1. Kuchi Petulu alivwile muze Yesu alingile chikomokeso ha kumukwasa kwoza yishi anji?

 PETULU kalingile ufuku wa muundu ni kuta yishi kakwashile niumwe. Hachino, yakomoka muze Yesu amulwezele ngwenyi: “Senya haze hali hasuku ukonge wanda hanga woze yishi.” (Luka 5:4) Petulu kakatayijile ngwenyi, te makwata yishi; chipwe chocho yalinga yize Yesu amwichile. Hachino, muze akongele wanda mu meya, yiuputuka kuchanuka mumu lia yishi anji waze afwileho. Muze hanyingika ngwenyi, achize chapwile chikomokeso, Petulu ni malunga akwo waze apwileho yakomoka chinji. Mba Petulu yamba ngwenyi: “Mwene kanda ukundama kuli yami, mumu nguli chivulumunyi.” (Luka 5:6-9) Kwamba pundu, Petulu kanyongene ngwenyi te katelele chipwe hakehe kupwa hakamwihi ni Yesu.

2. Mumu liaka chili chipema kulilongesa chilweza cha Petulu?

² Petulu kambile umwenemwene, mumu kapwile lume “chihenge.” Mbimbiliya yakusolola ngwo, ha mashimbu amwe iye kambile ni kulinga yuma yize hanyima yamuvwishile yikola ku mbunge. Shina hiunalivu ngwe chize Petulu alivwile? Shina unazange kwalumuna yimwe ku mwono we hanji kukumba chitanga chipi chize wakupinda nacho ha miaka yinji? Nyi chenacho, kulilongesa chilweza cha Petulu muchikukwasa hanga ununge ni kusa tachi chakuhona kuhonga. Mu mutapu uka? Achinyonga ha chino: Nyi Yehova kazangile, kachi uhenge uze Petulu alingile kakausele mu Mbimbiliya. Alioze katumine kuusa mu Mbimbiliya, mumu kazangile hanga tulilongeseho yimwe. (2 Timo. 3:16, 17) Kulilongesa hali lunga yono wapwile ni ulelu ni manyonga ngwe a yetu, muchitukwasa kunyingika ngwetu, Yehova keshi kushimbwila niumwe hanga apwe mungunu. Yize Yehova anazange yili ngwo, kanda tuhonga; tunungenu ni kusa tachi chipwe ngwe twakuhengesa ha yimwe.

3. Mumu liaka twatamba kununga ni kunyongonona?

 ³ Mumu liaka chili chilemu kununga ni kunyongonona? Atu amwe kakwete chishima cha kwamba ngwo, mutu nyi manunga ni kulinga chimwe chuma; kakuchilinga kanawa. Chakutalilaho, njimba mahasa kupalikisa miaka yinji mba ahase kwimba chimwe chisaji. Ha mashimbu jacho, iye malimbenja ha yisuho yinji. Alioze nyi manunga ni kusa tachi, mahasa kwimba kanawa chisaji chacho. Chipwe ngwe machimba kanawa, nihindu ha mashimbu amwe mapwa ni kuhengesa. Chipwe chocho, kechi kulitwamina; manunga ni kwimba hanga alulieke uhashi wenyi wa kwimba. Chizechene nawa, chipwe ngwe hitunakumbu yimwe ndako yipi, muchihasa kupwa ngwe ha mashimbu amwe mutufunyina ndako yacho; chipwe chocho tunungenu ni kusa tachi hanga tuyehuke. Yetu eswe twakwamba hanji kulinga yuma yize hanyima mutuliseha. Alioze chahiana ulemu, kanda tuhonga. Nyi twachilinga, Yehova matukwasa hanga tununge ni kwalumuna yitanga yetu. (1 Petu. 5:10) Haliapwila, tutalenu chilweza cha kunyongonona cha Petulu. Keke yize Yesu asolwelele Petulu chipwe ngwe kapwile ni kuhengesa, muyihasa kutukwasa tununge ni kulingila Yehova.

4. Kulita ni Luka 5:5-10, yika Petulu te akunyonga hali mwene, mba kuchi Yesu amukwashile kuhwima mbunge?

⁴ Mbimbiliya kuyishi kuhanjika mumu liaka Petulu alimwene ngwe chivulumunyi chipwe ha shili yize iye apwile ni kunyonga. (Tanga Luka 5:5-10.) Alioze, kota kalingile umwe uhenge unene. Yesu kanyingikine ngwenyi, Petulu te kanevu woma, mumu kota te kakulimona ngwe keshi ulemu. Alioze Yesu kanyingikine nawa ngwenyi, Petulu te mahasa kununga ni kushishika. Hachino, ni zango lieswe Yesu yalweza Petulu ngwenyi: “Kanda wivwa woma.” Maliji wano kasolwele ngwo, Yesu te kakujikijila hali Petulu; yino yiyalumuna mwono wenyi. Kulutwe, Petulu ni ndumbwenyi Andeleu, yecha mulimo wa kuta yishi, yaputuka kuya hamwe ni Yesu mu mulimo wa kwambujola. Hachino, Yehova yaawahisa chinji.—Marku 1:16-18.

5. Yiwape yika Petulu azukile ha kukumba woma ni kutayiza kupwa kambaji ka Yesu?

⁵ Petulu kamwene yuma yinji yipema mumu lia kupwa kambaji ka Yesu. Iye kamwene Yesu mauka mweji ni kutuhwisa andemoniu, ha mashimbu amwe ni kuhindwisa afu. b (Mateu 8:14-17; Marku 5:37, 41, 42) Petulu nawa kamwene mu usolwelo chize Yesu te mayula mu Wanangana wa Zambi kulutwe lia matangwa. Usolwelo uno, wakwachile chinji ha mwono wenyi. (Marku 9:1-8; 2 Petu. 1:16-18) Petulu kamwene yuma yize te kechi kuhasa kumona nyi kakapwile kambaji ka Yesu. Chochene, kanakawahilila chinji mumu lia  kukumba ulelu wenyi ni kupwa ni uhashi wa kuzuka yiwape yinji!

6. Shina Petulu kakumbile ulelu wenyi susumuku? Lumbununa.

⁶ Chipwe ngwe kamwene ni kwivwa yuma yipema muze apwile hamwe ni Yesu, nihindu Petulu te kakupinda ni ulelu wenyi. Tutalenu yilweza yimwe. Muze Yesu ambile ngwenyi, te katamba kumona lamba ni kufwa, hanga amanunune uprofeto wa mu Mbimbiliya, Petulu yalweza Yesu ngwenyi yino kuyichi kulingiwa kuli iye. (Marku 8:31-33) Ha yisuho yinji, Petulu ni apostolo akwo te kakuzwela hanga anyingike yoze ukwete ulemu mukachi ko. (Marku 9:33, 34) Ha ufuku uze te mashiha Yesu, Petulu mumu lia kulipupula; yateta twitwi lia umwe lunga. (Yoa. 18:10) Ha ufuku uzewene, Petulu yevwa woma unji; chocho yalituna ha yisuho yitatu ngwo kanyingikine Yesu. (Marku 14:66-72) Yino yiyimutwala kulila chinji.—Mateu 26:75.

7. Hanyima lia kumuhindwisa, uhashi uka Yesu ahanyine kuli Petulu?

⁷ Petulu kevwile yikola yinji ku mbunge ha yize alingile, chipwe chocho Yesu kakamwehukile. Hanyima lia kumuhindwisa, Yesu yahana kuli Petulu uhashi wa kusolola nawa zango lienyi ali iye. Yesu yahana mulimo waha kuli Petulu, wa kupwa kafunga walikehesa yoze mafunga mapanga jenyi. (Yoa. 21:15-17) Petulu kalingile yizeyene Yesu amwichile. Ha tangwa lia Pentekoste, Petulu kapwile mu Yerusaleme; chocho yapwa umwe wa kuli tumbaji atangu waze atambwile spiritu yisandu.

8. Uhenge uka unene Petulu alingile muze apwile ku Andiakia?

⁸ Chipwe muze te hapwa mukwa-Kristu wa kuwayisa, nihindu Petulu te kakupinda ni ulelu wenyi. Ha mwaka 36 M.J, Zambi yatuma Petulu kuli Koneliu yoze te hi Ka-Yunda ko; chocho Koneliu yamuwayisa ni spiritu yisandu. Yino yiyisolola pundu ngwo, “Zambi keshi katonde;” nawa akwa-mavungu hanji ngwetu, atu waze te hi A-Yunda ko no te mahasa kunjila mu chikungulwila cha Akwa-Kristu. (Yili. 10:34, 44, 45) Hanyima lia yino, Petulu yaputuka kulia hamwe ni akwa-mavungu; chuma chize te kanda achilinga kama ku mwono wenyi. (Ngala. 2:12) Alioze, Akwa-Kristu amwe A-Yunda nihindu te machinyonga ngwo, A-Yunda ni akwa-mavungu katambile kulia hamuwika. Muze Akwa-Kristu amwe waze te akunyonga chocho ayile ku Andiakia, Petulu yalitwamina kulia hamwe ni mandumbu akwa-mavungu. Kota kapwile ni kwivwa woma wa kulemeka ku mbunge Akwa-Kristu waze te A-Yunda. Paulu yamona ngwenyi, Petulu te kanasolola ulembekese, chocho yamukwasa hakachi ka atu. (Ngala. 2:13, 14) Chipwe ngwe kalingile upi uno, nihindu Petulu kakechele kusa tachi hanga anunge ni kululieka yitanga yenyi. Mba yika yamukwashile?

9. Kuchi Yoano 6:68, 69 unasolola ngwo Petulu te kashishika?

⁹ Petulu te kashishika; kashika kakechele chuma nichimwe hanji mutu niumwe amukwike kukaula Yesu. Chakutalilaho, tangwa limwe, iye kasolwele ushishiko wenyi muze tumbaji ahonene kunyingika yimwe yize Yesu ambile. (Tanga Yoano 6:68, 69.) Anji waze apwile ni kukaula Yesu, yalitwamina; kakazangile chipwe kwivwa ulumbunwiso wa chikuma chacho. Alioze, Petulu kakalingile chocho. Iye kapwile ni kushishika; kashika ambile ngwenyi Yesu wika mwe uli ni “maliji a mwono wa mutolo.”

10. Kuchi Yesu asolwele ngwenyi kakujikijila hali Petulu? (Tala nawa chizulie.)

¹⁰ Yesu kakehukile Petulu. Ha ufuku wenyi wa kasula hano hashi, Yesu kanyingikine ngwenyi, Petulu ni apostolo akwo te mamuhichika ukawenyi. Chipwe chocho, Yesu yalweza Petulu ngwenyi te kananyingika ngwo, iye manunga ni kushishika. (Luka 22:31, 32) Yesu kanyingikine ngwenyi, ‘spiritu yikwete tachi . . . alioze mujimba ulelu.’ (Marku 14:38) Kashika, iye kakehukile  sepa lienyi Petulu chipwe hanyima lia kulikalaye. Hanyima lia kumuhindwisa, chinasoloka ngwe Yesu kaliwanyine ni Petulu muze te ali ukawenyi. (Marku 16:7; Luka 24:34; 1 Kori. 15:5) Yino kota yinakatakamisa chinji Petulu yoze wapwile ni kunenganyana mumu lia yize alingile!

11. Kuchi Yesu akwashile Petulu kupwa ni shindakenyo ngwenyi Yehova mamufunga?

¹¹ Yesu kalwezele Petulu ngwenyi, Yehova te mamufunga. Hanyima lia kumuhindwisa, Yesu yakwasa nawa Petulu ni apostolo akwo, hanga woze yishi anji kupalikila mu chikomokeso. (Yoa. 21:4-6) Pundu chikomokeso chino, chakwashile Petulu kunyingika ngwenyi, Yehova te mamwaha yuma yeswe ya ku musunya yize mafupiwa. Petulu kota kewulukile maliji a Yesu muze ambile ngwenyi, Yehova manunga ni kukwasa waze ‘mafupa chitangu Wanangana wenyi.’ (Mateu 6:33) Yino yeswe, yakwashile Petulu kusa mulimo wa kwambujola ha chihela chitangu ku mwono wenyi hi mingoso ya yishi ko yize apwile ni kulinga. Iye kasolwele hamu, chocho yambujola sango jipema ha Pentekoste ya mwaka 33 M.J., ha kukwasa atu anji kutayiza umwenemwene. (Yili. 2:14, 37-41) Ha kupalika cha amwe mashimbu, iye yakwasa A-Samaria ni akwa-mavungu hanga apwe tumbaji twa Kristu. (Yili. 8:14-17; 10:44-48) Chochene, Yehova kazachishile Petulu mu jila yalipwila hanga anehe atu a mutapu weswe mu chikungulwila cha Akwa-Kristu.

12. Kuchi chilweza cha Petulu muchihasa kutukwasa nyi tunapinji ni umwe ulelu ha miaka yinji?

¹² Yehova mahasa kutukwasa tunyongonone. Tunanyingika ngwetu, hi chashi ko kutala kulutwe, chipi-chipi nyi tunapinji ni umwe ulelu ha miaka yinji. Ha mashimbu amwe, ulelu wetu muhasa kusoloka ngwe unji kuhiana wa Petulu. Alioze, Yehova matwaha tachi jize tunafupiwa hanga tununge ni kunyongonona. (Samu 94:17-19) Chakutalilaho, tutalenu chilweza cha umwe ndumbu yoze wapwile ni kulinga utumwa ha miaka yinji muze te kanda achililongesa umwenemwene. Iye kalumwine mwono wenyi; yatwama kulita ni yize Mbimbiliya yakulongesa. Chipwe chocho, ha mashimbu amwe kakupinda ni usolo upi. Mba yika yakumukwasa kununga ni kusa tachi? Mwene yamba ngwenyi: “Yehova kakungutakamisa. Ni ukwaso wa spiritu yisandu. . . , nalilongesa ngwami, chili chashi kununga mu umwenemwene. Chipwe ngwe nakupinda ni ulelu wami, nihindu Yehova kakunguzachisa ni kununga ni kungutakamisa.”

13. Kulita ni Yilinga 4:13, 29, 31, kuchi mutuhasa kwimbulula chilweza cha Petulu? (Tala nawa chizulie.)

¹³ Ngwe chize twamona, Petulu kahengesele  ha yisuho yinji mumu lia kuvwila atu woma. Alioze iye te kakulemba ni kwita tachi, chocho yahasa kupwa ni hamu. (Tanga Yilinga 4:13, 29, 31.) Ni yetu mutuhasa kukumba woma uze twakwivwa. Tutalenu yize yalingiwile kuli Horst, umwe ndumbu mukweze yoze te watwama mu Alemanha ha jita yamuchiali ya hashi heswe. Ha mashimbu amwe, mumu lia kumushinjila kuli akwo ku shikola, iye yahana mwoyo uze akwa-mavungu te akuhana ngwo, “Vulie Hitler!” Muze Horst alwezele yuma yacho kuli yisemi jenyi, ayo kakamuzwelesele; alioze yalemba hamwe nenyi ni kwita kuli Yehova hanga amwehe hamu lize te anafupiwa. Ni ukwaso wa yisemi jenyi ni kujikijila muli Yehova, Horst yahasa kupwa ni tachi jize te anafupiwa hanga anunge ni kujikiza. Ha kupalika cha mashimbu, iye yamba ngwenyi: “Yehova kanda achingwehuka kama.” c

14. Kuchi tufunga a zango mahasa kukwasa waze ananenganyana?

¹⁴ Yehova ni Yesu kechi keza katwehuka nilimwe tangwa. Hanyima lia Petulu kulituna Yesu, iye katambile kukwata chimwe chiyulo chilemu. Shina te mecha kupwa kambaji ka Yesu, nyi te manunga ni kunyongonona? Yesu yeta kuli Yehova hanga ufulielo wa Petulu uhone kukeketela. Iye yalweza Petulu hakutwala ku kulemba chacho, ni kusolola pundu ngwenyi, Petulu te matakamisa mandumbu jenyi. (Luka 22:31, 32) Hita shimbu apwile ni kwiwuluka yize Yesu ambile, Petulu kota te kakuwana utakamiso unji. Chizechene nawa, nyi tunambe kukwata chiyulo chilemu ku mwono wetu, Yehova mahasa kutukwasa hanga tununge ni kushishika kuli iye. Iye mahasa kuchilinga kupalikila muli tufunga a zango. (Efwe. 4:8, 11) Ndumbu Paul yoze uli ha ukulwana ha miaka yinji che akulinga. Muze umwe malivwa ngwe kechi kuhasa kununga ni kunyongonona, iye kakumukwasa  anyonge ha chize Yehova amunehene mu umwenemwene. Mba himamwiwulula ngwenyi, zango lingunu lia Yehova, kulichi kumutwala hanga akwehuke. Paul yamba ngwenyi: “Namwene mandumbu anji waze te akunenganyana; yahasa kunyongonona ni ukwaso wa Yehova.”

15. Kuchi chilweza cha Petulu ni cha ndumbu Horst chinasolola ngwo, mutuhasa kufuliela ha yize yili ha Mateu 6:33?

¹⁵ Ngwe chizechene afungile Petulu ni apostolo akwo ha yize te akufupiwa ku musunya, ni yetu Yehova matukwasa nyi mutusa Wanangana wenyi ha chihela chitangu. (Mateu 6:33) Horst yoze hitwatongola, hanyima lia kuhwa cha jita yamuchiali ya hashi weswe, iye yazanga kupwa pionelu. Alioze kapwile chiswale, chocho yamona ngwe kechi kuhasa kununga mu mulimo wacho. Mba yika alingile? Iye yatesa kunyingika nyi chamwenemwene Yehova te mamufunga. Mba ha poso yize apwile ni kwameneka kuli kalayi wa mbonge, iye yambujola ha poso yacho yeswe. Ku songo lia poso, kakomokene chinji muze kalayi wa mbonge amuhele papilo haze avungile mbongo jize amuhele kuli ndumbu yoze kakazangile kulisolola. Ha papilo liacho hapwile mbongo jinji jize te mujimukwasa mu mulimo wa upionelu ha tukweji anji. Chawana chino, chakwashile Horst kupwa ni shindakenyo ngwenyi, Yehova mamufunga. Chocho ku mwono wenyi weswe, yanunga ni kusa Wanangana ha chihela chitangu.—Mala. 3:10.

16. Mumu liaka chili chilemu kulilongesa hali Petulu ni ha yize asonekene mu mikanda yenyi?

¹⁶ Petulu kota kanakawahilila chinji ha chize Yesu kakasosolokele ngwe chize mwene amwichile! Yesu kanungine ni kufumba Petulu hanga apwe postolo washishika ni kupwa chilweza chipema kuli Akwa-Kristu. Ni yetu mutuhasa kulilongesa yikuma yilemu ha fumbo lize Petulu atambwile. Petulu kanakalianyina ni mandumbu jenyi malongeso jacho ha mikanda yaali yize asonekenene yikungulwila ku sekulu yitangu yinalingi chihanda mu Mbimbiliya. Ha mutwe uze muuhataho, mutumona yimwe yikuma mu mikanda yacho ni chize mutuhasa kuyikaula ku mwono wetu.