1-2. Mumu liaka chili chipema kulilongesa hali Samasone?

 YIKA wakunyonga muze wakwivwa jina ngwo Samasone? Kota wakwiwuluka lunga yoze wapwile ni tachi jinji. Chochene lume. Alioze iye kakwachile yiyulo yipi yize yamunehenene lamba. Chipwe chocho, Yehova yalihulikila ha yuma yipema yize alingile, chocho yatuma kusoneka chilweza chenyi mu Mbimbiliya hanga chitukwase musono.

² Yehova kakwashile Samasone kulinga yuma ya kukomwesa ni kukwasa A-Izalele. Ha kupalika cha miaka yinji chize haze Samasone afwile, ni ukwaso wa Yehova, Paulu yasoneka jina lia Samasone mukachi ka majina ja atu waze asolwele ufulielo ukolo. (Hepre. 11:32-34) Chilweza cha Samasone, muchihasa kututakamisa chinji musono. Muze apalikile mu yipikalo, Samasone kanakajikijila pundu muli Yehova. Mutumona chize chilweza chenyi muchihasa kutukolweza musono ni malongeso alemu waze mutuwanaho.

3. Chiteli chika Samasone apwile nacho?

³ Ha mashimbu waze Samasone asemukine, A-Filistea te kakuyula A-Izalele ni kwamwesa lamba linji. (Kuyu. 13:1) Ayo kapwile atu api; kashika A-Izalele te kakumona lamba linji mu chiyulo cho. Yehova yasakula Samasone hanga “apulule A-Izalele ku moko ja A-Filistea.” (Kuyu. 13:5) Chino chapwile chiteli chikalu! Mba Samasone alinge kanawa chiteli chino, iye katambile kujikijila muli Yehova.

4. Kuchi Yehova akwashile Samasone kulitusula kuli A-Filistea? (Akwa Kuyula 15:14-16)

⁴ Mutumona chilweza chinasolola chize Samasone ajikijilile muli Yehova ni ha ukwaso uze te akumwaha. Tangwa limwe,  chizavu cha maswalale a A-Filistea yaya ndo ku Lehi, chihela chacho kota chapwile mu Yunda. Ayo kayileko hanga akwate Samasone. Malunga A-Yunda yaputuka kwivwa woma unji, chocho yazanga kuhana Samasone kuli akwa-kole jo. Akwa-vungu lia Samasone ene yamukasa ni mihipu yaali yaha ni kumuhana kuli A-Filistea. (Kuyu. 15:9-13) Alioze, ‘spiritu ya Yehova yiyiza hali iye ni tachi,’ chocho mihipu yize amukashile yiyikasuluka. Hehaze Samasone ‘awanyine lumbangachi mwaha wa chimbulu,’ ni lumbangachi wacho, iye yashiha malunga kanunu!—Tanga Akwa Kuyula 15:14-16.

5. Kuchi Samasone asolwele ngwenyi kakujikijila muli Yehova ha kuzachisa lumbangachi wa chimbulu?

⁵ Mumu liaka Samasone azachishile lumbangachi wa chimbulu? Chino chapwile chuma chakasula chize te mutu mahasa kuzachisa hanga alikalile. Alioze Samasone kanyingikine ngwenyi, kukumba chenyi te chinatale kuli Yehova; hi ha uta ko uze mazachisa hanga ase jita. Lunga yono washishika, kazachishile yize awanyine hanga amanunune upale wa Yehova. Chochene, Samasone kanakamuwahisa ha mashimbu jacho; yakumba jita ni A-Filistea mumu te kakujikijila muli Yehova!

6. Yika chilweza cha Samasone chinatulongesa ha kujikijila muli Yehova?

⁶ Ni yetu Yehova mahasa kutwaha tachi hanga tulinge mulimo weswawo, chipwe uze muusoloka ngwe ukalu. Yehova mahasa kuchilinga mu mutapu uze muutukomwesa. Kashika, jikijila muli Yehova. Ngwe chizechene ahanyine ndundo kuli Samasone, iye makukwasa kulinga upale wenyi nyi mumujikijila ni kufupa ukwaso Wenyi.—Yishi. 16:3.

7. Hana chilweza chize chinasolola ulemu wa kufupa usongwelo wa Yehova.

⁷ Mandumbu anji a mapwo ni a malunga waze akulinga mulimo wa kutunga mu ululikiso wetu, kakusolola ujikijilo wo muli Yehova. Kunyima, chapwile chashi mandumbu kululieka yuma ni kuputuka kutunga Mazuwo a Wanangana ni mazuwo akwo a mu ululikiso wa Yehova. Alioze ha kupalika cha mashimbu, atu anji kaapapachisa; hachino ululikiso wa Yehova yiufupa kwalumuna yimwe. Mandumbu waze akusongwela milimo yino ya kutunga, kakufupa usongwelo wa Yehova ni kweseka mutapu waha  wa kutunga nawo. Chakutalilaho, ha mashimbu amwe kakulanda mazuwo ni kwatungulula. Robert, ndumbu yoze ha miaka yino wakalakala chinji mu mulimo wa kutunga hashi heswe, yamba ngwenyi: “Ku uputukilo, kuchakapwile chashi kutayiza ngwetu yuma mutuyilinga mu mutapu wacho. Jila yino yalisele chinji ni yize te twakukalakala nayo ha miaka yinji kunyima. Alioze, mandumbu kafupile kwijilila ni mutapu uze waha; chocho yichisoloka zwalala ngwo, Yehova kanawahisa mutapu uno waha wa kutunga nawo mazuwo.” Chino chili chilweza chimuwika chinasolola chize Yehova anakwase atu jenyi kulinga upale wenyi musono. Hita shimbu, muchilita yetu eswe kulihula ngwetu: ‘Shina nakufupa usongwelo wa Yehova ni kusa tachi hanga ngwalumune yuma ku mwono wami ni kumulingila mu mutapu walita?’

8. Yika Samasone alingile muze evwile pwila yinji?

⁸ Yena hanji unanyingika ngwe Samasone kalingile yuma ya kukomwesa. Chakutalilaho, chakuhona chito nichimwe, iye yashiha ndumba, mba kulutwe yashiha malunga A-Filistea 30 mu mbonge ya Asekalone. (Kuyu. 14:5, 6, 19) Samasone kanyingikine ngwenyi, nyi kakapwile ni ukwaso wa Yehova te kechi kuhasa kulinga yuma yacho. Yino yasolokele zwalala muze Samasone evwile pwila yinji hanyima lia kushiha A-Filistea 1,000. Yika iye alingile? Shimbu afupe meya ni kuhwisa kapinda wacho ukawenyi, iye yeta ukwaso wa Yehova.—Kuyu. 15:18.

9. Yika Yehova alingile muze Samasone alembele kuli iye ni kwita ukwaso? (Akwa Kuyula 15:19)

⁹ Yehova kakumbulwile kulemba cha Samasone, chocho kupalikila mu chikomokeso, iye yamutuhwishila shima lia meya. Muze Samasone anwine meya jacho, “yahuzuluka; yevwa tachi.” (Tanga Akwa Kuyula 15:19.) Kota shima liacho, lianungine ha miaka yinji ndo muze profeta Samuele asonekene mukanda wa Akwa Kuyula. Muze A-Izalele apwile ni kutala ku shima liacho, ayo kapwile ni kwiwuluka ngwo, nyi majikijila muli Yehova iye maakwasa mu kapinda mweswawo mapalika.

10. Yika twatamba kulinga mba tuzuke ukwaso wa Yehova? (Tala nawa chizulie.)

¹⁰ Ni yetu tunafupiwa ukwaso wa Yehova, chipwe ngwe tuli ni utotombo weswawo, hanji hitwalinga yuma yeswayo mu ululikiso wa Yehova. Twatamba kupwa akwa-kulikehesa ni kutayiza ngwetu, mutuhasa kulinga yuma yize Yehova akutwita nyi mutujikijila muli iye. Ngwe chizechene Samasone apwile cheka ni tachi muze anwine meya waze Yehova amuhele, ni yetu mutuhasa kufunga tachi jetu ja ku ufulielo, muze mutuzachisa yuma yeswe yize Yehova akutwaha.—Mateu 11:28.

11. Kuchi ndumbu Aleksey asolwele ngwo kakujikijila muli Yehova; mba yika yetu mutuhasa kulilongesa ha chilweza chenyi?

¹¹ Tutalenu chilweza cha Aleksey, umwe wa kuli mandumbu jetu mu Rússia waze anapalika mu yihungumiona yinji. Yika yamukwashile kununga ni tachi chipwe muze apwile ha mashimbu akalu? Iye ni mukwo-pwo kapwile ni katalilo mupema wa ku ufulielo. Mwene yamba ngwenyi: “Yami ngukwete katalilo wami wa longeso lia wika ni wa kutanga Mbimbiliya matangwa eswe. Hita tangwa, yami ni mukwetu-pwo, twakutanga chisoneko cha hita tangwa ni kulemba hamuwika.” Yika twalilongesa ha chilweza cha Aleksey? Twalilongesa ngwetu, shimbu tujikijile hali yetu ene, twatamba kujikijila muli Yehova. Kuchi mutuhasa kuchilinga? Mutuhasa kuchilinga ha kupwa ni katalilo mupema wa longeso lia wika ni wa yuma yikwo ya ku ufulielo, yize muyikolesa ni kutakamisa ufulielo wetu. Nyi twachilinga, Yehova mawahisa tachi jize tunase hanga tumuwayile. Iye katakamishine Samasone; ni yetu matutakamisa.

12. Chiyulo chika chipi chize Samasone akwachile; mba mumu liaka ulo wenyi ni Ndelila walisele ni uze apwile nawa ni mapwo akwo?

¹² Samasone kapwile chihenge ngwe yetu; iye kakwachile yimwe yiyulo yipi. Chiyulo chimwe chinakamunehena lamba linji ku mwono. Hanyima lia kukalakala ngwe mukwa-kuyula ha amwe mashimbu, Samasone ‘yazanga umwe pwo mu chikulo cha Soreke, jina lienyi Ndelila.’ (Kuyu. 16:4) Ha amwe mashimbu, Samasone katendele umwe pwo Ka-Filistea, alioze ‘Yehova mwe wasongwelele Samasone ha chikuma chino.’ Mumu chino te muchimwaha uhashi wa kwasa jita ni A-Filistea. Ha chisuho chikwo, Samasone yaya ku zuwo lia umwe chikoi mu Ngaza, yimwe mbonge ya A-Filistea. Ha chisuho chacho, Yehova yahana tachi kuli Samasone; iye yachiza mapito a chikolo cha mbonge ni kuhichika mbonge yawashi. (Kuyu. 14:1-4; 16:1-3) Alioze yino te yalisa ni ya Ndelila. Chakusoloka ngwe Ndelila kapwile Ka-Izalele, kashika kulimbata nenyi te kuchichi kuhana uhashi kuli Samasone wa kwasa jita ni A-Filistea.

13. Yika Ndelila alingile kuli Samasone?

¹³ A-Filistea yahana mbongo jinji kuli Ndelila hanga onge Samasone. Amu Samasone azangile chinji Ndelila, chocho kakahashile kumona yize te iye anambe kumulinga. Ndelila yalilila Samasone hanga amulweze kuze kwakukatuka tachi jenyi. Mumu lia chino, Samasone yalweza Ndelila yuma yeswe yize azangile. Chaluyinda, Samasone mwene mwe walisele mu kapinda wacho. Uhenge uze alingile, wamutwalile hanga ahone tachi ni utayizo wa Yehova ha amwe mashimbu.—Kuyu. 16:16-20.

14. Lamba lika Samasone amwene mumu lia kujikijila muli Ndelila?

¹⁴ Samasone kafwetele ndando yinji ha kujikijila muli Ndelila; chakuhona kujikijila muli Yehova. A-Filistea yakwata Samasone  yamushiha meso; yamusa mu zuwo lia ususu ku Ngaza. Ha amwe mashimbu kunyima, Samasone kapinjishile atu a mu mbonge yacho. Alioze, haliapwila kanamumwesa lamba ngwe ndungo mukwa-kutwa unga. Chize haze, Samasone yanunga ni kumumwesa lamba ndo muze amutwalile ha chimwe chiwanyino chinene chize alingilile zambi yo Ndagone. Ayo kapwile ni kunyonga ngwo, Ndagone mwe wakwashile mba akwate Samasone. A-Filistea kazangile kulivwisa kuwaha ha chiwanyino chacho. Chocho yaneha Samasone hanga amuhehese ku meso jo.—Kuyu. 16:21-25.

15. Kuchi Samasone asolwele ngwenyi, kaputukile kujikijila cheka muli Yehova? (Akwa Kuyula 16:28-30) (Tala chizulie ha chifukilo.)

¹⁵ Samasone kalingile uhenge unene, chipwe chocho kakalitwaminyine kulingila Yehova. Iye yafupa uhashi hanga alinge yize Yehova azangile, hanji ngwetu ase jita ni A-Filistea. (Tanga Akwa Kuyula 16:28-30.) Samasone yeta kuli Yehova ngwenyi: Ngweche hanga “ngufwetese ha A-Filistea ha meso jami aali.” Yehova yakumbulula yilemba ya Samasone. Mba ha chisuho chino nawa, kupalikila mu chikomokeso; Yehova yamwaha tachi jinji. Hachino, Samasone yashiha A-Filistea anji kuhiana waze ashihile muze te ali ni mwono.

16. Yika twalilongesa ha yitanga ya Samasone hanyima lia kulinga upi?

¹⁶ Tunanyingika ngwetu, Samasone katambile kumona lamba mumu lia uhenge uze alingile, chipwe chocho iye kakechele kulinga upale wa Zambi. Yino muyihasa kulingiwa ni kuli yetu. Nyi mutulinga umwe upi, mba matufumba hanji mututokesa chimwe chiteli; kutwatambile kwecha kulingila Yehova. Twiwulukenu ngwetu, Yehova keshi kutwehuka chamwehukila. (Samu 103:8-10) Chipwe ngwe mutuhengesa, nihindu mutuhasa kupwa ni ulemu kumeso ja Yehova ngwe chize apwile Samasone.

17-18. Yika walilongesa ha chilweza cha ndumbu Michael? (Tala chizulie.)

¹⁷ Tutalenu yize yalingiwile kuli umwe ndumbwetu mukweze, avuluka ngwo Michael. Iye kapwile ni kulihana chinji mu milimo yenyi mu chikungulwila ha kulingila Yehova ngwe kavumbi aku nawa ngwe pionelu wa shimbu lieswe. Alioze chaluyinda, iye yalinga uhenge, chocho yatokesa yiteli yenyi mu chikungulwila. Mwene yamba ngwenyi: “Yuma yeswe yapwile ni kwenda kanawa; nawa te ngunalingi yuma yinji mu mulimo wa Yehova. Alioze susumuku, yingutokesa yiteli yeswe. Yami nanyingikine ngwami, Yehova kechi kungwehuka. Alioze te  nakulihula nyi munguhasa kupwa nawa ni usepa wacho ni Yehova hanji kumulingila chinji mu chikungulwila ngwe chize te nakumulingila.”

¹⁸ Michael kakahongele; kanungine ni kusa tachi. Kulutwe lia mashimbu, yafunyina yiteli yenyi mu chikungulwila. Musono kanakalakala ngwe mukulwana aku nawa ngwe pionelu wa shimbu lieswe. Mwene yamba ngwenyi: “Ngunakalihulikila ha kululieka usepa wami ni Yehova, kusa tachi hanga ngulembe kuli iye ni mbunge yeswe, kulilongesa ni kupukuna. Ukwaso natambwile, chipi-chipi kuli makulwana, wangukwashile kunyingika ngwami, Yehova nihindu machinguzanga. Haliapwila ngunahase kukalakala mu chikungulwila ni mbunge yitoma. Yino yangulongesa ngwo, nyi mutu malikonyeka ni mbunge yeswe, Yehova mamukonekena.” Yika twalilongesa hano? Ni yetu mutuhasa kupwa ni shindakenyo ngwetu, Yehova mahasa kutuzachisa ni kutuwahisa chipwe ngwe mutulinga umwe uhenge. Alioze chino muchilingiwa, nyi mutusa tachi hanga tuhone kufunyina upi uze twalingile ni kununga kujikijila muli iye.—Samu 86:5; Yishi. 28:13.

19. Kuchi unevu hanyima lia kulilongesa ndambu hakutwala ku mwono wa Samasone?

¹⁹ Ha mutwe uno, twalilongesaho yimwe yuma ya kukomwesa yize yalingiwile ku mwono wa Samasone. Iye kakapwile mungunu; chipwe chocho, kakechele kusa tachi hanga alingile Yehova chipwe hanyima lia kulinga shili ni Ndelila. Ni Yehova neye kakamwehukile. Iye kazachishile cheka Samasone mu jila ya kukomwesa. Yehova nihindu machimona Samasone ngwe umwe lunga yoze te ukwete ufulielo ukolo. Kashika anamutongola hakachi ka atu waze asolwele ufulielo ha A-Hepreu kapitulu 11. Cho kuwaha ha kunyingika ngwetu, tunalingila Tata yetu wa zango, yoze wakututakamisa, chipi-chipi muze mutuhonga. Kashika, chizechene ngwe Samasone tukololokenu kuli Yehova ngwetu: “Mwene Yehova, ngwiwuluke kama; ngutakamise kama.”—Kuyu. 16:28.