, linga yize muhasa hanga uwayile Yehova ni kukwasa mandumbu je. Nyi wachilinga, makulwana a mu chikungulwila makumona ni kukwaha milimo yize muhasa kulinga.​—Roma 12:4-8.

13. Yika tunanyingika hakutwala ku yitanga yize ndumbu atamba kupwa nayo mba apwe kavumbi?

¹³ Tala chikuma chikwo cha mumu liaka watamba kusa tachi hanga upwe kavumbi. Yitanga yinji yize watamba kupwa nayo mba upwe kavumbi ye Akwa-Krisu eswe atamba kupwa nayo. Ngwe chilweza, Mukwa-Kristu mweswe katamba kukolesa usepa wenyi ni Yehova, kuzanga kulingila akwo ni uwahililo ni kupwa chilweza chipema mu yitanga. Kashika hanji hiunapu ni yitanga yeswe yize ndumbu atamba kupwa nayo mba amutongole ngwe kavumbi. Yika lume ndumbu atamba kulinga mba apwe kavumbi?

YIZE MULINGA MBA UPWE KAVUMBI

14. Kupwa mutu yoze akwetu “mahasa kujikijila” yika chinalumbunuka? (1 Timoteu 3:8-10, 12)

¹⁴ Tuhengwolenu yimwe ya ku yitanga yize Mbimbiliya yakusolola ha 1 Timoteu 3:8-10, 12. (Tanga.) Tuvumbi katamba kupwa atu waze akwo “mahasa kujikijila.” Liji lino mulihasa nawa kulumbunuka ngwo, “kutela vumbi lia akwo,” “kwalemesa,” hanji “kulinga yuma yize muyitwala akwo hanga aavumbike.” Chino kuchalumbunukine ngwo, yena kuwatambile kuseha hanji kuheha. (Chilu. 3:1, 4) Alioze chikuma chili ngwo, watamba  kulemesa yiteli yize uli nayo. Nyi mashimbu eswe mulinga kanawa milimo yize akuhele mu chikungulwila, mandumbu makujikijila ni kukuvumbika.

15. Kupwa lunga wa “liji limuwika” ni kuhona ‘kuzuka mbongo mu jila yize kuyalitele,’ yika chinalumbunuka?

¹⁵ Kupwa lunga wa “liji limuwika” chinalumbunuka ngwo, wakuhanjika umwenemwene, kuushi mahuza nawa akwenu mahasa kukujikijila mashimbu eswe. Wakumanununa yuma yize wakulakenya nawa kuushi kwonga akwenu. (Yishi. 3:32) Kuushi “kuzuka yuma mu jila yize kuyalitele” chinalumbunuka ngwo, ukwete mbunge yitoma ha milimo yize wakulinga, nawa ukwete nyonga lialita hakutwala ku mbongo. Kashika, kuwatambile kwonga mandumbu je mu chikungulwila hanga uzuke mbongo kupalikila muli ayo.

16. (a) Kuhona “kunwa walwa unji” yika chinalumbunuka? (b) Yika chinalumbunuka kupwa ni “mbunge yitoma”?

¹⁶ “Kuhona kunwa walwa unji” chinalumbunuka ngwo, kuwatambile kuhianyisa chinji kunwa walwa hanji kupwa chizengi. Kupwa ni “mbunge yitoma” chinalumbunuka ngwo, wakutwama kulita ni shimbi ja Yehova. Chipwe ngwe kuushi mungunu, alioze muhasa kupwa ni sambukila yize yakwiza ha kupwa ni usepa upema ni Yehova.

17. Maliji “kwahengwola chitangu” yika analumbunuka? (Tanga 1 Timoteu 3:10; tala nawa chizulie.)

¹⁷ “Katamba kwahengwola chitangu,” maliji wano kanalumbunuka ngwo, makulwana hamona chize wakulinga milimo ye, nawa mahasa kukujikijila. Kashika, muze makulwana makwita hanga ulinge umwe mulimo, kaula kanawa usongwelo wo ni wa mu ululikiso. Fupa kunyingika kanawa mulimo wacho ni shimbu lize watamba kuuhwisa. Nyi wafunga kanawa yiteli yize mutambula, mandumbu eswe mu chikungulwila mamona ngwo, wakulinga kanawa milimo ye; nawa mamona kujama che ku ufulielo. Makulwana a mu chikungulwila, kanda nwecha kufumba mandumbu waze hanapapachisa. (Tanga 1 Timoteu 3:10.) Shina mu chikungulwila chenu muli akweze a miaka 10 ndo 14 waze hanapapachisa? Shina o kakulinga longeso lio lia wika ni kululieka kanawa kukunguluka? Kakuhana makumbululo ha kukunguluka ni kuya ni kwambujola mashimbu eswe? Nyi nwakumbulula ngwo ewa, ehenu yiteli yize o mahasa kumanununa kulita ni miaka yize ali nayo. Kulinga chino, muchinukwasa kunyingika kanawa akweze jacho. Mba muze  makumbanyisa miaka 17 hanji 18 mahasa kujama hanga apwe tuvumbi.

18. Kupwa waze “keshi ni chitela cha kwasumina mulonga,” yika chinalumbunuka?

¹⁸ Maliji “keshi ni chitela cha kwasumina mulonga” kanalumbunuka ngwo, niumwe katambile kukusuma mulonga ngwo wakulinga yuma yipi. Kwamba pundu, Akwa-Kristu eswe mahasa kwalamikiza ha yimwe. Yino ye yalingiwile kuli Yesu, mba yamba ngwenyi, tumbaji twenyi no te mapalika mu yuma yacho. (Yoa. 15:20) Alioze chizechene ngwe Yesu, nyi wapwa ni mbunge yitoma, muopwa ni lufuma mupema mu chikungulwila.—Mateu 11:19.

19. Kupwa “Lunga wa pwo umuwika” yika chinalumbunuka?

¹⁹ “Lunga wa pwo umuwika.” Nyi hiunambata, watamba kupwa ni nyonga lia Yehova hakutwala ku ulo ngwo, uli kulinunga cha lunga ni pwo umuwika. (Mateu 19:3-9) Mukwa-Kristu katambile kulinga utanji hanji upangala. (Hepre. 13:4) Chikwo nawa, katamba kushishika kuli mukwo-pwo, chakuhona kusolola zango lia ulo kuli mapwo eka.​—Yombi 31:1.

20. Kuchi lunga mahasa “kusongwela kanawa” usoko wenyi?

²⁰ “Mukwa-kusongwela kanawa ana jenyi, ni usoko wenyi.” Nyi uli mwata wa mu usoko, watamba kumanununa kanawa yiteli yize ukwete. Songwela uwayilo wa mu usoko mashimbu eswe. Ambujola hamuwika ni mukwenu-pwo hamwe ni ana jenu, kulita ni uhashi wenu. Kwasa ana je hanga apwe ni usepa ukolo ni Yehova. (Efwe. 6:4) Lunga yoze wakufunga kanawa usoko wenyi, kakusolola ngwo mahasa nawa kufunga chikungulwila.​—Tesa ni 1 Timoteu 3:5.

21. Yika muhasa kulinga nyi kanda uchipwa kavumbi?

²¹ Nyi kanda uchipwa kavumbi, lisesa lilongese kanawa mutwe uno ni kulemba ha chikuma chino. Lilongese nawa yize Mbimbiliya yakwamba hakutwala ku yize tuvumbi atamba kulinga, ni kusa tachi hanga uyise mu yitanga. Pukuna ha chize wakuzanga Yehova ni mandumbu je mu chikungulwila. Kulinga chino, muchikukwasa kwokesa zango lie lia kwalingila. (1 Petu. 4:8, 10) Muze muopwa kavumbi, muwivwa uwahililo uze wakwiza ha kulingila mandumbu je mu chikungulwila. Kashika muhasa kupwa ni shindakenyo ngwe, Yehova mawahisa tachi jize unase hanga upwe kavumbi.​—Fwili. 2:13.