1. Mumu liaka twatamba kulilongesa hali tushinakaji?

 YETU eswe twakufupa ukwaso muze tunazange kukwata chimwe chiyulo chilemu ku mwono wetu. Kashika, makulwana a mu chikungulwila ni mandumbu akwo waze ajama, mahasa kutukwasa ha chikuma chino. Chipwe ngwe o hapwa tushinakaji, nihindu kutwatambile kunyonga ngwetu, yiyulo yo kuyishi nawa ni ulemu. Yehova kanazange hanga tulilongese hali tushinakaji. Ayo hatwama chinji ku mwono; hanalilongesa yuma yinji, kashika kali ni yinyingi yinji kuhiana yetu.​—Yombi 12:12.

 2. Yika mutumona ha mutwe uno?

² Ku mashimbu a kunyima, Yehova katakamishine ni kusongwela atu jenyi kupalikila muli malunga ashishika. Malunga wano te hapwa ni miaka yinji, ngwe chilweza, Mose, Ndawichi ni postolo Yoano. Ayo kakatwamine ha shimbu limuwika, chikwo nawa, mwono wo te walisa. Muze te hikwasala hakehe hanga afwe, o yahana yiyulo yinji ya mana kuli akweze. Hita umwe wa kuli malunga jacho ashishika, yahanjika ha ulemu wa kwononokena Zambi. Yehova katumine kusoneka maliji a malunga wano mu Mbimbiliya hanga atukwase musono. Yetu eswe, akweze hanji tushinakaji, mutuhasa kuyuka ha yize malunga wano ambile. (Roma 15:4; 2 Timo. 3:16) Ha mutwe uno, mutumonaho maliji akasula a malunga wano atatu ashishika, ni malongeso waze mutuwana ha yize o ambile.

“MUNUKATWAMA MU CHIFUCHI MATANGWA ANJI”

 3. Yuma yika Mose alingile?

³ Mose kalingilile Yehova ku mwono wenyi weswe. Iye kapwile profeta, ngaji, kasongo nawa mukwa-kusoneka. Yuma yeswe yize apalikile ku mwono yamukwashile kupwa ni yinyingi yinji. Iye mwe watuhwishile A-Izalele mu Engitu, chikwo nawa, kamwene  yikomokeso yinji ya Yehova. Mose mwe wasonekene mikanda yitangu yitano ya mu Mbimbiliya; yasoneka nawa Samu 90, kota ni Samu 91. Chakusoloka nawa ngwe iye mwe wasonekene mukanda wa Yombi.

 4. Aya Mose atakamishine, nawa mumu liaka?

⁴ Muze Mose te hapwa ni miaka 120 kusongo lia mwono wenyi, yakungulula A-Izalele eswe ni kwaeulula yuma yeswe yize Yehova aalingilile. A-Izalele amwe muze te achili akweze, kamwene yikomokeso yinji yize Yehova alingile ni chize alambile A-Engitu. (Kutuhu. 7:3, 4) Kamwene chize Yehova azulwile Kalunga-lwiji Muchila hanga o apalike ni chize anongesene Falau hamwe ni tujita twenyi. (Kutuhu. 14:29-31) Mu puya, Yehova yaafunga, yaakwasa ni kwaha yuma yeswe yize te anafupu. (Shimbi 8:3, 4) Te hikwasala hakehe hanga A-Izalele anjile mu Chifuchi cha Chilakenyo. Mba shimbu te kanda achifwa, Mose yazanga chinji kwatakamisa. a

 5. Maliji akasula a Mose ali ha Shimbi Yamuchiali 30:19, 20, kahanyine shindakenyo yika kuli A-Izalele?

⁵ Yika Mose ambile? (Tanga Shimbi Yamuchiali 30:19, 20.) Mose keulwile vungu lia Izalele ngwo, kulutwe, mwono wo te muupema. Yehova te maawahisa hanga atwame matangwa anji mu chifuchi chize aalakenyene. Chifuchi chacho chapwile ni upite unji, nawa mavu jamo te kakwima mbuto yinji. Mose yasoneka ngwenyi: ‘Chifuchi cha membo anene-anene, apema, waze enu kunwaatungile, ni mazuwo a too ni yuma yipema waze enu kunwaazalishile, ni mashima a kutota waze enu kunwaatotele, ni minda ya uva ni mitondo ya olevwe yize enu kunwayitumbile; munulia ni kukuta.’​—Shimbi 6:10, 11.

 6. Mumu liaka Yehova echele mavungu akwo hanga akumbe A-Izalele?

⁶ Mose kahanyine nawa utowezo kuli A-Izalele. Nyi te mazanga kununga ni kutwama mu chifuchi chize Yehova aehele, o te katamba kwononokena shimbi jenyi. Mose yaeulula ulemu wa ‘kusakula mwono’ ha kupanjika Yehova ni ‘kulalaminya kuli iye.’ Alioze, A-Izalele kakazangile kwononoka. Kashika ha kupalika cha mashimbu, Yehova yecha Asuria hanyima A-Babilonia hanga akumbe A-Izalele ni kwatwala mu ufunge.​—2 Mia. 17:6-8, 13, 14; 2 Sango 36:15-17, 20.

 7. Yika twalilongesa ha maliji a Mose? (Tala nawa chizulie.)

⁷ Yika twalilongesa? Twalilongesa ngwetu, kwononoka chakulamwina mwono. Ngwe chizechene kwasalile hakehe hanga A-Izalele anjile mu Chifuchi cha Chilakenyo, ni yetu kwasala hakehe hanga tunjile mu chifuchi chaha chize Yehova alakenyene. Kwasala hakehe hashi heswe muhapwa paraisu. (Iza. 35:1; Luka 23:43) Ndiapu ni andemoniu jenyi, kechi kahasa nawa kutupinjisa. (Uso. 20:2, 3) Kukuchi kapwa nawa uwayilo wa mahuza. (Uso. 17:16) Manguvulu kechi kamwesa nawa atu lamba. (Uso. 19:19, 20) Yehova kechi kecha mutu niumwe hanga anehe lamba mu Paraisu. (Samu 37:10, 11) Atu eswe makononokena shimbi ja Yehova, chino muchikaneha sambukila ni kulinunga. Kuchizako yino, atu makalijikijila ni kulizanga umwe ni mukwo. (Iza. 11:9) Tunashimbwila tangwa lize yino yeswe muyikalingiwa. Nyi twanunga ni kwononokena Yehova, mutukapwa ni uhashi wa kutwama mu paraisu hano hashi hi ku miaka yikehe wika ko, alioze ku miaka yeswe.​—Samu 37:29; Yoa. 3:16.

 8. Kuchi chilakenyo cha mwono wa mutolo chakwashile umwe mishionaliu? (Yundase 20, 21)

⁸ Nyi twalihulikila ha chilakenyo cha Yehova cha kutwaha mwono wa mutolo, mutuhasa kumwononokena chipwe ngwe mukulingiwa yuma  yeswayo ku mwono wetu. (Tanga Yundase 20, 21.) Chilakenyo chacho muchihasa nawa kutwaha tachi hanga tukumbe ulelu uze tukwete. Umwe ndumbu yoze wakalakala ha miaka yinji ngwe mishionaliu mu África, kanahanjika ha tachi jize akusa hanga akumbe ulelu wa ku musunya. Iye yamba ngwenyi: “Muze nanyingikine ngwami nyi chononokenene Yehova munguhasa kutokesa kutalatala chami cha kutwama mu paraisu, yingukwata chiyulo cha kusa tachi hanga ngukumbe ulelu wami ni kuliumba kuli Yehova hanga angukwase. Ni ukwaso wa Yehova, nahashile kukumba ulelu wacho.”

“MUKAWAHA MU YUMA YESWE MULINGA”

 9. Yipikalo yika Ndawichi apalikile ku mwono wenyi?

⁹ Ndawichi kapwile mwanangana wa atu ja Yehova nawa kashishikile kuli Zambi. Iye kapwile mukwa-kusoneka miaso ni kuyimba, kajita nawa profeta. Alioze kapalikile mu yipikalo yinji. Ha yimwe miaka, iye katambile kuchina Mwanangana mupi Saulu. Hanyima lia kupwa mwanangana, Ndawichi katambile nawa kuchina hanga alamwine mwono wenyi, mumu mwanenyi Absalome kazangile kumutambula wanangana. Chipwe ngwe Ndawichi kapalikile mu yipikalo yino ni kulinga shili yinene, nihindu iye kashishikile kuli Yehova ndo ku kufwa chenyi. Hachino, Yehova yamuvuluka ngwenyi, “lunga yoze wakuwahisa mbunge yami.” Kashika, chili chipema kupanjika kanawa yiyulo ya mana yize Ndawichi ahanyine.​—Yili. 13:22; 1 Mia. 15:5.

10. Mumu liaka Ndawichi ahanyine chiyulo kuli mwanenyi Solomone yoze te mamusalakana ha wanangana?

¹⁰ Tutalenu yimwe yiyulo yize Ndawichi ahanyine kuli mwanenyi Solomone yoze te mamusalakana ha wanangana mu Izalele. Yehova kasakwile mukweze Solomone hanga atunge tembele, yize atu te mawayilamo Yehova. (1 Sango 22:5) Solomone te mapwa ni milimo yinji, kashika te mafupa ukwaso wa Yehova mba ayule A-Izalele. Chiyulo chika Ndawichi ahanyine kuli Solomone? Tuwanenu kumbululo.

11. Kulita ni 1 Mianangana 2:2, 3, chiyulo chika Ndawichi ahanyine kuli Solomone, mba yika yalingiwileko muze iye apwile ni kwononokena Yehova? (Tala nawa chizulie.)

¹¹ Yika Ndawichi ambile? (Tanga 1 Mianangana 2:2, 3.) Ndawichi kalwezele mwanenyi ngwenyi, nyi mononokena Yehova, iye te mamuwahisa mashimbu eswe. Ha miaka yinji, Yehova kahanyine yuma yinji yipema kuli Solomone ni kumukwasa mu majila eka ni eka. (1 Sango 29:23-25) Solomone katungile tembele yipema, nawa maliji jenyi kali akusoneka mu yimwe mikanda ya mu Mbimbiliya. Iye nawa kapwile ni lufuma munji mumu lia mana ni upite uze apwile nawo. (1 Mia. 4:34) Alioze, ngwe chizechene Ndawichi ambile, Solomone te mawaha mu yuma yeswe ku mwono wenyi, nyi manunga ni kwononokena Yehova. Chaluyinda, muze Solomene apwile mukulwana, iye yaputuka kuwayila tuzambi eka. Ha mukunda wa chino, Yehova yecha kumuwahisa, chocho Solomone yatokesa mana akuyula atu ni ululi.​—1 Mia. 11:9, 10; 12:4.

12. Yika twalilongesa ha maliji ja Ndawichi?

 ¹² Yika twalilongesa? Twalilongesa ngwetu, kwononoka chakuneha yiwape. (Samu 1:1-3) Kwamba pundu, musono Yehova kechi kutupwisa pichi hanji akwa-lufuma ngwe chize alingile hali Solomone. Alioze nyi twononokena Zambi yetu, iye matwaha mana waze tunafupu hanga tukwate yiyulo yipema. (Yishi. 2:6, 7; Tia. 1:5) Shimbi ja Yehova, mujihasa kutukwasa kukwata yiyulo yalita hakutwala ku mulimo, shikola, mbongo ni yiheho. Kukaula yiyulo ya mana ya Yehova, muchitufunga ni kutukwasa twehuke yuma yize muyitukokela lamba. (Yishi. 2:10, 11) Kulinga chino, muchitukwasa kupwa ni masepa apema ni uwahililo mu usoko wetu.

13. Yika yakwashile Carmen kukwata chiyulo chipema?

¹³ Carmen yoze watwama mu Moçambique, kapwile ni kunyonga ngwenyi, kuya ku shikola yinene te muchimukwasa kupwa ni mwono upema. Yalisonekesa ku shikola yinene yize yakulongesa kufunjeka mazuwo. Iye yamba ngwenyi: “Napwile ni kuzanga chinji yize napwile ni kulilongesa. Alioze kanji-kanji, te chishi kupwa ni mashimbu chipwe tachi ja kulinga yuma yikwo. Napwile ni kuya ku shikola 7:30 ndo 18:00. Chapwile chikalu kuya ku kukunguluka, nawa usepa wami ni Yehova te unakeketela. Ku mbunge yami, nanyingikine ngwami te ngunawayila tuzambi aali.” (Mateu 6:24) Iye yalemba kuli Yehova ni kumulweza yize te yinalingiwa ku mwono wenyi, ni kuhengwola mu mikanda yetu. Carmen yamba nawa ngwenyi: “Hanyima lia ukwaso uze anguhele makulwana ni mama, yingukwata chiyulo cha kwecha kulinga shikola yinene, ni kuputuka kulingila Yehova mashimbu eswe. Kuchishi kukakajana ngwami nakwachile chiyulo chipema; nakuwahilila chinji.”

14. Longeso lika lilemu lize Mose ni Ndawichi atuhichikilile?

¹⁴ Mose ni Ndawichi, kazangile chinji Yehova nawa kanyingikine ulemu wa kumwononokena. Ha maliji jo akasula, ayo yakolweza akwo hanga akaule chilweza cho. Chikwo nawa, Mose ni Ndawichi kasolwele zwalala ngwo, waze akwecha kuwayila Yehova, keshi kutambula yiwape yenyi chipwe kwawahisa. Yiyulo yize o ahanyine yichili ni ulemu unji kuli yetu musono. Ha kupalika cha miaka yinji, umwe kavumbi mukwo washishika wa Yehova, yahanjika nawa ha ulemu wa kununga ni kushishika kuli Zambi. Tuhengwolenu hakehe hakutwala kuli iye.

 “KUKUSHI CHUMA CHIKWO MUCHINGWAHA UWAHILILO”

15. Yuma yika postolo Yoano amwene mu mwono wenyi?

¹⁵ Yoano kapwile kambaji yoze Yesu azangile chinji. (Mateu 10:2; Yoa. 19:26) Iye kendele ni Yesu mu mulimo wenyi wa kwambujola, kamwene yikomokeso yize alingile ni kupwa hamwe nenyi ha mashimbu akalu a mwono wenyi. Iye kamwene muze Yesu amushihile ni muze amuhindwishile. Kamwene nawa kutatuka cha chikungulwila cha Akwa-Kristu ku sekulu yitangu. Iye katwamine mashimbu anji waze amukwashile kumona chize sango jipema ajambujolwele “kuli atu eswe mushi lia lilu.​”—Kolo. 1:23.

16. Aya mikanda yikwo yitatu ya Yoano yatakamishine kunyima, aya yakutakamisa musono?

¹⁶ Muze Yoano te hapwa kashinakaji, iye yapwa ni chiwape cha kusoneka sango ja kukomwesa ja “usolwelo wa Yesu Kristu.” (Uso. 1:1) Iye nawa yasoneka mukanda wa Evanjelu uze uli ni jina lienyi ni mikanda yikwo yitatu. Ha mukanda wenyi wamuchitatu, Yoano yasonekena Ngayu, umwe Mukwa-Kristu washishika yoze iye apwile ni kuzanga ngwe mwanenyi wa ku ufulielo. (3 Yoa. 1) Chinasoloka ngwe Yoano kapwile ni ana anji a ku ufulielo waze apwile ni kuzanga chinji. Yuma yize lunga yono washishika asonekene, yakutakamisa tumbaji eswe a Yesu ndo ha matangwa jetu.

17. Kulita ni 3 Yoano 4, yika yakuneha uwahililo?

¹⁷ Yika Yoano asonekene? (Tanga 3 Yoano 4.) Yoano kasonekene ngwenyi, kwononokena Yehova chakuneha uwahililo unji. Ha mashimbu waze asonekene mukanda wenyi wamuchitatu, atu amwe te kanamwange malongeso a mahuza ni kuneha vunda mu chikungulwila. Alioze, akwo te kananungu ni “kwenda mu umwenemwene.” O yononokena Yehova ni “kwenda kulita ni shimbi jenyi.” (2 Yoa. 4, 6) Malunga wano ashishika, kakapwile wika ni kuvwisa Yoano kuwaha, alioze ni Yehova nawa.​—Yishi. 27:11.

18. Yika twalilongesa ha maliji a Yoano?

¹⁸ Yika twalilongesa? Twalilongesa ngwetu, kushishika chakuneha uwahililo. (1 Yoa. 5:3) Ngwe chilweza, twakuwahilila chinji ha kunyingika ngwetu, tunevwisa Yehova kuwaha. Yehova kakuwahilila chinji muze akumona tunehuka yeseko ya mu chifuchi chino ni kwononokena shimbi jenyi. (Yishi. 23:15) Angelo no kakuwahilila chinji. (Luka 15:10) Ni yetu nawa, twakuwahilila chinji muze twakumona mandumbu jetu manunga ni kushishika, chipi-chipi muze anapalika mu yihungumiona ni mu yeseko. (2 Tesa. 1:4) Muze chifuchi chino cha Satana machinongesa, yetu mutukawahilila ha kunyingika ngwetu, twanungine ni kushishika kuli Yehova ndo kusongo.

19. Yika ndumbu Rachel anambe hakutwala ku kulongesa umwenemwene kuli akwo? (Tala nawa chizulie.)

 ¹⁹ Chuma chimwe chize chakutuvwisa kuwaha, chili kuhanjika ni atu hakutwala kuli Yehova. Ndumbu Rachel yoze watwama mu República Dominicana, kakulivwa ngwenyi, kulongesa atu hakutwala kuli Yehova chili kuyuka chinene. Iye kakwasa atu anji kunyingika Yehova. Yamba ngwenyi: “Chakupwa chikalu kuhanjika hakutwala ku uwahililo uze nakwivwa muze nakumona atu waze nakwashile kunyingika Yehova malumuna yimwe ku mwono wo, ni kuputuka kumujikijila ni mbunge yo yeswe. Uwahililo uno, unahiane kapinda mweswawo hanji tachi jize nasele hanga ngwalongese umwenemwene.”

LILONGESE HA MALIJI AKASULA A TUVUMBI ASHISHIKA

20. Yuma yika twakulinga yalifwa ni ya Mose, Ndawichi ni Yoano?

²⁰ Mose, Ndawichi ni Yoano, katwamine ha mashimbu alisa ni a yetu. Chipwe chocho, tuli ni yuma yinji yalifwa. Ayo te kakuwayila Zambi wamwenemwene Yehova yoze ni yetu twakuwayila. Chizechene ngwe ayo, ni yetu twakulemba kuli Yehova, twakumujikijila ni kufupa usongwelo wenyi. Chikwo nawa, ngwe malunga wano ashishika, ni yetu tuli ni shindakenyo ngwetu, Yehova kakuwahisa waze eswe akumwononokena.

21. Yiwape yika anashimbwila atu waze akukaula yiyulo ya Mose, Ndawichi ni Yoano?

²¹ Pundu lume, tunazange kukaula yiyulo ya malunga wano ashishika ni kwononokena Yehova. Nyi twachilinga, Yehova matukwasa ni kutuwahisa. Mutupwa ni uhashi wa ‘kutwama ni mwono matangwa anji.’ (Shimbi 30:20) Chikwo nawa, mutukevwa chiseke chinji mumu lia kuvwisa kuwaha Tata yetu wa zango, yoze makatuwahisa mu majila waze kutushi kuhasa kunyonga.​—Efwe. 3:20.