Paul: Te tunawahilila chinji! Kapwile kakweji wa Novembro 1985, te tunayi ku chiteli chetu cha mishionaliu mu África Ocidental; ndeke yetu yiyitulila mu Senegal. Anne yamba ngwenyi: “Kwasala wika ola yimuwika tuhete ku Libéria.” Alioze yikwiza umwe mutambi, ngwo: “Ngeji anayi ku Libéria, katamba kusunuka mu ndeke. Mumu lia yingalwe waze alukukila Nguvulu hanga amutambule wata, kutuchi kuhasa kuya mu chifuchi chacho.” Ha kupalika cha matangwa kumi, twatwamine ku zuwo lia mishionaliu mu Senegal. Sango jize twapwile ni kutambula ja ku Libéria, te jakuhanjika ha tuminyau a too ni afu ni sango jakwamba ngwo, atu katamba kutwama ku mazuwo nyi kononokene, maashiha.

Anne: Yetu hi tuli tungumbe ko. Chikwo nawa, muze napwile kanuke te kakunguvuluka ngwo, Annie mukwa-mwongo. Nakwivwa mwongo chipwe wa kutangunuka tapalo. Alioze, twahamukine hanga tuye ku chiteli kuze atutumine.

Paul: Yetu eswe aali tuli a ku Oeste ya ku Inglaterra, nawa twakolelele mu mbonge yimuwika. Yami ni Anne twaputukile mulimo wa upionelu, muze twahwishile shikola yikehe. Yetu eswe aali twatambwile ukwaso ni utakamiso, yami kuli yisemi jami, Anne kuli naye. Twapwile ni nyonga lia kunjila mu mulimo wa shimbu lieswe, chocho yisemi jetu yatukwasa. Muze napwile ni miaka 19, yingupwa ni chiwape cha kuya ku Mbetele. Anne kayile ku Mbetele muze twalimbachile ha mwaka 1982.

Anne: Yetu te twakuzanga chinji Mbetele, alioze twazangile kukalakala chinji kuze te kunafupiwa ukwaso. Ku Mbetele, twapwile ni uhashi wa kukalakala hamwe ni mandumbu waze apwile mu mulimo wa mishionaliu. Chino yichikolesa zango lietu lia kukalakala ngwe mishionaliu. Te twakulemba ha chikuma chino matangwa eswe ha miaka yitatu. Ha mwaka 1985, yituwahilila chinji muze atusanyikine ku kalasa 79 ya Ngiliate. Hanyima lia kuhwisa shikola, yatutuma ku Libéria mu África Ocidental.

Paul: Twayile wenyi mu ndeke yitangu yize atayijile kuya ku Libéria. Mba nunyingike yize yalingiwileko, chipwe zungo lia mashinyi te liakutwala atu evwe woma. Mba tuhwime mbunge, hita ufuku te twakutanga jimwe versu mu mukanda wa Masamu. Yetu te twakuzanga chinji chiteli chetu. Anne te kakukalakala ngwe mishionaliu wa mu munda, yami te nakukalakala ku Mbetele hamuwika ni ndumbu John  Charuk. a Chinyingi chenyi ni chize te anyingika kanawa mwono wa mandumbu, chapwile fumbo linene kuli yami.

Anne: Mumu liaka twazangile Libéria ha mashimbu akehe wika? Twazangile Libéria mumu lia mandumbu jetu. Ayo kapwile ni zango linji; kapwile ni kusangulwisa akwo, nawa te kashishika. Chocho yitulikata no ni kupwa usoko umuwika. Yiyulo yo yatukwashile chinji ku ufulielo. Chikwo nawa, mulimo wa kwambujola wapwile chuma chize napwile ni kuzanga chinji. Atu te kakuzanga hanga tuhanjike no ha mashimbu anji. Chapwile chashi kuhanjika ni atu mu matapalo hakutwala ku Mbimbiliya. Twapwile ni alongi anji a Mbimbiliya. Hachino, te chakukaliwa kulilongesa Mbimbiliya ni eswe. Yono mwe kapinda twapwile nenyi.

Paul: Ha 1989, muze te hikwapalika miaka yiwana ya sambukila yikehe, susumuku yikuputuka jita. Ha 2 Julho 1990, maswalale yihulia yatambula mbonge muze mwapwile Mbetele. Ha kupalika cha tukweji atatu, kutwakahashile kuhanjika ni mandumbu akwo, kuchingako asoko jetu ni mandumbu a ku chishina chinene. Chiyulo cha nguvulu chapwile chikalu chinji. Kutwakapwile ni yuma ya kulia, mapwo anji te kakwapihisa. Kapinda wacho kapwile mu chifuchi cheswe nawa kanungine ha miaka 14.

Anne: Minyachi yimwe yapwile ni kwasa jita ni kulishiha umwe ni mukwo. Maswalale waze apwile ni mata ni kuzala mazalo api, kapwile ni kuya mu matapalo ni kutambula yuma yeswe yize apwile ni kuwana kuli atu. Kuli amwe a kuli ayo, kushiha mutu chapwile wika ngwe kushiha kasumbi, ngwe chize ene apwile ni kwamba. Kashika, twapwile ni kuwana afu anji ha yilombo ya maswalale ni hakamwihi ni Mbetele. Tuvumbi twa Yehova ashishika kafwile, kuchingako mandumbu jetu aali waze apwile mishionaliu.

Mandumbu kasele mwono wo mu ponde hanga asweke mandumbu a ku munyachi weka, waze apwile ni kufupa hanga aashihe. Mishionaliu ni Mambetelita no che alingile. Mandumbu waze achinyinyine ku Mbetele, te kakupomba mu yipatulo ya mushi, akwo te kakupwa hamwe ni yetu mu yipatulo ya kwilu. Ku zuwo lietu mu Mbetele, twatambwile usoko uze wapwile ni atu shimbiali.

Paul: Matangwa eswe maswalale kapwile kufupa kunjila mu Mbetele hanga atale nyi tunaswekamo atu. Kwapwile mandumbu awana waze te akufunga Mbetele. Aali te kakutalila ha tupenda, akwo aali ku chikolo. Mandumbu waze apwile ku chikolo nyi masa moko jo kulutwe, chino te chakulumbunuka ngwo, yuma yeswe yinende kanawa. Alioze nyi masa moko jo kunyima, chino te chakulumbunuka ngwo, maswalale yingalwe kaneza. Mba waze te akutalila ha tupenda mazomboka hanga alweze mandumbu jetu aswame.

 Anne: Ha kupalika cha poso jinji, chimwe chizavu cha maswalale yihulia yichinjila mu Mbetele. Yami ni umwe ndumbu wa pwo yituya ni kuswama mu kumba mu chimwe chihela chize twapwile ni kutulikila yuma. Ndumbu wacho katambile kulivunga mu chiheta chacho. Maswalale jacho waze apwile ni mata, yangukaula ndo ni ku chipatulo cha kwilu. Ayo yapupa chikolo. Paul yaliumba ni kwalweza ngwenyi: “Mukwetu-pwo kanalingi yimwe mu kumba.” Muze nayikile chikolo cha chipatulo muze ndumbu apwile, yichineha zungo. Hanyima, yingufunyisa yuma yeswe mu chihela chayo. Mulimo uno unakashimbula chinji, chocho yiutwala maswalale kwiza kuze twapwile. Chino changuvwishile woma unji. Mba kuchi te munguhasa kwazulula chikolo? Nalembele kuli Yehova ni kumwita ukwaso. Hazehene yingwazulula chikolo. Hanyima lia kuchilinga, yinguhwima mbunge. Umwe swalale yangununguna, chocho yanjila mu chihela muze te twakutulikila yuma ni kuputuka kufupa-fupa mu yikashi. Kakawanyinemo mutu niumwe. Hachino, iye ni chizavu chenyi, yaputuka kuya ni kufupa mu yipatulo yikwo. Chipwe chocho, atu waze apwile ni kufupa kakawanyinemo.

Paul: Twahonene kulia ha tukweji anji. Ha uwayilo wetu wa chimene ku Mbetele, twapwile wika ni kulia ku ufulielo, kutwakapwile ni “kulia” cha ku musunya. Kulia chino cha ku ufulielo, che chatukwashile ha mashimbu jacho.

Twanyingikine ngwetu, nyi kulia cheswe ni meya waze twapwile no muyihwa, te mututuhuka haze lia Mbetele. Mba yika te muyilingiwa kuli mandumbu waze ejile ni kuswama mu Mbetele? Te mahasa kwashiha. Alioze ha mashimbu amwe, mutapu uze Yehova apwile ni kutuhelamo kulia wapwile chikomokeso. Yehova katufungile ha yeswe yize twapwile ni kufupa ni kutukwasa kukumba yipikalo yetu.

Muze te yuma yinayi ni kupihia chinji hashi, ni umwenemwene te unayi ni kukola. Ha yisuho yinji, mandumbu jetu katambile kuchina hanga alamwine mwono wo. Chipwe chocho, te kakununga ni kushishika ni kuhwima mbunge. Mandumbu amwe kambile ngwo, yuma yize apwile ni kupalika, “yapwile ni kwakwasa hanga amone chize makapalika mu luyinda munene.” Makulwana a mu yikungulwila a hamu hamwe ni akweze, kasele tachi hanga akwase mandumbu jo. Muze te akutuhuka mu mbonge, mandumbu te kakulinunga ni kuputuka kwambujola ku chihela kuze apwile ni kuya, ni kukunguluka mu Mazuwo a Wanangana waze ene apwile ni kutunga mu usaki. Mu kapinda wacho mweswe, kukunguluka chapwile ngwe paraisu ya utakamiso. Chikwo nawa, kwambujola chakwashile mandumbu kukumba kapinda wacho. Muze te twakuya ni kuhana ukwaso kuli mandumbu, twapwile ni kukomoka ha kwamona meta pasta ja kutuhuka najo mu munda shimbu ete mazalo. Atu waze apalikile mu yuma yikalu yize yapwile ni kwevwisa mwongo, kapwile ni kuzanga chinji kupanjika sango jipema. Atu jacho te kakukomoka chinji ha kumona Yela ja Yehova kanawahilila, nawa kali ni nyonga lialita. Chochene, mandumbu te kakupeyima mukachi ka milima. (Mateu 5:14-16) Zango lize mandumbu apwile nalio ha kwambujola sango jipema, liakwashile chipwe lume maswalale yilianyi, kulilongesa umwenemwene.

Paul: Ha mashimbu amwe, twatambile kuhichika chifuchi. Twachilingile katatu ha mashimbu akehe, chikwo nawa, kaali ha mwaka. Umwe ndumbu wa pwo mishionaliu, yalumbununa kanawa chize twapwile ni kwivwa ngwenyi: “Ku Ngiliate, twalilongesele kusa mbunge ku chiteli chetu, chino che chalingiwile lume. Kashika, kuhichika mandumbu jetu ha mashimbu akalu waze apwile ni kupalika, chatuvwishile yikola yinji ku mbunge.” Alioze tunakawahilila chinji ha kupwa mu yifuchi ya hakamwihi muze te mutununga ni kukwasa mandumbu jetu ku Libéria.

Anne: Ha Maio 1996, awana a kuli yetu, yituya ni amwe mashinyi muze mwapwile mikanda yilemu ya Mbetele. Nyonga lietu liapwile kwenda kilometro 16 hanga tuye ku mbonge kuze kwakapwile jita. Ha shimbu liacho, mu mbonge muze twapwile te munalingiwa jita. Maswalale yilianyi waze apwile ni kuloza mata mwilu yatumanyisa, yachiza atatu a kuli yetu mu mashinyi, o yanda mashinyi yaputuka kuya hamwe ni Paul. Etu yitusala ni kuhipa ku mbunge. Susumuku yitumona Paul kaneza kuli yetu hashi ni manyinga anji kumeso. Ku uputukilo twamwene ngwetu hanji kamuloza, alioze yitunyingika ngwetu nyi kamuloza kachi te kechi kuhasa kwenda. Kamulambile kuli umwe swalale muze te anamutuhwisa mu mashinyi. Chapemene kumona ngwetu, chapwile wika chilonda chikehe.

Hakamwihi ni yetu hapwile amwe mashinyi a maswalale waze apwile a too ni atu waze te anevu woma. Yitunyina mu mashinyi jacho, alioze kukwakapwile chihela cha kukwata. Twambile kuholoka mumu shofele kapwile ni kwendesa ni fuji jinji. Yituputuka kuteta hanga amanyise mashinyi, alioze amu apwile ni kwivwa woma unji, kakazangile kumana. Kashika, twasele tachi hanga tuhone kuholoka, alioze twahetele hitwahonga ni yikatashi ku mujimba, mumu lia tachi jize twasele hanga tulifunge.

Paul: Ni fufuta hamwe ni mazalo akuchanuka, yitulitala umwe ni mukwo ni kulihula ngwetu, kuchi chapwa mba tununge ni mwono? Yitupomba haze sali lia ndeke yikehe yize yapwile ni yituwa ya mbundu, ndeke yacho ye te muyitutwala ku Serra Leoa ha tangwa lize mulihataho. Twawahililile chinji ha kuheta ni mwono ku Serra Leoa, alioze twalipikalile mumu lia mandumbu jetu waze asalile ku Libéria.

Anne: Muze twahetele ku Mbetele mu mbonge ya Freetown Serra Leoa, yatutambula kanawa ni kutufunga. Alioze ha mashimbu amwe, te nakumona mu manyonga jami yizulie ya yuma yipi yize twapalikile. Matangwa eswe te nakwivwa mwongo ngwo mukulingiwa chimwe chuma chipi, hachino te chishi kuhasa kunyonga kanawa. Chapwile ngwe yuma yize twapalikile yapwile wika yilota. Ha ufuku, te chishi kupomba, napwile ni kuchikima ni woma ni kunyonga ngwe mukulingiwa chimwe chuma chipi. Chakapwile ni kuhasa kuhwima. Paul te kakungukangayika ni kulemba hamuwika ni yami. Twapwile ni kwimba miaso ya Wanangana ndo haze mungulivwa kanawa. Napwile ni kulivwa ngwe ngunazaluka ni kumona ngwami, chichi kuhasa kununga ngwe mishionaliu.

Chichi keza kavulama yize yalingiwile kulutwe. Ha poso yizeyene, yitutambula mikanda yaali. Umwe Laulenu! 8 Junho 1996, wapwile ni mutwe unambe ngwo: “Chize Mutu Mahasa Kukumba Mwongo.” Chocho yingunyingika mumu liaka napwile ni kulivwa chichize. Mukanda wamuchiali wapwile Kaposhi wa Kutalila 15 Maio 1996, wapwile ni mutwe unambe ngwo, “Kuchi Muhasa Nawa Kupwa ni Tachi?” Kaposhi yono kapwile ni chizulie cha kambimbi, yoze te keshi ni yimwe yihanda ya ngona. Chikuma chacho yichilumbununa ngwo, ngwe chizechene kambimbi mahasa kununga ni kulia ni kuhumuka chipwe ngwe ngona jimwe kujishi kanawa, ni yetu mutuhasa kununga ni kutambula spiritu ya Yehova hanga tukwase akwetu, chipwe ngwe kutushi kanawa ku manyonga. Yikuma yino yanguhele tachi, nawa yapwile kulia cha Yehova chize chejile ha shimbu lialita. (Mateu 24:45) Kuhengwola chikuma chino ni kukunga mikanda yize yapwile ni kuhanjika ha chikuma chacho changukwashile. Ha kupalika cha mashimbu, woma uze napwile ni kwivwa yiutepuluka.

Paul: Te twakuwahilila chinji ha yisuho yeswe yize twapwile ni kufuna ku Libéria. Kusongo lia 2004, te tunayi ni kukumbanyisa miaka 20 mu mulimo wetu. Jita yeswe yahwile, chocho yitusa tachi hanga tutunge Mbetele yaha. Muze te tunalulieka yuma, hazehene yatusanyika ni kutwaha chiteli chaha.

 Chapwile cheseko chinene. Twazangile chinji mandumbu jetu mu chifuchi chacho, kuchi te muchipwa nyi mutwahichika? Hazehene, yitwiuluka chize Yehova atukwashile ha kuhichika asoko jetu ni kuya ku Ngiliate, chocho yitutayiza chiteli chaha. Chiteli chino chapwile kututuma ku Gana, chifuchi chize chapwile hakamwihi.

Anne: Twalilile chinji muze twahichikile Libéria. Twakomokene muze ndumbu Frank, umwe ndumbu kashinakaji wa mana anji, ambile ngwenyi: “Tuvulamenu!” Hanyima, yalumbununa mumu liaka ambile chocho. Yamba ngwenyi: “Tunanyingika ngwetu, yenu kunuchi kuhasa kutuvulama, alioze nwatamba kulihana ni mbunge yeswe ku chiteli chenu chaha chize nwatambula. Chiteli chino chili cha Yehova. Kashika, lihulikilenu hali mandumbu a kuze munuya.” Maliji wano katukwashile kulikata ni masepa aha mu chifuchi chize twayile muze mandumbu akehe wika e te atunyingika, nawa yuma yeswe yapwile yaha kuli yetu.

Paul: Alioze chakuhona kushimbula, mandumbu jetu mu Gana yapwa usoko wetu waha. Mu Gana mwapwile Yela ja Yehova anji. Twalilongesele yuma yinji kuli mandumbu jacho waze te hanahi ku ufulielo. Hanyima lia kukalakala miaka 13 mu Gana, yitutambula nawa chiteli chize te kutushi ni kushimbwila. Yatutuma hanga tuye ni kukalakala ku Mbetele ya ku África Oriental mu chifuchi cha Quênia. Chipwe ngwe twapwile ni kwivwa usona wa mandumbu a mu yifuchi muze twakalakalile, nihindu yituputuka nawa kuzanga chinji mandumbu jetu mu Quênia. Ni musono, tunakalakala mu njiza yize munafupiwa chinji ukwaso.

Anne: Ha miaka yino yeswe, napalika mu yuma yinji yikalu. Ha mashimbu amwe, te nakwivwa woma unji. Kupalika mu ponde ni mu yuma yize yakusakalalisa, muchihasa kutunehena kapinda ku manyonga ni ku musunya. Kutwatambile kushimbwila ngwetu, Yehova atufunge ku yuma yeswe kupalikila mu chikomokeso. Chipwe haliapwila, muze nakwivwa zungo lia mata, nakwivwa chishika-shika mu jimo ni kulekumuka mu moko. Alioze, nalilongesele kujikijila ha ukwaso uze Yehova ni mandumbu jetu akutwaha hanga tupwe ni tachi. Namwene ku mwono wami ngwami, nyi twalikwachilila ha kulinga yuma ya ku ufulielo, Yehova mahasa kutukwasa kununga mu mulimo wetu.

Paul: Ha mashimbu amwe, atu kakutuhula ngwo: “Nwakuzanga chiteli chenu?” Yifuchi yimwe muyihasa kupwa yipema, alioze mumuhasa kusoloka vunda ni ponde. Kashika, yika yetu twakuzanga chinji kuhiana chifuchi? Twakuzanga mandumbu jetu hanji ngwetu, usoko wetu wa ku ufulielo. Chipwe ngwe tuli a ku minyachi yeka nawa tukwete fumbo lialisa, nihindu kunyonga chetu chapwa chimuwika. Twanyongene ngwetu, katutumine hanga tuye ni kutakamisa mandumbu jetu, alioze kwamba umwenemwene, ayo e atutakamishine.

Mandumbu jetu a hashi heswe kali chikomokeso cha Yehova kuli yetu. Tuli ni asoko hashi heswe. Kweswako twakuya, twakulivwa ngwe tuli kumahetu. Kashika, tuli ni shindakenyo ngwetu, nyi twanunga ni kujikijila muli Yehova, iye matwaha tachi jize mutufupa.​—Fwili. 4:13.