1. Kuchi Yehova azachishile Petulu muze te hikwasala hakehe hanga afwe?

 POSTOLO Petulu kanyingikine ngwenyi, te hikwasala hakehe hanga afwe. Ha miaka yeswe yize alingile mu mulimo wa Zambi, iye kayile hamwe ni Yesu mu mulimo wa kwambujola, yaputuka kwambujola mu yihela yinji ni kukalakala mu chizavu cha tusongo. Alioze, mulimo wa Petulu te kanda uchihwa. Mu miaka 62-64 M.J., Zambi yamuzachisa hanga asoneke mikanda yaali. Mukanda utangu ni wamuchiali wa Petulu. Petulu te kakushimbwila hanga mikanda yino, yikwase Akwa-Kristu, chipwe hanyima lia kufwa chenyi.—2 Petu. 1:12-15.

2. Mumu liaka mikanda ya Petulu kayisonekene ha shimbu lialita?

² Petulu kasonekene mikanda yenyi yaali, ha mashimbu waze mandumbu apwile ni kusakalala mumu lia yeseko yeka ni yeka. (1 Petu. 1:6) Atu waze apwile ni yitanga yipi, te kakufupa kupihisa lufuma wa chikungulwila ha kulongesa yuma ya mahuza ni kulinga yuma ya luchisa. (2 Petu. 2:1, 2, 14) Te hikwasala hakehe hanga Akwa-Kristu apalike ku “songo lia yuma yeswe,” hanji ngwetu, A-Roma anongese mbonge ya Yerusaleme, hamwe ni yuma yeswe yize te A-Izalele akulinga. (1 Petu. 4:7) Chochene, mikanda ya Petulu yakwashile Akwa-Kristu kumona yize te malinga, hanga apalike ha mashimbu jacho akalu ni kulilulieka ha yipikalo yize te muyiza kulutwe. b

3. Mumu liaka twatamba kuhengwola chinji mikanda ya Petulu?

³ Chipwe ngwe Petulu kasonekenene Akwa-Kristu ku sekulu yitangu, alioze Yehova kazangile hanga mikanda yacho yipwe mu Liji lienyi. Kashika, ni yetu musono mutuhasa kulilongesa  yuma yinji mu mikanda yacho. (Roma 15:4) Twatwama hashi hapi, mukachi ka atu waze keshi kuwayila Yehova, kashika twakupalika mu yipikalo yeka ni yeka. Ha mashimbu amwe, muchihasa kupwa chikalu kulingila Zambi. Kuchizako yino, kwasala hakehe mutupalika mu luyinda munene, kuhiana yoze A-Yunda apalikile kunyima. Kashika, yikuma yize yili mu mikanda yino yaali ya Petulu yili ni ulemu unji kuli yetu musono. Mikanda yino, yakutukwasa tununge ni kushimbwila tangwa lia Yehova; tukumbe woma wa atu ni kulisolwela zango umwe ni mukwo. Yiyulo yino, muyihasa kukwasa nawa makulwana hanga amone chize mafunga mapanga a Yehova.

4. Kulita ni 2 Petulu 3:3, 4, yika muyihasa kuzeyesa ufulielo wetu?

⁴ Twatunga ni atu waze keshi kutayiza uprofeto wa mu Mbimbiliya. Amwe kakutukekuna mumu ngwo, twaputukile kulu kuhanjika hakutwala ku songo lia hano hashi. Akwo kakutwamba yuma yipi ni kutulweza ngwo, songo kulichi keza-keza. (Tanga 2 Petulu 3:3, 4.) Nyi mutwivwa maliji a mutapu au kuli mwenyembo wetu, yoze twakalakala nenyi hanji kuli umwe usoko, ufulielo wetu muhasa kupwa mu cheseko. Petulu kanalumbununa yize muyihasa kutukwasa.

5. Yika muyihasa kutukwasa kushimbwila songo lia hano hashi ni uhumikizo? (2 Petulu 3:8, 9)

⁵ Amwe mahasa kunyonga ngwe Yehova kanashimbula chinji kuneha songo lia hano hashi. Alioze, maliji a Petulu kanatukwase kupwa ni manyonga alita ha kutwiwulula ngwo, mutapu uze Yehova akumwenamo mashimbu, unalise chinji ni chize atu akwamona. (Tanga 2 Petulu 3:8, 9.) Kuli Yehova, miaka kanunu yapwa ngwe tangwa limuwika. Yehova kapwa chihomboloji, kazangile mutu niumwe atoke. Kashika muze shimbu lienyi muliheta, iye makahwisa upi weswe hano hashi. Yetu tuli ni uhashi unene wa kuzachisa mashimbu waze asalako hanga twambujole sango jipema kuli atu a ku mavungu eswe.

6. Yika twatamba kulinga mba tufunge tangwa lia Yehova mu ‘manyonga jetu’? (2 Petulu 3:11, 12)

⁶ Petulu kanatukolweza hanga tufunge tangwa lia Yehova mu ‘manyonga jetu.’ (Tanga 2 Petulu 3:11, 12.) Kuchi mutuhasa kuchilinga? Mutuchilinga ha kupukuna mashimbu eswe ha yiwape yize mutukazuka kulutwe. Shina hiunalinyongo kama uli mu chimwe chihela muze munapalika fuji yipema, unali kulia chipema ni kutambwisa asoko je waze anahinduka ku ufwe? Nyi hanji hiunanyongo unalongesa atu waze atwamine ha miaka yinji kunyima chize uprofeto wa mu Mbimbiliya wamanunukine? Kupukuna ha yikuma yino, muchikukwasa kushimbwila tangwa lia Yehova ni kupwa ni shindakenyo ngwe songo linakundama. Kulianga kunyingika yize muyikalingiwa kuli yetu kulutwe lia matangwa, muchitukwasa hanga ahone kutupiangula ku saki ja hano hashi.—2 Petu. 3:17.

7. Kuvwila atu woma, yika muchihasa kutulinga?

⁷ Tunanyingika ngwetu, tangwa lia Yehova linakundama. Kashika, tunafupiwa kusa tachi hanga twambujole sango jipema kuli atu eswe. Alioze ha mashimbu amwe, mutuhasa kuhona hamu lia kuhanjika. Mumu liaka? Mumu mutuhasa kuvwila atu woma, ngwe chize chalingiwile kuli Petulu. Ha ufuku uze akwachile Yesu, Petulu kevwile woma wa kulisolola ngwo, kali kambaji kenyi. Ha yisuho yinji, yalituna ngwo te kanyingikine Yesu. (Mateu 26:69-75) Alioze Petulu kakumbile woma, mba ha kupalika cha mashimbu, yasoneka ngwenyi: “Kanda nuvwila woma yize ayo akuvwila woma, chipwe kulipikala.” (1 Petu. 3:14) Maliji wano a  Petulu, kanatwehe shindakenyo ngwo ni yetu mutuhasa kukumba woma wa atu.

8. Yika muyihasa kutukwasa mba tukumbe woma wa atu? (1 Petulu 3:15)

⁸ Yika muyitukwasa kukumba woma wa atu? Petulu yamba ngwenyi: “Lemesenu Kristu ngwe Mwene mu mbunge jenu.” (Tanga 1 Petulu 3:15.) Yino yinachingi kupukuna ha chiteli ni ndundo ja Mwanangana wetu, Yesu. Muze kwakusoloka uhashi wa kwambujola sango jipema, shina wakwivwa sonyi hanji woma? Nyi hanji che wakwivwa, iwuluka Mwanangana wetu mashimbu eswe, kanayulu mu malilu; kali mukachi ka angelo anji. Iwuluka ngwe iye ‘kali ni wata mu malilu ni hashi.’ Iye nawa kalakenyene ngwenyi: “Nguli hamuwika ni yenu matangwa eswe, ndo ku songo lia miaka yino.” (Mateu 28:18-20) Petulu kanatukolweza hanga tupwe a “kulilulieka kulu” ha kukalila ufulielo wetu. Shina muhasa kwambujola kuli umwe ku mulimo, ku shikola hanji ku chihela cheswacho? Nyonga ha mashimbu waze muhasa kuchilinga ni kululieka yize muhanjika. Lemba hanga upwe ni hamu; nawa pwako ni shindakenyo ngwe Yehova makukwasa ukumbe woma wa atu.—Yili. 4:29.

9. Kuchi Petulu echele kusolola zango ha shimbu limwe? (Tala nawa chizulie.)

⁹ Petulu kalilongesele chize masolola zango. Iye kapwile hamwe ni Yesu muze ambile ngwenyi:  “Ngunanwehe shimbi yaha ngwami, lizangenu umwe ni mukwo, ngwe chizechene yami hingunanuzange, ni yenu nawa lizangenu umwe ni mukwo.” (Yoa. 13:34) Chipwe chocho, ha kupalika cha mashimbu, Petulu yevwila atu woma, chocho yalitwamina kulia hamwe ni mandumbu waze te hi A-Yunda ko. Postolo Paulu yamba ngwenyi, yitanga yino ya Petulu ‘yapwile ya ulembekese.’ (Ngala. 2:11-14) Petulu katayijile fumbo liacho ni kulilongesa yimwe. Ha mikanda yaali yize asonekene, iye yashindakenya ngwenyi, kutwatambile wika kusolola zango lia mu kanwa kuli mandumbu jetu, alioze twatamba kulisolola nawa mu yitanga.

10. Yika muyihasa kutukwasa kusolola “zango lia undumbu” chakuhona ulembekese? Lumbununa. (1 Petulu 1:22)

¹⁰ Petulu kambile ngwenyi, twatamba “kupwa ni zango lia undumbu lize kulishi ulembekese” hali mandumbu jetu. (Tanga 1 Petulu 1:22.) Mba tupwe ni zango lino lia undumbu, twatamba “kwononokena umwenemwene.” Umwenemwene uno, unachingi chikuma cha kwamba ngwo, “Zambi keshi katonde.” (Yili. 10:34, 35.) Nyi mutuzanga mandumbu amwe mu chikungulwila, akwo ka, acho kutushi kwononokena shimbi ya Yesu. Mutuhasa kulikata chinji ni mandumbu amwe kuhiana akwo ngwe chize Yesu alingile hali apostolo jenyi. (Yoa. 13:23; 20:2) Alioze, Petulu kanatwiwulula ngwenyi, twatamba kusa tachi hanga tupwe ni “zango lia undumbu”—zango likolo linahiane lize tukwete hali asoko waze twasemuka no. Zango liacho, twatamba kulisolola hali mandumbu eswe; a mapwo ni a malunga.—1 Petu. 2:17.

11. Kulizanga umwe ni mukwo ni “mbunge yeswe” yika chinachingi?

¹¹ Petulu kasolwele ngwenyi, chili chilemu ‘kulizanga chinji umwe ni mukwo ni mbunge yeswe.’ Ha chisoneko chino, liji kuzanga “chinji” linalumbunuka kuzanga umwe mutu chipwe ngwe chili chikalu kumusolwela zango. Chakutalilaho, yika mutulinga nyi umwe ndumbu matwamba amwe maliji api hanji matulinga chuma chipi? Chuma chitangu mutulinga hanji chili kufunyisa upi ha upi shimbu tumusolwele zango. Alioze, Petulu kalilongesele kuli Yesu ngwenyi, yitanga ya mutapu au kuyishi kuvwisa Yehova kuwaha. (Yoa. 18:10, 11) Yasoneka ngwenyi: “Kanda nufwetesa upi ha upi, chipwe matuka ni matuka, alioze, shimbu nulinge chino, etelenu chiwape.” (1 Petu. 3:9) Nyi twazanga chinji mandumbu jetu, mutusolola umbovu kuli eswe ni kufupa kunyingika kanawa ndumbu chipwe muze makulemeka ku mbunge.

12. (a) Kulizanga chinji umwe ni mukwo muchitukwasa kulinga yika? (b) Yika watamba kulinga, kulita ni chinema Sako Tachi Hanga Ufunge Kulinunga Chetu?

¹² Ha mukanda wenyi utangu, Petulu yazachisa liji “lizangenu chinji.” Zango lia mutapu au, liakutukwasa kukonekena hi wika ko shili yikehe, alioze chipwe “shili yinji.” (1 Petu. 4:8) Hanji Petulu kewulukile yize alilongesele kuli Yesu ha yimwe miaka kunyima hakutwala ku kukonekena. Ha mashimbu jacho, Petulu kamwene ngwe te kanasolola umbovu muze ambile ngwenyi, ngwo, ndumbu te mahasa ‘kukonekena mukwo ha yisuho shimbiali.’ Alioze, Yesu yalongesa Petulu ni yetu eswe ha kukonekena akwetu “ndo yisuho 77,” hanji ngwetu, mutuhasa kuchilinga ha shimbu lieswalio mutupwa ni uhashi. (Mateu 18:21, 22) Nyi chakukukalila kukaula shimbi yino, kanda uhonga. Yetu eswe ha mashimbu amwe, chakutukalila kukonekena akwetu! Chuma chilemu watamba kulinga chili, kununga ni kusa tachi hanga ukonekene ndumbwe ni kuneha sambukila. c

13. Yika muyihasa kukwika makulwana kuwana mashimbu a kumeneka mandumbu ni kwatakamisa?

¹³ Kwamba pundu, Petulu kakavulamine yize Yesu amwambile muze ahindukile ku ufwe, ngwenyi: “Funga ana-mapanga jami.” (Yoa. 21:16) Nyi uli mukulwana mu chikungulwila, unanyingika ngwe maliji wano kanatale ni hali yena. Tunanyingika ngwetu, muchihasa kupwa chikalu kuli mukulwana kuwana mashimbu a kulinga mulimo uno ulemu. Makulwana katamba chitangu kufunga asoko jo ha yize anafupiwa ku musunya, ku manyonga ni ku ufulielo. Chikwo nawa, katamba kupwa chilweza chipema mu mulimo wa kwambujola, ha kululieka pande jo mu chikungulwila, ku kukunguluka cha mbonge ni cha mambonge. Akwo kali ni chiteli chikwo cha kukalakala mu Komite ya Akwa-kutala Yuma ya Shipitali, hanji ku mulimo wa kutunga mazuwo mu ululikiso wetu. Chochene, makulwana kakwete milimo yinji!

14. Yika muyihasa kukwasa makulwana mba afunge kanawa mapanga ja Zambi? (1 Petulu 5:1-4)

¹⁴ Petulu kalwezele makulwana ngwenyi: “Fungenu mapanga ja Zambi.” (Tanga 1 Petulu 5:1-4.) Nyi uli mukulwana, tunanyingika ngwetu wakuzanga mandumbu ni kuzanga kwafunga. Alioze ha mashimbu amwe, muhasa kupwa ni milimo yinji hanji kuhonga, chocho muhona kulinga kanawa mulimo we. Nyi yino muyilingiwa kuli yena, yika muhasa kulinga? Lweza Yehova chize unevu. Petulu kasonekene ngwenyi: “Nyi mutu kanalingila akwo, achilinge ni kujikijila ha tachi jize Zambi a kuhana.” (1 Petu. 4:11) Mandumbu anji kanapalika mu yipikalo yimwe yize hanji kuyichi kuhwa yeswe ha miaka yino tuli. Alioze, iwuluka ngwe “kafunga munene,” Yesu Kristu, mahasa kwakwasa kuhiana yena. Iye mahasa kuchilinga musono ni mu chifuchi chaha. Yize Yehova anete kuli makulwana hanga alinge, yili wika kuzanga mandumbu jo; kwameneka ni kwatakamisa ni kupwa “chilweza chipema kuli mapanga.”

15. Kuchi umwe mukulwana akumeneka mapanga? (Tala nawa chizulie.)

¹⁵ William, umwe ndumbu yoze hakalakala chinji ha ukulwana, kananyingika ulemu wa kumeneka mandumbu ni kwatakamisa. Muze musongo wa COVID-19 waputukile, iye ni makulwana akwo, kasele tachi ja kuhanjika ni hita ndumbu wa mu chizavu cho. Iye kanalumbununa yize yaatwalile kuchilinga, hakwamba ngwenyi: “Mandumbu anji kapwile ukawo ku mazuwo, chino te chinaatwale kupwa ni manyonga  api.” Muze umwe ndumbu anapalika mu kapinda, William kakumupanjika kanawa hanga anyingike chize anevu ni yize anafupiwa. Mba hi mafupa yimwe mikanda hanji yinema mu site yize muyitakamisa ndumbwetu. Iye yamba ngwenyi: “Wano kali mashimbu a kumeneka mandumbu ni kwatakamisa kuhiana kunyima. Yetu twakusa tachi jinji hanga tukwase atu waze kanyingikine Yehova, kashika twatamba nawa kusa tachi hanga tukwase mandumbu jetu anunge ni kwenda mu umwenemwene.”

16. Kuchi mutuhasa kukaula malongeso waze twawana ha mikanda ya Petulu?

¹⁶ Ndo hano, twamona wika yikuma yimwe yize mutuhasa kulilongesa ha mikanda yaali asonekene Petulu. Hanji wamona chitanga chimwe chize unafupiwa kululieka. Chakutalilaho, shina muzanga kupukuna chinji ha yiwape yize mutukapwa nayo mu chifuchi chaha? Muhasa kutesa kupwa ni kwambujola ku shikola, ku mulimo hanji ku chihela cheswacho? Shina muhasa kuwana majila akwo waze muzangilamo chinji mandumbu je a malunga ni a mapwo? Mba yenu makulwana, shina nwatesa kufunga kanawa mapanga ambala a Yehova ni mbunge yeswe? Muze mulihengwola hanji munyingika ngwe unafupiwa kwalumuna yimwe, chipwe chocho kanda uhonga. “Mwene kali mupema” iye makukwasa kwalumuna yeswayo mufupa. (1 Petu. 2:3) Petulu kanatwehe shindakenyo yino ngwenyi: ‘Zambi mwene . . . mahwisa kunulongesa, manujamisa, manwaha tachi ni kunukwasa hanga numane nguu.’—1 Petu. 5:10.

17. Yika mutuzuka nyi mutununga ni kunyongonona ni kwecha Yehova hanga atulongese?

¹⁷ Ku uputukilo, Petulu kamwene ngwe te kechi kuhasa kupwa hamwe ni Yesu. (Luka 5:8) Alioze ni ukwasa wa zango wa Yehova ni Yesu, Petulu yanyongonona; yanunga ni kupwa kambaji ka Yesu. Kulinga chino, chakwashile Petulu kunjila mu “Wanangana wa mutolo wa Mwene wetu kanda chilamwina chetu Yesu Kristu.” (2 Petu. 1:11) Chino chapwile kuyuka chinene! Nyi munyongonona ngwe chize alingile Petulu, ni kwecha Yehova hanga akulongese ni yena mukatambula chiwape cha mwono wa mutolo. Nyi wachilinga, muzuka ‘fweto ya ufulielo we, we ulamwino we.’—1 Petu. 1:9.