1, 2. (a) Mu kapinda muka yilambala anji akupalika musono? (Tala chizulie ha uputukilo.) (b) Yika postolo Paulu anatwiwulula, nawa yihula yika mutushimutwina?

HIKWAPALIKA miaka 30, chize haze Oseya, yoze te kanda achipwa Chela cha Yehova, ahichikile zuwo lienyi mu Gana, ni kuya kutwama mu Europa. ^[1](Tala maliji akusongo.) Iye yamba ngwenyi: “Muze naheteleko yingumona ngwami, atu jako te keshi kungupala. Chikwo nawa, mwapwile chishika chinji, chino chapwile ni kungupinjisa chinji. Muze nakatukile ku utulilo wa ndeke nevwile chishika chinji, chino chapwile chishika chitangu chize nevwile ku mwono wami, chocho yinguputuka kulila.” Chapwile chikalu kuli Oseya kuwana mulimo upema mumu kapwile ni kupinda kuhanjika limi liamo, chino chambachile mwaka umuwika chakuhona kupwa ni mulimo upema. Nawa kapwile ni kwivwa yinyengo yinji, mumu kapwile ukawenyi, asoko jenyi kasalile kusuku.

² Achinyonga chize te muwivwa nyi te uli ha chihela cha Oseya. Kwamba pundu, te muwahilila kukuzumbula kanawa ku  Zuwo lia Wanangana kuze kuli atu waze akukuzanga, chipwe ngwe kali aku munyachi weka hanji chikowa. Yino, ye Mbimbiliya yakwamba ngwo, akwa-Kristu amwenemwene ‘kanda avulama kuzumbula ngeji.’ (A-Hepreu 13:⁠2) Kashika, tushimutwinenu yihula yino: Kuchi Yehova akwivwa hakutwala kuli yilambala? Shina tunafupiwa kwalumuna manyonga jetu hakutwala kuli yilambala? Nawa kuchi mutuhasa kukwasa umwe ndumbu wa ku chifuchi cheka alivwe kanawa mu chikungulwila chetu?

3, 4. Kulita ni Kutuhuka 23:​9, yika Zambi azangile hanga A-Izalele asolole hali yilambala, nawa mumu liaka?

³ Muze Yehova atuhwishile tuvumbi twenyi mu undungo mu Engitu, iye kaahele shimbi jize jaalongesele kusolola zango kuli yilambala waze atuhukile no hamuwika. (Kutuhuka 12:​38, 49; 22:21) Mwono wa yilambla kanji-kanji wakukaliwa chinji, kashika Yehova te akwa-funga ni zango lieswe. Chakutalilaho, ayo te mahasa kuhuhujola kulia chize apwile ni kuhichika kuli akwa-minda.​​—⁠Ulevi 19:​9, 10.

⁴ Shimbu Yehova atume wika A-Izalele kuvumbika yilambala, iye yazanga hanga o ewuluke chize apwile ni kwivwa muze apwile mu Engitu. (Tanga Kutuhuka 23:⁠9.) Chipwe muze A-Izalele te kanda achipwa ndungo mu Engitu, A-Engitu te keshi kwaazanga, mumu o te kalisa ni A-Engitu. (Uputukilo 43:32; 46:34; Kutuhuka 1:​11-14) A-Izalele kapwile ni mwono ukalu mu Engitu. Kashika Yehova azangile hanga o ewuluke chikuma chacho, ha kuzanga yilambala waze apwile mukachi ko.​​—⁠Ulevi 19:​33, 34.

5. Yika muyitukwasa kusolola zango kuli yilambala ngwe chize Yehova akulinga?

⁵ Yehova kalumukine. Kashika nyi yilambala meza mu chikungulwila chetu, kanda tuvulama ngwetu, Yehova nihindu kakusolola zango kuli yilambala. (Shimbi Yamuchiali 10:​17-19; Malakia 3:​5, 6) Ha chino, nyonga kanawa kapinda yoze yilambala mahasa kupwa nenyi. Chakutalilaho, ayo mahasa kupwa ni kapinda wakuhanjika limi liaha, hanji kwachoka-choka kuli akwo. Kashika tulikolwezenu, hanga twaakwase ni kwaasolwela zango.​​—⁠1 Petulu 3:⁠8.

6, 7. Yika yakwashile akwa-Kristu atangu A-Yunda kwehuka katonde?

⁶ Akwa-Kristu aku sekulu yitangu, kalilongesele kwehuka katonde munji yoze wapwile mukachi ka A-Yunda. Ha Pentekoste ya mwaka 33, A-Yunda waze apwile akwa-Kristu mu Yerusaleme, kasolwele yitanga yakuzumbula ngeji ni kuzanga mandumbu jo waze apwile ni kukatuka ku yifuchi yeka ni yeka. (Yilinga 2:​5, 44-47) Chino chasolwele ngwo, A-Yunda akwa-Kristu kanyingikine kanawa ulumbunwiso “wakuzumbula” hanji “kusolola zango” kuli Yilambala.

⁷ Ha mashimbu jacho, yikusoloka umwe kapalia mukachi ko. A-Yunda waze te akuhanjika limi lia Ngregu yaputuka kulinyenyeta, mumu ngwo tuliwa jo kakapwile ni kwasolwele  zango. (Yilinga 6:⁠1) Mba ahwise mulonga wacho, apostolo yasakula malunga shimbiali hanga aye ni kusa shindakenyo ngwo atu eswe kanatambula ukwaso umwika. Apostolo yasakula malunga waze apwile ni majina amu Ngregu, hanji kalingile chino hanga tuliwa jacho apwe ni utakamiso.​​—⁠Yilinga 6:​2-6.

8, 9. (a) Yihula yika muyihasa kutukwasa hanga tunyingike nyi tuli ni katonde ni ka? (b) Yitanga yika twatamba kwehuka? (1 Petulu 1:⁠22)

⁸ Chipwe ngwe chatulumbunuka hanji ka, nihindu yetweswe ha mashimbu amwe twakukaula ndako ja ku munyachi wetu. (A-Roma 12:⁠2) Nawa mutuhasa kwivwa enyembo jetu, atu waze twakukalakala no, hanji waze twakulilongesa no ku shikola mamba yuma yipi hakutwala kuli atu amu yifuchi yikwo, munyachi hanji chikowa. Shina ni yetu twakuhanjika yuma yacho? Kuchi twakwivwa nyi atu mamba yuma yize kuyalitele hakutwala ku chifuchi hanji munyachi wetu?

⁹ Ha amwe mashimbu, postolo Petulu kapwile ni kusolola katonde kuli atu waze te hi A-Yunda ko. Alioze hakehe-hakehe, aye yaputuka kwecha ndako yacho. (Yilinga 10:​28, 34, 35; A-Ngalashia 2:​11-14) Chizechene nawa, ni yetu, nyi mutumona ngwetu, tuli ni katonde hanji zango lia munyachi linatunangamisa, twatamba kulikolweza hanga twehuke ndako yacho. (Tanga 1 Petulu 1:22.) Yika muyitukwasa kuchilinga? Twiwulukenu ngwetu, chipwe ngwe twatwama ku chifuchi cheswacho, nihindu yetweswe tuli akwa-shili, nawa, niumwe wakuli yetu unatela ulamwino wakuhi. (A-Roma 3:​9, 10, 21-24) Kashika kutwatambile kunyonga ngwetu, etu tuli apema kuhiana akwetu! (1 A-Korindu 4:⁠7) Twatamba kwivwa ngwe chize evwile postolo Paulu. Iye yamba kuli mandumbu jenyi akwa-Kristu ngwenyi, “chocho hi nuli yilambala ni njize ko nawa” alioze nuli “akwa zuwo lia Zambi.” (A-Efwesu 2:19) Tulieswe twatamba kusa tachi hanga twehuke katonde mba tuhase kuzala mutu mwaha.​​—⁠A-Kolosu 3:​10, 11.

10, 11. Kuchi Mboaze embulwile nyonga lia Yehova hakutwala kuli yilambala?

¹⁰ Mboaze lunga washishika, kembulwile kunyonga cha Yehova hakutwala kuli yilambala. Kuchi ahashile kuchilinga? Muze Mboaze ayile ni kutala minda yenyi ha shimbu lia kucha mbuto, aye yamona Rute umwe pwo chilambala, wa ku chifuchi cha Moape. Rute te kanahondangana chinji ha kuhuhujola mbuto yize yapwile hashi. Kulita ni Shimbi ya Mose, Rute te mahasa kuhuhujola chakuhona kwita. Alioze muze Mboaze evwile ngwenyi, Rute kechile hanga ahuhujole mu minda yenyi, chino chamukwachile chinji ku mbunge, kashika amwambile hanga ahuhujole mukachi ka machita a mbuto.​​—⁠Tanga Rute 2:​5-7, 15, 16.

¹¹ Yuma yize yalingiwile ha tangwa lize liasulileho, yasolwele ngwo Mboaze kalipikalile chinji hakutwala kuli Rute ni ha mwono ukalu uze apwile nawo ngwe chilambala. Chocho, iye yamusa mu chizavu chenyi cha ana-mapwo hanga achine kumumwesa lamba kuli malunga waze apwile ni kukalakala mu minda yenyi. Nawa kapwile ni kumwaha yakulia yinji ngwe chize apwile ni kuhana kuli akwa-milimo akwo. Mboaze kasolwele vumbi linji kuli yono pwo chilambala ni kumukolweza.​​—⁠Rute 2:​8-10, 13, 14.

12. Kuchi yilambala mahasa kwivwa nyi mutwasolwela zango?

¹² Mboaze kasolwele zango hali Rute, hi wika ko ha mukunda wa ushishiko wenyi kuli naye-weno Noemi, alioze mumu Rute nawa kaputukile kuwayila Yehova ni kufuliela muli Iye ngwenyi mamufunga. Muze Mboaze te akusolola zango kuli Rute, kwamba pundu iye te kakwimbulula zango lingunu lia Yehova. (Rute 2:​12, 20; Yishima 19:17) Chizechene nawa musono, nyi twasolola zango mutuhasa kupwa ni uhashi wakukwasa ‘atu amutapu weswe’ hanga alilongese umwenemwene ni kwaakwasa kunyingika ngwo, Yehova kakwaazanga chinji.​—⁠1 Timoteu 2:​3, 4.

13, 14. (a) Mumu liaka twatamba kumeneka yilambala muze tulino ku Zuwo lia Wanangana? (b) Yika muyikukwasa mba uhase kuhanjika kanawa ni mutu wa ku munyachi weka?

¹³ Mutuhasa kusolola zango kuli yilambala ha kwaameneka ni zango lieswe muze meza ku Zuwo lia Wanangana. Yilambala waze achili aha mu chifuchi mahasa kwivwa woma ni kutwama ukawo. Kulita ni ndako ya munyachi hanji mutapu wa mwono wo, ayo mahasa kwivwa ngwe keshi ulemu kuli atu aku munyachi hanji chifuchi cheka. Kashika twatamba kwaameneka chitangu, ni kwaasolwela zango liamwenemwene. Nyi aplicativo JW Language yili mu limi lienu, muyihasa kukukwasa hanga unyingike chize akumeka mu limi lio.​​—⁠Tanga Fwilipu 2:​3, 4.

¹⁴ Hanji wakwivwa sonyi jakuhanjika ni mutu wa ku munyachi weka. Mba uhwise kapinda wacho, ena muhasa kumulweza yimwe hakutwala ku mwono we. Ha chino, muhasa kunyingika ngwe, kuma nunalivwashana ha yuma yinji yize yena te kuushi kunyingika. Iwuluka ngwe munyachi ni munyachi ukwete ndako jipema ni jipi.

15. Yika muyitukwasa kunyingika kanawa atu waze analikolweza kutwama mu chifuchi cheka?

¹⁵ Mba tutambwise kanawa akwetu mu chikungulwila, twatamba kulihula ngwetu ‘Nyi nguli mu chifuchi cheka kuchi munguzanga hanga akwetu anguzumbule?’ (Mateu 7:12) Solola uhumikizo kuli mandumbu waze analikolweza kwalumuna mwono wo mu chifuchi cheka. Chitangu, muchihasa kupwa chikalu kunyingika kanawa kunyonga hanji kupwa cha atu jacho. Alioze shimbu twaashimbwile hanga anyonge hanji kusolola ndako jetu, mumu liaka kutwatambile ­kutayiza kupwa cho?​—Tanga A-Roma 15:⁠7.

16, 17. (a) Yika mutuhasa kulinga mba tulikate ni mandumbu aku munyachi weka? (b) Ukwaso uka mutuhasa kuhana kuli njize waze ali mu chikungulwila chetu?

¹⁶ Nyi twasa amwe mashimbu hanga tunyingike kanawa chifuchi hanji ndako ja atu jamo, muchihasa kupwa chashi kwaanyingika kanawa. Ha uwayilo wetu wa mu usoko, mutuhasa kuhengwola hakutwala ku ndako ja yilambala waze ali mu chikungulwila chetu, chipwe waze ali mu ngiza yetu. Jila yikwo yakunyingikilamo mandumbu amu yifuchi yeka, yili kwaasanyika ku zuwo lietu hanga tulieno hamuwika. Yehova “hanazulula pito lia ufulielo kuli akwa mavungu.” Kashika twatamba kumwimbulula hakwazulula zuwo lietu kuli yilambala “waze ali usoko wetu wamu ufulielo.”​—⁠Yilinga 14:27; A-Ngalashia 6:10; Yombi 31:⁠32.

¹⁷ Muze mutupalikisa mashimbu ni umwe usoko wa njize hanji yilambala, chino muchitukwasa kwaanyingika ni kwaalemesa ha tachi jize akusa hanga ejilile ni ndako yetu. Ni twalinga chocho, mutwaakwasa hanga alilongese limi lietu. Mutuhasa nawa kwaakwasa hanga awane zuwo lipema hanji mulimo. Ukwaso wa mutapu au, muuhasa kukomwesa chinji mandumbu ni mapangi jetu.​​—⁠Yishima 3:⁠27.

18. Chilweza chika cha vumbi ni usakwililo chize yilambala mahasa kwimbulula musono?

¹⁸ Chochene, yilambala, kakuzanga kulikolweza hanga ejilile ni ndako ja ku chifuchi cheka. Rute kauchikile chilweza chipema ha chikuma chino. Chitangu, kavumbikile ndako ja mu chifuchi chize apwile, hakwita hanga ahuhujole. (Rute 2:⁠7) Aye kakazachishile chipi uhashi uze amwehele ni kunyonga ngwe akwo keshi ulemu. Chamuchiali, hazehene aye yalweza kuli akwo ngwo kanasakwilila chinji ha zango lize amusolwele ha kumwecha hanga ahuhujole. (Rute 2:13) Nyi yilambala masolola yitanga yino yipema, mandumbu ni mapangi jo ni atu amu chihunda chize ali mahasa kwaavumbika chinji.

19. Mumu liaka twatamba kuzumbula yilambala ni zango lieswe?

¹⁹ Twakuwahilila chinji ha chize Yehova akusolola chawana chenyi cha vumbi hali yetu, ni kwecha hanga atu eswe evwe sango lipema. Atu amwe, mu yifuchi yo keshi kuhasa kupwa ni uhashi wakulilongesa Mbimbiliya hanji kuya kukunguluka cha Yela ja Yehova. Alioze, haliapwila ayo kali ni uhashi wakulitakana ni yetu, kashika twatamba kwaakwasa hanga alivwe ngwe keshi nawa yilambala. Hanji kutushi mbongo jinji chipwe uhashi wakwaaha ukwaso wacho, alioze nyi twasolola zango kuli yilambala, chekwamba tunembulula zango lize Yehova ali nalio hali ayo. Tusenu tachi jinji hanga tuzumbule yilambala ni zango lieswe, mumu tuli “akwa kwimbulula Zambi!”​​—⁠A-Efwesu 5:​1, 2.